Kutirnin wawqikikunata yanapë
JESUSTA negarirmi, Pëdruqa alläpa waqarqan. Dioswan mana alli këkanqanta vencinampaqqa kallpachakunanraqmi karqan. Tsënö kaptimpis, Jesusqa wakin qateqninkunata yanapanampaqmi utilisëta munarqan. Tsëmi nirqan: “Noqaman yape marcäcamurnin, disipulu mayiquicunata yanapëcunqui” (Lüc. 22:32, 54-62). Tsënöpam Pëdruqa punta cristiänukunapa tiempunchö congregacionta yanaparqan (Gäl. 2:9). Tsënöllam, anciänu këninkunata oqrashqa kaqkunapis, yapë tsë cargunkunaman kutiyänampaq sinchikurnin cristiänu mayinkunata yanapar kushikïta puëdiyanqa.
Itsa wakin cristiänukunaqa, carguyoq kayanqanta oqrayanqampita alläpa llakikuyanman. Boliviachö 20 watapitapis masna anciänunö yanapakushqa Julium * kënö nin: “Discursukunata rurar y cristiänu mayïkunata watukarmi mas tiemputa pasaq kä. Peru tsë llapan rurënïtam oqrarirqä, y tsëta jaqirinqäqa llakikïpaqmi kashqa”. Juliuqa yapënam anciänunö yanapakïkan.
IMËKAPA PASARNIMPIS “CUSHICUYË”
Santiägum nirqan: “Wauqicuna panicuna, tuquilaya desgrasiacuna pasayäshuptiqui [...] cushicuyë” (Sant. 1:2). Pëqa parlëkarqan Diosta sirwinqantsikpita qatikachashqa kanqantsikpaqmi y jutsasapa karnin imëka mana allikunaman ishkinqantsikpaqmi. Kikintsikllaman yarparar imëkata ruranqantsikpaq y wakin wakinllata alli tratanqantsikpaq, y maskunapaq (Sant. 1:14; 2:1; 4:1, 2, 11). Jehovä corregimashqaqa alläpa nanatsikïpaqmi kanman, peru manam tsërëkurtsu kushikïnintsikta oqrarishwan (Heb. 12:11).
Congregacionchö carguntsikta jaqirinapaq nimashqantsik kayaptinqa, Jehoväman markäkunqantsikta y kuyanqantsiktam rikätsikunantsik. Y kënömi tapukunantsik: “¿Munënïta rurëta munarllaku tsë carguyoq këta munä? ¿O Jehoväta kuyarku, congregacionnin pëpa kanqanta musyarku y tsëchö kaqkunata kuyëpa cuidëta munarku?” (Hëch. 20:28-30). Anciänunö sirwishqa cristiänukunaqa Diosta mana jaqipa sirwirninmi, llapankunata rikëkätsiyan, hasta Satanastapis, Jehoväta shonqupita patsë kuyayanqanta.
Mana allita ruranqampita Davidta piñapäyaptinmi chaskikurqan y arrepentikurqan, tsënöpam perdonashqa karqan. Tiempuwannam cantarqan: “Kushishqam kanqa jutsankunapita perdonashqa kaqqa y jutsankuna tsapashqa kaptinqa. Kushishqam nuna kanqa pëchö ima mana allitapis Jehovä mana tariptin, y espïritunchö engäñu mana kaptin” (Sal. 32:1, 2). Diospa markanchö alli mitseq tikranampaqmi piñapäyanqanqa yanaparqan.
Cargunkunaman kuteq anciänukunaqa, unëpitapis mas alli mitseqmi tikrayashqa. Jukmi kënö nin: “Kananqa jutsa ruraqkunata mas allim yanapëta puëdï”. Y juk kaqnam kënö nirqan: “Kananqa masnam kuyä wakinkunata yanapëta”.
¿KUTIMÏTA PUËDINKIMANTSURAQ?
Salmistam nirqan: “Manam imëyaqpis [Jehoväqa] mana alli ruranqantsikta yarparäkïkanqatsu” (Sal. 103:9). Manam pensashwantsu jutsata rurayanqanrëkur Jehovä pëkunaman manana markäkunqanta. Atska watapana anciänu këninta jaqishqa Ricardum nin: “Jutsäpitaqa alläpa llakishqam sientikurqä. Jina mana väleqnö sientikunqämi cargöman kutinäpaq yanapamarqantsu. Cristiänu mayïkuna manana markäkayämänampaq kaqtam mantsaq kä. Peru yanapakïta gustarmi Bibliapita yachatsikoq kä, congregacionchöpis wakinkunata animaq kä y pëkunawanmi yachatsikoq yarqoq kä. Tsëmi yanapamarqan mantsakïnïta vencinäpaq, y kananqa yapënam anciänunö yanapakïkä”.
Jehoväta kuyanqëkita rikätsikï kushi kushi sirwirnin
Juk wawqi sientikurninlla (qallayarninlla) kakuptinqa mas sasam kanqa anciänu këninman kutinampaq. Tsëpa rantinqa Saul qatikachaptin David ruranqantam ruranman. Vengakunampaq tiempu këkaptimpis Davidqa manam tsëta rurarqantsu (1 Sam. 24:4-7; 26:8-12). Guërrachö Saul wanuriptinqa David waqarqanmi, y Jonatantawan Saulta kuyanqantam nirqan (2 Sam. 1:21-23). Davidqa manam sientikushqallatsu kakurqan.
Manaraq alli entiendir o jutsannaq këkaptiki imatapis niyäshushqa kayäshuptikiqa, ama permititsu sientikushqalla këniki dominashunëkita. Gran Bretäñapita 30 watapana anciänunö sirwishqa Williammi, anciänu këninta jaqirirnin wakin anciänukunawan sientikushqa quedakurqan. ¿Imataq yanaparqan tsëta vencinampaq? Pëmi kënö nin: “Job libruta leyinqämi alläpa yanapamarqan. Kima yanaqinkunata Job perdonanampaq Jehovä yanapëkaptinqa, ¿manatsuraq noqata yanapamanman congregacionchö anciänukunawan sientikushqalla mana kakunäpaq?” (Job 42:7-9).
JEHOVÄQA YANAPANMI ANCIÄNU KËMAN KUTEQKUNATA
Congregacionchö anciänu këta jaqishqa karninqa, allichi kanman imanir jaqinqëkita tapukunqëki. ¿Problëmëkikuna atska kaptinku? ¿Juk mas precisaq rurëkuna kawënikichö yurimuptinku? ¿Cristiänu mayikikunapa jutsankuna qelanätsishuptikiku? Ima kashqa kaptimpis, yarpë, anciänu karninqa imëkanöpam cristiänu mayikikunata yanaparqëki. Discursukunawan y rurënikikunawampis animakurqëkim, y watukakunqëkipis mana allikunapa pasayanqanchö alläpam yanapakurqan. Jinamampis, anciänunö yanapakunqëkiqa Jehoväpa shonquntam alläpa kushitsirqan y kikikipatapis (Prov. 27:11).
Jehoväqa mëtsikaq cristiänukunatam yanapashqa kushi kushi yapë kayänampaq y congregacionchö anciänunö yapë yanapakïta munayänampaq
Jehoväqa mëtsikaq cristiänukunatam yanapashqa kushi kushi yapë kayänampaq, y congregacionchö anciänunö yapë yanapakïta munayänampaq. Anciänu kënikita kikiki jaqishqa karnin o jaqinëkipaq niyäshushqa kayäshuptikipis, ¿imanirtaq kallpachakunkitsu yapë anciänunö yanapakunëkipaq? (1 Tim. 3:1, NM.) Colosensis cristiänukuna Jehoväpa munënin ima kanqanta alleq musyayänanta munarmi, Pabluqa tsëpaq imëpis mañakïkarqan. Tsëmi nirqan, Jehovä “munashqanno” pëta kushitsirnin kawakuyänampaq (Col. 1:9, 10). Anciänu këman yapë kutirninqa Jehoväta mañakï, kallpata, pacienciata y kushi kushi këta qoshunëkipaq. Kë ushanan junaqkunachöqa Jehoväpa markan alläpam wanan kuyakoq anciänukunapa yanapakïninta. Puëdirninqa, ¿munankimantsuraq cristiänu mayikikunata yanapëta?
^ par. 3 Rasumpëpa jutinkunaqa jukmi.