BIBLIAQA willakun mëtsikaq nunakuna yakaräyanqan (jatiräyanqan) röpata rachiyanqantam. Judïukunaqa, tsënö rurayaq mantsakashqa, nanatsikushqa, humillashqa, piñashqa o llakishqa këkäyanqanta rikätsikuyänampaqmi.

Këta maslla tantiyarishun, Rubenqa “röpantam rachirirqan” wawqin Josëta esclävutanö rantikuyanqanta musyarir, y ima rurëtapis mana puëdirnin. Teytan Jacobpis, “röpantam rachirirqan” wamran Josëta chukaru animal mikushqa kanqanta pensar (Gen. 37:18-35). Wamrankuna wanuyanqanta musyarirmi, Jobqa yakaranqan röpata rachirirqan (Job 1:18-20). Juk willakoqmi, saserdöti Elï kaqman “röpan rachishqa chärirqan” israelïtakuna guërrata perdiyanqanta, ishkan wamrankuna wanuyanqanta, y chikeqninkuna Conträtu babulta apayanqanta willanampaq (1 Sam. 4:12-17). Ley ninqanta wiyarir y markan mana allita rurayanqanta musyarirmi Josïasqa “röpanta rachirirqan” (2 Rëy. 22:8-13).

Jesusta wanutsiyänampaq juiciuta rurëkarmi sacerdötikunapa mandaqnin Caifasqa, ‘sotananta rachirirqan’ Jesus Diospa contran parlanqanta nir (Mat. 26:59-66). Judïukunapa costumbrinkunachöqa, Diospa contran pitapis parlëkaqta wiyarqa yakarëkäyanqan röpankunatam rachiriyaq. Peru Jerusalenta ushakäratsiyaptinmi tsë costumbriqa cambiakärirqan kënö neq costumbriwan: “Kanan witsanqa Diospa contran pitapis parlaqta wiyarqa mananam röpanta rachinannatsu; tsëta ruraptinqa, llapan röpankunapis rachishqam ushanqa”.

Diospaqqa, röpankunata rachiyanqanqa väleq, shonqupita patsë llakikur rurayaptinllam. Tsëmi Jehovä markanta kënö nirqan: “Shonqïkikunata rachiyë, y ama röpëkikunataqa; y [. . .] Diosnikikunaman kutiyë” nir (Joel 2:13).