Gran Bretaña nacionchö pasakunqan willakïkunam yanapashunki imëpis shuyarëta mana jaqinëkipaq. Jina rikätsishunkim “yaku jananman tantëkita” jitanëkipaq imata ruranëkipaq kaqta y rasumpa kaq yachatsikïta manaraq musyaqkunata imanö yanapanëkipaq (Ecl. 11:1).

Mana jaqita tsarakïtaqa manam qonqanëkitsu. Rasumpa kaqchö tsarakunëki y Jehoväwan këkänëkiqa alläpam precisan (Deut. 10:20). Tsëtam rurarqan Georgina. 1970 watachö Jehoväpa testïgonkunawan Bibliata yachakur qallëkuptinmi, nunam Kyriacosqa alläpa piñakurqan. Bibliapita yachakïkanqanta jaqitsinanrëkurmi tukïta rurarqan, y manam munarqantsu Testïgokuna wayinman yëkuyänanta, y publicacionkunatapis ushakätseqmi.

Reunionkunaman Georgina ëwar qallëkuptinnäqa masran piñakïkurqan. Juk kutim Jehoväpa Testïgonkuna Yachatsikuyänan Wayiman ëwarqan pleitota ashir. Tsënam, tsëchö këkaq juk pani cuentata qokurirqan kë nunaqa inglés idiömapitapis griego idiömata más alli parlanqanta, y tsë nunata yanapanampaqmi telëfonopa qayarirqan griego idiömata parlëta yachaq wawqita. Kyriacosqa alläpam espantakurqan kë wawqi shumaq kuyëpa parlapanqampita y hasta Bibliatapis juk ishkë killakunapa estudiarmi qallëkurqan. Pero tsënö këkarmi illaqpita estudiëta jaqirirqan.

Jina Georgïnaqa kima wata maspam nunan michäkunqanta aguantarqan. Y bautizakuptinqa jaqirir ëwakunampaq kaqtam nunan nirqan; tsëmi Georgïnaqa nunan mana jaqinampaq bautizakunqan junaq Jehoväta mañakurqan. Georgïnata asamblëaman pushayänampaq wawqikuna wayinman chäriyaptinmi Kyriacosqa, kënö nirqan: “Puntarëkäyë, cärrökunawanmi qepëkikunata shayämushaq”. Mediodiayaqmi asamblëachö quedakurqan, ¡warmin bautizakoqtapis rikarqanmi!

Tsëpita patsëmi Kyriacosqa cambiar qallëkurqan, y tiempowannam bautizakurirqan. Georgina Testïgokunawan parlar qallanqampitaqa, ¿ëka watakunataq pasashqa karqan? ¡Casi 40 watakunam! Kyriacosmi kënö nin: “Alläpam kushikö warmï alli tsarakunqampita”. Y Georgïnanam kënö nin: “Michäkïkaptimpis noqaqa Jehoväta mana jaqinäpaqmi decidishqa karqä. Tsë llapan watakunam Jehoväta mana jaqita mañakoq kä y nunätaqa shuyarëkaq kä”.

Jina majata yanapanapaqqa alläpam precisan mushoq nuna këta o cristiänonö kawëta procuranantsik. Apóstol Pëdrum casado warmikunata kënö consejarqan: “Casadu warmicuna, Diosnintsicpa alli willaquininman qowequicuna mana creyiyaptinpis, pecunapa mandaduncho cawacuyë. Tsemi respetosa y alli cawacuyanqequita ricarnin, qowequicunapis Diosnintsicmanna paqwepa creyicuyanqa, Diosnintsicpaq mana parlapëcaptiquipis” (1 Ped. 3:1). Tsë consëjotam Christïneqa wiyakurqan, pero tsënö kaptimpis atska tiemporan pasarqan nunan John cristiano tikranampaq. 20 watapitapis masnam Christine Testigo këman chanqampita pasarirqan, y nunanqa Diosman creita manam precisaqpaqtsu churaq. Pero religión asunto mana gustëkaptimpis cuentata qokurirqanmi warminqa markäkïninta alläpa precisaqpaq churanqanta. Johnmi kënö nin: “Markäkïninwan alläpa kushishqa kanqantam cuentata qokurirqä. Ima problema kaptimpis shonqupita patsëmi tsarakoq, y tsëmi noqatapis yanapamarqan tukï problëmakunapa pasaqtï”.

Christïneqa manam nunanta imëpis obligarqantsu religionninman yëkunampaq. Johnmi kënö yarpan: “Christïneqa qallanampita patsëmi cuentata qokurqan, obligamaptinqa mana cäsonäpaq kaqta, tsëmi alläpa pacienciawan y munanqänö ichikllapa ichikllapa yanapamarqan”. Täpakoq o ¡Despertad!, revistakunachö Johnta gustanqampaqnö imapis kaptinqa rikäratseqmi y “këta leita itsa gustankiman” nireqmi.

Jubilakurirninqa Johnqa wakin tiemponwan jardintam cuidaq. Yarpachakïninkuna alläpa mana kaptinmi, kawëninchö más precisaq kaqkunapaq yarpachakur qallarqan y kënömi tapukoq: “¿Këchöqa këkantsik mana kaqpita illaqpita yuriramurku o imarëkurpis kamashqa karku?”. Juk kutim juk wawqi pëwan parlarqan y Bibliapita yachakïta munanqanta o mana munanqantam tapurirqan. Johnmi nin: “Awnirirqämi, porque Diosmanmi creirna qallëkarqä”.

¡Christine atska watapa shuyaranqanqa alläpam precisarqan! 20 watakunapa nunan cristiano këman chänampaq Diosman mañakunqampitam bautizakoqta rikärirqan. Kananqa ishkanmi Jehoväta kushishqa sirwiyan. Johnmi kënö willakun: “Rasumpa kaqman chätsimaqnïqa ishkë cösaskunam karqan. Punta kaqqa karqan, Testïgokunapa kuyakoq këninmi. Ishkë kaqnam karqan, Jehoväta sirweq warmiwan casado kanqä, porque pëqa rasumpa kuyakoq, markäkïpaq y rurëninkunatapis cumpleq warmi  kanqantam rikätsikoq”. Christïneqa 1 Pedru 3:1 texto ninqan consëjotam wiyakurqan y pasakunqanqa tsë texto rasumpa cumplikanqantam rikätsimantsik.

¿Imataq pasakun pipis Bibliata shumaq estudiëkar illaqpita yachakïta jaqiriptin?” Rey Salomonmi kënö qellqarqan: “Qoyapa murïkita murï, y tardeyanqanyaq makikita jamatsitsu; manam musyankitsu mëchö wayunanta, këchö o wakchö, o ishkan lädochö wayunampaq kaqtapis” (Ecl. 11:6). Höraqa atska watakunaran pasan rasumpa kaq muru winanampaq y Jehoväman witi alläpa precisanqanta nunakuna entiendiyänampaq (Sant. 4:8). Tsëmi, quizás mana pensanqantsik hora kushikïpaq noticiata chaskirintsik.

Tsëmi pasakurqan Indi nacionpita Inglaterra nacionman ëwakushqa Alice jutiyoq warmiwan, pëmi 1974 watachö Bibliata estudiar qallarqan. Indi idiömatam parlaq, pero tsënö karpis inglés idiömatam maslla yachakïta munaq. Atska watapam Bibliata estudiarqan, y inglés idiömata parlaq congregacionmanmi hora hora reunionkunaman ëwaq. Yachakïkanqan rasumpa kaq kanqanta musyëkarpis, pëqa manam precisaqpaqtsu churaq. Pero qellëta ashillapaqmi más yarparaq y fiestakunaman ëwëtaqa alläpam gustaq. Tiempowanqa Bibliapita yachakïta jaqirirqanmi.

Tsëpita 30 watanö pasariptinmi, Bibliapita unë yachatseq Stella jutiyoq Testïgoman, Alice cartakurqan. Cartanchömi kënö nirqan: “Alläpachi kushikunki 1974 watachö Bibliapita yachatsinqëki estudianteki kë último kaq jatun asamblëachö bautizakurinqanta musyarir. Qamqa kawënïchö alläpa precisaqmi karqunki. Rasumpa kaq murutam noqaman mururqëki, y tsë witsankuna Diosta sirwinäpaq listo mana këkarnimpis, peqäman y shonqömanmi churarirqä”.

¿Imataq pasakushqa karqan? Alïcem willakun, 1997 watachö nunan wanuriptin alläpa llakishqa quedarinqanta. Y tsënö këkar Diosman mañakuriptin 10 minütospis manaraq pasaptin panjabí idiömata parlaq ishkaq Testïgokuna punkunta takakuriyanqanta y ¿Wanushqakuna kawariyämunqatsuraq? neq tratädota jaqipuyanqanta. Mañakïninta Dios contestashqa kaptinmi, Jehoväpa testïgonkunata ashir qallëkurqan. ¿Mëchöraq tarinman karqan? Panjabí congregacionpa direccionninta Stella qonqantam juk makwa apuntakunan cuadernochö taririrqan. Y Yachatsikuyänan Wayiman chäriptinnam wawqikuna y panikuna kushishqa chaskiriyarqan. Pëmi kënö nin: “Alläpa kuyëpa chaskiyämanqantaqa manam qonqarqätsu y manam alläpaqa llakikurqänatsu”.

Alïceqa llapan reunionkunamanmi ëwar qallëkurqan y yapëmi Bibliapita yachakur qallëkurqan, jina yachakurqanmi panjabí idiömata alleq parlëta y leitapis. 2003 watachömi bautizakurirqan. Stëllaman qellqanqan cartaqa kënö nirmi usharqan: “Gracias 1974 watachö noqaman kë muruta murunqëkipita y noqapaq juk ejemplo kanqëkipita”.

“Gracias 1974 watachö noqaman kë muruta murunqëkipita y noqapaq juk ejemplo kanqëkipita.” (Alice)

¿Kë pasakunqan imatataq yachatsimantsik? Quizás shuyaranqëkipitapis más tiemporaq pasanqa, juk nuna humilde kaptin y Jehoväpa kaqta musyëta munaptinqa, Pëqa yanapanqam shonqunchö tsë muru winanampaq. Yarpë, juk igualatsikïwan yachatsikur Jesus kënö ninqanta: “Chacrancho muronqannam jeqaramur winan. Peru imano winanqantapis manam tse nuna musyantsu. Mururishqaqa quiquinllanam jeqaramur winarirnin, espigarir poquramun” (Mar. 4:27, 28). Tsë muruqa “quiquinllanam jeqaramur” ichikpa ichikpa winaramun. Ama qonqëtsu mëqan yachatsikoqpis muru imanö winanampaq kaqta mana musyanqanta. Tsënö kaptinmi, kushi kushilla murïtaqa jaqinëkitsu, y mëtsikatam cosechanki.

Jina Diosman mañakïtapis precisaqpaq churë. Georgïnawan Christïneqa mana jaqitam mañakuyarqan. ‘Imepis mañaquicarqa’ y shuyarëta mana ajayarqa “atska junaqkunatam” ‘yaku jananman tantëki’ jitanqëkiwan tinkurinki (Rom. 12:12; Ecl. 11:1).