1, 2. ¿Imatataq Jehovä rikätsimantsik juk mitsikoqwan igualatsikurnin?

JEHOVÄQA juk alli mitsikoq kanqantam willamantsik (Ezeq. 34:11-14). Tsënö igualatsikunqanmi yanapamantsik, imanö kanqanta mas musyanantsikpaq. Alli mitsikoqqa manam imapis üshankunata pasananta munantsu y alli atiendishqa kayänantam munan. Alli qewakunaman y yaku kanqankunamanmi apan (Sal. 23:1, 2); junaqpapis y paqaspapis cuidëkanllam (Lüc. 2:8); mikukoq animalkunapitam cuidan (1 Sam. 17:34, 35); tsëllaraq yurishqakunataqa mellqarkurmi apan (Is. 40:11); oqrakashqa kaqkunataqa ashinmi y malograkushqa kaqkunataqa jampinmi (Ezeq. 34:16).

² Israelïtakunaqa murukoq y wätakoq karninmi, alleq entiendiyarqan mitsikoqpaq igualatsikïta. Musyayaqmi üshakunaqa alleq cuidayänanta y atiendiyänanta wanayanqanta. Jina tsënöllam nunakunapis wanayan Diospita yachatsiyänanta (Mar. 6:34). Shumaq y rasumpa kaqta mana yachatsiyaptinqa sufriyanmi. Imëka mana allikunamanmi ishkiriyan y mana allim tikrakuriyan, “mitseqninnaq üsha” cuenta witsikar ushashqa quedariyan (1 Rëy. 22:17). Peru Jehoväqa kuyarninmi sirweqnin kaqkunataqa llapan wanayanqanta qoykanlla.

3. ¿Imapitataq kë yachatsikïchö yachakushun?

³ Jehovä juk mitsikoqnö kanqanta ninqanqa, kanan witsampis clärum rikakun. Pëqa sirweqnin kaqkunataqa yanapëkanllam. Rikärishun imanö pushanqanta y wanayanqankunata qonqanta, jina rikäshunmi üsha kaqkuna Jehoväpa kuyakïninta imanö chaskikunapaq kaqta.

4. ¿Ima cargutataq Jesusqa apan Jehoväpa üshankunata cuidëchö?

⁴ Jehoväqa Tsurin Jesustam churashqa congregacionpa pushaqnin kanampaq (Efes. 1:22, 23). Jesusqa  ‘Alli mitsicoqmi’ y Teytampanöllam munënin, y alli kënimpis. Hasta “üshäcunarecurmi noqaqa wanushaq” nirqanmi (Juan 10:11, 15). Jesucristu wanunqanqa juk bendicionmi llapan nunakunapaq (Mat. 20:28). Jehoväqa munan, Jesusman ‘marcäcoqcuna mana condenashqa cayänantam, sinoqa wiñepa cawayänantam’ (Juan 3:16).

5, 6. a) ¿Pikunatataq Jesus churashqa üshankunata cuidayänampaq? b) ¿Imatataq üshakuna rurayänan Jesus churanqan mitsikoqkunapita yanapakïta chaskiyänampaq? c) ¿Imanirtaq anciänukunata cäsukushwan?

⁵ ¿Imanötaq alli Mitsikoq Jesus qayaptin üshakuna wiyakuyan? Kikinmi nirqan: “Parlanqätam üshäcunaqa wiyayan. Pecunatam noqa reqï, y pecunam noqata qatiyäman” (Juan 10:27). Alli Mitsikoq parlanqanta wiyëqa, llapanchö wiyakunanmi, hasta pë churanqan mitsikoqkunata cäsukïmi. Jesusqa willakurqa, pë rurar qallanqanta apostulninkuna y discïpulunkuna rurar sïguiyänampaq kaqtam. Kuyashqa ‘üshancunatam’ yachatsiyänan y cuidayänan karqan (Mat. 28:20; leyi Juan 21:15-17). Diospita yachatsikï më tsëman chäriptin y cristiänukuna mirariyaptinmi, congregacionta rikäyänampaq poqushqa cristiänukunata Jesusqa churarqan (Efes. 4:11, 12).

⁶ Ëfesu congregacionchö këkaq anciänukunata parlaparninmi, apostul Pabluqa nirqan ‘creyicoqcunata cuidayänampaq” santu espïritu akrashqa kanqanta (Hëch. 20:28). Jina tsënöllam nishwan kanan witsan anciänukunapaqpis, porqui anciänu kayänampaqqa santu espïritunwan Jehovä qellqatsinqan Bibliachö këkaq mandakïkunataran cumpliyänan. Tsëmi anciänukunata cäsukurninqa, Jehovätawan Jesusta respetëkanqantsikta rikätsikïkantsik (Lüc. 10:16). Këta musyanqantsikmi yanapamantsik anciänukunata imëpis casukïkänapaq. Peru maskunaran kan.

7. ¿Imanötaq anciänukuna yanapayäshunki Jehoväwan alli kanëkipaq?

⁷ Anciänukunaqa, cristiänu mayinkunata animarnin y consejarninqa Bibliatam utilisäyan. Tsënö rurarqa manam imanö kawayänampaq kaqtatsu mandëkäyan (2 Cor. 1:24). Sinöqa yanapëkäyan, imata akrayanqanchöpis Biblia ninqanmannö kikinkunapita rurayänampaqmi y tsënöpa congregacionchö alli y ordenädu kawakuyänampaq (1 Cor. 14:33, 40). ¿Imanirtaq anciänukunaqa cristiänu mayinkunata alleq yanapayan? Porqui munayan Jehoväwan alli këninkuna alli kanantam. Tsëmi listu këkäyan cristiänu mayinkunata “mana alli rureman ishquishqata” o ishkinëkaqta rikarninqa yanaparkuyänampaq (Gäl. 6:1, 2; Jüd. 22). ¿Manaku këqa rikätsimantsik ‘yachatsir pushamaqnintsiccunata cäsucunapaq’? (Leyi Hebrëus 13:17.)

8. ¿Imanötaq anciänukuna Diospa üshankunata mana allikunapita cuidayan?

⁸ Apostul Pablupis mitsikoq karmi Colösaschö këkaq cristiänu mayinkunaman kënö qellqarqan: “¡Paqtataq, pipis mana allita creyitsiyäshurniqui, shumaq parleninwan llutanta yachatsiyäshunquiman! Tseno mandacur yachatsicuyanqanqa nunacunapa yarpenincunallam y costumbrincunallam, manam Jesucristupatsu” (Col. 2:8). Kë consëjum rikätsimantsik, anciänukuna Bibliawan consejamanqantsikkunata wiyakunapaq. Pëkunaqa üshakunata cuidayan, imamampis mana ishkiyänampaq puntallapitana willarninmi. Pëdrupis cristiänu mayinkunata willarqan “uli profetacuna” y mana alli “willapäcoqcunam” “mana alliman jitarpuyäshunqui” nirninmi (2 Pëd. 2:1, 14). Jina tsënöllam anciänukunapis precisaptinqa, cristiänu mayinkunata consejarëkäyänan. Poqushqa cristiänum kayan, tsëmi imëkatapis musyayan. Jina anciänu kayänampaq, carguta manaraq chaskirmi rikätsikuyarqan Bibliata  alli entiendiyanqanta y rasumpa kaqta yachatsikïta puëdiyanqanta (1 Tim. 3:2; Tïtu 1:9). Tsëmi, poqu këninkuna, imatapis alli tantiyanqan y Biblia ninqanmannö rurayanqan yanapan üshakunata shumaq pushäyänampaq.

9. ¿Imanötaq Jesus pushan y yachatsin cristiänukunata?

⁹ Jehoväqa markanwanmi alistatsimun mëtsika mikï cuenta yachatsikïkunata llapan cristiänukunapaq. Publicacionnintsikkunachöqa, Bibliapita mëtsika consëjukunam këkan. Jinamampis, Jehoväpa markanqa cartawan kar o congregacionkunata watukaq wawqiwanmi imata rurayänampaq kaqtapis anciänukunata willarëkämun. Tsënöpam Jehoväqa üshankuna imata rurayänampaq kaqta alli cläru willarëkämun.

10. ¿Imatataq anciänukuna rurayänan congregacionpita juk cristiänu rakikäkuriptin?

¹⁰ Anciänukunapa cargunkunaqa, cristiänu mayinkunata cuidë y Diospa kaqchö alli kayänampaq yanapëmi, masqa jutsata rurarir mana alli këkaqkunata o Diospa kaqchö qeshyëkaqkunata yanapëmi (leyi Santiägu 5:14, 15). Wakin üshakunaqa Jehoväpa markampitam rakikäkuriyashqa y manam Diospa kaqkunata rurëkäyannatsu. ¿Manatsuraq juk kuyakoq anciänuqa imëkata ruranman kë rakishqa üshakuna congregacionman kutiyämunampaq? ¡Awmi! Tsëmi Jesusqa nirqan, Teytäqa manam “munantsu ni juc qollmi shonqucunallapis oqracäyänanta” (Mat. 18:12-14).

11. ¿Imanirtaq wakin cristiänukunaqa anciänukuna consejaptin cäsukuyanmantsu?

¹¹ Jehoväwan Jesusqa imachöpis mana pantëpa mitsikoqmi kayan, peru pëkuna churayanqan mitsikoqkunaqa o anciänukunaqa imachöpis pantarëkäyanmi. Tsërëkurmi wakin cristiänukunaqa consejayaptin wiyakïta munayanmantsu. Itsa kënö niyanman: “Noqantsiknö jutsa ruraqllataq kayan. Manam pëkunaraqtsu imata ruranäpaq kaqtapis niyämänan, musyakönam imata rurakunäpaq kaqtapis”. Musyanqantsiknöpis anciänukunaqa imachöpis pantariyanmi. Tsënö kaptimpis, manam pantayanqankunallamanqa rikarëkänantsiktsu.

12, 13. a) ¿Ima nishwantaq Jehovä utilisanqan wakin carguyoq nunakuna pantayanqampita? b) ¿Imanirtaq Jehovä utilisanqan nunakunapa mana alli rurëninkuna Bibliaman qellqakarqan?

¹² Bibliaqa willakunmi, markanta pushanampaq Jehovä churanqan nunakuna mana allita rurayanqampita. Yarpärishun, Davidqa akrashqa rey y Israel markapa pushaqninmi karqan. Tsënö këkarpis, jutsamanmi ishkirirqan, jukpa warminwanmi punukïkurqan y nunantam wanuratsirqan (2 Sam. 12:7-9). Jina apostul Pëdrutapis yarpärishun. Congregacionchö precisaq carguyoq kanampaq churashqa këkarpis, alläpa mana allikunatam rurarqan (Mat. 16:18, 19; Juan 13:38; 18:27; Gäl. 2:11-14). Rasumpa kaqchöqa Adanwan Ëva jutsata rurayanqampita patsëqa, manam ni pï nunapis kashqatsu jutsannaqqa; Jesusllam jutsannaq nunaqa kashqa.

¹³ ¿Imanirtaq Jehoväqa Bibliaman qellqatsirqan carguyoq nunakunapa mana alli rurëninkunata? Tsëtaqa qellqatsirqan, markanta pushanampaqqa jutsa ruraq nunakunatapis utilisëta puëdinqanta rikätsikunampaqmi. Y tsënömi imëpis rurëkashqa. Tsëmi, pushamaqnintsikkuna pantayanqanrëkurllaqa pëkunapita mana allita parlashwantsu ni cargunkunata mana precisaqpaq churashwantsu. Jehoväqa munan anciänukunata respetanantsikta y cäsukunantsiktam (leyi Exodu 16:2, 8 *).

14, 15. ¿Imatataq yachakuntsik Jehovä markanta willatsinampaq angelkunata o nunakunata utilisanqampita?

¹⁴ Alläpam precisan pushamaqnintsikkunata cäsukunantsikqa. Yarpärishun, Jehovä markanta parlapänampaq precisaq tiempukunachö pikunata utilisanqanta. Israelïtakuna Egiptupita yarquriyaptinqa, imata rurayänampaq kaqtaqa Jehovä willarqan Moiseswan y Aaronwanmi. Chunka kaq castïguta kawëkar pasayänampaqqa, celebrayänan karqan juk alläpa precisaq cënatam y punkunkunapa markunmanmi pishtayanqan üshapa yawarninta pilchitsiyänan karqan. Manam ciëlupitatsu parlapämurqan imata rurayänampaq kaqta. Sinöqa, Israelchö anciänukunatam wiyakuyänan karqan, porqui pëkunam Moisespita chaskiyarqan imata rurayänampaqpis (Ex. 12:1-7, 21-23, 29). Tsë precisaq tiempuchöqa Moiseswan anciänukunam willakuyarqan Jehovä mandakunqanta. Tsënö kaqllam kanan witsan anciänukunapis tsënö precisaq rurëkunata rurëkäyan.

¹⁵ Mëraq yarpantsik Bibliachö tsënö atska willakïkunata, Jehovä sirweqninkunata salvananrëkur angelninkunawan o nunakunawan willatsinqampita. Tsëchömi rikantsik Jehovä willakunampaqqa jukkunata utilisanqanta. Jehoväpa jutinchömi willakuyarqan, y niyarqanmi salvakuyänampaq imata rurayänampaq kaqta. ¿Manatsuraq tsënölla Jehoväqa ruranqa Armagedon chämuptin?  Clärum këkan, manam ni mëqan anciänu Jehovä cargun qoshqa kaptinlla o markanta pushanampaq churashqa kaptinllaqa munanqanta rurakunmantsu.

16. ¿‘Qepantsikpita’ ima nimanqantsiktataq alkäbulla këkashwan?

¹⁶ Jehoväpa markanqa ‘juc canchallam’ y jukllëllam ‘mitseqninpis’, Jesucristu (Juan 10:16). Jesusmi discïpulunkunata kënö awnirqan: “Qamkunawanmi llapan junaqkuna këkä, hasta më tsëchö imëkapis imanö [patsätsishqa] këkanqampa ushënin witsanyaq” (Mat. 28:20, NM). ¿Imanötaq awninqanta cumplikan? Ciëluchö rey karmi, Satanaspa mundunta ushakätsinampaq kaqta rikëkan. Jehoväpa üshankunawan juntu y tsë rurinchö alli këta munarqa, mëpa ëwanantsikpaq kaqtapis ‘qepantsikpita’ nimanqantsiktam wiyakunantsik. Y ‘qepantsikpita’ nimanqantsikta wiyanqantsikqa, Bibliachö santu espïritu nimanqantsik y Jehoväwan Jesus mitsikoqninkunawan nimanqantsikmi (leyi Isaïas 30:21 * y Apocalipsis 3:22).

17, 18. a) ¿Pitaq Jehoväpa üshankunata ushakätsita munan, peru imapitataq següru kashwan? b) ¿Imapitataq yachakushun qateqnin kaq yachatsikïchö?

¹⁷ Apostul Pëdrum Satanaspaq kënö nirqan: “Imeca mallaqashqa leonnomi qaparir qayarir, purican qamcunapa marcäquiniquicunata ushacäratsinanpaq” (1 Pëd. 5:8). Imëka mikukoq animal üshapa kunkanman raslla saltëkunampaq listu këkaqnömi, pasëpa shuyarëkan Jehoväpa üshankuna mëqanllapis qepapärinanta o oqrakärinanta. Jina këmi rikätsimantsik cristiänu mayintsikpita y “almantsikta cuidaq y mitsimaqnintsik” Jehoväpita mana rakikänapaq (1 Pëd. 2:25, NM). Apocalipsis 7:17 textum kënö nir willakun alläpa jipakï (ñakay) tiempukunata pasaqkunapaq: “Tronu chopincho quecaq Achcasmi [Jesusmi] üshacunata [...] mitsenqa. Tsenollam cawatsicoq yacuman pushanqa mana yacunäyänanpaq. Tsechoqa quiquin Diosmi waqaquinincunapita weqincunata shupiratsenqa”. ¿Këpita mas alli awnikïqa kanmantsuraq?

¹⁸ Anciänukuna alläpa precisaq rurëyoq kayanqantam rikärirquntsik, tsëmi cada anciänu kënö tapukunan: “¿Imanötaq Jesuspa üshankunata shumaq tratäman?”. Qateqnin kaq yachatsikïchömi këpita yachakurishun.