TSËNÖ ninqantam teytäpitaqa mas yarparä, pëqa qollmi shonqu y trabajador nunam karqan. Alli rurëkunatam kuyaq, tsëmi 1953 watachö, Biblia yachatsikunqanta wiyarir mas yachakïta munarqan. Tsëpita patsëmi, yachakïkanqampita llapan wamrankunata yachatsiyämanampaq sinchikurqan. Mamänïpaqqa sasa o ajam karqan, catölica karnin costumbrinkunata jaqinan, peru ichikllapa ichikllapam Bibliapa yachatsikïninkuna shonqunman chärirqan.

Teytäkunapaqqa manam fäciltsu karqan Bibliapita yachatsiyämänan, porqui papänïqa chakrachömi llapan junaqkuna trabajaq y mamänïqa manam leyita yachaqllatsu. Höraqa alläpa utishqa karninmi, estudiu höraqa punukäkureq. Peru sinchikunqanqa allipaqmi karqan. Mayor kaq wamran karmi, nanäta y turïkunata yachatsir yanapaq kä. Yachakuyanqä höraqa masqa parlayaq kayä, papänïkuna kënö nir imëpis yarpätsiyämanqampitam: “Noëqa alläpam familianta kuyarqan y tsëtaqa rikätsikurqan Diosta wiyakurninmi”. ¡Noëpa kawënimpita yachakïqa alläpam gustamaq! Ichik tiempullatanam, Adriatico lamar kuchunchö këkaq Roseto degli Abruzzi (Italia) nishqan markachö këkaq Yachatsikuyänan Wayiman, reunionkunaman ëwar qallëkuyarqä.

1955 watachömi, mamänïwan ëwayarqä punta asamblëäkunaman, tsëpaqqa 11 watayoqllaran karqä. Asamblëa kanan Röma markaman chäyänäpaqqa atska jirkakunatam pasayarqä. Tsëpita patsëmi asamblëakunataqa alläpa precisaqpaq churä.

Shamoqnin watallanam bautisakurirqä, y tsëpita ichik killakunallatanam, llapan tiempöwan Diospita yachatsikur qallëkurqä. 17 watayoq këkaptïmi, Römapa sur kaq lädunmampa këkaq Latina markachö precursöra especialnö sirwinäpaq churayämarqan. Tsë markaqa këkan wayïpita 300 kilömetrukuna karuchömi, y tsëllaraq patsakashqa marka kaptinmi, pipis alläpaqa yarpachakoqtsu nunakuna ima niyänanman. Precursöra mayïwan atska publicacionkunata nunakunapa makinchö jaqirpis y alläpa gustamaptimpis, alläpa jövinllaraqmi karqä y wayïtam alläpa llakeq kä. Tsënö karpis, niyämanqantam cäsukïta munaq kä.

 Tsëpitanam, Milan markata mandayämarqan, “Buenas Nuevas Eternas” nishqan atska nacionkunapaq asamblëapaq alistapakïchö yanapakunäpaq, tsë asamblëaqa rurakarqan 1963 watachömi. Tsëchömi atskaq cristiänu mayïkunawan juntu yanapakurqä. Tsë yanapakoqkunachömi këkarqan Florenci markapita Paolo Piccioli jutiyoq jövinpis. Asamblëapa ishkë kaq junaqninchömi soltëru këpaq parlaq juk shumaq discursuta ruramurqan. Y tsëta wiyarirmi kënö nir pensarqä: “Kë turiqa manachi imëpis casakunqatsu”. Tsënö karpis qellqanakurmi qallëkuyarqä y musyariyarqämi, imata munayanqä, Jehoväta kuyayanqä y cäsukïta munayanqaqa ishkäkunapapis igual-lla kanqanta. Y 1965 watachömi casakuriyarqä.

Florencia markachömi chunka watakunapa precursöranö yanapakurqä. Congregacionkuna miraqta rikëqa alläpa kushikïpaqmi karqan. Y mas kushikïpaqqa karqan jövin kaqkunata Diospa kaqchö poqoqta rikäyanqämi, pëkunawanmi, esposöwan ishkä kushishqa tiempökunata pasayaq kayä, Bibliapita parlakurnin o juk cösaskunata rurarnimpis. Paolotaqa alläpam gustaq pëkunawan pelöta pukllë. Rasumpam, noqaqa esposöwanmi mas tiemputa pasëta munaq kä, peru cuentatam qokoq kä jövinkuna y congregacionchö familiakunapis pëta wanayanqanta.

Alläpam kushikö, atskaq nunakunata Bibliapita yachatsiyanqäta yarparnin. Adriäna jutiyoq juk estudiantïkunam, ishkë familiakunata willarqan Bibliata yachakïkanqampita. Kë familiakunaqa juk cürawanmi willanakushqa kayänaq Kima Dios Jukllëllachö kanqanta y alma mana wanoq kanqanta parlayänampaq. Reunion höranam chärayämurqan kimaq precisaq cürakuna, peru estudiatïkunaqa rasmi cuentata qokuriyarqan yachatsikïninkunaqa pantatsikoq y contranakoq kanqanta y Bibliapa yachatsikïninkunawan mana igualanqanta. Tsë cürakunawan parlayanqaqä alläpam yanapakurqan, porqui tsë familiakunapitaqa 15 nunakunam cristiänu tikrariyarqan.

Rasunmi, kanan witsanqa imanö yachatsikunqantsik cambiashqanam. Peru tsë witsankunaqa, cürakunawanmi Paoloqa atska kuti Biblia ninqampita parlayarqan, y pëkunawan discutïtaqa alläpam yachëkoq. Atskaq mana testïgu nunakuna këkäyanqan sitiuchö juk kuti parlayanqantam yarpä. Cürakunaqa tsëchö këkaq nunakunatam puntallapitana yachatsishqa kayänaq, mana alli quedatsiyänanrëkur tapukïkunata rurayänampaq. Peru tsënö karpis, atska pachak watakunapana ruranqannö, polïticaman iglesia mëtikunqan alli o mana alli kanqanta tsëchö këkaq nuna tapukaramuptinmi, cürakunapaq parlar qallakëkurqan. Awmi, cürakunaqa mana allichömi këkäyarqan. Tsënam, illaqpita aktsi  upirirqan y reunion usharirqan. Tsëpita watakuna pasariptinnam musyariyarqä, tsë reunion pëkuna munayanqannö mana yarquptinqa, aktsita upiratsiyänampaq patsätsishqa kayanqanta.

Paolowan casakuyanqäpita chunka watakuna pasanqanchömi tapuyämarqan congregacionkunata watukaqnö yanapakïta munayanqäta o mana munayanqätapis. Tsëta akrananqa manam fäciltsu karqan, porqui Paoloqa alli trabäjuyoqmi karqan. Peru Diosman alli mañakïkur y alleq pensëkurmi tsë invitacionta chaskikuyarqä. Posadatsiyämaq familiakunawanqa shumaqmi pasayaq kayä. Seguïdum pëkunawan paqaskunapa Bibliata yachakuyaq kayä, y nïkurnam, Paoloqa wamrakunata tarëankunawan yanapaq, y masllaqa matemätica kaqwanmi. Paolotaqa alläpam leyiqa gustaq y yachakunqankunataqa wakinkunata kushishqam willaq. Cäsi llapan luniskunam testïgukuna mana kanqan sitiukunata yachatsikoq ëwayaq kayä, tsë paqas discursu wiyakoq shayämunampaqpis nunakunata invitayämoqmi kayä.

Ishkë watakunapa congregacionkunata watukaqnö yanapakïkäyaptïmi, Roma markachö këkaq Betel wayichö yanapakuyänäpaq invitayämarqan. Paoloqa Ley Asuntuchö Yanapakoqkunawanmi trabajarqan y noqanam Publicacionkunata Mañakuyanqan oficïnachö yanapakurqä. Tsëkunachö yanapakuyänäqa, manam fäciltsu karqan, peru wiyakoq kayänäpaqmi churakäyarqä. Alläpa kushikïpaqmi karqan sucursal winaqta rikë y Italia nacionchö Jehoväpa testïgukuna mirayanqanta rikëqa. Jinamampis tsë witsankunapaqqa, Testïgukunapa rurëninkunatam autoridäkuna tsë nacionchö reconociyarqan. Alläpa kushishqam sientikuyarqä Betelchö yanapakurnin.

Tsë watakunam Italia nunakuna musyariyarqan imarëkur yawarta mana churakunqantsikta. 1980 watakuna qallananchömi, yawar asuntu jatusaq autoridäkunaman juk juiciu charqan. Tsë markachö wakinkuna wanuyanqan qeshyawan wanïkaptimpis, “wamran wanunantam jaqishqa” nirmi, juk testïgu matrimoniuta acusayarqan. Tsëmi atskaq betelïtakuna yanapayarqan tsë matrimoniupa abogädunkunata. Juk qellqashqa willakï y juk ¡Despertad! revistam imanö pasakunqanta y yawar asuntupaq Biblia yachatsikunqanta nunakunata cläru rikätsirqan. Tsë killakunaqa Paoloqa hasta 16 hörakunam cada junaqchö trabajaq, y noqaqa imëkanöpam yanapaq kä trabäjunta alli cumplinampaq.

20 watakunapana casädu këkäyaptïmi juk mana shuyaräyanqä pasakurqan. Qeshyaq këkanqätanö mäkurirmi nunäta willarirqä, tsëpaqqa Paoloqa 49 watayoqnam karqan y noqanam 41 watayoq karqä.  Tsë junaqmi cuadernunman kënö nir qellqarqan: “Mañakï: Rasumpa kaptinqa yanapëkayämë llapan tiempökunawan yachatsikur siguiyänäpaq, espiritual kaqchö sinchi kayänäpaq y ejempluwan yachatsikoq alli teytakuna kayänäpaq. Y masqa pasaq 30 watakunachö yachatsikur parlanqänö ichikllapis ruranäpaq yanapëkamë”. Y alleqmi musyä, nunä mañakunqanta y noqa mañakunqätapis Jehovä contestanqanta.

Ilaria jutiyoq wamräkuna yurikunqanqa kawënïkunachö jatun cambiukunatam apamurqan. Rasumpa kaqchöqa, höra höraqa kallpannaqmi sientikuyarqä, y Proverbius 24:10 kënö ninqantam yarpätsiyämaq: “¿Mana allikunapa pasar alläpaku llakikurqonki? Tsëqa kallpëki pishinqam”. Tsëmi, yanapanakuyänä precisanqanta musyar, ishkäkuna yanapanakuyarqä.

Ilariaqa alläpam kushikun, llapan tiempunkunawan yachatsikoq cristiänukuna wätayanqampita. Manam imëpis japallanqa sientikurqantsu, y wakin familiakuna kawayanqannöllam pëpis kawarqan. Noqam junaqpaqa cuidaq kä y Paolonam trabäjumpita kutimur pëwan pukllaq y tarëankunawan yanapaq. Mëtsika trabäjun këkaptimpis y madrugadakunayaq trabajar quedakunan këkaptimpis manam pukllatsitaqa jaqeqtsu. Ilariäqa imëpis kënömi neq: “Papänïmi mas alli kaq amïgöqa”.

Rasunmi, Jehovä munanqannö kawanampaq imëpis yanapëqa manam fäciltsu karqan, y höraqa alli sinchim pëwan kayänan karqan. Yarpämi juk kutichö yanasanwan pukllëkar mana alli portakunqanta. Bibliawanmi entienditsiyarqä tsënö portakunqan mana alli kanqanta, puntäkunachömi perdonta mañakurqan.

Pëqa alläpam agradecikun teytankuna Diospita yachatsikïta kuyayanqanta. Kananqa casädana karmi masna entiendin, Jehoväta cäsukï y yachatsikïninkunata wiyakï imanir alläpa precisanqanta.

2008 watachömi Paolo musyarirqan canceryoq kanqanta. Qallananchöqa tsë qeshyapita alliyaqpaqnömi karqan. Jina pëpis kachakänampaq kaqtam pensaq y allipam animamaq. Y rikäyänampaqmi mas allin kaq mëdicukunata ashiyarqä. Jina Ilariawan noqaqa Diosmanmi allipa mañakuyaq kayä imëkata pasayaptïpis yanapayämänampaq. Tsënö karpis, 2010 watachö wanukunqanqa alläpam llakitsimarqan. Kallpayoq y sinchi nuna këkarpis rikarëkaptïmi avansakarqan. Tsënö kaptimpis, 45 watakunapa juntu karnin llapan rurayanqäkunaman yarparmi kallpata tarï. Llapan puëdiyanqätam Jehoväpaq rurayarqä, y tsëqa manam imëpis qonqashqatsu kanqa. Juan 5:28, 29 textu cumplikananmanmi alläpa markäkö, tsëmi kawarimuptin chaskitaqa alläpa munëkö.

Imanö karpis, Noëpa kawënimpita yachakïqa wamra kaptï gustamanqannöllaran kanampis gustëkaman. Y Jinallam, imata mañamaptimpis, Jehoväta cäsunäpaq listu këkä. Alleqmi musyä, ima michämaptimpis, o ruranä mana fäcil kaptimpis, Jehoväpa bendicionninkunawan mana igualanqanta. Kawënïchö pasashqa karmi noqaqa alleq musyä Jehoväta cäsukïqa imawampis mana igualanqanta.