ALLIYËKAQ nacionpita François jutiyoq anciänum kënö nir willakun: “Juk votacion ushariptin wanutsinakï qallakïkuptinmi Jehoväpa testïgunkunaqa wayinkunapita qeshpir ëwakuyarqan. Mikï (mikuy) y jampikunapis manam taripaqtsu karqan y karpis alläpa chaniyoqmi karqan. Y bancukunapitapis manam qellë jorqëta puëdiyarqannatsu”.

Sucursalpita wawqikunaqa, entëru nacionchö Yachatsikuyänan Wayikunachö juntakashqa Testïgukunapaqmi qellëta y wanayanqankunata ras apatsiyarqan. Ishkan chikinakoq grüpukunaqa carretërapa ëwaqkunatam controlar qallëkuyarqan, peru Testïgukuna ni mëqanmampis mana qaqäyanqanta musyarmi, sucursalpita ëwaq cärrukunata höra höraqa pasananta jaqiyaq.

Françoismi kënö nir willakun: “Yachatsikuyänan Wayiman ëwëkäyaptïmi, ratakïkur (tsinkëkur) illapakoqkuna cärrükunata illapëkayämurqan. Ichikllapam ratëkatsiyämarqantsu. Juk soldädu illapanwan noqakunaman cörrimoqta rikëkurmi, tumarïkur sucursalman ras kutikuyarqä. Alläpam Jehoväta agradecikuyarqä kawëkar chäriyanqäpita. Waräninpanam Yachatsikuyänan Wayikunachö kayanqampitapis mas següru sitiuman 130 cristiänukuna ëwakuyarqan. Wakinkunaqa sucursalmanmi chäyämurqan, tsëchömi Diospa kaqchö y wanayanqanchö yanapar problëma altsakanqanyaq katsiyarqa.

”Tsëpitanam, entëru nacionpita cristiänukuna llapan shonqunwan agradecikur sucursalman cartakayämurqan. Juk sitiupita cristiänu mayinkuna yanapayanqanta rikäyanqanmi Jehoväman mas markäkuyänampaq yanaparqan.”

Desgraciakunata nuna causaptin o kikinllapita kaptimpis, noqantsikqa manam, “qoñulla shumaq pitucur, abrigacunqui; y pachequi junta, micunqui” nintsikllatsu yanapanata wanëkaq cristiänu mayintsikkunata (Sant. 2:15, 16). Tsëpa rantinqa, punta cristiänukuna rurayanqannömi wanayanqanchö cristiänu mayintsikkunata yanapantsik. Mallaqë tiempu chänampaq kaqta musyarirmi, pëkunaqa “shumaq parlariyarqan, cayäponqanmanno imatapis ellicurnin, Judea marcacho Jesusman creyicoqcunaman apatsiyänanpaq” (Hëch. 11:28-30).

Jehoväta sirweqkunaqa shonqupita patsëmi wanaqkunata yanapëta munantsik, peru musyantsikmi Diospa kaqkunata nunakuna mas wanayanqanta (Mat. 5:3, NM). Tsë wanayanqanchö nunakunata yanapayänanrëkurmi, Jesusqa qateqninkunata mandarqan creikoq tikrayänanrëkur nunakunata yanapayänampaq (Mat. 28:19, 20). Noqantsikpis tsënöllam tiempuntsikta, kallpantsikta y kapamanqantsikta tsë rurëchö yanapakunapaq utilisantsik. Diospa markanqa ëlluyanqan qellëtaqa desgraciakunachö jukkunata yanapayänampaqmi utilisan, peru Diospa Gobiernumpita alli willakïkuna më tsëman chänampaqmi masqa utilisäyan. Tsënöpam rikätsikuntsik Diosta y nuna mayintsikta kuyanqantsikta (Mat. 22:37-39).

Diospa yachatsikïninta jinantin Patsaman chänampaq qellëwan yanapakoqkunaqa, segürum kayënëki alli rurëchö tsë qellë gastakëkanqanta. ¿Ëkallawampis yanapakunkimantsuraq desgraciakunata pasaq cristiänukuna mayintsikkunapaq? ¿Diospa yachatsikïnin më tsëman chänampaq yanapakïta munankiku? Tsënö kaptinqa Proverbius 3:27 textu ninqannö rurë, kënömi nin: “Wanëkaqkunata yanapëta puëdikarqa yanapë, ama kikikillapaqqa alli kaqta katsikïtsu”.