Unë tiempuchöqa, atska markakunam alläpa mana alli ruraq nunakunapita, wakintaqa, qeruman warkurkur wanutsiyaq. Romänukunaqa kawëkaqtam qeruman warkuyaq o clavayaq, tsëmi atska junaqkunapa nanatsikur, yakunar y mallaqar wanoq. Kënö wanunan alläpa penqakïpaq kaptinmi, tsënöqa wanutsiyaq alläpa mana alli kaq nunakunallata.

¿Tsënötsuraq israelïtakunapa tiempunkunachöpis nunakunata wanutsiyaq? Moises qellqanqan Leymi kënö mandakurqan: “Pipis jatun jutsata ruranqampita wanutsiyänampaq sentenciashqa karninqa, wanutsishqam kanman, y ayanta qeruman warkushqa karqa, manam entëru paqas qeruchö ayan warkuranmantsu; tsëpa rantinqa, tsë junaqllam pampankiman” (Deut. 21:22, 23). Clärum këkan, Escrituras Hebreas nishqanta qellqayanqan witsankunaqa, pitapis qeruman warkuyänampaqqa, puntataqa wanutsiyaqraq.

Tsëpaq parlarmi Levïticu 20:2 textu kënö nin: “Israelpa mëqan tsurinkuna kar, o pipis forastërunö Israel markachö yachëkar, Mölekpaq tsurinta qorninqa, wanushqam kanman. Llapan nunakunam rumiwan tsampiyanman [saqmayanman] wanunqanyaq”. Jina “brüjakoq o suerti qateq” kaqkunapis tsënöllam castigashqa kayänan karqan, tsë ninanqa, rumiwan tsampipa o saqmaypam wanunan karqan (Lev. 20:27).

Jina Deuteronomiu 22:23, 24 textuchöpis tsënöllam nin: “Juk virgen shipash juk nunawan casakunampaq awnikushqa këkanman, y markachö taririr juk nuna pëwan punukïkunman, tsëqa ishkantam tsë markapa punkunman jorqëkur rumiwan tsampiyänëki [shaqmayänayki] y ishkanmi wanuyänan, shipash kaq mana qayarinqampita [qayaranqampita], y ollqu kaqna nuna mayimpa warminta humillanqampita. Tsënömi mana alli kaqtaqa qamkunapita ushakätsiyänëki”. Kë textukunachömi rikantsik, punta kaq israelïtakunaqa, rumiwan tsampipa o saqmaypa mana alli ruraqkunata wanutsiyanqanta. *

Deuteronomiu 21:23 textuqa willakurqan, “qeruman warkushqa kaqqa Dios maldecishqanmi” nirmi. Tsëmi ‘Dios maldecishqantanö’ nunapa ayanta qeruchö rikäyänampaq warkuyanqanqa, israelïtakunata yarpätseq tsënö mana kayänampaq.