30 watayoqpitapis masna, Angela * jutiyoq soltëra panim mantsapakushqa këkan. Congrecionnimpita anciänukuna visitayänantam shuyëkan, y imata niyänampaq kaqmanmi yarparëkan. Edäna nunakunata llapan junaqkuna cuidar trabajarninmi wayintaqa utishqana kutin, tsëmi, wakin wakin reunionkunamanqa ëwashqatsu. Jinamampis cada junaq ruranampaq kaqman y mamänimpa saludninmanmi alläpa yarpachakun.

Angelata watukanëki kaptinqa, ¿imanöraq animankiman? (Jer. 31:25.) ¿Imanötaq alistakunkiman pënö “utishqa almata” shumaq yanaparinëkipaq?

Höraqa llapantsikmi utishqa sientikuntsik, trabäjurëkur o Diospa kaqchö imëka rurapakïyoq karnin. Mana entiendinqan visionta rikëkurmi profëta Danielpis kënö nirqan: “Kallpannaqmi sientikurqä” (Dan. 8:27). Tsëpita tiempuwannam, Gabriel jutiyoq juk angel yanapanampaq yuripurqan. Tsë vision ima ninan kanqantam entienditsirqan y llapan mañakïninkunata Jehovä wiyanqanta y “alläpa yachanëpaq” nunatanö rikanqantam nirqan (Dan. 9:21-23). Jina tsënö yanapakoq palabrakunawanmi juk kutichöpis, kallpannaq këkaptin Danielta juk angel yanaparqan (Dan. 10:19).

Tsëmi, juk kallpannaq y llakishqa cristiänu mayikita watukaq manaraq ëwarnin imakunapa pasëkanqanman pensanëki. ¿Ima problëmakunapataq pasëkan? ¿Imanötaq tsë problëmakuna utikätsin? ¿Imakunachötaq kë cristiänu alläpa alli kanqanta rikätsikun? 20 watakunapa anciänunö yanapakoq Richard jutiyoq wawqin kënö nin: “Yarpachakö cristiänu mayïkuna imachöpis alli  kayanqanmanmi. Watukaq manaraq ëwarnin, imakunapa pasëkanyanqanman yarpachakurqa shumaq yanaparitam puëdï”. Juk anciänu yanaqäshunëki kaptinqa, ¿imanirtaq manaraq ëwarnin watukayänëkipaq kaq cristiänu imakunapa pasëkanqampita shumaq parlariyankitsu?

Itsa cuentata qokurqunki sientinqantsikpita parlëqa mana fäcil kanqanta. Tsënö kaptinmi, juk cristiänupaqqa fäciltsu kanqa sientinqampita anciänukunata willëqa. ¿Tsëqa imataraq rurankiman parlakamunampaq? Itsa kushi kushilla shumaq parlapäriptikiqa parlakaramunman. 40 watakunapana anciänunö yanapakoq Michael jutiyoq wawqim kënö nir parlapar qallanqanta nin: “Anciänukunapa juk shumaq rurëninkunaqa wayinkunaman watukaq ëwarnin cristiänu mayinkunata mas reqimi. Tsëmi kanan shamïtaqa alläpa munëkurqö”.

Allim kanman, parlar manaraq qallarnin Diosman mañakuriyanqëki. Apostul Pablu Diosman mañakurninqa, cristiänu mayinkunapa markäkïninkunapita, kuyakïninkunapita y alli sinchi tsarakuyanqampitam parlaq (1 Tes. 1:2, 3). Mañakunqëki höra cristiänu mayiki imanö nuna kanqanta kuyanqëkita parlarninqa, shonqïkita y pëpa shonquntam alistëkanki shumaq parlakuriyänëkipaq. Jinamampis shumaq parlapärinqëkiqa allim sientikatsinqa. Anciänunö alli yanapakoq Ray jutiyoq wawqim kënö nin: “Höraqa Diospa kaqchö imëka allikunata ruranqantsikkunatam qonqarintsik, tsëmi pillapis yarpäratsimashqaqa alläpa kushishqa sientikuntsik”.

Apostul Pablu ruranqannömi, Bibliata utilisarninqa, qampis puëdinki “espiritual qarëkunawan” yanapakïta (Rom. 1:11, NM). Këllaman pensarishun, pipis alläpa llakishqa këkarninqa, itsa mana imapaqpis välenqanta pensanman. Tsëqa itsa, salmukunata qellqaq “qarapita rurashqa [yakunnaq o tsaki] porongunö” sientikïkarpis, “Manam mandakunqëkikunataqa  qonqarqötsu” ninqampita parlapärinkiman (Sal. 119:83, 176). Kë textukuna ninqanta raslla entiendiratsirmi, nirinkiman, Dios mandakunqankunata pëpis mana qonqashqa kanqanta.

Jina Diosnintsikpaq rurëkunachö qelanashqakunata o congregacionpita karupäkurishqa kaqkunataqa yanapanman, juk warmi qellëninta oqranqampita Biblia willakunqan igualatsikïmi (Lüc. 15:8-10). Itsa tsë oqrakashqa qellëtaqa utilisarqan atska qellëkunawan rurashqa wallqampaq. Kë igualatsikïta entienditsirninqa, congregacionchö alläpa precisaq kanqanta entienditsita procurë. Tsëpitanam ninkiman, üshan kanqanrëkur, pëpaq Jehovä alläpa yarparanqanta.

Cristiänu mayintsikkunataqa alläpam gustayan Bibliapa textunkuna imata yachatsikunqampita parlakaramïta, tsëmi qamllaqa parlanëkitsu. Yanapanampaqnö juk textuta leyirapur, mëqan palabratapis akrarir tapuri, tsë palabrakunapita imata pensanqanta parlakaramunampaq. Këllaman pensari, 2 Corintius 4:16 textuta leyirapurmi kënö nir tapurinman: “¿Imëllapis mäkurqonkiku Jehovä kallpanwan yanapashunqëkita?”. Tsënö tapukïkuna rurëmi yanapayäshunki ‘jucninki jucninki’ animanakuyänëkipaq (Rom. 1:12).

Jina juk cristiänutaqa yanaparinmanmi, pë pasëkanqantanö unë nunakuna pasayanqampita Biblia willakunqankunapita parlapärinqëki. Itsa wakinkunaqa kallpannaq sientikurnin Änanö o Epafrodïtunöpis alläpa llakïkuyanman. Peru tsënö kaptimpis rikätsita puëdinkim, Diosnintsikpaqqa Änawan Epafrodïtuqa alläpa väleq imëpis kayanqanta (1 Sam. 1:9-11, 20; Filip. 2:25-30). Tsënö këkaptinqa, ¿imanirtaq Biblia willakunqan nunakunapa kawëninkunapita parlapärinkitsu?

Cristiänu mayikikunapaq yarpachakunqëkitaqa rikätsikunki, watukarirnimpis, pëkuna imanö këkäyanqampaq yarpararninmi (Hech. 15:36). Itsa manaraq ëwakurnin, yachatsikoq imë yarquyänëkipaq shumaq patsäratsiyankiman. Jina pensari, atska watakunapana anciänunö yanapakoq Barnard jutiyoq wawqi ruranqanman. Visitanqan cristiänuwan yapë tinkurirqa, consejanqanman yarparmi shumaqllapa kënö nir tapurin: “¿Imanötaq këkanki parlanqantsik asuntuchö?”. Cristiänu mayikikunapaq yarpachakurqa, rasllam cuentata qokurinki mas yanapanëkita wanayanqanta o mananapis.

Kanan witsankunaqa, imëpitapis masmi cristiänu mayintsikkunaqa wanayan tsapashqa këta, entiendishqa këta y kuyashqa këta (1 Tes. 5:11). Tsëmi, watukaq manaraq ëwarnin, imakunapa pasëkäyanqanman alleq yarpachakï. Jehoväta mañakï yanapashunëkipaq, y precisaq textukuna shumaq akrë. Tsëta rurarmi shumaq palabrakunata tarinki “utishqa almata” shumaq yanaparinëkipaq.