1, 2. a) Bibliachö “alabanza” palabraqa, ¿imatataq rikätsikun? b) ¿Ima tapukïkunapa respuestantataq kë yachatsikïchö yachakushun?

ALABANZA palabrata wiyaptikiqa, ¿imamantaq pensatsishunki? ¿Diosnintsik kamanqankuna alläpa shumaq kanqanmanku? (Sal. 19:1.) ¿Rico kaqkuna, más yachaq kaqkuna o imatapis espantëpaq kaqta ruraqkuna alabanzata chaskiyanqanmanku? Hebreo idiömachö “alabanza” palabrapaq Biblia parlarqa rikätsikun lasaq ninantam. Unë witsankunaqa shumaq metalkunapitam qellëta rurayaq, y valornin ëka kanqantaqa musyayaq pësëpam; más lasarqa, más valoryoqmi kaq. Tsëmi “alabanza” nir tikratsiyämunqan palabrataqa utilizar qallayarqan imapis más valoryoq o espantëpaq kaqkunapaq parlarnin.

² Quizás nunakunaqa pitapis alabayanman puëdeq kanqampita, imëkayoq kanqampita o imanöpis reqishqa kanqampita. Pero Jehoväqa, ¿imanö nunakunatataq alaban? Proverbios 22:4 textochömi këta nin: “Humilde kë y Jehoväta mantsëqa, rico këman, alabashqa këman y kawëmanmi apakun”. Y discípulo Santiägunam kënö nir qellqarqan: “Dios Yayapa nopancho qollmi shonqu nuna cayë. Tseno cayaptiquim, pe presisaqpaq churayäshunqui”, o alabayäshunki (Sant. 4:10). Pero ¿imanötaq Jehová alabamantsik? ¿Y imaraq michäkunman alabamänantsikta? ¿Y imataraq rurashwan tsë alabanzata wakinkunapis chaskiyänampaq?

3-5. ¿Imanötaq Jehová alabamantsik?

³ Salmo 73 kaq capïtulota qellqaqqa, alleqmi musyarqan makimpita Jehová janchanampaq kaqta y rasumpa alabanampaq kaqta (lei Salmo 73:23, 24 *). ¿Imanötaq Jehoväqa humilde sirweqninkunata alaban? Tukïnöpam alabamantsik. Këllaman pensarishun, munëninta musyanata dejamarnintsikmi bendecimantsik (1 Cor. 2:7). Palabran ninqanta wiyakurnin rurashqaqa, amïgon kanata dejamarnintsikpis alabamantsikmi (Sant. 4:8).

 ⁴ Jinamampis Diosqa, sirweqninkunapa makinchömi imëka alläpa väleq tesoro cuentata, pëpita yachatsikïta jaqishqa (2 Cor. 4:1, 7). Kamakoq Teytantsikta alabanapaq y wakin nunakunata yanapanapaq tsë tesörota utilizashqaqa, Jehoväqa alabamantsikmi. Kikinmi, “precisaqpaq churamaq kaqtaqa noqapis precisaqpaqmi churashaq” nir awnikurqan (1 Sam. 2:30). Tsëmi, pëpa rikënimpaq y congregacionchöpis alli rikashqa këta puëdintsik (Prov. 11:16; 22:1).

⁵ Jehová awnikunqanta shuyarashqa y mandamanqantsikta rurashqaqa, pëqa juk shumaq kawëtam qomäshun, porque Bibliam kënö nir awnikun: “Pëmi precisaqpaq churashunki, patsata herenciatanö chaskinëkipaq. Mana allita ruraq nunakuna ushakäriptinmi, qam rikärinki” (Sal. 37:34). Tsëmi alläpa shuyarantsik, mana wanushpa kawëta qomarnintsik Jehová alabamänantsikpaq kaqta (Sal. 37:29).

6, 7. ¿Imanirtaq mëtsikaq nunakuna Jesusman creikuyarqantsu?

⁶ Rikanqantsiknömi Jehoväqa alabamënintsikta munan. Pero ¿imataq michäkunman tsë alabanzata chaskinata? Tsëtaqa michäkunman Diospa rikëninchö mana alli këkaq nunakunapa pensëninta precisaqpaq churanqantsikmi. Tsëmi pasarqan Jesus kawanqan witsan mëtsikaq mandakoqkunata. Rikärishun apóstol Juan pëkunapaq ima ninqanta: “Atscaqmi Jesusman creyicuyarqan. Peru fariseucunata mantsarninmi, defrenteqa Jesusman creyicuyanqanta willacuyarqantsu, porqui mantsayarqanmi ellucayänan wayipita qarquyänanta. Pecunaqa ichicllam gustayaq Diospita alabashqa queta; masqa gustecuyaq nunacunapeq alabashqa quetam” (Juan 12:42, 43). Pero más alliqa kanman karqan farisëokuna niyanqankunata mana precisaqpaq churayanqanmi.

⁷ Yachatsikunqan witsanmi Jesus nirqan imanir mëtsikaq nunakuna mana chaskiyanqanta, ni pëman mana markäkuyanqanta (lei Juan 5:39-44). Israel nacionqa mëtsika watakunapanam Mesias, o Cristu chämunanta shuyarëkarqan. Y Danielmi imë chämunampaq kaqta willakushqana karqan. Tsënö kaptinchi, Bautizakoq Juan yachatsikoqta rikärirnin mëtsikaq nunakuna, “shuyaconqantsic Dios Acrashqanchi pëqa” niyarqan (Luc. 3:15). Y tsëpita killakuna pasariptinmi Jesusqa yachatsikur qallëkurqan; shuyarayanqan Mesïasqa tsëchönam këkarqan. Pero llakikïpaqqa karqan, Diospa Leyninta alleq reqeqkuna Jesusta mana chaskiyanqanmi. Jesusqa clärom willakurqan imanir mana chaskiyanqanta, kënömi nirqan: “Qamcunaqa quiquiquicuna purallam alabanaquita ashiyanqui, peru Diosllawan allicho quedetaqa manataq ashiyanquitsu. Tseno quecar, ¿Imanoparaq noqaman marcäcuyanquiman?”.

8, 9. ¿Imanötaq nunakunapita alabanzata chaskita munanqantsik, Diospa alabanzanta chaskinata michäkunman? Juk igualatsikïwan willakaramï.

⁸ Diospita alabanzata chaskinatam tsapanman, nunakuna alabamänata munanqantsikqa. ¿Imanötaq tsëqa pasakunman? Tsëta entiendirinapaqqa aktsiwan igualaratsishun. Ciëloqa tukï aktsiwanmi junta këkan. ¿Yarpankiku paqaspa ciëloman rikärirnin mëtsika qoyllurkunata rikärinqëkita? “Sielucho quecaqcunapa shumaq quenincunaqa” espantashqatam dejamantsik (1 Cor. 15:40, 41). Pero atska luzkunayoq markapita ciëloman rikärirninqa, ¿igual-llatsuraq shumaqta rikashwan? Manam. Tsë markapita luzkunaqa manam dejamäshuntsu qoyllurkunata shumaq rikarnin kushikunata. ¿Imanir? Tsë luzkuna más amänuntsikchö karninmi, Jehová kamanqankunata rikänata tsapämäshun. Jehová kamanqankunata paqaspa shumaq rikänapaqqa, amänuntsikchö luzkunatam upitsinantsik, o manaqa, mana luz kanan sitiokunataran ëwanantsik.

⁹ Markakunachö luzkuna amänuntsikchö kanqannöllam, nunakunapa alabanzanta chaskita munëpis shonquntsikchö këkanman, y tsëmi tsapanman Jehoväpita shamoq alabanzata  precisaqpaq churanata. Atskaq nunakunam Diospa yachatsikïninta chaskikïta munayantsu, amïgonkuna o familiankuna imatapis niyänanta mantsapakurnin. Pero ¿ima nishwantaq Diosta sirweq kaqkunapaqqa? ¿Pëkunapis nunakuna alabariyänanta munariyanmantsuraq? Pensarishun juk joven llapankuna reqiyanqan sitiochö Diospita yachatsikunampaq kaqman, pero pipis musyanmantsu Jehoväpa testïgon kanqanta. ¿Yachatsikïkanqanta rikëkur penqapäyänantatsuraq mantsanqa? O jina pensarishun juk cristiano Diospa kaqkunata más precisaqpaq churaptin, wakinkuna asikuyanqanta. ¿Imataraq ruranqa? ¿Diospa kaqta mana musyaq nunakunapa pensëninkunatatsuraq precisaqpaq churar qallëkunqa? ¿Y juk cristiano alläpa jatun jutsata rurashqa karninqa? ¿Congregacionchö alli rikashqa këninta oqrëta mantsar o familianta y amïgonkunata llakitsita mantsartsuraq willakunmantsu? Jehoväpa rikëninchö alli kë pëpaq más precisaptinqa congregacionchö ‘mandacoqcunatam’ o anciänokunatam yanapayänampaq mañakunqa (lei Santiagu 5:14-16).

10. a) Wakinkuna noqantsikpaq imata pensayanqanman alläpa yarpachakushqaqa, ¿imaraq pasamashwan? b) ¿Imataraq tarishun humilde karqa?

¹⁰ ¿Imataraq rurashwan alli cristiano këta sinchikïkashqapis juk wawqi consejaramashqa? Shumaq consejamanqantsikqa yanapamäshun humilde kashqallam. Tsëmi ni imanöpapis tsapäkunantsiktsu mana allita ruranqantsikpitaqa. O juk cristiano mayintsikta yanapanapaq niramashqaqa, ¿alleq pensëkur ruranqantsikpita y sinchikunqantsikpitatsuraq alabamänata shuyarashwan? Imëllapis tsëkunapa pasarqa, yarpäshun “pipis humilde kaqqa alabashqam kanqa” neq palabrakunata (Prov. 29:23).

11. ¿Imanötaq sientikushwan ruranqantsikpita pipis alabaramashqa, y imanir?

¹¹ Anciano këta munaqkuna o anciänona kaqkunaqa manam shuyaräyanmantsu nunakuna alabayänanta (1 Tes. 2:6; 1 Tim. 3:1). Tsënö karqa, ¿imanötaq juk wawqi chaskikunman ruranqankunapita pipis alabariptin? Manam rey Saulnö alabakurnin tukïta ruranmantsu (1 Sam. 15:12). Yarpänanmi Jehová kuyakïninwan yanapaptinraq ruranqankuna allilla yarqapunqanta. Jina tsënöllam yarpänan shamoq tiempochö ruranampaq kaqkunapis Jehoväpa bendicionnimpita y yanapakïnimpitaraq kanqanta (1 Ped. 4:11). Pipis alabaramashqa imanö sientikunqantsikmi rikätsikunqa nunapa o Jehoväpa alabanzanta ashikanqantsikta (Prov. 27:21).

12. ¿Imanirtaq wakin judïokunaqa Jesusta wiyëta munayarqantsu?

¹² Dios alabamänataqa jina michäkunman mana alli munënintsikkunam, y tsëta cäsorninqa itsa rasumpa kaqtaqa wiyëta munashuntsu (lei Juan 8:43-47). Jesusmi nirqan wakin judïokunaqa Diablupa munëninta rurarnin Pë yachatsikunqanta mana wiyakuyanqanta. Kënömi nirqan: “Qamcunapa tëtequicunaqa diablum. Pepa carmi, gustunta ruraquicayanqui”.

13, 14. a) ¿Imataq musyakashqa imachö peqantsik yanapamanqantsikpita y nunapa voznimpita? b) ¿Imapitataq kanqa pitapis wiyëta munanqëkiqa?

¹³ Imëpis gustamanqantsik kaqllatam wiyëta munantsik (2 Ped. 3:5). Jehovämi kamamarquntsik wiyëta mana munanqantsiktaqa cuentaman mana churanapaq. Tsëta tantianëkipaq këta rurë: kanan hora imakunata wiyëkanqëkita yupë. Itsa tsëta manaraq rurarqa mana precisaq kaqkunataqa wiyarqunkitsu. Tsëmi rikätsikun, tsë hörallachö mëtsika cösaskunata wiyëta puëdirnimpis, peqëkiqa más precisaq kaqllata wiyanëkipaq yanapëkäshunqëkita. Tsënö kaptimpis, musyakashqam nunapa vozninta wiyarirqa, tsë hörachöqa juk cösaskunata alleqllaqa wiyëta manana puëdinqantsikta. Ishkaq nunakunata tsë hörallachö parlaqta wiyarninqa, mëqan kaqtapis wiyanapaqqa akranantsikran, porque ishkantaqa manam tsë hörallachö entiendita puëdishwantsu. Wiyanapaqqa akrashun wiyëta munanqantsik kaqtam. Diablupa munëninta ruraq judïokunaqa, Jesusta mana wiyayänampaqmi churapakäyarqan.

 ¹⁴ Proverbios librom yachëtawan upa këta ishkë wayikunatawan igualatsin (Prov. 9:1-5, 13-17). Iskankunam, yachëwan upa kë, cäsonata munarnin tsë hörallachö shumaqkunata parlapämantsik. ¿Mëqantaraq wiyashun? Tsëqa kanqa mëqantapis kushitsita munanqantsikpitam. Jesusqa nirqan üshankunaqa pëpa vozninta wiyayänampaq kaqtam (Juan 10:16, 27). Jina nirqanmi, pëkunaqa “rason caqta” wiyakoqkuna kayanqanta y mana reqishqakunapa voznintaqa ‘mana reqiyanqanta’ (Juan 10:5; 18:37). Humildäwan tsëta ruraq kaqkunataqa Diosmi alaban (Prov. 3:13, 16; 8:1, 18).

15. ¿Imanirtaq Pablu tukï sufrimientokunapa pasanqanqa wakinkunapaq alabanza karqan?

¹⁵ Jehoväpa munëninta imëpis rurëta sinchikunqantsikmi yanapakun wakinkunapis Diospita alabanzata chaskiyänampaq. Apóstol Pablum Efeso cristiänokunaman kënö nir qellqarqan: “Tsemi roguecuyaq que sufrimientücunata ricarnin, mana desanimacuriyänequipaq. Antis queqa qamcunapa bienniquicunapaq [“alabancëkikunapaq”, NM] catsun” (Efes. 3:13). ¿Ima nïtataq munëkarqan? ¿Imanirtaq tukï sufrimientokunapa pasanqanqa wakinkuna alabanzata chaskiyänampaq karqan? Porque tukï mana allikunapa pasëkarnimpis cristiano mayinkunatam yanapëkarqan; tsënömi rikätsikurqan Diosta sirwiqa imawampis mana igualanqanta. Tukï sufrimientokunapa pasarnin Diosta sirwita jaqirirqa, ¿manatsuraq Pablu rikätsikïkanman karqan Jehoväwan amigo kë, awnikunqanman shuyarë y yachatsikur purinqan mana precisaqpaq kanqanta? Alli tsarakunqanwanmi rikätsikurqan Jesuspa qateqnin këqa alläpa precisanqanta y noqantsikpis tsënölla ruranantsik alläpa precisanqanta.

16. ¿Imataq Pabluta pasarqan Listra markachö?

¹⁶ Pablu kushishqa kanqan y alli tsarakunqanqa wakin cristiänokunata allipachi yanaparqan. Hechos 14:19, 20 textom kënö willakun: “Tsepitanam israel nunacuna Iconiu y Antioquia marcacunapita chäriyarqan. Pecunam tse nunacunata willaparnin, jucnopa cäyitsiyarqan. Tsenam Pabluta sellama tsampiquicuyarqan. Y wanushqanta pensarninnam, qaracharcur tse marcapa [Listrapa] jaqninman jitariyarqan. Peru tseman Jesusman jiruroq creyicoqcuna juntacäriyaptinnam, Pablu juclla sharcaramurnin, tse marcaman yape yecurerqan. Waräninnam Bernabewan eucuyarqan Derbe marcata”. ¡Imanö alli ejemplom këqa! “Wanushqam” nir jitarishqa kayaptimpis waräninqa chakipam 100 kilömetrosta viajarqan.

17, 18. a) ¿Imanirtaq nintsik tukï sufrimientokunata Pablu pasanqampita Timoteu ‘alleq musyanqanta’? b) ¿Imanötaq Timotëuta yanaparqan Pablu tukï sufrimientokunata pasarnin alli tsarakunqan?

¹⁷ Hechos libro mana willakuptimpis Pablutaqa Timotëuchi yanapëkarqan. Pablu Timotëuman  qellqanqanta rikärishun, kënömi nirqan: “Peru qamqa allim musyanqui: alli yachatsicoq canqäta, alli cawacoq canqäta [...]. Qam llapantam allipa musyanqui Antioquiacho [qarqushqa karqan], Iconiucho [wanutsita munayarqan] y Listra marcacunacho [rumiwan tsampiyarqan o saqmayarqan] chiquir qaticachäyämar sufritsiyämashqanta, peru Teyta Diosmi tsecunapita salbamashqa” (2 Tim. 3:10, 11; Hech. 13:50; 14:5, 19).

¹⁸ Timotëuqa ‘allim musyarqan’ tukï sufrimientokunapa Pablu pasanqanta y alli tsarakunqanta. Tsëta rikarmi alläpa espantakurqan. Tsëmi, Listraman Pablu kutinqan witsampaqqa, Timotëuqa poqushqa cristiänona karqan, tsëmi “Listracho y Iconiucho Jesusman creyicoqcuna queno niyarqan: ‘Pëqa allapa alli ruraq nunam’ nirnin” (Hech. 16:1, 2). Tiempowannam, Dios mandakunqannö kawanqampita más cargokunata chaskirqan (Filip. 2:19, 20; 1 Tim. 1:3).

19. ¿Imanötaq wakinkunata yanapanqa tukï problëmakuna kaptin alli tsarakunqantsik?

¹⁹ Jehoväpa munëninta mana utishpa rurashqaqa, wakinkunapis rikämarnintsikmi más sinchikuyanqa, y masqa jövenkunam. Rurënintsikqa, Diosnintsikpa kuyë sirweqninkuna kayänampaqmi yanapakunqa. Pëkunaqa alkäbullam këkäyan atska nunakunachö imanö parlakunqantsikta, imanö yachatsikunqantsikta y tukï problëmakunapa pasarnin imanö tsarakunqantsikta. Tsëmi, Pablunöpis wakinkunata yanapanarëkur y “salvaciunta tariyananpag” “ichicllapis mana ajayarishpa” sinchikur sïguinantsik (2 Tim. 2:10, NTCN).

20. ¿Imanirtaq imëpis ashïkashwan Diospa alabanzanta?

²⁰ ¿Manaku “Japallan Diospita shamoq alabanzata” ashirnin sïguishwan? (Juan 5:44, NM; 7:18; lei Romanos 2:6, 7.) Jehoväqa alli tsarakunqantsikpitam ‘imachopis cäsucoqcunata wiñe cawenintsic qoycamäshun’. Jina noqantsikta rikämarnintsikmi, jukkunapis alli tsarakuyanqa, tsënöpa imëyaqpis kawakuyänampaq. Tsënö këkaptinqa, ama permitishuntsu Diospita alabanzata chaskinantsikta imapis michämänata.