GUY HOLLIS PIERCE wawqiqa, Jehoväpa Testïgunkunata Pushaqkunapitam karqan, y 18 de marzu 2014 watam 79 watayoq këkar kë Patsachö Jehoväta sirwinqanta usharirqan. Y Cristupa wawqin karmi, kawarimushqa ciëluchö kawanampaqna (Heb. 2:10-12; 1 Pëd. 3:18).

Guy Pierce wawqiqa, 1934 wata 6 de noviembri killam yurikurqan Auburn (California, Estädus Unïdus) markachö, y 1955 watachönam bautisakurirqan. Y 1977 watanam, kuyashqa warmin Pennywan casakurirqan, y ishkanmi wamrankunata shumaq wätayarqan. Tsënöpam alläpa kuyakoq nuna karqan. 1982 watachönam precursor këman chäriyarqan. Y 1986 watachönam, Estädus Unïduschö congregacionta watukakoqnö sirwir qallëkuyarqan, y 11 watapam tsëchö yanapakuyarqan.

Y 1997 watachönam, Estädus Unïduschö Betel wayiman invitariyarqan, tsëchöqa yanapakurqan Diospita Yachatsikïta Rikaqkuna nishqanchömi. 1998 watachönam Jehoväpa Testïgunkunata Pushaqkuna Llapan Tiempunkunawan Sirwiyänampaq Rikaqkunachö yanapakurqan. 1999 wata 2 de octubri killachömi, cada wata reunion rurakanqanchö Watch Tower Bible and Tract Society of Pennsylvania nishqanchö willakuriyarqan wawqi Pierceqa, Jehoväpa Testïgunkunata Pushaqkunapitana kanqanta. Pasaq watakunachöqa sirwishqa, Llapan Tiempunkunawan Sirweqkunata Rikaqkunachö, Publicacion Qellqaqkunata Rikaqkunachö, Publicacionkuna Kanampaq Rikaqkunachö y Imapis Pasanqanta Rikaqkunachömi.

Kushi kushilla kaptin, y bromista kaptinmi tukïläya nacionpita y tukïläya nunakuna pëta yachanäyaq. Peru kuyakoq, humildi, Jehoväpa mandamientunkunata y musyatsikïninkunata respetanqampita y Jehoväman chipyëpa markäkunqampitam alläpa kuyayaq. Guy Pierce wawqipaqqa, itsachi Inti (Rupay) yarqamunan segürutsu karqan, peru Jehovä llapan änikunqanta cumplimunampaq kaqman markäkunqanqa paqwë segürum karqan, y tsëpita entëru Patsachö nunakuna musyayänantam munarqan.

Wawqi Pierceqa mana utipam Jehoväta sirweq. Qoya qoyallam shärikureq y höraqa paqasyaqmi trabajaq. Entëru Patsapam viajarqan cristiänu mayinkunata yanapanampaq, y manam alläpa ocupädutsu kaq Betel wayichö sirweqkuna consëjuta o yanapakïta o pëwan juntu kariyänampaq ashiyaptimpis. Posadatsikoq kanqan, alli amïgu kanqan, y Bibliawan pitapis shumaq animarinqanqa, mana qonqëpaqmi tikrashqa reqeqninkunapaqqa.

Awmi, warmin, joqta wamrankuna, willkankuna y willkankunapa wamrankuna y teytantanö rikaqkunapis llakiyanmi kuyashqa wawqintsikta y amïguntsik Piercetaqa. 2014 wata säbadu 22 de marzu killam, wawqi Mark Sanderson Jehoväpa Testïgunkunata Pushaqkunapita, pampakuyänampaq juk discursuta rurarqan Brooklyn Betel wayichö. Tsë discursuchömi willakurqan, wawqi Pierceqa ciëluchö kawanampaq kaqta y Jesus ninqantam kënö leyirqan: “Papänï yachanqanchomi atsca wayicuna can. [...] Ewarir alistar usharirnam, cutimushaq pushacuyänaqpaq [“kikïmi wayïchö chaskiyashqëki”, NM]. Noqa canqächonam qamcunapis cayämunqui. Y musyayanquim meta ewanäta y mepa näni canqanta” (Juan 14:2-4).

Wawqi Piercetaqa alläpam llakishun. Peru kushikuntsikmi, imëpis täränampaq kaq wayinman ëwaq nänita musyanqampita.