1, 2. ¿Imataraq apostulkuna pensayarqan Jerusalenta Jesuswan manaraq ëwarnin?

AMPÏRINNAM, täpakoqkunaqa Jerusalen janampa llullu killa yarqamoqta rikäriyashqanam. Sanedrin cortipis musyarirmi, nisan killa qallarinqanta musyatsikurin. Jina willakoqkunapis tsënöllam më tsëpa willakur qallëkuyan. Y Jesusqa, Pascua manaraq qallaptin Jerusalenman chëta munarmi ëwar qallëkun.

² Tsëmanchi apostulkunaqa pensëkäyarqan, peru pëkunaqa Jordan mayupa wak lädun Perëa markachömi Jesuswan këkayärqan Jerusalenta ëwaptin yanaqarnin (Mat. 19:1; 20:17, 29; Mar. 10:1, 32, 46). Nisan killapa qallanan kaq junaq pasariptinqa, chunka kima junaqllatanam, 14 de nisanchö Inti (Rupay) jeqarkuptin Pascuaqa celebrakänan karqan.

3. ¿Imanirtaq cristiänukunapaqqa precisan Pascua junaqman yarparänantsik?

³ Pascua junaqwan tinkoq Señorpa Cënanqa, kë 2014 watachö ratamunqa 14 de abril Inti jeqarkuptinmi. Tsë junaqqa alläpa precisaqmi kanqa rasumpa kaq cristiänukunapaq y Dios munanqanta rurëta munaq nunakunapaq. ¿Imanirtaq precisan? Porqui kikin Jesusmi celebrayänampaq mandakurqan. 1 Corintius 11:23-25 (NM) textuchömi kënö nin: “Entregashqa kanqan paqasmi Jesus juk tantata tsarirkur gracias nikurirqan, y pakirirmi kënö nirqan: ‘Këqa cuerpü cuentam, qamkunapaqrëkurmi entregashqa kanqa. Noqata yarpämarnï këta rurar sïguiyanki’. Jina tsënöllam cöpawampis rurarqan”.

4. a) ¿Ima tapukïkunatataq rurakushwan Jesus Wanunqanta Yarpëpaq? b) ¿Imanötaq musyantsik Jesus wanunqan imë junaq ratamunqanta? (Rikäri,  “2014 watapaq Jesus Wanunqanta Yarpë” ninqan recuadruta.)

⁴ Itsa qampis kë wataqa, wanunqanta cada wata yarpänapaq Jesus mandakunqanchö këta munanki. Tsëqa kënö tapukï: “¿Imanötaq alistaköman tsë paqaspaq? Tsë yarpëchö, ¿imakunataraq utilisäyanqa? ¿Imanöraq rurakanqa? ¿Imatataq rikätsimanqa tsë yarpë y tantawan vïnu?”.

5. Ushanan kaq Pascuata celebrayänampaq, ¿imakunata alistapakuyänampaqtaq apostulninkunata Jesus mandarqan?

⁵ Pascuapaq alistapakuyänampaq apostulninkunata Jesus mandarninqa, manam nirqantsu imëka adornukunata churayänampaq. Tsëpa rantinqa, masqa munarqan, limpiu kananta y invitädunkunawan shumaq pasariyänampaq alli sitiu kananllatam (leyi Marcus 14:12-16). Y mikuyänampaqmi alistayänan karqan, levadürannaq tantatawan yana üvaspita rurashqa vïnuta. Pascuata celebrar usharirnam, Jesusqa tantapaqwan vïnupaq parlar qallëkurqan, porqui tsëtam utilisarqan cuerpun y yawarnin cuenta kanqanta rikätsikunampaq.

6. a) ¿Ima nirqantaq Jesus tantapaq Pascuata celebrar usharirnin? b) ¿Imanö tantatataq utilisashwan Jesus Wanunqanta Yarpëchö?

⁶ Tsë hörachö këkaq apostul Mateum tiempuwan kënö nir qellqarqan: “Jesusmi juk tantata tsarirkur gracias nikurirqan y pakirirmi discïpulunkunata kënö nir qorqan: ‘Tsarir mikuyë’” (Mat. 26:26, NM). Kë tantaqa, Pascuapaq utilisäyanqan tantanömi levadürannaq karqan (Ex. 12:8; Deut. 16:3). Yakuwan pichushqa harinallam karqan y manam levadüran ni kachin karqantsu. Levadürannaq këkarqa llapsha, tsaki y fäcil pakinallachi karqan. Itsa kanan witsampis anciänukunaqa, pillatapis niriyanman tsë tantata harinata yakuwan pichurkurlla ichiklla acietishqa lätachö rurarinampaq. Trïgu harina mana kaptinqa, cebädapita, jarapita, arruzpita o juk gränukunapita rurashqa harinatam utilisëta puëdiyan. O manaqa, matza nishqa judïukunapa tantatam utilisëta puëdiyan, peru manam masa poqutseqtaqa ni imatapis winayanmantsu, ruruta (runtuta) ni ceböllata.

7. ¿Imanö vïnutataq Jesus utilisarqan, y imanö kaqtaraq Jesus Wanunqanta Yarpëchö utilisashwan?

⁷ Jina Mateum kënö nin: “[Jesusqa] juk cöpata tsarirkurmi gracias nikurirqan y tsëpitanam pëkunata qorqan kënö nir: ‘Llapëki uputsinakuyë’” (Mat. 26:27, 28, NM). Jesus tsarinqan cöpachöqa, yana üvaspita rurashqa vïnum karqan, y manam tsëllaraq qapirishqa üvaspa yakuntsu karqan, porqui tsë witsampaqqa atska killapanam üvas cosëcha pasashqa karqan. Egiptuchö Pascuata celebrayanqanchö vïnuta mana utilisäyashqa  kayaptimpis, Jesusqa manam nirqantsu Pascuachö utilisë mana alli kanqanta. Y Señorpa Cënanta celebrarmi utilisarqan. Tsëmi cristiänukunapis Jesus Wanunqanta Yarparqa utilisantsik. Peru ¿imanö vïnutaq alli kanman? Jesuspa yawarninqa, manam imata yapayänanta wanarqantsu, tsëmi yawarninta rikätsikoq vïnumanqa ni imata yapayanmantsu pukutänampaq (muskünampaq) ni mishkïnampaq. Rantikuyanqan, beaujolais, borgoña o quianti nishqankunatanö vïnutam utilisëta puëdiyan, jina wayinkunachö rurayanqan vïnutapis utilisëta puëdiyanmi, peru imampis mana yapashqa yana üvaspita rurashqa vïnum kanan.

8. ¿Imanirtaq cristiänukunaqa tantawan vïnu imata rikätsimanqantsikta entiendita procurantsik?

⁸ Señorpa Cënantaqa manam apostulkunallatsu celebrayänan karqan, sinöqa llapan cristiänukunam. Tsëmi Corintuchö cristiänukunaman Pablu kënö qellqarqan: “Noqam kikin Señorpita chaskirqä y tsëllatam willariyaq, Señor Jesusmi traicionashqa kanqan paqas, juk tantata tsarirkur gracias nikurirqan, y pakirirmi kënö nirqan: ‘Këqa cuerpü cuentam, qamkunapaqrëkurmi entregashqa kanqa. Noqata yarpämarnï këta rurar sïguiyanki’” (1 Cor. 11:23, 24, NM). Tsëmi cristiänukunaqa kanan witsanyaqpis, Jesus wanunqanta cada wata yarpantsik y tantawan vïnu imata rikätsimanqantsikta entiendita procurantsik.

9. ¿Imanö nirtaq wakin nunakuna Jesus utilisanqan tantapaq creiyan?

⁹ “Këqa cuerpü cuentam” nir Jesus ninqampaqmi wakin Bibliakunaqa, “këqa noqapa cuerpümi” niyan, tsëmi mëtsikaq religiösu nunakunaqa niyan, tantaqa Jesuspa rasumpa ëtsanman tikrarinqanta. Peru tsëqa manam rasumpatsu. * Porqui Jesuspa cuerpuntaqa apostulkuna sänutam rikëkäyarqan,  y mikuyänampaq kaq levadürannaq tantapis jina kanqannöllam këkarqan. Tsëchömi cläru këkan, tantapaq cuerpun cuenta kanqanllata Jesus parlëkanqanta, y tsënö igualatsikïtaqa juk kutikunachöpis parlashqam karqan (Juan 2:19-21; 4:13, 14; 10:7; 15:1).

10. ¿Imatataq rikätsikun Señorpa Cënanchö utilisakanqan tanta?

¹⁰ Apostulkuna mikuyänampaq kaq tantaqa Jesuspa cuerpun cuenta kanqanllatam rikätsikurqan. Peru, rasumpa kaq cristiänukunaqa unëqa creiyarqan, Jesuspa tullunta ni jukllëllatapis mana pakishqa kayaptin, tantaqa ciëlupaq kaq llapan cristiänukunata rikätsikunqantam, Jesuspa ‘cuerpun cuenta’ kayanqanta Biblia niptin (Efes. 4:12; Rom. 12:4, 5; 1 Cor. 10:16, 17; 12:27). Peru tsëpitam entiendiriyarqan, tantaqa Jesuspa cuerpunta rikätsikunqanta. Jesusqa kë Patsachö këkar alläpam jiparqan (ñakarqan), hasta qerumanmi warkuyarqan. Tsëmi, Señorpa Cënanchö utilisakanqan tantaqa rikätsikun, kë Patsachö wanurnin ‘jutsantsiccunata apaconqan’ Jesuspa cuerpunta (1 Pëd. 2:21-24; 4:1; Juan 19:33-36; Heb. 10:5-7).

11, 12. a) ¿Ima nirqantaq Jesus vïnupaq? b) ¿Señorpa Cënanchö utilisakanqan vïnuqa imatataq rikätsikun?

¹¹ Tanta imata rikätsikunqanta musyanqantsikmi yanapamantsik, Jesus vïnupaq parlanqantapis entiendinapaq. Bibliam kënö nin: “Jina cöpawampis tsënöllam rurarqan, cenarirmi kënö nirqan: ‘Kë cöpaqa, juk mushoq conträtutam rikätsikun, qamkunapaqrëkur yawarnïta ramariptïmi qallarinqa’” (1 Cor. 11:25, NM). Atska Bibliakunam Reina-Valera Biblia ninqannö niyan: “Kë cöpaqa mushoq conträtum yawarnïrëkur”. Cöpa nirqa, cöpa rurinchö këkaq vïnupaqmi Jesusqa parlëkarqan. Tsëqa, ¿vïnuku conträtu yawar karqan? Manam, yawarninta Jesus ramanampaq kaqllatam rikätsikurqan.

¹² Marcus libruchömi tarintsik Jesus kënö ninqanta: “Këqa ‘conträtu yawarnï’ cuentam, mëtsikaq nunakunapaqrëkur ramashqa kanampaq kaq” (Mar. 14:24, NM). Jesuspa yawarninqa, “mëtsikaq nunakuna perdonta chaskiyänampaqmi” ramashqa kanan karqan (Mat. 26:28, NM). Tsëmi, yana üvaspita rurashqa vïnuqa Jesuspa yawarninta rikätsikurqan. Tsë yawarwanmi jutsantsikkunapita “rescatamarnintsic perdonamarqontsic” (leyi Efesius 1:7).

13. ¿Imanötaq cada wata celebrantsik Jesus wanunqan Yarpëta?

¹³ Jesus wanunqanta Jehoväpa testïgunkuna yarpäyaptin ëwarqa, ¿imataraq rikanki? Itsa rikanki, tsë reunionta rurayänan sitiuqa limpiu y llapankuna alli sientikuyänampaq alli sitiu kanqanta. Itsa churayanqa wëtakunata, peru manam alläpa chaniyoqtsu ni fiestapaqnötsu kanqa. Juk alli yachaq anciänum Bibliapita fäcil-llata yachatsikarämunqa Jesus Wanunqanta Yarpë ima kanqanta. Mana wanushpa kawëta tarinapaq Jesus ruranqanta y wanunqanta maslla kuyanapaqmi yachatsikamunqa (leyi Romänus 5:8-10). Jinamampis yachatsikamunqam, cristiänukunaqa ishkë cläsi kawëta chaskiyänampaq kaqta.

14. ¿Ima ishkë cläsi kawëtataq Jesus Wanunqanta Yarpëchö yachatsikayämun?

¹⁴ Apostulkunanöpis, wallkaqlla cristiänukunam ciëlupita patsë Cristuwan mandakamïta shuyaräyan (Lüc. 12:32; 22:19, 20, NM; Apoc. 14:1). Y mëtsikaq cristiänukunam, kë Patsa alläpa shumaq tikrashqachö mana wanushpa kawëta shuyaräyan. Tsënam, cristiänukuna imëpis mañakuyanqan cumplikärinqa; Diospa munëninmi, ciëluchönöpis kë Patsachö rurakärinqa (Mat. 6:10). Y Bibliaqa, imëyaqpis alläpa shumaq kawakuyänampaq kaqtam willakun (Is. 11:6-9; 35:5, 6; 65:21-23).

15, 16. ¿Imatataq tantawan rurayan Señorpa Cënanchö?

 ¹⁵ Discursu ushanëkaptinnam yachatsikamoqqa ninqa, Jesus apostulninkunata mandanqanta rurayänan höra chäramushqa kanqanta. Yachakunqantsiknömi, tantawan yana üvaspita rurashqa vïnu utilisakanqa. Y këkunaqa, yachatsikamoqpa amänunchömi juk mësachö churarëkäyanqa. Pëmi Bibliapita leyimunqa kë celebracionta patsätsir Jesus ninqampita y ruranqampita willakoqta. Mateum kënö nir willakun: “Jesusmi juk tantata tsarirkur gracias nikurirqan y pakirirmi discïpulunkunata kënö nir qorqan: ‘Tsarir mikuyë, këmi cuerpü cuenta’” (Mat. 26:26, NM). Jesusqa levadürannaq tantatam pakirirqan, ishkan lädunchö këkaq apostulninkunata qonampaq. 14 de abril reunionchöqa qampis levadürannaq tantayoq plätutam rikärinki.

¹⁶ Tanta pasanan alläpa mana demoranampaqmi, tantayoq plätutaqa atskata utilisäyanqa. Sencïllullam kanqa, y manam Biblia mana mandakunqan costumbritaqa rurayanqatsu. Puntataqa Jehovämanmi mañakarayämunqa, peru manam alläpa unëtsu kanqa, y tsëpitanam shumaq ordenädu, mëmampapis mas allinö kanqanmampa, tantayoq plätukunata pasatsir qallëkuyanqa. 2013 watachö Jesus Wanunqanta Yarpëchö wakin congregacionkunachö pasanqannöpis, itsa tantataqa juk ishkëlla mikuyanqa o manapis.

17. ¿Imatataq vïnuwan rurayanqa Jesus ruranqanta qatir?

¹⁷ Tsëpitanam yachatsikamoqqa Mateu willakunqanta yapë leyimunqa: “Juk cöpata tsarirkurmi [Jesus] gracias nikurirqan y tsëpitanam pëkunata qorqan kënö nir: ‘Llapëki uputsinakuyë; porqui këmi “conträtu yawarnï” cuenta kanqanta rikätsikun, jutsankunapita mëtsikaq perdonashqa kayänampaqmi ramashqa kanqa’” (Mat. 26:27, 28, NM). Jesus ruranqanta qatirmi, Diosman yapë mañakurir yana üvaspita rurashqa vïnuyoq cöpakunata pasatsir qallëkuyanqa.

18. Llapantsik tantatawan vïnuta mana mikunantsik y upunantsik këkaptimpis, ¿imanirtaq Jesus Wanunqanta Yarpëman ëwanantsik precisan?

¹⁸ Jesus ninqannömi, pëwan ciëlupita patsë mandakayämunampaq kaqkunalla, tantawan vïnu pasanqan höra mikïta (mikuyta) y upïta (upuyta) puëdiyan (leyi Lücas 22:28-30; 2 Tim. 4:18). Këmi rikätsikun, tsë hörachö mëtsikaq mana mikoq y mana upoq këkaqkunaqa respëtuwan yanaqäkoqlla kayanqanta. Tsënö kaptimpis, Señorpa Cënan celebrëman ëwaqkunaqa, pëkunapaq Jesus wanunqan alläpa precisanqantam rikätsikuyan. Jesus Wanunqan Yarpëchöqa, Jesus wanunqanrëkur ima bendicionkunata chaskiyänampaq kaqkunamanmi yarpachakuyänan. Pëkunaqa shuyaräyan “imeca nacaquicunatapis pasashqa” “mana yupetapis puedipaq, mantsaquepaq alli shuyni” nunakunawan juntu këtam. Pëkunaqa kayanqa, ‘Achcaspa yawarninwan’ “ropancunapis yulaq” püruman tikratsishqa Jehoväpa sirweqninkunam (Apoc. 7:9, 14-17).

19. ¿Imanötaq Señorpa Cënampaq alistakushwan y alleq provëchashwan?

¹⁹ Tsë precisaq reunionpaq alistakurninmi, Jehoväpa testïgunkunaqa, juk ishkë semänakuna pishïkaptinllana llapan nunakunata (runakunata) invitar qallashun. Jinamampis, wallka junaqkuna pishïkaptinmi, 33 watapa tsë junaqninchö Jesus imata ruranqampita y ima pasakunqampita Biblia willakunqanta leyishun. Mana faltänapaq y cantikuwan mañakï manaraq qallaptin chänapaqmi, puntallapitaqa alli patsätsipakushun. Tsënöpam shamoqkunatapis shumaq chaskishun. Llapantsikmi Bibliapita yachatsikäyämunqanta Bibliantsikchö qatir provëchuta jorqashun. Y masqa, tsëchö këkanqantsikwanmi rikätsikushun noqantsikrëkur Jesus wanunqampita alläpa agradecikunqantsik y “noqata yarpämarnï këta rurar sïguiyanki” nir mandakunqanta wiyakïkanqantsikta (1 Cor. 11:24, NM).