Bibliam kënö nir claro willamantsik: “Mana allicunata shonquncunacho yarpar[mi] quecunata rurayan: nunacuna wanutsinacuyan, majayoq quecarmi jucwan jucwan yachacuyan, mana majäcushpam jucwan jucwan puricuyan, suwacuyan, ulicuyan y ashanacuyan” (Mat. 15:19). Shonquntsik o imanö nuna kanqantsikqa, mana allimanmi chäratsimashwan y Dios chikinqan rurëkunata rurarirpis tukïnöpa tsapäkunapaqmi alli kanqanta pensatsimashwan. Quizás shonquntsik mana alliman apëkämanqantsikta cuentata qokushwantsu, hasta jutsata ruranqantsik hörayaq. Mana alli kaqta manaraq akrarnin, ¿imanötaq shonquntsikpa munëninkunata tantiashwan?

Cada junaqmi Bibliata leinantsik y leinqantsikman yarpachakunantsik.

Apóstol Pablum qellqarqan, “Diospa palabranqa kawëkaqmi, y alläpa poderyoqmi, ishkan lädopa fïluyoq ima espädapitapis más fïlum, y yëkurin almata y espïrituta” rakinqanyaqmi, nirnin. Palabranchö Dios nimanqantsikqa, “puëdinmi pensëkunata y shonqupa munëninkunata musyëta” (Heb. 4:12, NM). Bibliaqa alläpam yanapakun shonquntsikchö ima kanqantapis musyanapaq. Estudiarninqa alleqmi rikänantsik pensënintsik y rurënintsik imanö kanqanta. Tsëmi alläpa precisan Bibliata cada junaq leinantsik y leinqantsikman yarpachakunantsik. Tsënöpam Jehová rikanqannölla imatapis rikäshun.

Biblia ninqanta wiyakurnin ninqannölla rurarninqa, concienciantsiktam alli kanampaq yachatsishun. Tsënö rurashqam, imatapis mana allita rurashqaqa willamäshun y tukï mana alli portakïnintsikkunapita mana tsapäkunapaq yanapamäshun (Rom. 9:1). Jinamampis, Bibliachöqa tarintsik mana allikunaman  mana ishkinapaq atska ejemplokunatam (1 Cor. 10:11). Tsëkunapita yachakunqantsikmi yanapamäshun mana allikunaman mana ishkinapaq. ¿Ima mastataq rurashwan?

Diosta mañakushun yanapamänapaq.

Jehoväqa shonqukuna imanö kanqantam rikëkan (1 Crón. 29:17). Pëqa “shonquntsicpitapis mas puedeqmi [...,] llapantam musyecan” (1 Juan 3:20). Tsëmi pëtaqa ulipëta o llullapayta puëdintsiktsu. Yarparënintsikkunata, imanö sientikunqantsikkunata y munënintsikkunata shonqupita patsë willashqaqa, pëqa yanapamäshunmi munënintsik ima kanqanta musyanapaq. Hasta “limpio shonquta” qomänapaqpis mañakïta puëdintsikmi (Sal. 51:10). Shonquntsikpa munënin ima kanqanta musyanapaqqa, Diosman mañakunantsikmi alläpa precisan.

Reunionkunachö yachatsikayämunqanta alleq wiyakushun.

Tsënö rurarqa, shonquntsik imanö këkanqantam claro rikëta puëdishun. Rasunmi, casi musyanqantsikkunallapitam reunionkunachöqa yachatsikayämun, tsënö kaptimpis shumaq wiyakunqantsikqa alläpam yanapamantsik. ¿Imanir? Tsëchömi yanapamantsik Bibliapa musyatsikïninkunata alleq entiendinapaq, imanö këkanqantsikta rikäkunapaq y cambiota ruranapaq. Y cristiano mayintsikkuna parlakayämunqampis jina yanapamantsikllam (Prov. 27:17). Pero reunionkunaman mana ëwarninqa, rurënintsikkunallaman y problëmantsikkunallamanmi más yarpachakushun, y mana alli rurëkunatam akrarishwan (Prov. 18:1). Tsëmi kënö tapukunantsikqa alläpa precisan: “¿Mana faltëtaku llapan reunionkunaman ëwä y alleqku tsëchö yachatsikuyanqankunata wiyakö?” (Heb. 10:24, 25).

Traicionakoq shonquntsikqa tukï mana allikunamanmi chätsimashwan. Chusku peligrokunata rikärishun: shamoq tiempopaq qellëta ashïpita, licorkuna upyëpita, amïgokunapita y kushikï hörakunapita.

Shamoq tiempopaq qellëta ashi.

Necesitanqantsikkunapaq trabajëqa allillam. Tsënö kaptimpis, kapoqyoq këta imëkapitapis más precisaqpaq churëqa, alläpa peligroso kanqantam Jesus willakurqan. Juk igualatsikïwanmi parlarqan juk rico nunapa cosëchankuna churakunan sitio juntarinqanta, tsëna wakin kaq cosëchakunataqa mëmampis churëta mana puëdinqanta; y cosecha churakunan wayita juchuratsirnin juk más jatunta rurëta pensanqanta. Y tsë rico nunaqa kënömi pensarqan: “Mas jatusaqtana[m] rurashaq. Tseman cosechäcunata y llapan capamaqnïta churanäpaq.’ Tsenam shonqücho nishaq, ‘Atsca watapaqmi capaman imecapis. Cananqa manam afanacushaqnatsu uryeta. Micucur upucur, cushishqanam cacushaq”. Rasumpa kaqchöqa, manam tsë rico nunaqa yarpachakurirqantsu tsë paqas wanunampaq kaqllamampis (Luc. 12:16-20).

Edäyanqantsikmannömi alläpa yarpachakushwan awkinyarnin imanö mantenikunapaq kaqman. Y tsënö yarpachakurna, reunionkunamampis faltarnin y Diospa kaqchö rurënintsikkunata jaqirnin, más hörakuna trabajarnin qallëkushwan. Rasun kaqchöqa, tsëta rurëkanqantsikqa alläpa peligrösom kanman. Y joven karninqa, llapan tiempontsikwan Jehoväta sirwi alläpa alli kanqanta musyëkarqa, ¿imataraq rurashwan? ¿Trabajanan y qellëyoq këraq más precisaq kanqanta pensartsuraq, “tsëpitaran precursor  kashaq” nir kakushwan? ¿Manaku kanan witsan llapan puëdinqantsikmannö Diosnintsiktaqa sirwishwan? Rasun kaqchöqa, warë kawëkänapaq kaqllatapis manam musyantsiktsu.

Licorkuna upyë.

Proverbios 23:20 textom kënö nin: “Vïnota alläpa upyaqkunawanqa ama juntakïtsu”. Pipis alcoholta upyëta alläpa munaparqa, itsa seguido upyar qallëkunman, nïkurnam, “manam borrachëta munartsu upurï sinöqa alli sientikunällapaqmi” nirnin tsapäkunman. Alli sientikunallapaq alcoholta upyarqa, alläpam precisanman shonquntsikpa munënin ima kanqanta alleq rikänantsik.

Amïgokuna.

Trabäjochö, escuëlachö o yachatsikurnimpis, Diosta mana sirweq nunakunawanqa imëpis topëkantsikllam o parlëkantsikllam. Pero alläpa jukläyanam kanman pëkunawan juntakanqantsik o amigo këta munanqantsikqa. Tsënö rurarqa, capaz “alli nunakunam kayan” nirnin tsapäkushwan. Pero Bibliaqa clärom kënö consejamantsik: “Mana alli amigucunaqa, llutantam yachatsishunqui” (1 Cor. 15:33). Imanömi limpio yakuman juk ishkë gota rakcha yakuta juturatsishqa llapan yaku rakchatakärin, tsënöllam, shonqupita patsë Jehoväta mana sirweq nunakunawan juntakashqapis Diosnintsikwan alli kënintsikta rakchatärinman. Tiempowanqa, pëkunanönam pensashun, vestikushun, parlashun y portakushumpis.

Kushikï hora.

Kanan witsanqa, kushikunapaq cösaskunata tukïkunatam jorqayämun, pero wakin kaqkunaqa manam cristiänokunapaqnötsu. Apóstol Pabluqa nirqanmi rakcha o qanra rurëkuna o cösaskunaqa noqantsikchö mana kananta (Efes. 5:3). Pero shonquntsik rakcha o qanra cösaskunata rikëta o wiyëta munaptinqa, ¿imataraq rurashwan? Itsa nishwan, “cada ünom necesitantsik imallawampis kushikuritaqa, y imata ruranantsikpaq kaqmanqa manam pipis mëtikamunmantsu”. Tsënö pensëman mana ishkinapaqqa, Pablu consejakunqanta imëpis wiyakushun, y ama permitishuntsu rakcha rurëkuna nawintsikpa ni rinrintsikpa yëkunanta.

Traicionakoq shonquntsik engañamashqantsik kaptimpis y mana alli ruranqantsikpita tsapäkïta yachakashqa karpis, mana alli rurënintsiktaqa dejëta puëdintsikmi (Efes. 4:22-24). Tsënö rurayanqampita ishkëllata rikärishun.

Miguelqa * imëkayoq këta precisaqpaq churanqantaqa dejarqanmi. Pëmi nin: “Warmï, wamrä y noqaqa; más alli kaqta, tsëraq yarqamoq mäquinakunata y imëkayoq kawëta precisaqpaq churaq markapitam kayä. Imëkayoq këta precisaqpaq mana churëllapam, kë mundota provechëta munarqä. Ichik tiempollachömi cuentata qokurirqä imëkayoq këta ashiqa, mëmampis mana chätsikoq nänipa viaje cuenta kanqanta. Pensënïta y shonqöpa munëninta cambiëta yanapamänampaqmi Jehoväta mañakurqä, jina nirqämi familiäwan junto llapan puëdiyanqämannö sirwita munayanqäta. Necesitäyanqäkunallawanna kawayänäpaq y Diospita yachatsikoqkunata necesitäyanqan markakunata yanapakoq ëwayänäpaqmi churapakäyarqä. Tsëpita ichik tiempollatanam precursor tikrariyarqä, y alleqmi rikäyarqö, kushishqa kawakunapaqqa, kapoqyoq kë mana precisanqanta”.

Lee jutiyoq cristiano pasanqanmi, rikätsimantsik imanöpis këkanqantsikta alleq rikäkunapaq. Pëqa imanöpis këkanqanta alleq rikäkurirmi mana alli amïgonkunata dejarqan. Lee cristiänom kënö willakun: “Trabäjörëkurmi juk nacionpita negociota apamoq nunakunawan juntakoq kä. Tsë juntakäyanqächö alläpa upyayanqanta musyëkarpis, tsëman ëwëtaqa gustaqmi kä. Atska kutim casi borracharqä, y tsëpitam concienciäqa mana alli sientikatsimaq. Tsëmi alläpa precisarqan shonqöpa munënin ima kanqanta alleq rikänä. Bibliapa consëjonkuna y anciänokuna consejayämanqanmi yanapamarqan tsë problëmaman ima apëkämanqanta musyanäpaq, juk parlakïchöqa, Jehoväta mana sirweq nunakunawan mana juntakunäpaq. Kananqa telëfonollapanam negociöta atiendï, negociota apamoq nunakunawampis casi mananam takukänatsu”.

Kikintsikwanmi honrado kanantsik, y alleqmi musyanantsik shonquntsikpa munëninkuna ima kanqanta. Tsëta musyanapaqqa Jehoväpa yanapakïnintam mañakunantsik, “pëqa musyannam shonquntsikchö imapis pakaranqanta” (Sal. 44:21). Jina Palabran Bibliawampis yanapamantsikmi, imëka espejo cuentam imanö nuna kanqantsiktapis rikäratsimantsik (Sant. 1:22-25). Jinamampis, publicacionkunachö y reunionkunachöpis tukï consëjokunatam chaskintsik. Kë llapan yanapakïkunawanqa shonquntsikta allim cuidashun y Jehová kuyanqan kaqtam rurashun.