Mëchö këkarpis Jehoväta wiyakushun
“Rinrikim wiyanqa qepëkichö kënö nimoqta: ‘Këmi alli kaq näniqa. Këpa ëwayë’.” (IS. 30:21)
1, 2. ¿Imanötaq Jehovä sirweqninkunata parlapan?
UNËPITA patsëmi Jehoväqa sirweqninkunata tukïnöpa pushashqa. Shamoq tiempuchö pasakunampaq kaqta o imata rurayänampaq kaqta mandarmi, visionkunachö, suëñukunachö o angelkunawan parlaparqan (Nüm. 7:89; Ezeq. 1:1; Dan. 2:19). Wakintanam willatsirqan markanchö sirweqnin nunakunatawan. Imanö parlapashqa kaptimpis, wiyakoqkunaqa atska bendicionkunatam chaskiyarqan.
2 Kananqa, Jehoväqa pushamantsik Palabranwan, santu espïritunwan y congregacionwanmi (Hëch. 9:31; 15:28; 2 Tim. 3:16, 17). Pushakïninqa qepantsikpita, “këmi alli kaq näniqa. Këpa ëwayë” nikämaqnintsik cuentam (Is. 30:21). Jesuswampis parlapämantsikmi, porqui pëtam churashqa ‘llapanchö wiyakoq y yachëwan sirweqwan’ congregacionkunata pushanampaq (Mat. 24:45, NM). Jehoväpa pushakïnintaqa cäsukunantsikmi, tsënöpam imëyaqpis kawakïta puëdishun (Heb. 5:9).
3. ¿Imaraq tsapäramashwan Jehoväta wiyakunantsikta? (Rikäri kë yachatsikïpa qallananchö këkaq dibüjuta.)
3 Diosta wiyakurmi kawënintsikta salvantsik, tsëta musyarmi Satanasqa wiyakunantsikta munantsu. Jina shonquntsikpis traicionëru karmi, wiyakunantsikta permitimashwantsu (Jer. 17:9). Rikärishun Jehovä ninqanta wiyakunata michämanqantsikkunata imanö vencinapaq kaqta, y pëman seguïdu mañakunqantsik, Jehoväwan alli kënintsikta imanö tsapanqanta.
SATANASPA TRAMPANKUNA
4. ¿Imanötaq nunakunata Satanas engañan?
4 Ulikoq (llullakoq) willakïkunawanmi Satanasqa nunakunata engañan (leyi 1 Juan 5:19). Entëru Patsamanmi, periödicu, radiu, television y Internet chashqa. Yanapakurpis, këkunaqa lluta portakïkunata y mana allikunatam yachatsikun (Jer. 2:13). Tantiyarinapaq, ollqupura y warmipura casakoqkunatam allitanö rikätsikun, y tsëkuna mana alli kanqanta Biblia ninqantaqa alläpa michäkunqantanönam rikäyan (1 Cor. 6:9, 10).
5. ¿Imanötaq Satanaspa engañakoq willakïninta wiyashwantsu?
5 ¿Imanötaq Satanaspa engañakoq willakïninkunapita Jehoväta kuyaqkunaqa witikuyanman? ¿Imanöraq tantiyashun ima alli y ima mana alli kanqanta? Palabranta “wiyakur [y] mäkoq mäkoqlla karninmi” (Sal. 119:9). Diospa Palabranmi yanapamantsik ima willakï alli o pantatsikoq kanqanta musyanapaq (Prov. 23:23). Jesuspis, “Dios llapan nenqanta cäsucurninmi [nunakuna] cawayanqa” nirqanmi (Mat. 4:4). Këqa yachatsimantsik Bibliapa musyatsikïninkuna ninqanmannö kawanapaqmi. Tantiyarinapaq, majayoq këkar jukwan punukï mana alli kanqanta Jehovä manaraq qellqatsiptinmi, Josëqa musyarqanna Potifarpa warminwan punukïqa Diospa rikënimpaq mana alli kanqanta. Manam ni ichikllapis jutsa rurëman pensarirqantsu mëläya warmi mañaptimpis (leyi Genesis 39:7-9 *). Kutin kutin warmi tsënö niptimpis, Josëqa Jehovä ninqantam wiyarqan y manam warmitatsu. ¿Imatataq tsëpita yachakuntsik? Ima alli y ima mana alli kanqanta reqinapaqqa, Jehovä nimanqantsikta wiyakunantsikmi alläpa precisan y manam Satanaspa uli willakïnintatsu.
6, 7. ¿Imanötaq permitishwantsu Satanaspa consëjunkuna engañamänata?
6 Më tsëchömi mëtsikaq religionkuna pantatsikoq willakïkunata yachatsikuyan, tsënöpam rasumpa kaq religionta ashiqa alläpa sasa (aja) kanqanta creiyan. Tsënö kaptimpis, rasumpa alli yachatsikïninta fäcil-lla tariyänampaqmi Jehovä permitishqa. Ishkaq parlapämashqa ishkanta wiyananqa sasaraqmi, tsëmi Jesuspa vozninta reqinantsik y wiyanantsik, porqui Jehoväqa pëtam churashqa üshankunata cuidar mitsinampaq (leyi Juan 10:3-5).
7 “Shumaq cäyicuyë” nirqanmi Jesusqa (Mar. 4:24). Jehoväpa consëjunkunaqa fäcil entiendina y alli yanapakoqmi, tsëmi wiyanqantsikmannö ruranapaqqa shonquntsiktaraq alistanantsik. Shumaq mana tantiyakushqaqa, Jehoväpa consëjunta wiyakunapa rantinmi Satanaspa mana alli consëjunta wiyar qallëkushun. Ama permitishuntsu kë mundu, yachatsikïninwan, müsicawan, vidëuwan, yanaqikunawan o yachaq nunakunawan dominamänata (Col. 2:8).
8. a) ¿Imanötaq Satanaspa trampanman shonquntsik ishkiratsimashwan? b) ¿Imaraq pasaramashwan concienciantsikta mana wiyakushqa?
8 Satanasqa musyan mana alli munëyoq kanqantsiktam, y ishkitsimänapaq tsëta utilisaptinmi Jehoväta wiyakïqa sasaraq (Juan 8:44-47). Pensarishun kushikï asuntukunallachö këkanqanrëkur jutsata ruraq nunaman (Rom. 7:15). ¿Imataq tsë mana alliman chätsirqan? Itsa shonqunqa ichikllapa ichikllapa Jehovä ninqanta wiyakïkarqannatsu: itsa cuentata qokurqantsu mana alliman yëkïkanqanta conciencian willaptin, o cuentata qokurpis conciencianta cäsurqantsu. Tantiyarinapaq, itsachi mañakoqnatsu, puntatanö yachatsikoq yarqoqnatsu o reunionkunaman faltar qallëkurqan, tsënöpachi mana alli kanqanta musyëkarpis munëninta rurarirqan. ¿Imatataq rurashwan tsënö mana alli rurëman mana ishkinapaq? Concienciantsik nimanqantsiktam wiyakunantsik y rasllam cambiukunata ruranantsik. Jehovä nimanqantsikta shumaq wiyakurninqa, manam Diospa contran yachatsikïkunata wiyashuntsu (Prov. 11:9).
9. ¿Imanirtaq mana alli munënintsikkunata raslla mäkunantsik precisan?
9 Ima qeshyawampis juk nuna qeshyanqanta mäkurirqa, itsa kawëninta salvariyanman. Tsënöllam kikintsikchö mana alli munëkunata mäkurirqa ras jorqarinantsik, tsënöpam munëninta ruranapaq Satanas ‘kawëkaqta tsarimänata’ jaqishuntsu (2 Tim. 2:26, NM). Tsëmi, pensënintsikkuna y munënintsikkuna Jehovä munanqannö mana kanqanta cuentata qokurirqa, raslla humildäwan pëman kutinantsik, consëjunkunata shonqupita patsë chaskikurnin (Is. 44:22). Mana alli akranqantsikqa, llakikïman y alläpa sufrimientumanmi chäratsimashwan. Tsëmi, Satanaspa trampanman manaraq ishkirnin cambiukunata ras ruranantsik.
¿Imanötaq Diospa kaqchö rurëkuna Satanaspa trampampita tsapämashwan? (Rikäri 4-9 kaq pärrafukunata)
ORGULLÖSU NI MALLAQAKOQ KASHUNTSU
10, 11. a) ¿Imatataq orgullösu nunaqa rikätsikun? b) ¿Imatataq yachakuntsik Corë, Datan y Abiram rurayanqampita?
10 Shonquntsik Jehoväpita rakimënintsikta puëdinqantam musyanantsik. Tantiyarinapaq, parlarishun orgullösu y mallaqäkoq kë Jehoväta wiyakunata imanö michämënintsikta puëdinqanta. Juk orgullösu nunaqa, munanqanta ruranampaq derëchuyoq kanqanta y pitapis wiyakunan mana precisanqantam pensan. Itsa tsënö pensarnin, anciänukunapa, wakin cristiänukunapa o hasta Diospa markan consejakunqanta wiyakï mana precisanqanta pensanman. Tsënö nunapaqqa, Jehovä ninqanqa manam alläpa precisantsu.
11 Israelïtakuna tsunyaq jirkachö këkäyaptinmi, Corëwan Datan y Abirammi, Moisespa y Aaronpa autoridänimpa contran churakäriyarqan. Orgullösu karninmi munëninkunamannö Jehoväta adorëta munayarqan. ¿Imatataq Jehovä rurarqan? Pëkunata y qateqninkunatam wanuratsirqan (Nüm. 26:8-10). Kë pasakunqanmi yachatsimantsik Jehoväpa contran churakëqa imëpis mana alliman chätsikunqanta. Jina yarpätsimantsikmi orgullösukunaqa mana allichö ushayanqanta (Prov. 16:18; Is. 13:11).
12, 13. a) Willakaramï mallaqäkoq kë mana alliman chätsikunqanta. b) Willakaramï mallaqäkoq kë imanö qallanqanta.
12 Mallaqäkoq nunaqa, alli kaqta mana cäsushpam kikimpa munëninllata ashin. Siriu tröpata mandaq Naamanmi leprampita kachakärir Profëta Elisëuta qarënin qoyta munarqan, peru pëqa manam chaskirqantsu. Peru Elisëupa sirweqnin Guehazïqa, tsë qarëta chaskita munarmi kënö pensarqan: “Jehovä rasumpa kawanqanrëkurmi [Naamanpa] qepanta cörrir imallatapis pëpita mañakushaq”. Profëta Elisëu mana musyanqanyaqmi, Naamanta tariparnin ulikïkur (llullakuykur) “juk talentu qellëta y ishkë cambiu röpakunata” mañakurqan. Jina profëta Elïastapis ulipärirqanmi. ¿Imamantaq tsë rurënin chätsirqan? Naamanpa lepranmi pëman pasarirqan (2 Rëy. 5:20-27).
13 Mallaqäkoq këqa ichikllapa ichikllapam qallan. Mana tsarakushqaqa venciramashwanmi. Acanta pasanqanmi rikätsikun mallaqäkoq këqa nunachö ras winanqanta. Acanmi kënö willakurqan: ‘Rikëkurqä Sinarpita juk kuyëllapaq aqshunata, 200 siclos lasaq plätatawan 50 siclos lasaq örutam, y munapärirmi apakurqä’. Munëninta vencinampa rantinmi, tsëkunata suwarir carpa wayinman pakärirqan. Ruranqan musyakäriptinmi Jehovä kastiganampaq kaqta Josuë nirqan. Y ninqannöllam tsë junaq pë y familian wanuyarqan (Jos. 7:11, 21, 24, 25). ‘Mallaqäcoqqa’ ama kashuntsu, porqui tsëqa juk trampanömi imë höra karpis ishkiratsimäshun (Lüc. 12:15). Itsa höraqa mana alli y rakcha rurëkunaman pensashwan. Tsënö kaptinqa alläpam precisan tsë pensëkunata dominanantsik, y manam permitinantsiktsu jutsata ruranqantsikyaq tsë munë apamänata (leyi Santiägu 1:14, 15).
14. ¿Imataraq rurashwan orgullösu y mallaqäkoq kanqantsikta ichikllatapis mäkurninqa?
14 Orgullösu kë y mallaqäkoq këqa mana allimanmi chätsikun, tsëman pensanqantsikmi yanapamäshun Jehovä nimanqantsikta wiyakunapaq (Deut. 32:29). Pëqa manam alli kaq nänillapatsu pushamantsik, sinöqa tsëpa ëwar imanö yanapamänapaq kaqta y tsë nänipita witikushqa imachö ushanapaq kaqtapis nimantsikmi. Shonquntsik orgullösu o mallaqäkoq karnin imatapis ruratsimënintsikta munaptinqa, noqantsikta, familiantsikta y Dioswan amïgu kënintsikta imaman chätsinampaq kaqtam puntata yarpachakunantsik.
JEHOVÄMAN SEGUÏDU MAÑAKUSHUN
15. ¿Imatataq Jesuspa ejemplun yachatsimantsik?
15 Jehoväqa alli kanatam munan (Sal. 1:1-3). Y mas wananqantsik höram yanaparamantsik (leyi Hebrëus 4:16). Jutsannaq këkarpis Jesusqa teytanwan parlëtam wanarqan, tsëmi seguïdu mañakoq. Y Jehoväqa angelninkunatam sirwiyänampaq kachamurqan, Santu espïrituntam qorqan, y chunka ishkë apostulninkunata akraptimpis yanaparqanmi. Jina ciëlupitam parlamurqan wamranta yanapanqanta y akranqanta rikätsikunampaq (Mat. 3:17; 17:5; Mar. 1:12, 13; Lüc. 6:12, 13; Juan 12:28). Noqantsikpis Jesusnömi shonqupita patsë mañakunantsik (Sal. 62:7, 8; Heb. 5:7). Tsënö rurarqa Jehoväwanmi alleq parlashun y munanqannömi kawakushun.
16. ¿Imatataq rurashwan Jehovä nimanqantsikta wiyakunapaq?
16 Jehoväqa pï mëtam consejan, tsënö kaptimpis manam pitapis obligantsu ninqanta rurayänampaq. Peru pushamänata munarqa santu espïrituntam mañakunantsik y pëqa qomäshunmi (leyi Lücas 11:10-13). Bibliaqa, ‘alleq wiyayë’ nimantsikmi (Lüc. 8:18). Tantiyarinapaq, rakcha munëkunata vencinapaq Jehoväta mañakïkar pornografïata o mana alli pelïculakunata rikarëqa, mana allim kanman, tsëtaqa sinvergüensakunallam rurayan. Tsëpa rantinqa, santu espïritu këkanqan sitiukunachömi kanantsik; reunionkunachönö. Tsëkunachömi mëtsikaq cristiänukuna cuentata qokuyashqa shonqunkunachö mana alli munëkuna këkanqanta, y tsëta altsarninmi imëka llakikïkunapita witikuyashqa (Sal. 73:12-17; 143:10).
JEHOVÄ NIMANQANTSIKTA IMËPIS WIYAKUSHUN
17. ¿Imanirtaq allitsu kanman kikintsikllaman markäkï?
17 Rey Davidman pensarishun. Jövin këkarllam jatungarë Goliat-ta vencirirqan. Tiempuwannam soldädu karqan, y Israelpa reynin tikrarirmi precisaq rurëkunata akrarqan. Peru kikinllaman markäkuptinmi shonqun traicionarirqan, tsënöpam Bat-sëbawan jutsata rurarqan y qowan Urïasta wanutsiyänampaq mandarqan. Tsënö karpis, kushikïpaqqa Jehovä piñapaptin humillakurnin arrepentikunqanmi, tsënöpam pëwan amïgu kënin yapë kutikärirqan (Sal. 51:4, 6, 10, 11).
18. ¿Imaraq yanapamäshun Jehovä nimanqantsikta wiyakunapaq?
18 Kikintsikllaman markäkunantsikpa rantinqa, 1 Corintius 10:12 textu ninqanta yarpäshun. ‘Kikintsikllapita purinata’ mana puëdirmi Jehoväta wiyakunantsik alläpa precisan, manaqa Satanastam wiyakïkäshun (Jer. 10:23). Tsëmi mana jaqita mañakushun y santu espïritu yanapamänata jaqishun, tsënöpam Jehovä nimanqantsikta imëpis wiyakïkäshun.
^ par. 5 Genesis 39:7-9: “Tsëpitanam patronnimpa warminqa Josëta rikapar qallëkurqan, tsënam, ‘noqawan punukïkushun’ nirqan. Peru pëqa manam munarqantsu, y patronnimpa warmintam kënö nirqan: ‘Patronnïqa wayinchö kaqkunapaqqa manam yarpachakuntsu, y llapan kapunqantam makïman churamushqa. Kë wayichöqa noqallam mas precisaq kä, y pëqa llapantam qomashqa, qamllatam manaqa warmin kaptiki. Tsëqa, ¿imanöraq kë mana allita rurarnin Diosta llakitsir jutsallakïköman?’”.