Salmu libruchömi David kënö nirqan: “Teyta Diosllä, munanqëkita rurarmi alläpa kushikurqö, y shonqöpa rurinchömi leynikikuna këkan” (Sal. 40:8). Imëka mana allikunapa pasëkarnimpis, Davidtaqa Dios ninqanta rurëmi alläpa gustaq. Pënöllam Jehoväta adorarnin jukkunapis kushikuyarqan.

Pablum nirqan Salmu 40:8 textu Jesuschö cumplikanqanta, kënömi nirqan: “Manam munanquitsu imapis qarecunata ni sacrifisiucunata. Antis munarqonqui [. . .] cuerpüwan qamllatana sirwinaqtam. Qamtaqa manam gustashunquitsu [. . .] animalcunata pishtarir cayayämonqan. Tsemi nerqä: ‘Caq quechomi quecä Diosllä. Palabrequi nenqanmanno noqacho munanqequita rurequï’” (Heb. 10:5-7).

Jesus kë Patsachö këkarninqa alläpam kushikurqan, Dios kamashqanta rikar, amïgunkunawan pasar y kuyanqan nunakunawan mikurnin (Mat. 6:26-29; Juan 2:1, 2; 12:1, 2). Peru masqa kushikurqan Teytan munanqanta rurarmi. Tsëmi nirqan: “Nogapa micuynïga cachamagnï Dios Yaya mandamanganta cumplingämi” (Juan 4:34, NTCN; 6:38). Discïpulunkunaqa Jesuspitam yachakuyarqan kushishqa kawakïta imanö tariyänampaq kaqta. Tsëmi Diospa Gobiernumpita nunakunata kushishqa yachatsiyarqan (Lüc. 10:1, 8, 9, 17).

Jesusmi discïpulunkunata mandarqan: “Qamcunata cachayaq jinantin nasioncunapa ewar, noqaman creyicuyänanpaq nunacunata willapäyänequipaq, y creyicoq caqtana bautisayanqui Dios Yayapa, Tsurin Jesucristupa y Santu Espiritupa jutincho. Y qamcunata llapan yachatsiyashqaqcunata yachatsiyanqui” (Mat. 28:19, 20).  Tsëta cumplinapaqqa, nunakunata mëchöpis yachëkätsinantsikllam, jina watukaqmi kutinantsik y Bibliapitam yachatsinantsik. Tsënö ruranqantsikmi alläpa kushitsimäshun.

Wiyakuyaptin o mana wiyakuyaptimpis imanö shonquwan yachatsikunqantsikmi kushishqa yachatsikunapaq precisan. ¿Imanirtaq yachatsikur sïguintsik nunakuna mana munëkäyaptimpis? Porqui musyantsikmi yachatsikurninqa, Diosta y nuna mayintsikta kuyarnin rurëkanqantsikta. Mana yachatsikushqaqa, manam noqantsik ni mëtsikaq nunakunapis salvakïta puëdiyanqatsu (Ezeq. 3:17-21; 1 Tim. 4:16). Tsëmi yachakurishun, nunakuna mana chaskikuyaptimpis kushishqalla yachatsikunapaq imakuna yanapakunqanta.

Yachëpa tapurinqantsikqa alläpam yanapakun. Juk qoyam (wäraymi) Amalia tarirqan parquichö juk nuna periödicuta leyi kaqta, tsënam tapurirqan: “¿Alli noticiakunata tarirqunkiku?” nir, “manam” niptinnam, Amaliaqa nirqan: “Noqam Diospa Gobiernumpita alli noticiata apëkämö”. Tsëmi nunaqa musyëta munar Bibliapita yachakur qallëkurqan. Tsënömi Amaliaqa parquichö kima (kimsa) estudiukunata qallashqa.

Janice jutiyoq cristiänapis alleqmi tiempunta provechan trabäjunchö. Täpakoq revistapa juk yachatsikïnin ishkaq trabajaq mayinkunata gustaptinmi, Janiceqa cada revista yarqamuptin apapunampaq awnirqan. Tsënöllam rurarqan vigilanti trabajadorwampis Täpakoq y ¡Despertad! revistachö imëka yachatsikïkuna yarqamoqta leyita gustaptin. Jina juk empleädapis revistan apapunampaqmi mañakurqan. Janicem nin: “¡Alläpam Jehoväqa yanapamashqa!”. Pëqa cada yarqamoq revistakunatam 11 nunakunapaq trabäjuman cada killa apapun.

Congregacionkunata watukaq anciänum, Diospita yachatsikoqkunata nirqan, yachatsikurirninqa “juk junaqnam kutiyämushaq” nirlla mana ëwakuyänampaq. Tsëpa rantinqa kënö tapuyänampaqmi nirqan: “¿Bibliapita imanö yachakuna kanqanta rikäratsinaqta munankiku? o ¿imë junaqtaq o imë hörataq kutiramüman maslla parlakurinapaq?”. Congregacionta watukaq anciänum willakurqan, tsënö rurarnin juk watukanqan congregacionchö 44 estudiukunata juk semänallachö qallayanqanta.

Jina alläpa allim juk ishkë junaqkunallachö kutinqantsik. Tsënöpam alli shonquyoq nunakunaqa musyayanqa rasumpëpa Bibliapita yachatsita munanqantsikta. Juk warmitam, ¿imanirtaq Jehoväpa testïgunkunawan Bibliapita estudiar  qallarqëki? nir tapuyarqan, tsëmi kënö contestarqan: “Yachakurqa qallarqä kuyayämanqanta y noqapaq yarpachakuyanqanta rikarmi”.

Precursorkunapaq escuëlaman ëwanqampita ichik tiempu pasariptinllam Madaïqa 15 nunakunata Bibliata yachatsirqan y wakin publicadorkunatam pitsqa masta pasarqan. Bibliapita wakin yachakoqkunaqa reunionmanmi ëwar qallëkuyarqan. ¿Imataq yanaparqan Madaïta atska estudiukunata tarinampaq? Escuëlachömi yachakurqan yachakïta munaqkunaman kutiqa alläpa precisanqanta. Testïgu kayänampaq mëtsikaqta yanapashqa cristiänunam kënö nin: “Nunakunata mana jaqipa watukë alläpa precisanqantam yachakurqö”.

Yachakï munaqkunaman kutinan y Bibliapita yachatsinanqa manam fäciltsu, peru atska bendicionkunatam apamun. Nuna mayintsikta yachatsirninqa yanapëkantsik “rasonpa caq yachatsiquicunata” musyayänampaq y salvakuyänampaqmi (1 Tim. 2:3, 4). Awmi, Diospita yachatsirnin y Testïgu kayänampaq yanaparninqa kushikïtam tarishun.