1, 2. Ima edäyoq o imanö costumbriyoq kashqapis, ¿imanö sirwinatataq Dios munan?

JÖVIN, Jehoväpa testïgun karqa, alläpa precisaq jövin kanqëkitam yarpänëki. Mëtsika nacionkunachömi cada wata mëtsikaq jövinkuna bautisakuyan. ¡Jehoväta sirweqkunawan juntu sirwiyänampaq bautisakoqta rikëqa alläpa kushikïpaqmi!

² Itsa jövin mayikikunawan juntu këta gustanki. Rasumpa kaqchöqa, llapantsiktam gustamantsik edä mayintsikkunawan juntu këqa. Peru ima edäyoq o imanö costumbriyoq kashqapis, Jehoväqa munan, llapan sirweqninkuna juntulla sirwinantsiktam. Apostol Pablum nirqan: “[Diosqa] munan llapan nunacuna salbacuyänantam, y rasonpa caq yachatsiquicunata musyayänantam” (1 Tim. 2:3, 4). Y Apocalipsis 7:9 textunam nin, Jehoväta sirweqkunaqa “jinantin nasionpita [...] y tuqui idioma parlaq” nunakuna kayanqanta.

3, 4. a) ¿Imanötaq kanan witsan jövinkuna portakuyan? b) Efesius 4:25 textu ninqannö, ¿imanötaq tsënö portakïta cristiänukuna rikäyanman?

 ³ Diosta mana sirweq jövinkunaqa, munëninkunallatam ashiyan y rurayan. Yachaq nunakunam niyan, kanan witsan jövinkunaqa kikinkunallapaq imatapis ashiyanqanta. Parlakïninkunawan y vistikïninkunawanmi rikätsikuyan, mayorkunata mana respetayanqanta. Peru Diosta sirweq jövinkunaqa, ¡alläpa jukläyam kayan!

⁴ Diosta mana sirweq jövinkunapa mana alli portakïninkunaqa, më tsëchöpis igual-llam. Tsënö portakïkunaqa manam kananllaraqtsu, tsënö portakïta jaqiyänampaqmi apostol Pablupis unë witsan cristiänukunata consejarqan. Tsënö portakïqa, Diablupa kanqanta y “mana cäsucoq nunacunata” inkitanqantam nirqan (leyi Efesius 2:1-3). Tsëmi, Jehoväta sirweq jövinkunaqa, tsënö portakïkunapita cuidakuyänan. Y kushikïpaqmi, ¡mana alli kanqanta mäkurir, alleq tsarakuyanqan y congregacionwan juntu këkäyanqan! “Noqantsicqa juc castanollanam cantsic” nir Pablu consejakunqantam wiyakuyan (Efes. 4:25). Ushakë junaq chämunqanmannömi, cristiänu mayintsikwan juntu këqa masraq precisanqa. Rikärishun juntu kë imanir alläpa precisanqanta.

5, 6. ¿Imatataq yachakuntsik Lotwan wamrakuna juntulla këkäyanqampita?

⁵ Unë witsanmi, Jehoväqa sirweqninkunata peligrukunapita tsaparqan, sasa tiempukunachö yanapanakuyanqampita. Kanan witsampis, tsë nunakunapitam llapantsik yachakïta puëdintsik. Lot pasanqanta rikärishun.

⁶ Lotwan Familianqa peligruchömi këkäyarqan, porqui täräyanqan Sodöma markam ushakärinampaqna këkarqan. Juk angelmi willarqan karu jirkakunapa ëwakunampaq. “¡Ëwakï mana wanukëkipaq!” nirqanmi (Gen. 19:12-22). Lotqa wiyakurqanmi y ishkan warmi wamrankunapis. Peru mashampaq kaq nunakunata willaptinqa, “bromapëkaqtanömi” rikäyarqan, y tsënöpam  wanuyarqan (Gen. 19:14). Lotwan wamrankunallam, juntu kayanqampita salvakuyarqan.

7. ¿Imanötaq Jehovä yanaparqan israelïtakunata mana rakikäkuriyanqampita?

⁷ Jina israelïtakunapis, Egiptupita yarqurqa manam rakikar ushashqatsu ëwayarqan. Y Jehovä lamarta kichariptimpis, manam Moisesllatsu, ni wallkaq israelïtakunallatsu pasayarqan. Sinöqa, Jehovä tsapaptinmi llapankuna pasayarqan (Ex. 14:21, 22, 29, 30). Llapankunam juntu këta procurayarqan, hasta pëkunawan ëwaq mana Israel kaqkunapis (Ex. 12:38). ¿Manam jövin kaqkunalla juk grüpuman rurakëkur munayanqan nänipa ëwakuyanqantatsu pensantsik aw? Manam. Tsënö rurarqa Jehoväpa tsapäkïnintam oqrariyanman karqan (1 Cor. 10:1).

8. Jehosafat mandakunqan witsanchö, ¿imanötaq juntu këkäyanqanta Diospa markan rikätsikurqan?

⁸ Rey Jehosafat mandakunqan witsanchömi, Diospa markanta chikeq “mëtsikaq nunakuna” ushakätsiyänampaq ëwayarqan (2 Crön. 20:1, 2). ¿Imatataq Diospa sirweqninkuna rurayarqan? Kikinkunallaman markäkur pelyayänampa rantinmi, Jehoväman markäkuyarqan (leyi 2 Crönicas 20:3, 4 *). Manam kikinkuna pensayanqannötsu cada ünu altsëta procurayarqan. Bibliam willakun, “Judäpita llapan nunakuna, warmi kaqkuna y wamrakuna Jehoväpa puntanchö” këkäyanqanta (2 Crön. 20:13). Llapankunam wamrapis, jövinpis y mayorpis juknölla këkäyarqan Jehoväta wiyakuyänampaq. Tsënö kayanqampitam, Jehoväqa chikeqninkunapita librarirqan (2 Crön. 20:20-27). ¡Këqa alläpa shumaq yachatsikïmi pruëbakunapa pasarnin pëkuna rurayanqanta qatinapaq!

9. ¿Imatataq yachakuntsik punta cristiänukuna juntu kayanqampita?

⁹ Punta cristiänukunapis juntu kayanqantaqa rikätsikuyarqanmi. Tantiyarinallapaq, judïukuna y judïuman tikrashqakuna cristiänu tikrarirmi, ‘apostolcuna yachatsicuyanqanta cäsucur’, “juc shonqulla” ‘juntu micur y Diosman mañacur cayarqan’ (Hëch. 2:42). Y tsënö juntu kayanqanqa masqa rikakurirqan, chikeqnin nunakuna qatikachäyaptin yanapanakuyanqanchömi (Hëch. 4:23, 24). Rikanqantsiknömi, sasa tiempukunachönäqa juntu këkänantsik alläpa precisan.

10. ¿Imëtaq juntu këta mas wanashun?

¹⁰ Sasa tiempukunaqa chëkämunnam. Tsëpaq parlarmi profëta Joelqa, “imapis mana rikakoq junaq” nirqan (Joel 2:1, 2; Sof. 1:14). Tsë witsanchöqa, imëpitapis masmi juntu këta wanashun. Y yarpäshun Jesus ninqanta: “Sitsun juc nasioncho nunacuna quiquincuna pura chiquinacuyanqa, raquicarmi, ushacäriyanqa” (Mat. 12:25).

11. ¿Imatataq Salmu 122:3, 4 textu yachatsimantsik juntu këpaq? (Rikäri kë yachatsikïpa qallananchö këkaq dibüjuta.)

¹¹ Kë mana alli mundupa sasa tiempunkuna ichikllachöna qallariptinqa,  noqantsikqa juntum këkänantsik. Diospa kaqchö juk pensëlla këta wananapaq kaqtaqa igualaratsishwan, Jerusalenchö qaqaraq wayikunatawanmi. Qaqarëkaqtam rurayaq, tsëmi salmistaqa “alli qaqätsishqa marka” nirqan Jerusalenpaq. Tsënö kanqampitam nunakunaqa raslla yanapanakïta y tsapänakïta puëdiyaq. Tsë qaqaraq wayikunachi, salmistataqa yarpätseq israelïtakuna Diospa kaqchö juk pensëlla karnin adorayänampaq juntakäyanqanta (leyi Salmu 122:3, 4 *). Tsënöllam noqantsikpis, kanan witsan y shamoqpaq kaq sasa tiempukunachöpis juntu y jukllëllanö këkänantsik.

12. Diospa markanta Satanas ushakätsita munaptin, ¿imaraq yanapamäshun kawëkar quedanapaq?

¹² ¿Imanirtaq precisanqa tsë sasa tiempukunachö juntu këkänantsik? Porqui 38 kaq capïtuluchömi Ezequiel willakun ‘Magog markachö këkaq Gog’, ushakätsimënintsikta munanampaq kaqta. Tsëchöqa manachi allitsu kanman rakikar këkanqantsik, o kë munduman markäkunqantsik. ¡Juntum këkänantsik! Peru manam juntu kanqantsikllapitatsu salvakushun, sinöqa cada ünum Jehoväman markäkunantsik y wiyakunantsik. Porqui jutinta parlaq kaqllam salvakuyanqa (Joel 2:32; Mat. 28:20). Peru ¿imaraq pasanqa Jehoväpa markampita rakikashqa kaqkunataqa? ¿Salvakuyanqatsuraq? (Miq. 2:12.)

13. Kë yachakunqantsikkunapita, ¿imatataq jövinkuna yachakuyanman?

¹³ Jövin, ¿cuentata qokunkiku wakin jövinkunanö rakikarqa kawënikita peligruman churëkanqëkita? Tsë sasa tiempuqa chëkämunnam. Y tsëchöqa alläpam wanashun juntu këta. Tsëmi kanampita patsë, Jehoväta juntu sirwinantsik, porqui alläpam precisan salvakunapaq.

14, 15. a) ¿Imarëkurtaq Jehoväqa juntu këta yachëkätsimantsik? b) ¿Imanötaq Jehovä consejamantsik juntu kanantsikta munar?

¹⁴ Jehoväqa, yanapamantsik “juknölla” sirwinantsikpaqmi (Sof. 3:8, 9). ‘Patsacho y sielucho caqcuna’ “Jesucristupa mandadunllächona” kayänan witsampaqmi yachëkätsimantsik (leyi Efesius 1:9, 10). Jehoväqa, ciëluchö y Patsachö sirweqninkuna juk familianölla adorayänantam munan. Y tsëtaqa logranqam. Jövin, ¿cuentata qokunkiku Jehoväpa markanwan juntu këqa alläpa precisanqanta?

¹⁵ Jehoväqa, kanampita patsënam yachëkätsimantsik markanwan juntu imëyaqpis këkänapaq. Tsëmi Palabranqa kutin kutin, ‘juc castanolla  cayanqequirecur, shumaq cuyanacuyë’, ‘marcäquiniquicunacho yanapanacur’ y ‘callpata qonacur quecayë’ nimantsik (1 Cor. 12:25; Rom. 12:10; 1 Tes. 4:18; 5:11). Jehoväqa musyanmi, jutsasapa kanqantsikrëkur pillapis piñaratsimashqa raslla rakikäkurinqantsikta. Tsëmi, “perdonanaquicuyë” nimantsik (Efes. 4:32).

16, 17. a) ¿Imanirtaq reunionkunaman faltashwantsu? b) ¿Imatataq jövinkuna Jesuspita yachakuyanman?

¹⁶ Jina Jehoväqa, reunionkunawanmi juntulla kanapaq yachatsimantsik. Hebrëus 10:24, 25 textum yarpätsimantsik, piñakïnin junaq chämunqanyaqqa, reunionkunaqa “cuyanacur alli rureta” ruranapaq y juknintsik juknintsik yanapanakunapaq yanapamanqantsikta. Tsëmi faltanantsiktsu.

¹⁷ Jesuspita yachakushun, pëqa Diospa markan juntakanqan reunionkunataqa alläpam kuyaq. 12 watayoq këkarmi, templuchö rurayanqan reunionman teytankunawan ëwarqan. Peru kutikïkarnam teytankunaqa pëkunawan mana kutikanqanta cuentata qokuriyarqan. Y ashirninqa, manam jövin mayinkunawan juk lädupa ëwakushqatatsu tariyarqan, sinöqa templuchö yachaq nunakunawan Diospita parlëkaqtam (Lüc. 2:45-47).

18. ¿Imanötaq mañakïnintsik yanapakun cristiänu mayintsikwan juntu këkänapaq?

¹⁸ Rikanqantsiknömi, juntu kanapaqqa alläpa precisan kuyakoq këta yachakunantsik y reunionkunaman mana faltëpa ëwanantsik. Jina cristiänu mayintsikkunapaqmi mañakunantsik. Pasëkäyanqampaq cläru mañakunqantsikmi rikätsikun, pëkunapaq yarparanqantsikta. Y këtaqa manam mayorkunallatsu rurayänan. Jövin karqa, ¿cristiänu mayikikunawan juntu kanëkipaq kë yanapakïkunata alliku provechëkanki? Tsëmi yanapashunki Jehoväpa markanwan mas juntu kanëkipaq, y Satanaspa mundunman mana qaqärinëkipaq.

19-21. a) ¿Imakuna pasakuptintaq Jehoväpa sirweqninkuna juk kastanölla kayanqanqa mas rikakurin? Willakaramï. b) ¿Imatataq yachakuntsik desgraciakuna pasakuptin yanapakoq cristiänukunapita?

¹⁹ Kanan witsan Jehoväpa sirweqninkunaqa, Romänus 12:5 textu ninqannömi juk kastanölla kayanqanta rikätsikuyan. Desgraciakuna pasakuptinmi këqa maslla rikakurin. 2011 wata diciembri killachömi, Filipinaspa Mindanao islanta yaku nitirirqan. Juk paqasllachömi chusku chunka waranqapitapis mas wayikuna ushakärirqan, y wakin wayikunaqa Testïgukunapam karqan. Peru sucursalqa kënö nirmi willakurqan: “Desgraciakuna kaptin yanapakoqkuna manaraq chaptinmi, juk lädupita Testïgukunaqa wanayanqäkunata aparatsimushqana kayänaq”.

²⁰ Jina Japonchöpis, patsa alläpa kuyuptin y lamar yaku yarqaramuptinmi mëtsika Testïgukuna imëkankunata oqrayarqan. Wakinkunaqa chipyëpam cösasninkunata oqrariyarqan. Yoshiko jutiyoq paniqa, Yachatsikuyänan Wayipita 40 kilömetru karuchömi täraq y wayintam oqrarirqan. Y kënömi willakun: “Espantakuyarqämi patsa kuyunqampita waräninllana, congregacionkunata watukaq turi y wakin cristiänukuna ashiyämaqnï shayämunqampita”. Jina kushishqam kënö nin: “Alläpam valurayä Diospa kaqchö wanayanqäkunata mana pishitsiyaptin y shumaq cuidayämaptin. Qoyämarqanmi, zapatukunata, röpakunata y maskunatapis”. Desgraciakuna kaptin yanapakoqkunapita juk wawqim kënö nin: “Tsë nacionpita llapan cristiänukunam juknölla yanapanakuyarqan. Hasta Estädus Unïduspitam yanapakoq shayämurqan. Tsëläya karuta imanir shayämunqanta tapuyaptïmi, kënö niyarqan: ‘Japonchö yanapakïta wanaq cristiänu mayïkunatam alläpa kuyayä’”. ¿Manaku alläpa kushikuntsik alläpa kuyanakoq markachö kanqantsikpita? Jehoväpis alläpachi kushikun sirweqninkuna juknölla kanqanta rikar.

²¹ Kanan witsan juntu kanqantsikqa, yanapamäshun shamoq pruëbakunachö alleq tsarakunapaqmi. Juk nacionpita cristiänu mayintsikkunawan yanapanakïta mana puëdirpis tsarakushunmi. Kanampita yachakunqantsikmi yanapamäshun, Satanaspa mundun ushakänan witsampaq listu këkänapaq. Lamar yaku yarqamuptin kawëkar quedaq Fumïko jutiyoq Japonpita panim nin: “Ushakëqa këllachönam. Cristiänu mayintsikkunawan yanapanakurmi sïguinantsik hasta desgraciakuna ushakanqan junaqyaq”.

22. ¿Imanöraq shamoq tiempuchö yanapamäshun cristiänu mayintsikkunawan juntu kanqantsik?

²² Jövin kar o mayor karpis, cristiänu mayintsikwan juntu kanantsikpaq sinchikurqa, rakikar ushashqa Satanaspa mundun ushakaptin kawëkar pasanapaqmi yachakïkantsik. Unënöllam Diosnintsikqa markanta salvanqa (Is. 52:9, 10). Imëpis yarparäshun, Jehoväpa markanwan juntu këta sinchikurqa, kawëkar pasaqkunawan kawëkar pasanapaq kaqta. Jina tsëpaqqa yanapamäshun imëka chaskinqantsikkunata valuranqantsikmi. Tsëpitam qateqnin kaq yachatsikïchö yachakurishun.