1. ¿Ima niyantaq nunakuna esclavo këpaq?

UNË 2500 watakuna pasanqanchömi, drama librota qellqaq Greciapita juk nuna kënö nirqan: “Munënimpitaqa manam pipis esclavo këta munantsu”. Noqantsikpaqpis tsëqa rasun kaqllam. Esclavo këpaq parlarqa, pensantsik nunakuna cadenashqa këkaqman y mälas imatapis ruratsiyanqanmanmi, y rurayanqanqa manam kikinkunapaqtsu, sinöqa duëñonkunapaq y obligaqninkunapaqmi.

2, 3. a) ¿Imanötaq Cristupa sirweqninkuna esclavo këta chaskiyanqan? b) ¿Ima tapukïkunatataq contestashun mayordömonö rurënintsikpita?

² Jesusmi nirqan qateqninkunaqa humilde sirwipakoq o esclävokuna kayänampaq, pero rasumpa kaq cristiänokunataqa, tsënö esclavo kayanqanqa, manam mana väleqtanö, ni mana munëkar mälas trabajaqkunatanötsu sientikatsin. Tsëpa rantinqa o trukanqa, respetashqa y markäkïpaq o yärakuypa kayanqantam rikätsin. Këllaman yarpärishun, manaraq wanurninmi Jesus willakurqan, cösasninkunata rikänampaq ‘llapanchö wiyakoq y yachëwan sirweqta’ churanampaq kaqta (Mat. 24:45-47, NM).

³ Jina precisanmi musyanantsik juknin kaq willakïchö tsë esclävopaq parlarnin “mayordomo” nishpa Jesus qayanqantapis (lei Lucas 12:42-44 *). Tsë esclävoqa ciëlota ëwaqpaq kaqkunam kayan, pero kanan witsanqa manam llapan cristiänokunatsu ciëlopaq akrashqa kayan, tsënö kaptimpis, llapan cristiänokunatam mayordömonö trabajanapaq cargota qomarquntsik. ¿Ima rurapakïkunataq kapamantsik y imanötaq tsëta rikashwan? Musyarinapaqqa, unë tiempochö mayordömokunapa rurëninkuna ima kanqanta rikärishun.

4, 5. ¿Unë witsan mayordömokuna ima rurëkunayoqtaq kayarqan? Willakaramï.

⁴ Unë witsanqa, mayordömoqa markäkïpaq o yärakuypaq esclävom karqan, pëmi patronnimpa wayinta y negocionkunata rikaq. Respetashqa cargochö karmi patronnimpa tukï cösasninkunata, qellëninta y wayinchö wakin sirweqkunata rikänampaq churashqa kaq. Tsënö cargoyoqmi karqan Eliezer, pëtam Abrahan churarqan llapan cösasninkunata rikänampaq. Capazchi pëta patronnin mandarqan, Mesopotamia markaman ëwar tsurin Isaacpaq warmita ashipunampaq (Gén. 13:2; 15:2; 24:2-4).

⁵ Abrahanpa willkampa wamran Josëpis Potifarpa wayinchömi mayordomo karqan (Gén. 39:1, 2). Tiempowannam kikin Josëpis, wayinta rikänampaq mayordömoyoq karqan, tsë mayordömom juk kutichö Josëpa chunka wawqinkunata shumaq chaskirqan. Jose ninqanta cäsokurmi wawqinkunapa costalninman plätapita rurashqa cöpata wiñatsirqan, suwakushqam niyänampaq. Tsëmi rikätsimantsik, mayordömokunaqa markäkïpaq y precisaq cargokunachö kayanqanta (Gén. 43:19-25; 44:1-12).

6. ¿Ima rurëkunatataq anciänokuna cumpliyan mayordömonö sirwirnin?

⁶ Atska pachak watakuna pasariptinnam, Apóstol Pablu qellqarqan anciänokuna ‘Diospa mayordömonnö’ sirwiyänampaq kaqta (Titu 1:7, NM). Tsë cargotaqa chaskiyashqa “Diospa üshanta” mitsiyänampaqmi, tsënö karmi congregacionkunata pushayan y llapanchömi alli rurëninkunata rikätsikuyan wakinkuna qatiyänampaq (1 Ped. 5:1, 2). Musyanqantsiknöpis, rurëninkunaqa jukläya jukläyam kayan. Casi llapanmi congregacionninkunallachö yanapakuyan, pero viajaq anciänokunaqa atska congregacionkunachömi yanapakuyan. Y Sucursalta rikaqkunanam, nacionninkunachö llapan congregacionkunata rikäyan. Diosta cuentata qoyänan kaptinmi, anciänokunaqa rurëninkunata alleq cumpliyan (Heb. 13:17).

7. ¿Imanirtaq llapan cristiänokunapis mayordomo kanqantsikta nintsik?

⁷ ¿Pero mana anciano kaq cristiänokunaqa? Llapan cristiänokunapaq parlarmi apóstol Pedru kënö nir qellqarqan: “Cada ünuta shongoyquicunaman Dios Yaya yachayniquicuna garayäshungayquinölla, runamajiquicunata cuyarnin [“alli mayordömonö”, NM] imaycallachöpis yanapanqui. Tsaynö cuyanacurnin cawarga, tucuyläyapam cumpliycäyanqui Dios Yaya alläpa cuyacug cayninwan llapan yachayniquicuna garayäshungayquita” (1 Ped. 1:1; 4:10, NTCN). Alläpa kuyakoq karninmi, Diosnintsikqa llapantsikta qomarquntsik yachëta, y cristiano mayintsikta imëkallachöpis yanapëta puëdinapaq. Tsëmi, Diosta sirweq kaqqa, llapantsik mayordomo kantsik, y tsënö këqa, respetëpaq, markäkïpaq o yärakuypaq y cumplido kanqantsiktam rikätsikun.

8. ¿Ima precisaq musyatsikïtataq cuentaman churashwan?

⁸ Mayordomo kënintsikman alleq yarpachakur kima musyatsikïkuna imanö yanapakunqanman pensarishun. Punta kaqqa këmi: Diosmi llapantsikpa duëñontsik y pëtam cuentata qoshun. Pablum kënö nir qellqarqan: “Mananam qamcunanatsu cuerpiquicunapa dueñun cayanqui, sinoqa Teyta Diosnintsicmi. Tsepaqmi pe rantimarqontsic”; rasunmi, Cristu yawarninta ramanqanwanmi rantimarquntsik (1 Cor. 6:19, 20). Jehovällapana karmi llapan mandamanqantsikta wiyakunantsik, y tsëqa manam sasa o aja cumplinantsu (Rom. 14:8; 1 Juan 5:3). Jina Cristupa esclävompis kantsikmi. Unë witsan mayordömokunatanöllam noqantsiktapis libre këta qomantsik, pero manam kikintsikpa munënintsikta rurakunapaqtsu; sinöqa, mandamanqantsikta llapanta cumplinantsikpaqmi. Congregacionchö mëqan rurëkunachö yanapakurpis, Diospa y Cristupa esclävonllam kantsik.

9. ¿Imanötaq Jesus yanapamarquntsik patronwan esclavo jukläya kanqanta entiendinapaq?

⁹ Juk igualatsikïwanmi Jesus yanapamarquntsik patronwan esclavo imachö jukläya  kayanqanta entiendinapaq. Qateqninkunatam parlaparqan, entero junaq trabajarirnin wayinman chärir juk esclavo imata ruranqanta. ¿Acaso patronninqa ‘pasacaramï. Täcurïquï micurinequipaq’ ninku? Manam tsënötsu nirqan. Tsëpa rantinqa o trukanqa, këtam mandarqan: “Alistaqui miquinïraq arumunequipaq. Micur upur ushanqäyaq sirwimë; tsepeqnam qamqa micucunqui”. Tsëpitanam tsë igualatsikïwan ima nita munaqanta Jesus yachatsikurqan, kënö nir: “Tse cuentanollam qamcunapis Dios mandayäshonqequicunata rurar usharir niyanquiman, ‘Pishipaq sirwipacoqllam cantsic. Mandamashqantsiccunallatam rurashqa cantsic’” (Luc. 17:7-10).

10. ¿Imataq rikätsikun sirwir sinchikunqantsikta Jehová precisaqpaq churanqanta?

¹⁰ Awmi, Jehoväqa pëta sirwir sinchikunqantsiktaqa alläpa precisaqpaqmi churan. Bibliam këta rikätsimantsik: “Tayta Diosga manam gongangatsu imanö ñacarpis payman yäracur cawagcunataga” (Heb. 6:10, MTCS). Rurëta puëdinqantsikllatam Jehoväqa mañamantsik. Jinamampis, alli kanantsikrëkurmi imatapis mañamantsik, y rurananqa manam sasa o aja cumplinantsu. Tsëmi, igualatsikïninwan Jesus yachatsimarquntsik juk esclävoqa kikinta kushitsinqan kaqllata ni munëninllata puntaman mana churanqanta. Diosllapaq kanapaq awnikurninmi decidirqantsik, pëpa kaqkunata kawënintsikchö puntaman churanapaq.

11, 12. Mayordomo kënintsikchö, ¿imanötaq portakushwan, y imatataq rurashwantsu?

¹¹ Ishkë kaq musyatsikïninqa këmi: mayordomo kënintsikchöqa, tsë mandakïkunallatam llapantsik wiyakuntsik. Rasunmi, wakin kaq rurëkunata rurayänampaqqa wallkaq cristiänokunalla tsë cargokunata chaskiyan, pero más rurëkunataqa congregacionchö llapan cristiänokunam rurayan. Këllaman pensarishun, Cristupa qateqnin kar y Jehoväpa testïgon karmi, juknintsik juknintsik kuyanakunantsik. Jesusmi nirqan, juknintsik juknintsik kuyanakunqantsik rasumpa cristiano kanqantsikta rikätsikunqanta (Juan 13:35). Jina kuyantsikmi mana creikoq o mana cristiano kaq nunakunatapis. Tsë kuyakïtaqa llapantsikmi rikätsikïta puëdintsik, y tsëtam ruranantsik.

¹² Jina Jehoväqa shuyaran alli portakïnintsikta imëpis rikätsikunantsiktam. Palabran michäkunqan mana alli portakïkunapita y mana alli kawëkunapitam witikushwan. Tsëpaq parlarmi Pablu këta nirqan: “Ama pensayëtsu jucwan jucwan pununacur cacoqcuna, imajincuna adoracoqcuna, majayoq quecar jucwan jucwan pununacoqcuna, warmi ricoqcuna y mariconcuna, suwacuna, qellepaq erayashqacuna, borrachucuna, cuentusterucuna y ranchadorcuna, Diospa mandaquininman yecuyänanta” (1 Cor. 6:9, 10). Diospa mandakïninkunata imëpis cumplinapaqqa, sinchikunqantsikpitaraqmi kanqa. Y tsënö sinchikïqa tukï bendicionkunatam apamun, alli saludyoq këta, wakinkunawan alli apanakïta y Diospa rikëninchö alli këta (lei Isaías 48:17, 18 *).

13, 14. ¿Ima cargoyoqtaq kayan llapan cristiänokuna, y imanötaq tsëta rikashwan?

¹³ Jinamampis yarpänantsikmi mayordömokunapanöpis noqantsikpa juk rurënintsik kapamanqantsikta. Jehovämi rasumpa kaqta yachatsimarquntsik, tsëqa, manam imawampis igualantsu. Y shuyaranmi tsë rasumpa kaqta nuna mayintsikkunata yachatsinata (Mat. 28:19, 20). Pablum këta qellqarqan: “Qamkuna rikëkalläyämë, Cristupa mandädonchö këkaqkunatanölla y Diospa pakaraq cuenta alli willakïnimpa mayordömonkunatanölla” (1 Cor. 4:1, NM). Apóstol Pablum nirqan moyordömokunapa rurëninkunaqa, Diospa pakaraq cuenta alli willakïninta cuidar rikäyänan y Patrón Jesucristu mandakunqannö tsë willakïta mana cambiëta yachatsikuyänan kanqanta (1 Cor. 9:16).

¹⁴ Rasumpa kaqpita yachatsikïqa kuyakoq  këmi. Clärom këkan, cristiänokunapa kawëninkunachö pasakunqankunaqa jukläya jukläyam. Manam llapantsu Diospita yachatsikïchö igual-llata rurayan, y tsëtaqa Jehová alleqmi entiendin. Cada ünom llapan puëdinqantsikta ruranantsik, tsëmi más precisan. Tsënöpam, Diosnintsikta y nuna mayintsikta alläpa kuyanqantsikta rikätsikuntsik.

15-17. a) ¿Imanirtaq alläpa precisan juk mayordomo mandayanqankunata chipyëpa cumplinan? b) ¿Ima igualatsikïwantaq Jesus rikätsikurqan mandamanqantsikta mana rurë mana alliman chätsikunqanta?

¹⁵ Kima kaq musyatsikïqa manam jukläyatsu wakin kaq musyatsikïkunapita, këmi: mandamanqantsiknöllam ruranantsik y markäkïpaq o yärakuypaqmi kanantsik. Kanmanmi juk mayordomo imëkatapis rurëta puëdinqanta rikätsikoq y rurëta yachaq, pero patronninllapaq mana kaptin y mandanqankunata mana ruraptinqa, manam yachaq kënin alläpa precisanqatsu. Patrón mandamanqantsiknölla ruranantsikqa alläpam precisan, rurëninta shumaq cumplinapaq. Pablu kënö ninqanta yarpärishun: “Pipis juc encargota [“mayordomo këta”, NM] chasquishga carga, tsaynö rasumpa alli confiacurnin encargayanganta cumplïdu cayninwan musyatsicutsun” (1 Cor. 4:2).

¹⁶ Këpitam seguro kanantsik: mandamanqantsiknölla rurashqaqa, Jehovämi bendecimäshun. Pero tsënö mana rurarqa, mana allimanmi chäshun. Këtaqa Jesus yachatsikurqan talentokunapaq parlar igualatsikïninchömi. Patronqa, mandanqannölla ruranqampita y qellëninta miratsipuyanqampitam esclävonkunata alabarqan y kushishqa premionkuna qorqan. Pero mana cumpleq kaqtaqa, “allapa qela mana alli ruraq” “mana imapaqpis sirweq” nirmi qayarqan (lei Mateo 25:14-18, 23, 26, 28-30).

¹⁷ Jina juknin kaq igualatsikïninchöpis Jesusqa rikätsikurqanmi mandamanqantsiknölla mana rurëqa mana alliman chätsikunqanta, kënömi nirqan: “Juc nunam carqan allapa ricu. Tse nunapam juc mayuralnin [“mayordömon”,  NM] carqan. Tse mayuralpaqmi patronninta willayarqan llutanpa imecancunatapis ushaconqanta. Tsenam mayuralninta qayaratsir queno nerqan: ‘Nunacunam willayämashqa qam llutanta imecacunatapis ruraconqequita. Cananpita witsepanam mayuralnïnatsu [“mayordömönatsu”, NM] canqui. Llapanta cuentata qomänequipaq prebiniquï’” (Luc. 16:1, 2). Patronnimpa cösasninkunata lluta gastapushqa kaptinmi, mayordömonta qarqurirqan. Këqa yachatsimantsik Jehová mañamanqantsiknölla ruranapaqmi.

18. ¿Imanirtaq wakinkunawan igualatsikï allitsu?

¹⁸ Mayordömonö rurënintsikta imanö cumplikanqantsikta rikarqa, manam allitsu kanman jukkuna rurayanqantawan igualatsishqaqa. Tsëmi Biblia kënö consejakun: “Quiquintsicmi shonquntsicta tapushwan allita o mana allita rurecanqantsicta. Waquin nunacunapita mas alli canqantsicta alabaconqantsicqa manam imapaqpis balintsu. Antis allicunata ruranqantsictaqa shonquntsicllachomi cushicushwan” (Gal. 6:4). Jukkuna rurayanqanwan igualatsikunapa rantinqa, kikintsik puëdinqantsikmannö rurëkanqantsikmanmi pensashwan. Tsëta rurarqa, manam allitukushuntsu ni qelanäkurishuntsu. Rurëkanqantsikta rikarqa, imëkakuna cambianqantam cuentaman churashwan. Capazchi qeshya, edäyë o imakunapis permitimashwantsu puntatanö ruranantsikta. Höraqa rurëkanqantsikpitapis mastam rurëta puëdishwan. Tsëmi kënö tapushwan: “¿Manatsuraq Diospita más yachatsikunäpaq tiempota rakïman?”.

19. ¿Imanirtaq qelanäkurishwantsu shuyaranqantsik cargota raslla mana chaskir?

¹⁹ Ni manam jukkuna cargoyoq kayanqanwanqa igualatsikushwantsu. Këllaman pensarishun, capazchi congregacionchö juk wawqi anciänonö yanapakïta munanman o asamblëakunachö discursëta munanman. Tsëkunata logranapaq sinchikïqa alläpa allim, pero munënintsikmannö mana rurakaptinqa manam qelanäkurishwantsu. Capaz entiendishwantsu imanir tsë cargokunata raslla mana chaskinqantsikta, höraqa pensanqantsikpitapis más tiempotaran necesitanqa. Ama qonqashuntsu, Egiptopita Diospa markanta jorqamunampaq listona kanqanta pensëkarpis, 40 watakunaraq tsëta ruranampaq Moises shuyaranqanta. Tsë tiempokunaraq shuyaranqanmi permitirqan más alli nuna tikranampaq, mana wiyakoq y munëninkunallata rurëta munaq markata shumaq pushanampaq (Hech. 7:22-25, 30-34).

20. ¿Imatataq yachakuntsik Jonatanpita?

²⁰ Rasun kaqchöqa, capazchi wakin kaq cargokunataqa imëpis chaskishuntsu. Tsëmi pasarqan Saulpa tsurin Jonatanta. Tsurin karmi Israel markata gobernanampaq teytanta trukanan karqan. Pero Diosqa Jonatanpita más jöventam akrarirqan, Davidta. ¿Imatataq rurarqan Jonatán? Manam piñakurqantsu, tsëpa rantinqa o trukanqa, kawëninta peligroman churarmi, Davidta yanaparqan. Kënömi nirqan Davidta: “Qammi Israelchö rey kanki, y noqanam qateqnikiman kashaq” (1 Sam. 23:17). Jonatanqa manam papäninnötsu chikikurqan, sinöqa kushishqam chaskikurqan. ¿Imatataq këpita yachakuntsik? Wakinkuna cargokunata chaskiyanqanta chikikur kanapa rantinqa, kapamanqantsik cargotam shumaq cumplishwan. Mushoq Patsachönam, llapan sirweqninkunapa munëninta Jehová qonqa, y tsëqa segürom kanqa.

21. ¿Imanötaq rikashwan mayordömonö rurënintsikta?

²¹ Mayordömonö sirwinqantsikchöqa manam sufrintsiktsu ni mälasqa imatapis ruratsimantsiktsu, tsëtam alleq yarparänantsik. Rasun kaqchöqa, pipis mana ruranqan respetashqa rurëtam Jehová qomarquntsik. ¿Imataq tsëqa? Kë ushan mana alli tiempokunachö Diospita yachatsikïmi, y tsë rurëqa manam yapëqa rurakanqanatsu. Jinamampis, Diospa kaqchö rurënintsikkunawanqa manam nitipakashqatsu kantsik. Tsëmi, mandamanqantsiknölla ruraq mayordomo kashun y imawampis mana igualaq, Ciëlochö y Patsachöpis Autoridadyoq Diosta sirwinqantsikta precisaqpaq churashun.