1. ¿Imakunatataq wakinkuna rurayan y imanir?

NUNAKUNAQA, pëkunapaq imapis precisaq kaptinqa imëkatam rurayan. Wamrankuna profesionyoq kayänanta munarmi, teytakunaqa imëkata rurar atska qellëta gastayan y atska tiempupa yanapayan. Mëtsikaq cörreq jövinkunam amïgunkunawan pasëta jaqiriyan, nacionninkunapa jutinchö cörriyänampaq alli yachakuyänanrëkur. Jesuspis mas precisaqta rurananrëkurmi imëka rurëkunata jaqirqan. Familiayoq këta o rïcu këtapis puëdinmanmi karqan, peru Diospa Gobiernumpita yachatsikïtam akrarqan (Mat. 4:17; Lüc. 9:58). Discïpulunkunapis Diospa Gobiernunta mas precisaqpaq churarmi imëka rurëninkunata jaqiyarqan (Mat. 4:18-22; 19:27). Tsëmi noqantsikpis kënö tapukunantsik: “¿Imataq noqapaqqa mas precisaq?”.

2. a) ¿Imapaqtaq cristiänukunaqa tiempunkunata rakiyänan? b) ¿Wakinkunaqa imakuna mastataq rurëta puëdiyan?

² Jehoväwan amïgu këta munarqa, cristiänukunaqa munëninkuna ashitam jaqiyänan. Këllaman pensarishun, tiemputam rakiyänan Diosman mañakuyänampaq, Bibliata leyiyänampaq, familianwan Diosta adorayänampaq, reunionkunaman ëwayänampaq y yachatsikoq yarquyänampaqpis (Jos. 1:8; Mat. 28:19, 20; Heb. 10:24, 25). * Yachatsikunapaq sinchikunqantsikrëkurmi y Dios yanapamanqantsikrëkurmi Diospita yachatsikïqa mas nunakunaman (runakunaman) chëkan y mëtsikaqmi “Jehoväpa wayin këkaq jirkaman” shamïkäyan (Is. 2:2). Y wakinkunaqa hasta, Betelchö, Yachatsikuyänan Wayikuna rurëchö, Asamblëapaq Localkuna rurëchö, asamblëakuna rurakänampaq patsätsichö o desgraciakuna  pasakuptinmi yanapakuyan. Rasunmi, manam këkunata rurar-raqtsu mana wanushpa kawëman yëkushun, peru kë rurëkunam Diospita yachatsikï më tsëman chänampaq yanapakun.

3. a) ¿Imanötaq yanapamantsik Diospa Gobiernunrëkur puëdinqantsikmannö yanapakunqantsik? b) ¿Ima tapukïkunatataq rurakunantsik?

³ Kananqa imëpitapis masmi Diospa Gobiernumpita yachatsikïta puntaman churanantsik. ¡Alläpa kushikïpaqmi llapan puëdiyanqanmannö Jehoväta sirwikäyaqta rikëqa! (Leyi Salmu 54:6 *.) Diospa Gobiernun chämunqanta shuyaranqantsikyaq kushi kushilla yanapakurqa, atska kushikïta tarishun (Deut. 16:15; Hëch. 20:35). Tsënö kaptimpis cada ünum kënö tapukunantsik: “¿Manatsuraq Diospa Gobiernumpaq masta ruräman? ¿Imachötaq gastëkä tiempöta, qellënïta y rurëta yachanqäkunata? ¿Ima rurëtataq imëpis jaqïmantsu?”. Rikärishun unë witsankuna kikinkuna shonqupita munar Jehoväta imakunata qarayanqanta. Tsëmi yanapamäshun Jehoväta kushishqa sirwinapaq.

4. ¿Imatataq israelïtakuna chaskiyaq Jehoväta qarënin qoyanqampita?

⁴ Israelïtakuna perdonta chaskiyänampaq y Jehoväpa rikënimpaq alli käyänampaqqa alläpam precisarqan Jehoväta qarënin qoyänan. Wakin qarëkunataqa voluntäninkunapitam qoyaq, peru wakintaqa obligädum qoyaq (Lev. 23:37, 38). Voluntäninkunapita qoyanqan kaq animalkunata kayayanqanqa, pukutarmi (mushkurmi) Jehoväta alläpa kushitseq. Tsëtam rurayarqan Salomon templuta usharatsiptin (2 Crön. 7:4-6).

5. ¿Imatataq Jehovä patsätsirqan waktsakunapaq?

⁵ Jehoväqa manam llapankuna igual-lla qarayänantatsu shuyaraq, sinöqa puëdiyanqanmannö rurayänantam. Leyqa mandakoq animalta qoyänampaq y yawarninta jichayänampaqmi, porqui tsëqa “Jesucristo sacrificiuta rurananpag” kaqtam rikätsikoq (Heb. 10:1-4, NTCN). Peru Jehoväqa llapan israelïtakuna igual-lla qoyta mana puëdiyanqantaqa musyaqmi, juk waktsa israelïta wäkata mana qoyta puëdiptinqa, kullkukunata qoptimpis chaskeqllam. Tsënöpam waktsakunapis Jehoväta qararnin kushishqa  këta puëdiyaq (Lev. 1:3, 10, 14; 5:7). Peru animalkunata jukläya jukläyata qoyta puëdiyaptimpis, Jehoväqa ishkë precisaq cösaskunatam mañaq.

6. ¿Ima ishkë cösastataq Jehovä mañaq voluntäninkunapita qarayaptin y tsënö mañanqanqa precisarqanku?

⁶ Puntataqa, mas alli kaqtam qoyänan karqan, porqui Jehoväqa sänu animalkunata qoyaptinllam chaskeq (Lev. 22:18-20). Tsëmi juk qeshyëkaq animalta qoyaptinqa chaskeqtsu. Ishkë kaqchönam, Ley mandakoq Jehoväta qarënin qoq nunaqa (runaqa) conciencianchö alli këkänanta. Ima jutsatapis rurashqa karqa, puntataqa perdonta chaskinampaqraqmi Jehoväta qarënin qonan karqan (Lev. 5:5, 6, 15). Këqa alläpam precisarqan, porqui jutsallakushqa këkar Jehoväta qaranqanta mikurninqa wanunanmi karqan (Lev. 7:20, 21). Peru Jehoväpa rikënimpaq alli concienciayoq kar y Jehovä nunanqannö qarënin kaptinqa, alläpam kushikoq (leyi 1 Crönicas 29:9 *).

7, 8. a) ¿Imanötaq mëtsikaq cristiänukuna sientikuyan Diospa Gobiernumpita yachatsikïchö yanapakurnin? b) ¿Imakunawantaq llapan cristiänukuna yanapakuyanman?

⁷ Kanan witsanqa mëtsikaq cristiänukunam shonqupita patsë Jehoväta sirwir kushitsiyan. Jina pëkunapis kushikuyanmi jukkunata yanaparnin. Juk wawqim alläpa kushikunqanta kënö willakun: “Yachatsikuyänan Wayiyoq tikrarirqa o desgracia pasakuptin yanapakunqäpitaqa cristiänu mayïkuna alläpam kushikuyan y tsëta rikëqa alläpam kushitsiman”.

⁸ Jehoväpa markanqa imëkanöpam yanapakïkashqa Diospa Gobiernumpita yachatsikï llapan nunakunaman chänampaq. 1904 watachömi wawqi Charles T. Russell kënö nir qellqarqan: “[Llapan cristiänukunam] yarparäyänan tiempunkunapa y imëkankunapa duëñun kayänampaq Señor churashqanta, y tsëkunatam alli utilisäyänan Patrunninta alabayänampaq”. Jehoväpaq rurëqa manam fäciltsu, peru atska bendicionkunatam apamun (2 Sam. 24:21-24). Tsëmi kënö tapukunantsik: “¿Maslla yanapakömanku kapamanqanwan?”.

9. ¿Imatataq yachakuntsik Lücas 10:2-4 textuchö Jesus parlanqampita?

 ⁹ Tiempuntsik. Atska tiemputam wanayan, publicacionkunata juk idiömaman tikratsiyämunampaq, imprimiyämunampaq, Yachatsikuyänan Wayikunata rurayänampaq, asamblëakunata patsätsiyänampaq, desgraciakuna pasakuptin yanapakuyänampaq y maskunata rurayänampaqpis. Peru tiempuqa rasllam pasarin. Tsëqa, ¿imatataq rurashwan tiempuntsikta alli provechanapaq? Yachatsikuyänampaq discïpulunkunata mandarnin Jesus ninqanta rikärishun: “Nänipa ewarnin, ama pitapis parlaparnin, shäcuyanquitsu” (Lüc. 10:2-4). Jesus tsënö ninqampaqmi juk yachaq nuna kënö nin: “Tsë tiempuchö nunakunaqa manam noqantsiknötsu raslla saludanakuriyaq, sinöqa atska kutiraqmi waqupänakuyaq (makallanakuyaq), puktiyaq y qonqurikuyaq. Y tsëqa atska tiemputam wanaq”. Jesusqa manam, mana saludakurlla pasakuriyänampaqtsu nikarqan, sinöqa musyëkätsirqan mas precisaq rurëkunata rurayänampaq ichik tiempulla kanqantam, y juk cösaskunachö tiempunkunata mana perditsiyänampaqmi (Efes. 5:16). ¿Imanötaq Jesus ninqanta wiyakur Diospa Gobiernumpita mas yachatsikunapaq tiempuntsikta utilisashwan?

10, 11. a) ¿Imakunachötaq utilisäyan Yachatsikuyänan Wayichö winakunqantsik qellëta? b) ¿Imanötaq yanapamashwan 1 Corintius 16:1, 2 textu ninqan?

¹⁰ Qellënintsik. Diospa Gobiernumpita yachatsikunapaqqa atska qellëmi pishin. Cada watam, congregacionta watukaqkunata, precursor especialkunata y misionërukunata yanapëchö atska millon dölarkuna gastakan. Jina 1999 watapita patsëmi, 24.500 Diospita Yachatsikuyänan Wayikuna rurakashqa waktsa nacionkunachö, y 6.400 mastaran wanantsik. Jina cada killam Täpakoq revistatawan ¡Despertad! revistata 100 millontanö imprimiyämun. Kë llapanqa rurakämun voluntänintsikpita ëkallatapis Yachatsikuyänan Wayichö qellënintsik winanqanqantsikwanmi.

¹¹ Apostul Pablum qellënintsikta imanö rakinapaq kaqta yachatsikurqan (leyi 1 Corintius 16:1, 2). Diosnintsik yanapaptinmi Corintu cristiänukunata nirqan semäna qallananchö qellëninkuna rakiyänampaq, semäna ushaptin sobranantaraq mana shuyaräyänampaq. Jina tsënöllam kanampis, puëdinqantsikmannö ëkallatapis qonapaqmi puntallapitana rakintsik (Lüc. 21:1-4; Hëch. 4:32-35). Alli qarakoq kanqantsiktaqa Jehoväqa alläpam kuyan.

12, 13. a) ¿Imataq michämashwan Jehoväpa kaqchö kallpantsikwan y rurëta yachanqantsikwan mas yanapakunata? b) ¿Imatataq Jehovä awimarquntsik?

¹² Kallpantsik y rurëta yachanqantsik. Gobiernumpita yachatsikunapaq kallpantsikta y rurëta yachanqantsikta utilisashqaqa Jehovä yanapamantsikmi. Pëqa awnimarquntsikmi kallpannaq këkanqantsik höra yanapamänapaq (Is. 40:29-31). Y rurëta mana yachashqapis, Bezaleltawan Oholiabta yanapanqannömi mas yachënintsik qomäshun (Ex. 31:1-6, rikäri kë yachatsikïpa qallananchö këkaq dibüjuta).

¹³ Diosnintsikqa animamantsik pëpaq llapan puëdinqantsikta ruranapaqmi (Prov. 3:27). Templuta yapë shärikätsiyaptinmi judïukunata Jehovä nirqan, rurëkäyanqanman alleq pensayänampaq (Ageu 1:2-5). Pëkunaqa juk cösaskunata rurakurmi precisaq rurëninkunata jaqirishqa kayarqan. Tsëmi noqantsikpis kënö tapukunantsik precisan: “¿Jehoväpa munëninta rurarku kawëkä? ¿Diospa  Gobiernumpita mas yachatsikurnin yanapakömanku?”.

14, 15. a) ¿Imatataq yachatsimantsik waktsalla këkarpis cristiänu mayintsikkuna rurayanqan? b) ¿Imata ruranapaqtaq listu këkashwan?

¹⁴ Mëtsikaq cristiänu mayintsikkunam kawayan alläpa problëmakuna kanqan y alläpa waktsa nacionkunachö, peru Jehoväpa markanqa yanapëkanllam (2 Cor. 8:14). Tsënö waktsa këkarpis tsë cristiänukunaqa donacionninkuna winakuyanmi. ¡Imanömi Jehoväqa kushikïkun shonqunkunapita patsë ichik kayäpunqanllatapis qoyaptin! (2 Cor. 9:7, NM.)

¹⁵ Africapa juk nacionninchö cristiänu mayintsikkunaqa huertankunapa juk kuchuntam rakiriyan tsëchö murukuyanqan kaqta rantikurir donacionnikuna winayänampaq. Tsë nacionchöqa alläpam wanayarqan Yachatsikuyänan Wayita. Wawqikunam munayarqan Yachatsikuyänan Wayinkuna rurayaptin yanapakïta, peru murukuyänan witsampaqmi rurakänampaq patsäratsiyarqan. ¿Murukuyänan kaptintsuraq yanapakuyarqantsu? Manam. Junaqpam Yachatsikuyänan Wayiman trabajaq ëwayaq, y paqaspanam chakrankunata muruyaq. ¡Llapan puëdiyanqanmannömi yanapakuyarqan! Këqa yarpätsimantsik apostulkuna kawayanqan witsanchö Macedonia markachö täraq cristiänukunatam. “Wactsalla quecarpis”, pishipakoq cristiänu mayinkunatam yanapayarqan (2 Cor. 8:1-4). Jina tsënöllam noqantsikpis ‘Jehovä bendicimanqantsikmannö’ yanapakunantsik (leyi Deuteronomiu 16:17 *).

16. ¿Imakunata rurartaq sinchikushwan Jehoväta qaranqantsik alli kanampaq?

¹⁶ Peru Jehoväta qarënin qorqa, israelïtakunanömi alleq rikänantsik Jehovä munanqannö kananta. ¿Imanö kaptinraq chaskimäshwantsu? Mas precisaq kaqkunata rurëta jaqirishqam. Këllaman pensarishun, ¿familiantsikta Jehoväpa kaqchö yanapëta jaqirir y wananqankunata qoyta jaqirir imëkachöpis yanapakunqantsikta Diosnintsik chaskimashwantsuraq? Manam. Porqui mana këkäpamanqantsikta qarëkaq cuentam kanman (leyi 2 Corintius 8:12). Jina manam jaqinantsiktsu Diospa kaqchö rurënintsikkunatapis (1 Cor. 9:26, 27). Peru Jehovä munanqannö kawakushqaqa, Diosnintsikta qaranqantsikmi alläpa kushitsimäshun y pëpis kushishqam chaskimäshun.

17, 18. a) ¿Ima nintsiktaq llapan puëdiyanqanmannö Diospa Gobiernumpita yachatsikuyänampaq sinchikoqkunapita? b) ¿Imamantaq noqantsikpis yarpashwan?

¹⁷ Mëtsikaq cristiänu mayintsikkunam Diospa Gobiernumpita yachatsikïchö alläpa yanapakuyan, o juk parlakïchöqa tsë rurëchö wanurpis wanuriyanmanmi (Filip. 2:17). ¡Tsënö rurayanqankunapitaqa alläpam kushikïkuntsik! Jina Diospa kaqchö imëka rurëkunata rikaqkunapa warminkuna y wamrankuna yanapakuyanqampitapis alläpam agradecikuntsik.

¹⁸ Diospa Gobiernumpita yachatsikïchöqa mëtsikam rurëpaq kan. Jehoväman mañakushun y imanö yanapakunapaq kaqmampis yarpachakushun. Tsënö ruranqantsikpitaqa kanan y shamoq tiempuchöpis atskaq bendicionkunatam chaskishun (Mar. 10:28-30).