Kananqa këman pensari. Juk parëjam, japallanlla ishkë wamranta wätaq panita wayinchö meriendayänampaq invitayan, wamrakunapis mamam willariptinmi alläpa kushikuyan y tsë junaq chämunantam shuyaräyan. Peru tsëpaq juk junaq pishikaptinmi, tsë parëjaqa panita willariyan juk cäsu kaptin pëkunawan meriendëta manana puëdiyänampaq kaqta. Tsëpitanam, kë paniqa musyarin tsë cäsu ima kanqanta. Tsë parëjatash tsë tardi mikoq ëwayänampaq juk amïgukuna invitayänaq, y pëkunaqa awniriyänaqshi.

Cristiänukunaqa parlanqantsiktam cumplinantsik. Manam imëpis “aumi” nirirnin, “manam” ninantsiktsu (2 Cor. 1:18). Tsënö kaptimpis, rikanqantsiknömi ima cäsullapis kaptin höraqa itsa awnikunqantsikmannö rurëta puëdishuntsu. Apostul Pablupis tsëkunapam pasarqan.

55 watachö kima kaq viäjinta rurëkar Ëfesuchö këkarmi, Pabluqa mar Egeo nishqampa tsimpar Corintuman ëwëta munarqan, tsëpita Macedonia markaman ëwanampaq. Macedonia markata visitarir Jerusalenman kutikurmi, yapë Corintumanraq chänan karqan, itsa tsë markachö cristiänukuna Jerusalenchö cristiänukunapaq ëlluyanqan qëllëta apanampaq (1 Cor. 16:3). Tsëtam, 2 Corintius 1:15, 16 textukuna willakun kënö nir: “Tseno marcäcäyämanquequita musyarmi, qamcunaman watucayaqniqui shamita munarqä; tsenopa ishque cuti watucayarniqui imallachopis yanapariyänaqpaq. Macedonia marcaman shamurmi, qamcunamanraq bisitayaqniqui yecamita yarparqä. Tsenollam jina Macedoniapita cutirpis, qamcunamanraq yecamita pensarqä, tsenopa Judea marcaman cutinäpaq yanapecayämänequipaq”.

 Itsa Pabluqa Corintu cristiänukunaman imata pensëkanqanta qellqarnin cartakushqana karqan (1 Cor. 5:9). Peru tsë cartanta mandarinqanchönam, Cloe kastapita shayämur Corintuchö jatun problëmakuna kanqanta willariyarqan (1 Cor. 1:10, 11). Tsënöpam, Pabluqa ruranampaq kaqta cambiarirqan, y Corintu Cristiänukunapaq Punta kaq Cartantam qellqarqan. Tsëchömi kuyakïwan Corintu cristiänukunata consejarqan y corrigirqan. Jina nirqanmi puntataqa Macedonia markapa ëwar-raq Corintuman chänampaq kaqta (1 Cor. 16:5, 6). *

Corintu cristiänukuna cartanta chaskirirmi, wakin “musyaq tucoq apostolcuna” niyarqan Pablu palabranta mana cumplinqanta. Tsënö niyaptinmi, kënö nirqan: “Macedonia provinciapa aywarnin cutimurpis, gamcunacagpa chämuyta munaycarpis manam puedimurgätsu. Tsaycu ¿gamcunaga yarpäyanqui puediycar mana shamungäta? o ¿Munayllan rurag, mana criyicug runacunanö car, ishcay cösata parlangäta? Pero nogaga manam tsay runacunanötsu ‘aumi’ nirga ‘aumi’ nï, manam nirgä ‘manam’ nï” (2 Cor. 1:17; 11:5, NTCN).

¿Awnikunqanta Pablu ichikllapaqku churarqan? ¡Manam! Kënömi tapurqan: “¿Gamcunaga yarpäyanqui puediycar mana shamungäta[ku]?”. Kënö ninqanqa itsa corintukunata musyatsirqan awnikunqanta Pablu ichikllapaq mana churanqanta.

Tsënö pensayanqanta musyarmi Pablu kënö nirqan: “¡Manam tsenotsu! Teyta Diosmi musyan jucta wacta ‘Aumi’ nir, o ‘Manam’ nirpis, mana parlanqäta” (2 Cor. 1:18). Corintu cristiänukunata ‘mana llaquitsinanrecurmi’ Pabluqa tsëpa ëwanampaq kaqta cambiarirqan (2 Cor. 1:23). Rasumpa kaqchöqa, manaraq watukaptin problëmankunata altsayänampaqmi tiemputa qorqan. Y Macedonia markachö këkarmi, cartanchö consejanqannö Corintu cristiänukuna rurëkäyanqanta Tïtu willariptin, alläpa kushikurqan (2 Cor. 6:11; 7:5-7).

Pablu palabranta mana cumplinqanta nirqa, Diospita yachatsikurpis mana confiakïpaq kanqantam nikäyarqan. Peru Cristu yachatsikunqanllata pë yachatsikïkanqantam yarpätsikurqan. Kënömi nirqan: “Silvanu, Timoteu y noqam willapäyarqaq Jesucristupaq. Tse Cristoqa manam nunacunano jucta wacta pensaquicaqtsu; sinoqa Diospa tsurin carninmi, Cristoqa juc parlacoqlla” karqan (2 Cor. 1:19). Jesucristuqa confiakïpaqmi karqan, tsëtaqa rikätsikurqan kawëninchö y yachätsikïninchömi. Imëpis rasumpa kaqtam willakoq (Juan 14:6; 18:37). Y apostul Pablupis Jesus yachatsikunqankunallatam yachatsikoq, tsëmi yachatsikunqankunaqa confiakïpaq karqan.

Jehoväqa ‘rasumpa kaq Diosmi’ (Sal. 31:5). Tsëtam rikätsikun Pablu kënö nir qellqanqanchö: “Jesucristullachomi Diosnintsicpis llapan änimashqantsicta cumplin”. Jesus Teytanta mana jaqita Patsachö sirwinqanmi, rikätsikun Jehovä awnikunqanta cumplinampaq kaqta. Pablum jina nin: “Tsemi Diosnintsicta alabarpis, ‘Amen, tseno catsun’ nintsic Jesucristurecur” (2 Cor. 1:20). Jesuspa jutinchömi Jehoväqa llapan awnimanqantsikkunata cumplimunqa.

Tsëmi, Jesuswan Jehovä rasun kaqllata parlayanqannömi, Pablupis parlanqanta cumpleq (2 Cor. 1:19). Pabluqa confiakïpaq  nuna karmi ishkë cösastaqa parlaqtsu (2 Cor. 1:17, NTCN). Antis “Santu Espiritu” munanqannömi ruraq (Gäl. 5:16). Llapan ruranqankunam rikätsikun wakinkunapaq yarpachakunqanta. Awmi ninqantaqa cumpleqmi.

Kanan witsanqa Bibliapa musyatsikïninmannö mana kawaq nunakunaqa, imallapis kaptinqa awnikuyanqanta manam cumpliyantsu. Negociu asuntukunachö acuerduta rurar documentukunaman qellqarpis höraqa manam cumpliyantsu. Mëtsikaq nunakunaqa manam wanuyanqanyaq conträtutanönatsu casakï asuntuta rikäyan. Casakï asuntuta mana precisaqpaq churayanqantam, kanan witsan mëtsika divorciukuna kanqan rikätsikun (2 Tim. 3:1, 2).

¿Y qamqa, awmi ninqëkita cumplinkiku? Qallananchö rikanqantsiknömi, höraqa itsa ima precisaq cäsu kaptinqa awnikunqantsikta cumplita puëdishuntsu. Peru juk cristiänu imatapis awnikushqa kar o parlashqa karqa, cumplitam procuranan (Sal. 15:4; Mat. 5:37). Tsënö rurarqa confiakïpaq kanqëkita, awnikunqëkita cumplinqëkita y rasumpa kaqllata parlanqëkitam nunakuna rikäyanqa (Efes. 4:15, 25; Sant. 5:12). Confiakïpaq kanqëkita rikarmi, Diospita yachatsikuptiki wiyashïnikita munariyanqa. Tsëmi awmi ninqëki awmi katsun.