¿Yarpankiku?
¿Shumaq yachakurku leyirqunki tsëllaraq yarqamoq Täpakoq revistakunata? ¿Puëdinkimantsuraq kë tapukïkunata contestëta?
¿Imataq bibliomancia nishqan, y imanötaq tsëta cristiänukuna rikashwan?
Bibliapa mëqan läduntapis llutalla kicharir puntata rikäyanqan kaqta leyiyanqanmi, y tsë leyiyanqan yanapanampaq kaqta pensayanqanmi. Cristiänukunaqa manam tsënötsu Bibliapa yanapakïninta ashiyan, sinöqa Bibliatam alli estudiayan rasumpa yachatsikïkunata tariyänampaq y Dios pushananta jaqiyänampaq (15/12, 3 kaq pägina).
¿Imataq ushakänampaq kaq “munduqa”?
Diospa munëninta mana ruraq nunakunam kayan (1 Juan 2:17). Patsaqa y Diosta mana jaqita sirweq nunakunaqa imëpis kawëkäyanqallam (1/1, 5-7 kaq päginakuna).
Abel wanushqana këkarnimpis, ¿imanötaq parlapëkämantsikraq? (Heb. 11:4.)
Markäkoq o yärakoq këninwanmi parlapämantsik. Markäkoq kënimpita alleq yachakushqa y ruranqanta qatishqaqa imëka parlapëkämaqnintsik cuentam kanqa (1/1, 12 kaq pägina).
¿Jehoväpita imakuna rakimänatataq jaqinantsiktsu?
Këkunam rakiramashwan: trabäju, kushikunapaq akranqantsikkuna, Jehoväpa markampita qarqushqa familiantsikkuna, imëka yarqamoq mäquinakuna, salud asuntupaq yarpachakïkuna, qellë asuntupaq alläpa yarpachakïkuna y pensënintsikta o katsinqantsik carguta mas precisaqpaq churanqantsikkuna (15/1, 12-21 päginakuna).
¿Imatataq yachakuntsik Moises humildi kanqampita?
Moisesqa manam autoridäyoq kanqampita gälakurqantsu, Jehovämanmi confiakurqan y manam kikinmanqa. Manam imëpis permitinantsiktsu yachaq kënintsik, autoridäyoq kënintsik o poderyoq kënintsik orgullösu tikratsimänata, tsëpa rantinqa Jehovämanmi markäkunantsik (Prov. 3:5, 6) (1/2, 5 kaq pägina).
¿Kawarimoqkuna mëchöraq täräyanqa?
144.000 kawarimoqkunaqa ciëluchömi täräyanqa. Y mana yupëtapis puëdipaq kawarimoqkunanam kë Patsachö mana wanushpa kawayanqa (1/3, 6 kaq pägina).
¿Ima ninantaq israelïtakuna “shonqunkunapa mana alli kaq qaranta jitariyashqatsu” ninanqa? (Jer. 9:26.)
Shonqunkunaqa mana alli rurëkunallamanmi yarparäkoq, tsëmi shonqunkunata operakoq cuenta mana alli rurëninkunata cambiayänan karqan: Dios mandakunqampa contranchö këkaq mana alli pensëkunata y mana alli munëkunata (Jer. 5:23, 24) (15/3, 9 y 10 kaq päginakuna).
¿Imanötaq Jehoväpa markan patsachö patsakashqa këkan?
Kënömi këkan: Jehoväpa Testïgunkunata Pushaqkuna, Sucursalta Rikaqkuna, watukakur pureq anciänukuna, congregacionta rikaq anciänukuna, congregacionkuna, y Testïgukuna (15/4, 29 kaq pägina).
¿Israelïtakunaqa qeruman warkurkurku alläpa mana alli ruraq nunakunata wanutsiyaq?
Manam. Wakin nacionkunam tsëta rurayaq, peru israelïtakunaqa manam. Escritüras Hebrëas nishqanta qellqayanqan witsankunaqa, pitapis qeruman warkuyänampaqqa, puntataqa wanutsiyaqran (Lev. 20:2, 27). Tsëpitanam ayata qeruman warkuyaq, tsëta rikarnin israelïtakuna tsënö mana kayänampaq (15/5, 13 kaq pägina).
¿Imanirtaq Patsachö yamë kawakï kantsu?
Nunakuna imëka allikunata rurashqa karpis, manam kikintsikllaqa kawënintsikta dirigita puëdintsiktsu (Jeremïas 10:23). ‘Que munduqa’ Diablupa makinchömi këkan. Tsëmi nunakunaqa yamë kawakïta tariyanqatsu (1 Juan 5:19) (1/6, 16 kaq pägina).
