“WAMRAKUNAQA Jehoväpita shamoq herenciam, y pachapita yureqqa juk qarëmi” ninmi Bibliaqa (Sal. 127:3). ¡Tsëchi Teytakuna y mamakunaqa wamrankuna yuririptin alläpam kushikuyan!

Peru kushikïpaq kaptimpis, imanö winatsiyänampaq kaqmanmi yarpachakuyänan. Wamra sänu winanampaqqa alli y höranchömi mikutsiyänan. Jina tsënöllam Diospita yachakïtapis wananqa, y tsëpaqqa teytanwan mamanmi yanapayänan. Alläpam precisan Biblia ninqankunapita yachatsiyänan (Prov. 1:8). Peru ¿imëpita patsëtaq yachatsiyanman y imanötaq rurayanman?

Dan kastapita Manöah jutiyoq nunata pasanqanta rikärishun. Juk kutim, qolloq warminta juk angel willarqan wamran kanampaq kaqta (Juec. 13:2, 3). Itsachi kë noticiata wiyarirqa Manöahwan warminqa alläpa kushikuyarqan, peru tsënö kaptimpis, imanö wätayänampaq kaqmanchi yarpachakur qallëkuyarqan. Tsëchi Manöahqa Diosman kënö mañakurqan: “Jehovä. Tsë mandamunqëki rasumpa kaq Diospa nunanta, noqäkunaman yapë shamïkunampaq mandëkallämï, y willarayämätsun tsë yureq wamrata imanö wätayänäpaq kaqta” (Jue. 13:8). Pëkunaqa wamrata imanö wätayänampaq kaqtam precisaqpaq churayarqan. Llapan puëdiyanqanmannömi wamrankuna Sansonta yachatsiyarqan Jehoväpa leyninkunata, tsëmi Bibliaqa nin: “Tiempuwannam Jehoväpa espïritun yanapar qallëkurqan”. Jehoväpa podernin yanapaqtinmi Sansonqa Israelpa Jueznin këman chärir, espantëpaq rurëkunata rurarqan (Jue. 13:25; 14:5, 6; 15:14, 15).

¿Imëpita patsëtaq teytakuna y mamakuna wamrankunata yachatsir qallëkuyanman? Timoteupaq parlarmi Biblia nin, “llullu kanqampita” patsë maman Eunici y awilan Loida “Diospa palabranta” yachatsiyanqanta (2 Tim. 1:5; 3:15, NM). Awmi, Timoteutaqa Diospa kaqta yachatsiyarqan, llullu kanqampita patsëmi.

Cristiänu teytakuna y mamakunaqa, Jehovämanmi mañakuyänan yanapanampaq y allim patsätsiyänan wamrankunata llullumpita patsë imanö yachatsiyänampaq kaqta. Tsëpaq parlarmi Proverbius 21:5 textu kënö nin: “Alli yarpachakoq nunaqa, imëkachöpis allim yarqapukunqa”. Wamrankuna manaraq yuriptinmi, teytakuna y mamakunaqa alistakuyan. Itsachi hasta juk listamampis qellqayan imata wanayänampaq kaqta. Peru tsënö kaptimpis, Diospita yachatsiyänampaq kaqtapis patsätsiyänanqa precisanmi. Llullumpita patsëmi Jehoväpita yachatsita procurayänan.

Juk precisaq librum nin, yuririnqampita qallanan killakunachö, juk wamrapa peqan mushoq cösaskunata yachakunampaq alläpa ras yanapanqanta. Tsëmi alläpa precisan tsë tiempukunallachö, Dios mandakunqankunata mas yachatsiyänan.

Juk precursöram wamrampaq kënö nin: “Yurinqampita juk killayoq kanqampita patsëmi yachatsikoqqa aparqö. Wamräqa manam musyaqtsu yachatsikurnin imanir puritsinqäta, peru tsëmi alläpa yanapashqa. Ishkë watayoq këkarmi kikinllana nunakunata tratädun entregaq”.

Llullu kanqampita wamrakunata yachatsiqa alläpa allim. Peru tsënö kaptimpis, itsa atskaq teytakuna niyanman Diospita yachatsiqa sasaraq (ajaraq) kanqanta.

Wamrakunaqa manam trankïlulla këta puëdiyantsu. Tsënö kayaptinmi teytakunapaqqa alläpa sasa (aja). Itsa wamrakunaqa juktaraq juktaraq rurayanqa. Y tsëqa manam espantakïpaqtsu, porqui llapan rikäyanqantam imanö kanqanta musyëta munayan, tsëmi tsënö kayan. ¿Imatataq teytakunawan mamakuna rurayanman yachëkätsiyanqanta wamrankuna shumaq entiendiyänampaq?

Deuteronomiu 6:6, 7 textuchö Moises qellqanqanta rikärishun: “Kanan qoykanqaq kë mandamientukunaqa, shonqïkichömi kanan; y wamrëkitam kutin kutin yachatsinëki, y tsëkunapitam parlapänëki wayikichö jamakurnin, nänipa purirnin, patsäkurnin y shärikurnin”. Rikanqantsiknömi kë textuchöqa “kutin kutin yachatsinëki” nin. Juk wamraqa, imëka juk llullu planta yakuta seguïdu winapänata wanaq cuentam. Sï mayor kaqkunatapis kutin kutin yachatsimanqantsik yanapamantsik nimanqantsikkunata yarpänapaq, ¿manatsuraq wamrakunatanäqa mas yanapanman kutin kutin yachatsinqantsik?

Wamrankunata Bibliapita yachatsiyänampaqqa, tiemputam rakiyänan pëkunawan pasayänampaq. Kë alläpa ocupädu kawanqantsik munduchöqa, tsë rurëqa manam fäciltsu. Tsëmi apostul Pabluqa consejamantsik, Diospa kaqta ruranarëkur mana combiëneq kaq cösaskunachö tiempuntsikta nana perditsinapaq (Efes. 5:15, 16). ¿Imanötaq tsëta lograshwan? Congregacionchö anciänunö sirweq wawqipaqqa alläpa sasam (ajam) karqan wamranta Jehoväpita yachatsinan, porqui congregacionchömi yanapakunan karqan y trabajananmi karqan. Jina precursöranö yanapakoq warmimpis alläpa ocupädam kaq. Tsëqa, ¿imanötaq tiemputa  rakiyarqan wamrakunata yachatsiyänampaq? Ollqu kaqmi kënö nin: “Llapan junaqkunam trabajaq manaraq ëwarnin warmïwan ishkä Bibliapita willakïkuna willakoq librömi nishqan libruta o Llapan junaqkuna Bibliapita yachakunapaq nishqan follëtuta leipuyä. Y manaraq patsäkuptimpis ichik mastam leyipuyä. Y yachatsikoq yarqurninqa apakurkurmi ëwakuyä. Winanqan watakunachömi alli yachatsita procurayä”.

Awmi, llapantsikmi munantsik wamrantsikkuna poqurirnin imatapis yachëpa rurayänanta. Tsënö kayänampaqqa shonqupita patsë Diosta kuyayänampaqmi yachatsinantsik (Mar. 12:28-30).

Salmu 127:4 textum nin: “Juk puëdeq nunapa makinchö flëchakunanömi jövin wamrakunaqa kayan”. Këchöqa wamrankunatam igualatsin, arcu manejaqpa makinchöna këkaq flëchakunatawan. Flëchawan imatapis alleq chätsita munarqa, flëchata manaraq kacharmi alleq apuntanan, porqui mana alleq acertanqanrëkur flëcha llutampa ëwaptinqa mananam altsëta puëdinqanatsu. Teytakunawan mamakunaqa ichik tiempullapam wamrankunata katsiyan. Tsëmi tsë ichik tiemputa alleq aprovechayänan Jehovä mandakunqankunata peqanman y shonqunman chatsiyänampaq.

Wamrankunatanö cristiänu mayinkunata rikarninmi apostul Juan kënö nirqan: “Wamräcuna Diosnintsicta cäsucur quecayanqanta wiyarir, cushiconqänoqa manam imepis cushicushqatsu cä” (3 Juan 4). Teytakuna y mamakunapis tsënöllam kushikuyan wamrankuna “Diosnintsicta cäsucur quecayanqanta” rikar.