1. ¿Imatataq pushakoq religiösukuna rurayashqa guërrakuna kaptin?

¿DIOSQA munantsuraq cristiänukuna guërraman ëwar wanutsinakuyänanta? “Cristiänum kä” neqkunaqa, mëtsikaqmi tsëta rurayashqa. Catölicu sacerdötikunam tröpakunata y armakunata bendiciyashqa chikeqnin nacionkunachö catölicu mayinkunata wanutsiyänampaq. Jina tsënöllam, wakin religionkunapis rurayashqa. Tsëqa Ishkë kaq Jatun Guërrachömi cläru rikakurqan.

2, 3. a) ¿Imatataq Jehoväpa testïgunkuna rurayarqantsu Ishkë kaq Jatun Guërrachö? b) ¿Imanirtaq Testïgukunaqa guërrachö yanapakuyarqantsu?

² ¿Testïgukunaqa Ishkë kaq Jatun Guërrachö yanapakuyarqanku? Manam ni imanöpapis yanapakuyarqantsu. Jesus yachatsikunqanta y ruranqantam qatiyarqan. Porqui pëmi nirqan: “Sitsun qamcuna jucniqui jucniqui cuyanacuyanqui, llapan nunacunam musyariyanqa  noqapa disipulücuna cayanqequita” (Juan 13:35). Jina corintukunaman Pablu cartakunqantam wiyakuyarqan (leyi 2 Corintius 10:3, 4, NM *).

³ Concienciankunata Bibliawan yachatsishqa karninmi, Testïgukunaqa guërrapaq yachakuyantsu ni ëwayantsu. Tsërëkurmi autoridäkunaqa qatikachäyarqan. Mëtsikaqmi carcelchö y sinchi trabäjukunachö kayarqan. Alemania näzichöqa hasta wanutsiyarqanmi. Tsënö tratëkäyaptimpis, Euröpachö Testïgukunaqa manam qonqayarqantsu rurëninkunata. Tsëmi carcelkunachöpis yachatsikïkäyarqanlla. * Y 1994 watachöpis, Ruandachö wanutsinakï kaptin manam mëtikuyarqantsu. Jina unë Yugoslaviachö rakikë kaptimpis, Balcanes guërraman manam ni imanöpa mëtikuyarqantsu.

4. ¿Imapitataq nunakuna següru kayan guërrakunachö mana yanapakunqantsikta rikarnin?

⁴ Gobiernukunaman mana qaqanqantsikta rikämarnintsikmi, më tsë nacionpita nunakuna cuentata qokuyashqa, Diosta y nuna mayintsikta rasumpa kuyanqantsikta, y Jesuspa rasumpa qateqnin kanqantsikta. ¿Ima mastaq nunakunata rikätsishqa rasumpa cristiänukuna kanqantsikta?

5. ¿Ima mastataq Jesuspa discïpulunkuna rurayänan karqan?

⁵ Yachatsikur qallanqampita patsëmi, Jesusqa Diospa Gobiernumpita yachatsikï alläpa precisanqanta rikätsikurqan. Tsëta rurar qallayänampaqmi 12 discïpulunkunata akrarqan, tsëpitanam 70 * masta yachatsirqan (Lüc. 6:13; 10:1). Judïukunata yachatsiyänampaqmi puntataqa  yachatsirqan. Peru tiempuwanqa mastanam rurayänan karqan; juk nacionkunamannam tsë willakïta chätsiyänan karqan. ¡Këqa alläpa jukläya rurënam karqan pëkunapaq! (Hëch. 1:8.)

6. ¿Imanötaq Pëdruqa musyarirqan Diospaq llapan nunakuna igual-lla kayanqanta?

⁶ Apostul Pëdruqa kachashqa karqan mana judïu Corneliupa wayinmanmi. Tsëchömi Pëdruqa cuentata qokurirqan Diospaqqa llapan nunapis igual-lla kanqanta. Tsëmi Corneliutawan llapan familianta bautisakuyänampaq mandarqan (Hëch. 10:9-48). Tsëpita patsëmi, discïpulukunaqa entëru Patsamanna Diospa alli willakïninta chätsiyänan karqan.

7, 8. ¿Imatataq Jehoväpa testïgunkuna rurayashqa mëtsikaq nunakunaman Diospa yachatsikïninta chätsiyänampaq? (Rikäri kë yachatsikïpa qallananchö këkaq dibüjuta.)

⁷ Kanan witsankunapis, Jehoväpa testïgunkunata pushaqkunaqa entëru Patsaman Diospa yachatsikïnin chänampaqmi yanapakïkäyan. Cäsi 8 millon Testïgukunam yachatsikïkäyan 600 idiömapitapis maschö, y mas idiömakunachöraqmi yachatsikuyanqa. Wayin wayin, cällikunachö y mostradorkunaman publicacionkunata churëkur yachatsikuyanqampitam reqishqa kayan.

⁸ Testïgukunaqa juk idiömakunamanmi Bibliata y publicacionkunata tikrëkätsiyan. Tsëta rurayänampaqqa 2.900 cristiänukunapitapis mastam yachatsiyashqa. Alläpa mana reqishqa idiömakunamampis tikrëkätsiyanmi. Tantiyarinapaq, Espäñachöqa, mëtsikaqmi catalan idiömata y mas idiömakunata parlayan. Y Testïgukunapaqa catalan idiömachö publicacioninkuna kannam y reunionkunatapis tsë idiömachö rurayanmi. Tsë idiömatam nunakunaqa mas entiendiyan.

9, 10. ¿Imatataq Testïgukuna rurëkäyan nunakuna Jehoväpita yachakuyänampaq?

⁹ Tsënö juk idiömaman tikratsiqa më tsë markakunachömi rurakëkan. Mëxicuchöqa español idiömatam parlayan, peru juk idiöma parlaq nunakunapis mëtsikaqmi kayan. Juk kaqqa maya idiömam. Y tsëllaraqmi sucursal, maya idiömaman tikratseqkunata markankunaman mandashqa tsë idiömata parlar y wiyar sïguiyänampaq. Jina, Nepal nacionchöqa 29 millon nunakunam täräyan, y 120 idiömakunatam parlayan, y 10 millon kaqmi nepales idiömata parlayan. Publicacionnintsikkunaqa tsë idiömachöpis kannam.

¹⁰ ¿Imanirtaq Jehoväpa markanqa tukï idiömakunaman tikratsin? Jehoväpa yachatsikïninta alläpa precisaqpaq churarninmi. Testïgunkunaqa entëru Patsachömi qarakuyashqa tratädukunata, follëtukunata y revistakunata. Gastukunapaqqa voluntäninkunallapitam qoyan, Jesus ninqanta qatirnin: “Debaldillam chaskiyarqunki y debaldilla qarakuyë” (Mat. 10:8, NM).

11, 12. Testïgukuna yachatsikuyanqanta rikar, ¿imatataq nunakuna cuentata qokuyan?

¹¹ Testïgukunaqa, rasumpa kaqta tariyanqantam següru kayan,  tsëmi kushishqa yachatsikuyan. Y imëkatam rurayan Jehoväpa yachatsikïninta më tsë nacionkunaman y ichisaq markakunamampis chätsiyänampaq. Wallkallawanmi kawakuyan y juk idiömata yachakurmi tsë idiöma parlaq markakunachö yanapakïkäyan. Tsënömi llapan nunakunata musyatsiyan Jehoväpa testïgunkunaqa Jesuspa rasumpa qateqnin kayanqanta.

¹² Testïgukunaqa këta rurantsik rasumpa kaqta tarinqantsikta musyarmi. Peru ¿ima mastaq nunakunata rikätsin rasumpa kaq religion kanqantsikta? (Leyi Romänus 14:17, 18.)

13. ¿Imatataq Testïgukuna rurayashqa Jehoväpa markanta limpiuta katsiyänampaq?

¹³ ¿Imanöpataq rasumpa kaqta tariyanqanta wakin cristiänukuna creiyan? Juk cristiänum kënö nirqan: “Jehoväpa markan limpiu kanampaqqa, alliran sinchikuyänan, mana alli portakoqkunata corregiyänampaq o piñapäyänampaq”. ¿Imataq yanapakun Jehoväpa markanta limpiuta katsinapaq? Tsëpaqqa llapan Testïgukunam Biblia ninqanta wiyakuyan y Jesuswan qateqninkuna rurayanqanta qatiyan. Tsënöpam, Jehoväta mana wiyakuyanqanrëkur, wallkaqlla congregacionpita qarqushqa kayan. Mëtsikaq Testïgukunam portakïninkunachö kananqa limpiu kayan, Diosta manaraq reqirnin mana allikunata rurashqa karpis (leyi 1 Corintius 6:9-11).

14. ¿Ima rurayashqa Jehoväpa markampita qarqushqakuna, y congregacionqa imanötaq chaskishqa?

¹⁴ ¿Imataq pasakushqa Bibliapa consëjunta mana wiyakuyanqampita congregacionpita qarqushqa kaqkunawan? Mëtsikaqmi mana alli rurayanqampita arrepentikurnin kutiyashqa y congregacionqa alläpa kushishqam chaskishqa (leyi 2 Corintius 2:6-8). Biblia ninqanta wiyakïqa, congregacionta limpiuta  y markäkïpaqtam katsin. Wakin iglesiakunachöqa imëka mana allikunatam permitiyan, peru Testïgukunaqa Biblia mandakunqanta respetarmi tsëta permitiyantsu. Tsëmi mëtsikaqta rikätsishqa Testïgukuna Biblia ninqannö kawayanqanta.

15. ¿Imakunataq juk wawqita rikätsishqa rasumpa kaqta katsinqanta?

¹⁵ ¿Imanöpataq Testïgukunaqa següru këkäyan rasumpa kaqta katsiyanqanta? 54 watayoq juk wawqim kënö willakun: “Jövin kanqäpitam kima yachatsikïkuna markäkunäpaq (yärakunäpaq) yanapamashqa: 1) Dios kanqan, 2) Biblia Diospa Palabran kanqan, y 3) Jehoväpa testïgunkunapa congregacionninta Dios utilisëkanqan y bendicikanqan. Kë kiman rasumpa kanqanta o mana kanqantam pruëbaman imëpis churarqö. Peru tsëkuna rasumpa kanqanta rikanqämi markäkïnïta wata wata sinchiyätsishqa y tsëmi kë marka rasumpa kaqta katsinqanta crei”.

16. ¿Imataq juk panita rikätsishqa rasumpa kaqchö këkanqanta?

¹⁶ Nueva York Betelchö yanapakoq casäda panim Jehoväpa markampaq nirqan: “Kë markallam Jehoväpa jutintaqa yachatsikun. ¡Y kë jutiqa 7.000 kutinömi Bibliachö yurin! Jina 2 Crönicas 16:9 textu kënö ninqampis alläpam yanapaman: ‘Jehoväpa nawinkunaqa entëru patsapam rikarëkan pëllata llapan shonqunkunawan kuyaqkunata kallpanwan yanapanampaq’”. Jina nirqanmi: “Rasumpa kaqta musyanqämi yanapamashqa shonqupita patsë Jehovällata kuyanäpaq, y kallpanta qomänampaq. Pëwan amïgu kanqämi imëkapitapis mas precisaqqa. Jehoväta reqinäpaq Jesus ruranqantapis alläpam agradecikö. Tsëta musyanqämi yanapaman”.

17. Juk nunam puntata Diosman creeqtsu, peru ¿imanöpataq kananqa rasumpa kaqta tarinqanta crein?

¹⁷ Juk nunam puntataqa Diosman creirqantsu, peru cristiänu tikrarirnam kënö nin: “Jehovä ruranqankunata rikarmi, cuentata qokurqö kushishqa kawakunata munanqanta; y sufrinata mas mana permitinampaq kaqta. Kë munduqa mas mana allillamanmi ëwakïkan, peru Jehovä markanta espïritunwan yanapaptinmi, kushikïchö, markäkïchö y kuyakïchö mas alliyëkan” (leyi 1 Pëdru 4:1-4).

18. a) ¿Ima niyarqantaq ishkaq wawqikuna? b) ¿Y qamqa niyanqanwan acuerduku kanki?

¹⁸ Atska watapana Jehoväta sirweq  wawqim, rasumpa kaqta tarinqanta imanir creinqanta kënö nirqan: “Bibliata unëna estudianqämi rikätsimashqa, Testïgukunaqa punta cristiänukuna rurayanqanta rasumpa qatiyanqanta. Më tsëpam viajarqö y jukllëllanö kayanqantam rikarqö. Bibliapa rasumpa yachatsikïninqa alläpa kushikïtam qomashqa”. Y 60 watayoq wawqitanam tapuyarqan: “¿Imanirtaq següru këkanki Testïgukuna rasumpa kaqta katsiyanqanta?”. Pënam nirqan Testïgukunalla Jesusta rasumpa qatiyanqanta. Jina nirqanmi: “Jesus yachatsikunqanta y kawënintam allipa yachakuyarqö, tsëmi ruranqanta alläpa kuyayä. Jina përëkurmi kawënïkunachö cambiukunata rurayarqö Diosman witiyänäpaq. Y alleqmi creiyä Jesucristu wanunqanrëkurlla salvacionta tarita puëdinqantsikta. Jina musyayämi wanunqampita kawarimunqanta y atskaq rikäyanqanta” (leyi 1 Corintius 15:3-8).

19, 20. a) ¿Ima rurë precisanqantataq Röma cristiänukunata Pablu yarpätsirqan? b) ¿Ima shumaq rurëyoqtaq kantsik?

¹⁹ Nuna mayintsikta kuyarninqa, manam rasumpa kaqta kikintsikllapaq katsishwantsu. Pablum Römachö cristiänukunata nirqan: “Sitsun nunakunata willanki shimikiwan Jesus Señor kanqanta, y shonqïkichö creinki wanushqampita Dios sharkatsimunqanta, salvashqam kanki. Porqui shonquwanmi creintsik alli rurëpaq, peru shimïwannam willakuntsik salvacionpaq” (Rom. 10:9, 10, NM).

²⁰ Jehoväpa testïgunkunaqa segürum këkantsik rasumpa kaqta tarinqantsikta. Diospa Gobiernumpita yachatsikïqa alläpa kushikïpaq kanqantam musyantsik. Tsëmi yachatsikurninqa, Biblia ninqanllata creiyänanta shuyaräshuntsu, sinöqa següru këkanqantsikpitapis creiyätsun.