JESUSQA willakurqan tsë templota ushakätsiyaptin “ni juc rumillapis perqarëcarqa” mana quedanampaq kaqtam, tsënö willakunqanqa cumplikärirqan romano tropata mandaq Titu dirigiptin, 70 watachö romänokuna Jerusalenta ushakäratsiyanqanwanmi (Mat. 24:2). Atska pachak wata pasariptinmi, Juliano jutiyoq emperador Jerusalen templota yapë sharkatsita munarqan.

Constantino I el grande nishqan nunapa sobrinon Juliänopaqmi niyan, Römapa último kaq emperadornin kanqanta y Jehoväman mana creikoq nuna kashqa kanqanta. Cristiänokunapa yachatsikïninta chaskishqa karnimpis, 361 watachö emperador tikrarirqa, Jehoväman mana creikoq nunakunapa biennin yarqunanrëkurmi, mana alli rurëninkunarëkur llapan cristiänoyukoqkunata negarirqan. Tsërëkurmi unë librokunachöqa pëpa jutin yurin “Diospa contranman tikrashqa” nir.

Juliänoqa itsa cristiänokunata chikirqan, joqta watayoq këkaptin cristiänotukoqkuna teytanta y wakin familiankunata wanutsiyanqampita. Atskaq willakoqkunam niyan, Jesusta, uli o llulla profëtatanö rikätsikunanrëkur, Jerusalen templota yapë sharkatsiyänampaq judïokunata animanqanta. *

Juliano, templota sharkatsita munanqanqa rasumpam karqan. Tsënö kaptimpis, manam musyëtsu sharkatsita qallanqanta o manapis, o qallashqa kaptinqa manam musyëtsu imanöpa tsë trabäjota jaqirinqanta. Pero këtam sïqa alleq musyantsik: Juliänoqa wanurqan ishkë watatapis mandakurnin manaraq cumplirninmi, y tsëchömi templota sharkatsita munënimpis ushakarqan.