1. ¿Imanötaq wakin nunakuna juk nacionpita nunakunata rikäyan, y imanirtaq pantashqa këkäyan?

PASAQ yachatsikïchö rikanqantsiknöpis, juk nacionpita nunakunatam wakinkunaqa mana allipa rikäyan y tratayan. Pero juk nación nunakunapita kikinkuna más alli kayanqanta creeq nunakunaqa, manam mana respetakoq kayanqanllatatsu rikätsikuyan, sinöqa upa këninkunatawanmi. Juk librom kënö nin: “Patsachö tukïläya nunakunaqa, Biblia ninqannömi tsë kastalla kayan” (The Races of Mankind). Tsë teytalla y mamalla kaqkunapis manam igualtsu kayanman, pero tsënö kaptimpis, wawqillam o nanallam këkäyan.

2, 3. ¿Imanötaq Jehová rikan, markankunata dejarir juk markakunachö täraq nunakunata?

² Rasumpëpaqa, më nacionchöpis juk nacionpita nunakunaqa imëpis këkäyanllam. Tsënömi karqan Jehoväpa Leyninta wiyakur shumaq kawakoq unë Israel markachöpis. Tsë Leyqa wakin wakinchöqa juk nacionpita nunakuna munëninkunata rurakuyänanta michaqmi, pero tsënö kaptimpis israelïtakunataqa obligaq tsë nunakunata shumaq y respëtowan tratayänampaqmi. Tsënöllam rasumpëpa cristiänokunapis llapan nunakunata igual-llapa tratantsik. “Allim noqa cäyicurerqö llapan nunatapis Dios iwallla ricamanqantsicta. Porqui jinantin marcacho pipis allicunata rurar y Diosta respetar cacuyaptenqa, pëqa chasquinmi” nir Pedru ninqantam alleq entiendintsik (Hech. 10:34, 35).

³ Juk nacionkunapita nunakuna israelïtakunawan junto kawar yanapakïkunata chaskiyanqanmi rikätsimantsik, markanta dejarir juk markakunachö täraq o tiyaq nunakunata Jehová imanö rikanqanta. Tiempowannam, apóstol Pablu kënö nirqan: “Diosqa manam israel nunacunapa Diosninllatsu; sinoqa jinantin nasioncho llapan nunacunapapis Diosninmi” (Rom. 3:29; Joel 2:32).

4. ¿Imanirtaq nishwan “Diospa rasonpa israel” markanchöqa më tsë nacionpita karpis igual-lla kayanqanta?

 ⁴ Mushoq conträtota ruranqanwanmi Jehoväqa markan Israelta despreciarqan, y rantinnam o trukannam ciëlopaq ëwaqpaq kaq cristiänokunawan juk conträtota rurarqan, y pëkunam reqishqa kayarqan “Diospa rasonpa israel” markan nishpa (Gal. 6:16). Pablum entienditsikurqan kë mushoq markachöqa, “griegu nuna o israel nuna carpis, señalacushqa o mana señalacushqa carpis, chunchulla carpis, sirwipacoq o mana sirwipacoq carpis, Jesucristurecur Diospaqqa iwallla” kayanqanta (Col. 3:11). Tsëmi nishwan, ciëlopaq ëwaqpaq kaqkunachöqa, më tsë nacionpita karpis, igual-lla kayanqanta.

5, 6. a) Isaías 61:5,6 texto ninqampita, ¿ima tapukïtaq kan? b) ¿Pikunataq kayan “Jehoväpa sacerdötenkuna” y ‘juk nacionpita nunakuna’? c) ¿Ima rurëkunachötaq kë ishkan grupo yanapanakuyan?

⁵ Kanan yachakurishun, Isaías libropa 61 kaq capítulo ninqan Diospa markanchö imanö cumplikanqanta. ¿Imanirtaq 5 y 6 kaq versïculokunaqa rikätsikun “juk nacionpita” nunakuna ‘Jehoväpa sacerdötenkunata’ yanapayänampaq kaqta?

⁶ Tsë sacerdötekunaqa, ‘punta caq cawarimicho cawarimoq’ ciëlopaq akrashqa cristiänokunam kayan. Pëkunam “saserdoticuna cuentana Diosta y Jesucristuta sirwiyanqa, y waranqa watam Jesucristuwan juntu mandacuyanqa” (Apoc. 20:6). Tsënö kaptimpis, mëtsikaq cristiänokunam kë Patsachö imëkamayaqpis kawakïta shuyaräyan. Këkunaqa kayan “juk nacionpita” nunakunam, y pëkunaqa ciëlopaq akrashqa kaqkunatam tukï rurëninkunachö alläpa yanapayan. ‘Jehoväpa sacerdötenkunatam’ alläpa kushishqa yanapayan ‘uvas chakrankunachö trabajaq’ cuenta. Imëka alli cosëchata jorqar yanapakoq cuentam nunakunata yanapayan Diospa sirweqnin këman chäyänampaq, y tsëqa Diostam alaban. Tsënömi, ciëlopaq kaqkuna y “juk kaq üshakunapis”, imëkamayaqpis Diosta sirwita munaq alli shonquyoq nunakunata ashiyan y alli mitsikoq cuenta kuyëllapa yanapayan (Juan 10:16).

7. Kanan witsan cristiänokuna, ¿imachötaq igualantsik, Abrahannöpis unë witsan Diosta sirweq nunakunawan?

⁷ Qepa kaq yachatsikïchö yachakunqantsiknöpis, rasumpa kaq cristiänokunaqa, Satanaspa mundonchöqa imëka forastëronöllam o qorpanöllam këkantsik. Noqantsiknö ‘forasterulla’ kayanqantam, Abrahannöpis, unë witsan Diosta sirweq wakin  nunakunapis rikätsikuyarqan (Heb. 11:13). Ciëlochö o Patsachö kawëta shuyararpis, llapantsikmi Abrahannö kaqpis Diospa amïgon këta puëdintsik. Santiägum kënö nir entiendetsikurqan: “‘Dios Yayaman Abraham creyiconqanrecurmi, pe chasquerqan alli nunatano.’ Y Abrahampaqmi Dios Yaya nerqan: ‘Abrahamqa noqapa amigümi’ nir” (Sant. 2:23).

8. ¿Imatataq Dios awnikurqan, y imamantaq Abrahan markäkurqan?

⁸ Diosmi awnikurqan, Abrahanrëkur y mirëninkunarëkur Patsachö llapan nunakuna bendecishqa kayänampaq kaqta, awmi, tsëqa manam juk nacionllapaqtsu karqan (lei Génesis 22:15-18 *). Diosnintsik tsëta awnikunqan cumplikänampaq mëtsika watakunaraq pishikaptimpis, Abrahanqa shonqupita patsëmi markäkurqan o yärakurqan cumplikänampaq kaqman. Casi llapan kawëninchömi juk lädoman juk lädoman ëwar familianwan forastëronölla kawayarqan, y Jehoväwan alli kënintaqa manam oqrarqantsu.

9, 10. a) ¿Imatataq Abrahanpita yachakuntsik? b) ¿Ima invitaciontataq nunakunata musyatsishwan?

⁹ Dios awnikunqanta ëka tiempopa shuyaränampaq kaqta mana musyëkarpis, Abrahanqa manam permitirqantsu Diosta kuyanqan y pëllapaq kanqan ushakänanta. Dios awnikunqanllamanmi imëpis yarpararqan, tsëmi juk markachö wayin rurëkur imëkamayaqpis quedakïta munarqantsu (Heb. 11:14, 15). ¿Imatataq Abrahanpita yachakuntsik? Kapamanqantsikllawan kawakïtam, y kapoqyoq këman, reqishqa këman y profecionyoq këman mana yarparäkïta. Kë mundo ushakänampaq ichikllana pishikaptinqa, ¿imapaqraq kanan witsanchö “alli kawakïta” ashishwan? ¿Yanapamashwantsuraq ushakaqlla cösaskunata kuyanqantsikqa? Abrahannömi noqantsikpis más alli kaqta shuyarëkantsik, y tsëta chaskinqantsikyaq pacienciawan shuyaränapaqmi listo këkantsik (lei Romanos 8:25).

¹⁰ Abrahanpa mirënin apamunqan bendicionkunata chaskiyänampaqmi, Jehoväqa tukï nacionpita nunakunata invitëkanllaraq. “Jehoväpa sacerdötenkuna” y ‘juk nacionpita nunakunapis’, entero Patsachö nunakunamanmi kë invitacionta, 600 idiömakunapitapis maschö chëkätsiyan.

11. Salomonpa mañakïninchö, ¿ima invitaciontaq rikakun juk nación nunakunapaq?

¹¹ Jesus shamunampaq 1026 wata pishikaptinmi, templopa ushëninta celebranqanchö, Salomón shonqupita patsë Diosman kuyëllapa mañakurqan. Abrahanta Diosnintsik awninqannöllam, entero nacionpita nunakuna Jehoväta adorayänampaq juntakäyänampaq kaqta mañakïninchö rikätsikurqan, kënömi mañakurqan: “Jina juk nacionpita nunatapis, Israel markëkichö mana täraq [tiyaq] kaqtapis y karu markapita jutikita wiyarir shamur (porque jatun jutikipita sinchi makikipita y rikrëkipitam wiyayanqa), y rasumpëpa kë wayiman shamur mañakamuptinqa ciëlopita patsë kikiki wiyëkullë, täranqëki sitiopita, y karu marka nuna qanman mañakamunqannölla rurëkullë; entero Patsachö nunakuna jutikita reqirirnin, markëki Israel mantsayäshunqëkinölla mantsayäshunëkipaq” (1 Rey. 8:41-43).

12. ¿Imanirtaq wakin nunakunaqa, Jehoväpa testïgonkunaqa mana allipa rikäyan?

¹² Juk nunataqa jukpa markanchö täraptinmi  forastero nintsik. Tsënöllam Jehoväpa testïgonkunapaqpis më nacionchö täräyaptimpis forastërollam kayan nintsik. Imapitapis más puntaman churarmi, Diospa Gobiernon ninqanmannölla kawayänampaq awnikuyashqa. Tsëmi política asuntokunaman mëtikuyantsu. Tsënö kayanqampitam wakinkunaqa mana allitanö rikäyan.

13. a) ¿Imanirtaq wakin nunakunaqa juk nacionpita nunakunata jukläyapa rikäyanman? b) ¿Imanirtaq nishwan tukï lindërokuna kanqanqa, Jehoväpa munënin mana kanqanta?

¹³ Rasunmi, forastero nunakunataqa rasllam më markapita kayanqanta reqirishwan, parlakïninkunapita, vestikïninkunapita y rikëninkuna imanö kanqampita. Pero më markapita kakuptimpis, más precisaq munëninqa wakin nunakunapanöllam. Tsëmi, alläpa jukläya kayanqanta neqkunaqa rikëkäyan wakin wakinchö jukläya kayanqanllata. Pero alleq reqipärirqa, cuentatam qokurintsik pëkunawan igual-lla kanqantsikta. Tsëmi këta nintsik: “Llapan nunakuna juk gobiernopa mandakïninllachö kawayaptinqa, manam forastërokuna kanqanatsu”. Y tsëmi qallanampita patsë Jehoväpa munënin karqan: llapan nunakuna juk familianölla Diospa gobiernonchö kawakuyänan. ¿Kanan witsan tsënö kawakïta puëdishwantsuraq?

14, 15. ¿Imatataq Jehoväpa testïgonkuna precisaqpaq churayashqa?

¹⁴ Orgulloso y nacioninllata precisaqpaq churaq nunakuna kawanqan witsanchöqa, entero nacionkunapita nunakunata igual-llapa rikaq nunakunata tariqa alläpa kushikïpaqmi. Rasunmi, pipaqpis mana allita pensënintsikta dejëqa, sasaraq o ajaraq kanman. CNN nishqan televisionta patsätseq, Ted Turner jutiyoq nunam trabajarqan atska nacionpita yachaq nunakunawan, y pëmi kënö nirqan: “Tsë ollqukunata y warmikunata reqiqa alläpa kushikïpaqmi karqan. Manam forastërokunatanötsu rikarqä, sinöqa marka mayïtanönam. Awmi, forastero nishpa qayëqa, mana allinam parecimarqan; tsëmi televisión pasëkanqan hora y mana pasëkanqan hörapis, mana utilizäyänampaq mandakurqä. Tsëpa rantinqa o trukanqa, tukï nacionkunapita shamoq niyänampaqnam nirqä”.

¹⁵ Jehoväpa testïgonkunallam, Diosnintsik rikanqannö, tukïläya nunakunata igual-llapa rikäyan; y shonqunkunapitam y pensëninkunapitam nacionninkunalla más alli kanqanta pensayanqankunata jorqayashqa. Juk nacionpita nunakunata mana allipa rikäyänampa rantinmi, tsë nunakunapa yachëninta y alli këninta precisaqpaq churayashqa. ¿Imëllapis pensarqonkiku tsënö tratanakï más amigo këman chätsikunqanta?

16, 17. ¿Imanöraq kawënintsik kanqa Apocalipsis 16:16 y Daniel 2:44 ninqan textokuna cumplikäriptin?

¹⁶ Ichikllachönam, Jesucristuwan y tröpankunawan ushanan kaq guërrachö llapan nacionkuna pelyayanqa, tsënöqa pelyayanqa Diospa Gobiernompa contranmi, tsë guërrapa ‘jutinqa hebreu idiomacho Harmagedonmi’ (Apoc. 16:14, 16; 19:11-16). Diospa contranchö këkaq gobiernokunapa ushakëninta Daniel willakunqampitaqa 2500 watakunanam pasarishqa, kënömi nirqan: “Tsë gobiernokunapa tiemponchömi, ciëlochö këkaq Dios, mana ushakaq gobiernota churanqa. Tsë gobiernopa rantinqa [trukanqa] mananam jukqa yëkunqanatsu. Y chipyëmi ushakätsinqa tsë llapan gobiernokunata, y kikinllanam imëyaqpis kanqa” (Dan. 2:44).

¹⁷ Diosnintsik awnikunqan cumplikäriptin, ¿kawëniki imanö kanampaq kaqman pensarqunkiku? Nunakuna churayanqan lindërokuna ushakäriptinqa, manam pipis forastëronatsu kanqa. Rasunmi, tsë witsanchöqa, nunakunaqa wakin wakinchöqa manam igual-llatsu kayanqa, pero tsëmi rikätsikunqa Diosnintsik kamanqanqa tukïläya karpis, alläpa shumaq kanqanta. ¡Imanö kushikïpaq kawëmi shuyarëkamantsik! Awmi, alläpa allim Kamakoq Jehová Diosnintsikta shonqupita patsë sirwinantsikpaq y alabanantsikpaq, kallpachakunqantsikqa.

18. ¿Imakunataq rikätsikun nacionkuna churayanqan lindërokuna manana kanampaq kaqta?

¹⁸ ¿Mana creïpaqnötsuraq kë shuyaranqantsikqa? ¡Rasumpam kanqa! Atska pruëbakunam kan tsë cumplikänampaq kaqman markäkunapaq o yärakunapaq. Awmi, Jehoväpa testïgonkunaqa, cristiano mayintsikkuna më tsëpita kayaptimpis igual-llapam rikantsik. Këllaman yarpärishun, atska nacionchö këkaq sucursalkunatam juk nacionchö këkaq sucursal-llamanna juntariyarqan, y tsëtaqa rurayarqan tsë nacionkunachö Diospita yachatsikuyanqanta más fäcil-lla rikäyänampaq y tsë yachatsikï más nunakunam chänanta munarmi (Mat. 24:14). Tsënö rurayanqanwanmi rikätsikuyarqan Jehoväpa testïgonkunapaqqa lindërokuna mana kanqanta, y tsëtaqa rurayarqan tsë nacionkunapa leynin permitiptinmi. Jina këqa rikätsikun, Jehová churanqan Rey Jesucristuqa, nunakuna churayanqan lindërokunata ushakätsir qallëkanqantanam. Ichikllachönam chipyëpa ‘contrancunata bensirinqa’ (Apoc. 6:2).

19. ¿Imanö kawëtataq yachakurquntsik “juk alli kaq idiömallata” parlanqantsikrëkur?

¹⁹ Jehoväpa testïgonkunaqa tukï nacionkunapitam kantsik y tukï idiömakunatam parlantsik, tsënö kaptimpis, llapantsikmi sinchikuntsik “juk alli kaq idiömallata” parlanapaq, y tsëmi yanapakun shonqupita patsë kuyanakunantsikpaq (lei Sofonías 3:9 *). Kë mana alli mundochö kawarnimpis, manam mana alli rurëninkunamanqa takukantsiktsu. Tukï nacionpita cristiano mayintsikwan juk familianölla kawakunqantsikqa, rikätsikun chëkämoqna mushoq Patsachöqa forastërokuna manana kanampaq kaqtam. Tsënöpam llapan nunakuna musyariyanqa, kë qallanan yachatsikïchö libro ninqannöpis, “Patsachö tukïläya nunakunaqa, Biblia ninqannömi tsë kastalla kayan” ninqan rasumpa kanqanta (The Races of Mankind).