MËTSIKA watakunapam entero Patsachö nunakuna, Täpakoq revistapa yanapakïninwan, Bibliapa yachatsikïninkunata alleq entiendiyashqa. Pero 2011 wata, julio killachömi, yachakunapaq kaq Täpakoq yarqamurqan más fäcil-lla entiendina kaq inglés idïomachö, y imanö yanapakunqanta rikäyänampaqmi juk watallapa yarqamunan karqan.

Pero juk kushikïpaq willakïmi kan: kë revista yarqamur sïguinampaqmi decidiyarqö, y tiempowannam español, francés y portugués idiömakunachöpis yarqamunqa.

Más fácil-lla entiendina kaq revistata chaskirirmi, Pacífico del sur nishqanchö yanapakïkaq Testïgokuna këta niyarqan: “Kananqa más fäcil-llanam wawqikuna y panikuna entiendiriyan Täpakoq yachatsikunqanta”. Juk cartanam këta nin: “Sasa o aja palabrakunata entiendiyänäpaq diccionariokunachö ashiyänäpa rantinmi o trukanmi, tsë tiempota utilizäyä Bibliapa textokuna imanö yanapakunqanta y imata yachatsikunqanta shumaq entiendiyänäpaq”.

Estados Unïdoschömi, universidadninta ushashqa pani këta willakun: “18 watakunapam mana reqishqa sasa o aja palabrakunata parlar y qellqar karqö. Pensënïqa y parlakïnïqa mana entiendipaqmi karqan. Tsënö parlakïnïta cambianä precisanqantam cuentata qokurqä”. Kananqa Diospita alli yachatsikoqnam, y kënömi nin: “Fäcil-lla entiendina kaq Täpakoqmi alläpa yanapamashqa. Utilizanqan palabrakunaqa rikätsikun imatapis  parlanqantsik hora fäcil-lla entiendina kaq palabrakunata utilizänapaqmi”.

Inglaterra nacionpita 1972 watachö bautizakushqa panim këta nirqan: “Fäcil-lla entiendina kaq punta yarqamoq Täpakoq revistata leikarmi, sientirirqä imëka juk kuyakoq teyta kuyë wamrata waqurkur o makallarkur juk cuentota leipaqnö kikin Jehová leipëkämanqanta”.

40 watakunana bautizakushqa, Estados Unidos betelchö yanapakoq juk panim, wakin wakin yachatsikïtaqa más fäcil-lla entiendina kaq Täpakoqwanraq entiendinqanta nirqan. Këllata rikärishun, 2011 wata 15 de septiembre revistapa juk recuadronmi entienditsikurqan, Hebreus 12:1 (NM) textochö “pukutënö testïgokuna” ninqanqa, mana yupëtapis puëdipaq mëtsikaq Testïgokuna kayanqanta. Kë panim kënö nin: “Tsë versículo ninqantaqa más clärom entiendirirqö”. Y congregacionchö yachakuyanqampitam kënö nin: “Más fäcil-lla entiendina kaq Täpakoqpita juk wamra leïllapa comentaptimpis, juk kaq revistata katseqkunapis pasëpam kushikuyan wamra comentanqampita”.

Y juk betelita paninam kënö nin: “Reunionkunachö wamrakuna comentayämunqanta wiyëqa alläpam kushitsiman. Tsë yarqamoq mushoq revistan yanapakushqa mana mantsakurnin comentayämunampaq. Comentayämunqanqa alläpam yanapaman”.

1984 watachö bautizakushqa juk panim kushishqa këta nirqan: “Imëka noqaman pensëkur qellqakämushqanömi. Leinqätapis  pasëpam entiendï y tsëmi Täpakoqpita Yachakunapaq höraqa mana mantsapakurnin comentä”.

Qanchis watayoq wamrapa mamäninmi këta nirqan: “Täpakoqpita yachakunapaq reunionpaq preparakurnin sasa o aja palabrakunata wamräta entienditsinäpaqqa, alläpa atska tiempotam y kallpatam necesitaq kä”. ¿Imanötaq mushoq kaq revista yanapashqa? Këtam nirqan: “Pärrafokunata wamrä leirnin alleq entiendinqanta rikëqa alläpa kushikïpaqmi. Utilizanqan palabrakuna entiendipaq kaptin y pärrafokunapa oracionninkuna wallka wallkalla kaptinmi, más kushishqa wamrä sientikun. Jinamampis, kikinllam comentanampaq kaqta alistan, y reunionchö revistapita yachatsikayämunqan höraqa mäkoqlla o mayaqllam këkan”.

Isqun watayoq, warmi wamrampaq parlarmi, juk pani kënö nin: “Respuestakunata tarinampaqqa, manam precisantsu pipis yanapananraq. Mananam yachatsikïninkunata entienditsir alläpa tiempoqa kayänatsu. Yachatsikïkuna pëpaqnölla kaptinmi, Täpakoqpita Yachakunapaq höraqa alläpa kushishqa sientikun”.

Atskaq wamrakunam pëkunapaqnölla rurakashqa kanqanta niyan. 12 watayoq Rebecca jutiyoq wamram kushishqa kënö nin: “¡Tsë revistakunata ruramïta ama dejëkuyëtsu! Palabrakuna ima ninan kanqanta rikätsikoq recuadrom gustaman. Wamra kaqkuna entiendiyänäpaqqa fácil-llam”.

Qanchis watayoqllaraq, Nicolette jutiyoq wamram, Rebëccanö këta nirqan: “Noqapaqqa sasa o ajam karqan Täpakoq revista. Pero kananqa, kikïllam comentëta puëdï”. Jina isqun watayoq Emma jutiyoq wamrapis kënömi qellqarqan: “Alli entiendiyänäpaqmi, noqata y joqta watayoq turïta yanapayämashqa. ¡Gracias!”.

Rikanqantsiknöpis, palabrakuna fácil entiendinalla kaptin y pärrafokunachö oracionkuna ichik ichiklla kaptinmi tsë revistawan allipa yachakïkäyan. Awmi, kë revistaqa alläpam precisan, tsëmi 1879 watapita patsë yarqamoq revistawan junto yarqamur sïguinqa.