JUK waktsa viudam japallan ollqu wamranta alläpa kushishqa waqun (makallan). ¡Pasakurinqanta manam creita puëdintsu! Tsëllaran mellqarëkarqan wanushqa wamranta. Peru kananqa wamran kawariramurmi kushishqa rikarëkan, tsëmi pë alläpa kushikun. Y posadakoq nunam kënö nin: “Rikë, wamrëkiqa kawëkanmi”.

Cäsi 3.000 watanam pasarishqa tsë wamra kawarinqampitaqa, y 1 Rëyes librupa 17 kaq capïtulunchömi qellqarëkan. Mamanqa, Sarepta markapita viuda warmim karqan y posadakoq nunaqa Diospa profëtan Elïasmi karqan. ¡Kë pasanqanqa viudapa markäkïnintachi alläpa sinchiyätsirqan! Rikärishun kë warmita pasanqankunapita precisaq yachatsikïkunata.

Puntallapitanam Jehoväqa willakurqan Israelchö mana alli rey Acab mandakunqan witsan, atska watakunapa tamya mana kanampaq kaqta. Tsë tiempu chäriptinmi, Elïasta rey Acabpita pakarqan, y jatun yana pishqukunatam utilisarqan tantan y ëtsan apapuyänampaq. Tsëpitanam nirqan: “Sharkï, Sidonpa lädun Sarepta markaman ëwë, y tsëchömi täränëki. ¡Rikë! Rasumpam tsëchö täraq viuda warmita nishaq qarashunëkipaq” (1 Rëy. 17:1-9).

Sarepta markaman Elïas chärirmi, yantata pallapakïkaq waktsa viudata taririrqan. ¿Tsë waktsa warmitsuraq mikïnin qonan karqan? Tsënö kanampaq kaqta següru mana këkarnimpis, Elïasqa tsë warmita kënömi nirqan: “Mana piñakushllapa, ichik yakuta juk väsuman qarëkamë”. Tsë warmi yakuta qoriptinnam, jina kënö nirqan: “Mana piñakushllapa, juk pëdäsu tantata qarëkamë” (1 Rëy. 17:10, 11). Yakun qarëtaqa tsë viuda puëdirqanmi, peru mikïnin qonanqa sasaran karqan.

 Y viudanam kënö nir contestarqan: “Rasumpa Jehovä Diosniki kawanqan jina, manam tantaqa kapamantsu, sinöqa jarina winakunächö juk aptë jarina y aceiti winakunächö ichik aceitillam; y këchömi ichik yantakunata ëllupakïkä, tsëwan imallatapis noqapaq y wamräpaq rurarinäpaq, y tsëtam mikuyänä y wanuyänä” (1 Rëy. 17:12). ¿Imatataq kë parlayanqampita yachakïta puëdintsik?

“Rasumpa Jehovä Diosniki kawanqan jina” neq palabrakunaqa rikätsikun, Elïas Diospa sirweqnin israelïta kanqanta viuda creinqantam. Tsëqa rikätsikun israelïtakunapa Diosnimpita ichik musyanqantam, peru tsënö kaptimpis “Diosnï” nir Jehoväta qayanampaqqa masran reqinan karqan. Sidonpa lädun Sarepta markachömi tsë viudaqa tärarqan. Quisaschi, Sarepta markapita mëtsikaq nunakuna Baal diosta adorayaq. Peru, Jehoväqa tsë waktsa viudachö ima allillatapis rikarqanchi.

Mëtsikaq dioskunata adoraqkunawan tärarpis, Israelpa Diosninmanmi markäkoq (yärakoq). Jehoväqa tsë viuda kaqmanmi Elïasta mandarqan, pëpa biennin y viudapa bienninrëkur. Këqa juk precisaq yachatsikïtam yachatsimantsik.

Sarepta markachö täraq nunakunaqa manam llapantsu Baal diosta adorayaq. Tsë viuda kaqman Elïasta mandarmi, Jehoväqa rikätsikurqan, pëta manaraq sirweq alli shonquyoq nunakunata cuentaman churanqanta. Awmi, “pipis allicunata rurar y Diosta respetar cacuyaptenqa, pëqa chasquinmi” (Hëch. 10:35).

Sarepta markapita viudanö, ¿ëkaqraq territoriuntsikchö kan? Mana rasumpa kaq religionkuna chöwpinchö tärarpis, itsachi wakinkunaqa rasumpa kaq Diosta ashikäyan. Quisaschi Jehoväpitaqa ichiklla musyayan o manapis musyayantsu, tsëmi wanayan rasumpa kaq religionta tariyänampaq pillapis yanaparinanta. ¿Ashikantsikku y yanapëkantsikku tsë nunakunata?

Maslla rikäshun Elïas mañakunqampita. Tsëllaraqmi viudaqa nirirqan pëllapaq y wamranllapaq mikïnin kanqanta, tsëpita mikuyänampaq manana imankunapis kaptin wanuyänampaq kaqta. Tsënam Elïas kënö nirqan: “Ama mantsakïtsu. Yëkï, ninqëkinö rurë. Tsë kapushunqëkillapita noqapaq puntata rurëkamï juk tortïllata, y kë waqtaman aparamunki, y qampaqwan wamrëkipaqqa tsëpitanam imallatapis rurarinki. Këtam Israelpa Diosnin Jehovä nishqa: ‘Jarina winakunëkichö manam jarina ushakanqatsu, aceiti winakunëkichö manam aceitipis ushakanqatsu, Jehovä kë patsaman tamyatsimunqan junaqyaq’” (1 Rëy. 17:11-14).

Itsa kënö pensashwan: “¿Imanöparaq llapan kapamanqantsik mikïta qoykushwan? Elïasqa manachi rasumpatsu parlëkarqan” nir. Peru viudaqa, ¿ima nirqantaq? Jehoväta alleq mana reqikarnimpis, Elïasta creirqanmi y mañanqannöllam rurarqan. ¡Markäkïnintam rikätsikurqan y alli kaqtam rurarqan!

Diosqa manam jaqirqantsu. Elïas ninqannöllam, atska watakunapa tamya mana kanqan witsankuna, tsë warmipa ichiklla mikïnin kapunqan mana ushakänampaq Jehovä bendicirqan, tsëmi Elïaspaq, viudapaq y wamrampaqpis mikïqa pishirqantsu. Awmi, “jarina winakunanchö manam ushakarqantsu jarina, y aceiti winakunanchöpis manam ushakarqantsu aceiti, tsënömi karqan  Jehovä Elïaswan willatsinqannö” (1 Rëy. 17:16; 18:1). Viuda juknöpa rurashqa kaptinqa, itsachi tsë ichik jarinalla y aceitilla mikïninkuna kanman karqan. Peru pëqa, Jehoväman markäkurmi Elïasta puntata qararqan.

Kë pasakunqampitam yachakuntsik pëman markäkoqkunataqa Dios bendicinqanta. Pruëbakuna chämuptin markäkïwan tsarakushqaqa, Pëqa yanapamantsikmi. Awmi, Qomaqnintsik, Tsapämaqnintsik y Amïguntsikmi tikrarin pruëbakunachö tsarakunapaq (Ex. 3:13-15).

1898 watam Zion’s Watch Tower nishqan revista, tsë vuidapaq yachatsikurqan kënö nir: “Tsë warmi markäkïninta rikätsikuptin y wiyakuptinqa, profëtanta utilisarmi Señorqa yanapanan karqan; peru markäkïnin mana kaptinqa, Señorqa juk markäkoq viudatam akranman karqan. Tsënöllam noqantsikwampis pasakun. Markäkïnintsikta rikätsikurninqa, bendicionkunatam chaskishun; y tsënö mana rurarqa manam chaskishuntsu”.

Pruëbakunapa pasarninqa, Jehoväpa yanapakïnintam ashishwan, y tsë yanapakïkunaqa Bibliachö y publicacionkunachömi këkan. Y Jehovä mandamanqantsiknömi sasa kaptimpis ruranantsik. Y “llapan shonqïkiwan Jehoväman markäkï, y kikikipa yachënikillamanqa ama markäkïtsu. Llapan kawënikichö pëta yarpë, tsëqa llapan rurënikitam altsaramunqa” neq consëjuta wiyakushqaqa bendicimäshunmi (Prov. 3:5, 6).

Viudapa markäkïninqa yapëmi pruëbaman churakärirqan. Bibliam kënö willakun: “Tsëpitanam, wayiyoq viudapa wamran qeshyakurkurqan, y alläpa qeshyarmi jamaninnaq tikrarirqan”. Pasakunqanta musyëta munarmi, alläpa llakishqa viudaqa Elïasta kënö nirqan: “¿Imatataq qamta rurarqoq, rasumpa Diospa nunan? ¿Noqaman shamurqunki mana alli ruranqäkunata yarpätsimaqku y wamräta wanutseqku?” (1 Rëy. 17:17, 18). ¿Imanir-raq tsënö nirqan?

¿Yarpakachätsinqan jutsatatsuraq viudaqa yarpärirqan? ¿Wamrampa wanïninwan Dios castiguëkanqantatsuraq pensarqan, y wanïpaq willakoq Elïas kanqantatsuraq pensarqan? Bibliaqa manam tsëpaq alläpa parlantsu, peru clärum rikakun mana allita pasëkanqampita Diosta mana culpatsanqanta.

Elïastaqa alläpachi yarpakachätsirqan tsë viudapa wamran wanunqan, y përëkur tsë pasakunqanta pensëqa. Tsëpitanam, wamrapa ayanta Elïas rara (junish) cuartuman aparkur, kënö nir mañakurqan: “Jehovä Dioslla, ¿imanirtaq posadatsimaqnï viudatapis llakikïman churanki wamranta wanutsirnin?”. Profëtaqa manam munarqantsu tsë posadatsikoq alli warmi, wamran wanunqanrëkur alläpa llakikunanta y Diospa jutin mana allichö quedananta. Tsëmi kënö rogakurqan: “Jehovä Dioslla, rogakullaqmi kë wamrata kawarïkatsinëkipaq” (1 Rëy. 17:20, 21).

Jehoväqa llapantam rikëkarqan. Kë viudaqa profëtata mikïnin qorninmi markäkïninta rikätsikurqan. Itsa Diosqa permitirqan tsë wamra qeshyar antsänanta, porqui musyarqanmi kawaritsimunampaq kaqta. Tsë pasakunqanmi yanapakurqan tsëpita patsë nunakuna kawarimïman markäkuyänampaq, y Bibliaqa tsë wamrapa kawarimïninpaqmi punta kaq kawarimï nir willakun. Elïas rogakuptinmi, Jehoväqa tsë wamrata kawaritsirqan. Viudaqa alläpachi kushikurqan Elïas kënö niptin: “Rikë, wamrëki kawëkanmi”. Tsënö niriptinnam warmi kënö nirqan: “Kananmi sï musyarï Diospa nunan kanqëkita, y Jehovä ninqanta parlanqëki rasumpa kanqanta” (1 Rëy. 17:22-24).

Bibliaqa, kë viudapaq mananam mas willakunnatsu. Peru tsë viuda ruranqampaq Jesus parlashqa kaptinmi, wanunqanyaq Jehoväta sirwinqanta creintsik (Lüc. 4:25, 26). Tsë warmita pasanqanmi rikätsikun, sirweqninkunata yanapaqkunata Dios bendicinqanta (Mat. 25:34-40). Jina rikätsikunmi pëllata sirweqkunata wanayanqanmannö y sasa tiempukunachöpis yanapanqanta (Mat. 6:25-34). Jinamampis, rikätsimantsikmi wanushqakunata Jehovä kawaritsimïta munanqanta y puëdinqanta (Hëch. 24:15). Awmi, precisaq yachatsikïkunam kan Sarepta markapita viudata yarpänapaq