1-3. a) ¿Ima ninantaq imapitapis pësakï, y ima mana allikunamantaq chätsimashwan? b) ¿Imatataq apóstol Pablupita yachakushwan?

“IMËKA llakikïpaq palabrakunata niyanqampita o qellqayanqampitapis, más llakikïpaqqa, ‘tsënö këta puëdinmanmi karqan’ niyanqanmi.” Tsënö ninqanwanmi, poesïakunata qellqaq John G. Whittier jutiyoq nuna rikätsikurqan, imatapis mana allitanö ruranqantsikpita o juknöpa mana ruranqantsikpita pësakunqantsikta. Ruranqampita o mana ruranqampita pipis yarpachakurqa, alläpa pësakïman y llakikïmanmi chan. Rasun kaqchöqa llapantsikmi imallapitapis pësakuntsik. ¿Imakunapitataq qamqa alläpa pësakunki?

² Wakinkunaqa kawëninkunachömi imata karpis pantayashqa o jatun jutsakunata rurayashqa. Wakinkunaqa, mana jutsallakushqa këkarmi imatapis rurayänampaq akrayanqampita alli kanqanman o mana alli kanqanman yarpachakuyan. Wakinkunanam, unë rurayanqankunata qonqarirnin alli kawakïta procurayashqa. Pero wakinkunaqa, “këta o wakta rurakulläman karqan” nirmi llakikurlla kawakuyan (Sal. 51:3). ¿Y qamqa? ¿Puëdinkiku punta ruranqëkikunaman mana yarparäkushpa Diosta sirwita? ¿Puëdinkimantsuraq kanampita witsëpa tsënö sirwita? ¿Pillapis tsënöpa pasashqatsuraq yanaparamänantsikpaq? Awmi, apóstol Pablum.

³ Pabluqa tukï mana allikunatam rurarqan, pero tsënö karpis alli kaq rurëkunatam akrarqan. Unë ruranqankunapita alläpa llakikurpis, Diosta mana jaqita sirwirninmi kushishqa kawëta yachakurqan. Masllata pëpita yachakurishun.

4. ¿Imanötaq apóstol Pablupa unë kawënin karqan?

⁴ Jövenllaraq fariseo kanqan witsanmi Pabluqa tukï mana allikunata rurarqan, y tsëkunapitam pësakurqan. Këllaman pensarishun, Cristupa qateqninkunata chikir  qatikachäyaptinmi pë dirigirqan. Estëbanta wanuratsiyaptin imata ruranqantam Biblia kënö nir willakun: “Sauloqa creyicoqcunata[m] ashir [“alläpa”, NM] chiquir qaticacharqan, wayin wayin yequicuryanmi, warmitapis ollqutapis qaracharcuryan jorqamurnin, carselman llawiyänanpaq apatserqan” (Hech. 8:3). William Barclay profesormi, griego idiömachö ‘alläpa chiquir’ ninan palabrapaq willakun, “alläpa feyupa” y imëka “mikukoq chukaru animalnö” tratë kanqanta. Judaísmo religionninta alläpa defenderninmi, Sauluqa pensarqan Jesusman creikoqkunata ushakätsiqa Diospa munënin kanqanta. Tsëmi, Pabluqa cristiänokunata ushakätsita munar, “cananmi siqa musyayämanqa” nir “warmitapis ollqutapis” qatikacharqan (Hech. 9:1, 2; 22:4). *

5. Jesuspa qateqninkunata qatikachëta Saulu imanö dejanqanta y Cristupita yachatsikur qallanqanta willakaramï.

⁵ Sauluqa Damasco markatam ëwëta munarqan Cristupa qateqninkunata wayinkunapita qarachëpa jorqamunampaq y Jerusalenta aparnin Sanedrín cortewan castigatsinampaq. Pero congregacionpa Pushaqnin Jesusqa manam permitirqantsu (Efes. 5:23). Damasco nänipa ëwarëkaptinmi Sauluta yuripurirqan y juk aktsiwan wiskuyäratsirqan. Tsëpitam Damascota ëwanampaq mardarqan y tsëchö atska willakïkunata chaskinampaq nirqan. Bibliam masta willamantsik imanö pasakunqankunata (Hech. 9:3-22).

6, 7. ¿Imataq rikätsikun unë kawënimpita Pablu alläpa pësakunqanta?

⁶ Pabluqa cristiano tikrarirmi chipyëpa cambiarirqan. Alläpa chiki kashqa karpis, Jesusman creikoqkunata chipyëpam defendirqan. Tsënö këkarpis këtam qellqarqan: “Qamcuna wiyayashqachi yä cayanqui puntata Israel nunacunapa costumbricunaman marcäcurnin, imano portacunqäta. Tsemi Teyta Jesusman creyicoqcunata pasepa ushacätsita munarnin, chiquir qaticacharqä” (Gal. 1:13). Jina unë imanö kanqantam yapë qellqarqan Corintochö y Filïposchö këkaq cristiänokunaman y Timotëumampis (lei 1 Corintios 15:9; Filip. 3:6; 1 Tim. 1:13). Pabluqa manam tsënö kanqampita gälakurtsu qellqarqan, ni manam ruranqankunata mana kaqpaq churarnin tsaparqantsu. Alläpa jutsakunata ruranqantaqa yarparaqmi (Hech. 26:9-11).

⁷ Frederic W. Farrar jutiyoq yachaq nunam nirqan, cristiänokunata feyupa qatikachanqanchö Saulu ima cargoyoq kanqanta. Jina nirqanmi, alläpa feyupa cristiänokunata tratanqampita entiendirlla, ‘unë ruranqampita chipyëpa pësakunqanta musyëta puëdinqantsikta, jina chikeqnin nunakuna feyupa tratayanqanta’. Quizás watukanqan congregacionkunachöqa mana reqinqan cristiänokuna witirir kënö niyaq: “¡Ah qamchi qatikachäyämaqni Pablu karqëki!” (Hech. 9:21).

8. ¿Imanötaq Pablu rikarqan Jehoväwan Jesus ankupakïninkunata y kuyakïninkunata rikätsiyanqanta, y imatataq tsëpita yachakuntsik?

⁸ Tsënö kaptimpis, Pabluqa alleqmi entiendirqan Dios alli kanqanrëkur ruranampaq kaqkunata cumplita puëdinqanta. 14 cartakunata qellqanqanchömi Diospa alli kënimpaq 90 kutipitapis más parlarqan, tsëtanöqa manam parlayashqatsu Bibliata ni mëqan qellqaqkunapis (lei 1 Corintios 15:10). Pabluqa alläpam agradecikurqan Diosnintsik alläpa ankupäkoq karnin shumaq tratanqampita, y tsë ankupäkïta provechëkanqantam rikätsikurqan. Wakin apostolkunapitapis masmi trabajarqan. Pë pasanqanqa juk shumaq yachatsikïtam rikätsimantsik, y masqa jutsata rurayanqampita Dios mana perdonanqanta pensaqkunatam. ¿Imatataq yachatsimantsik? Jesuspa sacrificionman markäkushqa, jutsantsikta willakushqa y portakïnintsikta altsashqaqa,  jutsantsikkunata chipyëpa Jehová limpiaramanqantsiktam, jina tsënöllam ruran jatun jutsakuna kaptimpis (lei 1 Timoteu 1:15, 16). Pabluqa Cristupa alläpa chikeqnin kashqa karpis, këtam qellqarqan: “[Diospa Tsurinqa] allapa cuyamarnï[mi] rantï wanorqan” (Gal. 2:20; Hech. 9:5). Rikanqantsiknömi, unë ruranqankunapita mana pësakurlla Jehoväta sirwita yachakurqan. ¿Y qamqa?

9, 10. a) ¿Imanirtaq wakin cristiano mayintsikkuna pësakurlla kawakuyan? b) ¿Imanirtaq unë jutsa ruranqantsikkunapita llakikurlla kakushwantsu?

⁹ Quizás imatapis mana allita rurarirnin, tsëpita pësakurqunki. Capaz mana conviëneqkunachö tiempïkita y kallpëkita gastarqunki. O capaz pitapis mana allita rurarqunki o juk cösaskunapita alläpa pësakunki. ¿Imatataq rurankiman?

¹⁰ Wakinkunaqa tsëman yarpachakurllam kakuyan. Tsëllaman yarpararninmi, hasta qeshyëmampis chäyan. Pero ¿tsënö yarparäkuyanqanwan ima problëmatapis altsayanku? Manam. Tsëmi tsëllaman yarparäkunapa rantinqa, imata karpis ruranantsik tsëpita librakänapaq. Këllaman yarpärishun, quizás disculpata mañakunkiman y yapë amigo kayänëkipaq kallpachakunkiman. Jina quizá pësakunqëki jutsaman ishkitsishoqniki cösaskunata dejankiman yapë mana ishkitsishunëkipaq. O quizás altsëta puëdinkimannatsu, tsëqa allichi kanman tsarakunëkipaqna sinchikunqëki. Pero rasumpa kaqchöqa, alläpa llakikïqa manam imachöpis yanapakuntsu. Tsëpa rantinqa, imatapis ruranapaq kaqtam michämantsik y Jehovätapis mananam llapan puëdinqantsikmannöqa sirwita puëdintsiktsu.

11. a) ¿Imatataq rurashwan Jehová ankupämänapaq y kuyamänapaq? b) Jutsantsikkunata qonqanapaq y tranquilo kawakunapaq, ¿imata ruranapaqtaq Biblia consejamantsik?

¹¹ Wakin cristiänokunaqa jutsata rurayanqankuna alläpa llakitsinantam dejayan, tsëmi hasta pensayan Diosqa imëpis manana kuyanampaq kaqta. Quizás alläpa jutsata  rurayanqanrëkur o atska kuti rurayanqanrëkur Diospa ankupäkïninta o llakipäkuyninta chaskita mana mereciyanqanta pensayan. Pero rasumpa kaqchöqa, imëka jutsata rurashqa karpis, puëdiyanmi arrepentikïta, cambiëta y perdón mañakïta (Hech. 3:19). Jehoväqa mëtsikaq nunakunawan ruranqannömi, ankupäkïninta y kuyakïninta rikätsita puëdin. Jobnö shonqupita patsë arrepentikoqkunata y humilde kaqkunataqa Diosqa kuyëpam tratan. Jobmi kënö nirqan: “Rasumpam arrepentikö, peqämampis allpata y uchpata winar” (Job 42:6). Tranquilo kanata munarmi Diosqa Palabranchö nimantsik: “Jutsankunata pakaq kaqqa, manam alli kawëta tarinqatsu, pero jutsankunata willakurir jaqireq kaqqa, llakipashqam kanqa” (Prov. 28:13; Sant. 5:14-16). Tsëmi jutsantsikkunata Diosta willëta, perdón mañakïta y portakïnintsik altsëta puëdintsik (2 Cor. 7:10,11). Tsënö rurarqa Diospa ankupäkïnintam chaskishun, ‘porque pëqa chipyëpam perdonamäshun’ (Is. 55:7).

12. a) David ruranqanman yarpar, ¿imatataq rurashwan concienciantsik alli sientikunampaq? b) ¿Ima ninantaq Jehová pësakunqan, y imanötaq yanapamantsik tsëta musyanqantsik? (Rikäri recuadrota.)

¹² Jehoväman mañakushqaqa, pëqa yanapamënintsikta puëdinmi. Shonqupita patsë markäkurmi Davidqa sientinqankunata Jehoväta willarqan, y tsë shumaq mañakïninkunaqa kanankamayaqmi Salmo librochö këkan (lei Salmo 32:1-5). Davidqa cuentata qokurqanmi conciencian acusanqanta mana cäsokunqanrëkur pasëpa llakikïman chëkanqanta. Tukïmi rikätsikun jutsata rurarir mana willakunqampita kushishqa këninta oqranqanta, pensëninchö sufrinqanta y qeshyanqanta. ¿Y imatataq rurarqan perdonta chaskir alli sientikunampaq? Mañakïninchömi jutsata ruranqampita Jehoväta willarqan. Jehoväqa mañakïninta wiyarqanmi y alli kaqta rurar sïguinampaqmi kallpata qorqan. Jina tsënöllam, qampis shonqupita patsë Jehoväta willaptikiqa, rogakunqëkita wiyashunki. Jutsata ruranqëkikuna llakitsishuptikiqa, llapan puëdinqëkita rurë altsanëkipaq. Pero tsëpitaqa perdonashunëkipaq Jehová awnishunqëkiman markäkï o yärakuy (Sal. 86:5).

13, 14. a) ¿Imamantaq kanan witsan más yarpachakushwan? b) ¿Ima tapukïkunataq yanapamäshun rurëkanqantsikkunata alleq rikänapaq?

¹³ Qepaman rikarlla kawë ima kanqanta entiendiyanqantam nunakuna niyashqa. Jina niyashqam, puntaman rikarlla kawëta puëdinqantsikta. Tsëmi unë ruranqantsikkunaman yarpachakunapa rantinqa, yarpachakushwan kanan tiempopaq y shamoq tiempopaq kaqman. Kënö tapukï: “¿Kanan imatapis decidinqäkunapita tiempowanqa pësakushaqtsuraq? ¿Juknöpa rurakulläman karqan nishaqtsuraq? ¿Llapan puëdinqämannöku Jehoväta sirwikä shamoq tiempochö mana pësakunäpaq?”.

¹⁴ Alläpa jipakï o ñakakuy tiempo chëkämuptinnaqa, manam kënö nir pësakur këta munantsiktsu: “¿Manatsuraq Jehoväta más sirwita puëdïman karqan? ¿Imanirtaq  precursor këta puëdirqätsu? ¿Imataq michämarqan siervo ministerial kanäta? ¿Llapan puëdinqämannöku sinchikurqä Dios munanqannö alli nuna kanäpaq? ¿Mushoq Patsachö kawaqpaq nunatanöku Dios rikäman?”. Rasumpa kaqchöqa, kë tapukïkunaman yarpanqantsikmi yanapamantsik, kanan witsan llapan puëdinqantsikmannö Jehoväta sirwikanqantsikta o mana sirwikanqantsiktapis alleq rikänapaq. Tsënö mana yarpachakurqa, capazchi ima mana allitapis akrarishwan y tiempowanqa pësakïkashwan (2 Tim. 2:15).

15, 16. a) ¿Imakunatataq wakin cristiänokuna rurayashqa Jehoväta llapan puëdiyanqanmannö sirwiyänanrëkur? b) ¿Imanirtaq Diospa Gobiernonchö yanapakunqëkipita pësakunkimantsu?

¹⁵ ¿Llapan tiempïkiwan Jehoväta sirwinëkirëkurku tukïta dejarqunki? Capazchi estudiëkanqëkita dejarqunki, o quizás Diosta llapan tiempïkiwan sirwinëkirëkur jatun negocioykitapis dejarqunki. Jina capazchi, betelita, congregacionkunata watukaq o misionero këta munar, o atska nacionchö Diospita yachatsikuyänan wayikuna rurëchö yanapakïta munar casakurqunkitsu, o casado karqa wamrayoq mana kanëkipaq churapakarqunki. Tsënö atska watakunapa Jehoväta sirwishqa karqa, ¿tsëkunata ruranqëkipita pësakunkimantsuraq? ¿Tukïnöpa kallpachakunqëki mana kaqpaq kanqantatsuraq pensankiman, o alleq mana pensar tsëkunata akranqëkitatsuraq pësakunkiman? ¡Manachi tsënöqa pensankimantsu!

¹⁶ Tsë rurëkunataqa akrarqëki Jehoväta alläpa kuyarnin y pëta sirwita munaq nunakunata yanapëta munarninmi. Ama pensëtsu, “jukkunata akraptïqa más allichi kanman karqan” nirnin. Tsëpa rantinqa, alli kaqta akranqëkipita y llapan puëdinqëkimannö Jehoväta sirwinqëkipita kushishqa kë. Jehoväqa manam pëpaqrëkur tukïkunata ruranqëkikunata imëpis qonqanqatsu. ‘Rasumpëpa kawëyoq’ o jutsannaq mana wanushpa kawëyoq kaptikinam, pensanqëkipitapis más Jehová bendecishunki (Sal. 145:16; 1 Tim. 6:19, NM).

17, 18. a) ¿Imatataq Pablu rurarqan mana allita ruranqankunaman mana yarparäkunampaq? b) ¿Imatataq rurankiman mana allita rurankëkikunawan, y imatataq ruranki kanan tiempo y shamoq tiempo kawënikiwan?

¹⁷ ¿Imatataq rurarqan Pablu mana allita ruranqankunaman mana yarparäkunampaq? Kikinmi kënö nirqan: “Punta cangätaga gepaman dëjasquir[mi], llapan ruranäpag canganta cumplinäpag imayca lüchagnörag ruraycä” (lei Filipenses 3:13, 14 *). Pabluqa manam judaísmo religionchö këkarnin mana allikunata ruranqanman alläpa yarpachakurqantsu. Tsëpa rantinqa, mana ushakaq kawëta chaskinampaqmi tiemponta y kallpanta utilizarqan.

¹⁸ ¿Imatataq Pablu ninqampita yachakuntsik? Tsëpitaqa yachakuntsik, mana allita ruranqantsikkunaman yarparäkïqa mana alli kanqantam. Tsëpa rantinqa, ruranapaq kaqkunamanmi yarparänantsik. Rasun kaqchöqa, manam chipyëpaqa mana allikunata ruranqantsikta qonqarishuntsu, pero tsënö kaptimpis, manam pësakurllaqa kawakunantsiktsu. Mana allita ruranqantsikkunaman yarparëta jaqirirmi, llapan kallpantsikwan Jehoväta sirwishwan y shamoq tiempochö tukï bendicionkuna shuyarämanqantsikman yarparashwan.