1, 2. ¿Imatataq Jesus rurarqan 33 wata 14 de nisan paqaschö? (Rikäri kë yachatsikïpa qallananchö këkaq dibüjuta.)

JERUSALENQA ampïrinnam y Killanam atsikyëkan. 33 wata 14 de nisan paqasmi. Jesusqa apostolninkunawan Pascuata celebrarirmi, mana jaqeq 11 apostolninkunawan juk precisaq cënata patsäratsin. Ichikllachönam wanunan karqan. Tsënömi wanunqanta imëpis yarpäyänampaq patsäratsin * (Mat. 26:1, 2).

² Jesusqa, Diosman mañakurirmi levadürannaq tantata apostolninkunata pasarin kënö nir: “Tsarir mikuyë”. Tsëpitanam, vïnuyoq cöpata tsarirkur yapë Diosman mañakurir kënö nin: “Llapëki uputsinakuyë” (Mat. 26:26, 27, NM). Tsëpitaqa, manam apostolninkunata mas mikïta qorqannatsu, peru mana qonqëpaq precisaq yachatsikïkunatam yachakuyarqan.

3. ¿Ima tapukïkunapitataq yachakushun?

 ³ Tsënömi Jesusqa, wanunqanta yarpäyänampaq patsäratsirqan, tsëtaqa “Señorpa Cënan” nirpis reqiyanmi (1 Cor. 11:20, NM). Peru ¿imanirtaq Jesus Wanunqanta Yarpantsik? ¿Imatataq rikätsikun tantawan vïnu? ¿Imanötaq alistakushwan Jesus wanunqanta yarpänapaq? ¿Pikunataq tantata mikuyanman y vïnuta upuyanman? ¿Imanötaq sientikuyan ciëlupaq akrashqakuna y Patsapaq kaq cristiänukuna, Bibliachö Dios äninqanman pensar?

4. ¿Imanötaq Jesus wanunqan yanapamantsik?

⁴ Adan jutsata ruranqanrëkurmi, jutsata y wanïta llapantsik chaskirquntsik (Rom. 5:12). Tsëmi, ni pï nuna kikinllapitaqa librakïta puëdintsu. Manam ima pägupis, Diosta paganapaq kantsu (Sal. 49:6-9). Peru Jesusmi sïqa, jutsannaq cuerpunwan y yawarninwan pagakïta puëdirqan. Tsëmi, noqantsikrëkur wanurir kawënimpa valorninta Jehoväta entregarqan y Pëqa chaskirqanmi. Tsënöpam jutsapita y wanïpita libri quedarintsin y mana wanushpa kawakïta puëdintsik (Rom. 6:23; 1 Cor. 15:21, 22).

5. (1) ¿Imanötaq musyantsik Jehoväwan Jesus kuyamanqantsikta? (2) ¿Imanirtaq Jesus Wanunqanta Yarpëman ëwashwan?

⁵ Libramänapaq Wamranta kachamurninqa, Jehoväqa kuyamanqantsiktam rikätsimarquntsik (Juan 3:16). Y Jesuspis wanurninmi, kuyamanqantsikta rikätsimarquntsik. Y pëqa Patsaman manaraq shamurmi, “obra ruraq maestrunö” teytanllawanraq këkar ‘nunakunata pasëpa kuyarqan’ (Prov. 8:30, 31). Noqantsikrëkur Jehoväwan Jesus rurayämunqanta agradecikurninqa, Jesus Wanunqanta Yarpëmanqa ëwashunmi. Tsënöpam, “noqata yarpämarnï këta rurar sïguiyanki” nir mandakunqanta wiyakuntsik (1 Cor. 11:23-25, NM).

6. ¿Imatataq rikätsikun tantawan vïnu Jesus Wanunqanta Yarpëchö?

⁶ Wanunqanta yarpäyänampaq patsätsinqanchöqa, Jesusqa manam tantata cuerpunman ni vïnuta yawarninman tikratsirqantsu. Tsëpa rantinqa, “këqa cuerpü cuentam” y “kë cöpaqa, juk mushoq conträtutam rikätsikun” nirmi, cuerpunta y yawarninta rikätsikoq kanqanllata nikarqan (Mar. 14:22-24, NM).

7. ¿Imatataq rikätsikun Jesus Wanunqanta Yarpëchö utilisanqantsik tanta?

⁷ Tsëta patsätsinqanchöqa Jesusqa utilisarqan, Pascuata celebrayanqampita sobraq levadürannaq tantatam (Ex. 12:8). Porqui levadürapaq Biblia parlarqa, höraqa rikätsikun jutsa kanqantam (Mat. 16:6, 11, 12; Lüc. 12:1). Tsëmi levadürannaq tantaqa, mas alli karqan Jesuspa jutsannaq cuerpunta rikätsikunampaq (Heb. 7:26). Tsëmi Jesus wanunqanta yarpëchöqa, levadürannaq tantata utilisantsik.

8. ¿Imatataq rikätsikun Jesus Wanunqanta Yarpëchö utilisanqantsik vïnu?

 ⁸ Jesus Wanunqanta Yarpëchö utilisanqantsik vïnunöllam, Jesus utilisanqan vïnupis rikätsikurqan yawarninta o kawëninta. Jesusqa, ‘jutsantsikpita’ pagakurmi Golgota nishqan sitiuchö yawarninta ramarqan (Mat. 26:28, NM; 27:33). Noqantsikrëkur tsëta ruranqanta valorarninqa, wanunqanta cada wata yarpänapaqmi alleq alistakushun.

9. (1) ¿Imanötaq Jesus wanunqanta yarpë witsampaq akrashqa textukunata leyinqantsik yanapamantsik? (2) ¿Imanötaq sientikunki libramänapaq Jesus wanunqampita?

⁹ Jesus Wanunqanta Yarpë witsampaq akrashqa textukunata leyirqa, manaraq wanur imakunata pasanqanmanmi yarpachakushun. Tsë textukunaqa Llapan junaqkuna Bibliapita yachakunapaq follëtuchömi yarqamun. Tsëmi yanapamäshun shonquntsikchö listu këkänapaq. Juk panim kënö nirqan: “Jesus Wanunqanta Yarpë chämunantaqa alläpam shuyarantsik. Cada watam mas precisaq tikran. Papänï wanuriptin, ayan sutarëkaqta rikarmi, libramänapaq Jesus wanunqanta mas valorarqä. [...] Tsëpaq parlaq textukunata y tsëpita yachatsikïtaqa allipam yachaq kä, peru papänï wanuriptinraqmi sientirirqä Jesus wanunqanqa noqantsikpaq alläpa valoryoq kanqanta. ¡Tsëmi alläpa shoqamarqan!”. Jesus wanunqan yarpëpaq alistakurnin, alleq pensashun jutsapita y wanïpita imanö libramanqantsikman.

10. ¿Ima mastataq rurashwan Jesus Wanunqanta Yarpëpaq listu këkänapaq?

¹⁰ Jina Jesus Wanunqanta Yarpëpaq listu këkänapaqqa yanapamäshun, mas yachatsikunqantsikmi. Allichi kanman, tsë killakunachö precursor auxiliar kanqantsik. Llapan nunakunata invitashun. Jehoväpita, Tsurimpita y bendicionkunata apamunampaq kaqpita  parlëqa alläpam kushitsimäshun (Sal. 148:12, 13).

11. ¿Imanirtaq Corintuchö wakin cristiänukunaqa Jesus Wanunqanta Yarpëchö mana respetakïpa tantata mikuyaq y vïnuta upuyaq?

¹¹ Jina yarpänantsikmi, Corintu cristiänukunata Pablu ninqantapis (leyi 1 Corintius 11:27-34). Clärum rikätsikurqan, tantatawan vïnuta “mana presisaqpaq” churarnin, mikur y upurqa “Jesucristupa wanïninta mana caqpaq” churëkäyanqanta. Tsëmi manaraq mikur ni upur, ciëlupaq akrashqa cristiänuqa alleq rikäkunan Diospa rikëninchö imanö këkanqanta. Mana alli këkarnin mikur y upurqa, kikimpa ‘contranmi castïguta’ ashikan. Mana alli portakïninkunarëkurmi, Corintuchö wakin cristiänukunaqa, wanunarëkaq cuenta këkäyarqan. Itsa Jesus Wanunqanta Yarpë paqaspaq puntallapitana o tsë hörachö alläpa mikuyaq y upuyaq, tsëchi Diospa kaqchö y pensëninkunachö wanunëkaq cuenta kayarqan. Tsënö këkar tantata mikuyanqampita y vïnuta upuyanqampitam Jehoväqa despreciarirqan.

12. (1) ¿Imatawantaq Pablu igualatsirqan Jesus Wanunqan Yarpëta? (2) ¿Ima nirqantaq ciëlupaq akrashqakunata? (3) ¿Imatataq ciëlupaq akrashqa ruranman jutsata rurashqa karqa?

¹² Pabluqa nirqan, Jesus Wanunqanta Yarpëqa, invitädukunayoq mikoq cuenta kanqantam. Tsëmi Ciëlupaq akrashqakunata kënö nirqan: “Masqui yarpäcurcuyë, ¿Allitsuraq canman supëpa selebrasionnincho carir, Diospa Santa Senancho tantallantin binuta micurëcanqantsic?” (1 Cor. 10:16-21). Ciëlupaq akrashqa cristiänu jutsata rurashqa karninqa, anciänukunapa yanapakïnintam ashinan (leyi Santiägu 5:14-16). Rasumpa arrepentikushqa këkarnin, tantata mikurnin y vïnuta upurninqa, manam Jesus wanunqanta despreciëkantsu (Lüc. 3:8).

13. ¿Imanirtaq precisan ciëlupaq kanqantsikta o Patsapaq kanqantsikta musyanapaq Diosman mañakunantsik?

¹³ Jesus Wanunqanta Yarpëpaq alistakurninqa, allichi kanman ciëlupaq o Patsapaq kanqantsikman yarpachakurnin Jehoväman mañakunantsik. Ciëlupaq akrashqa kanqanta alleq mana musyëkarqa, manam pipis tantata mikunmantsu y vïnuta upunmantsu. Porqui tsë rurëqa Jesus wanunqanta mana respetëmi kanman. ¿Imanötaq musyashwan tantata mikunapaq kaqta y vïnuta upunapaq kaqta?

14. ¿Imatataq alleq musyayan Jesus Wanunqanta Yarpëchö tantata mikoqkuna y vïnuta upoqkuna?

¹⁴ Jesus Wanunqanta Yarpëchö tantata mikoq y vïnuta upoq kaqkunaqa, alleqmi musyayan mushoq conträtuchö kayanqanta. Vïnupaq parlarmi, Jesus kënö nirqan: “Kë cöpaqa, juk mushoq conträtutam rikätsikun, qamkunapaqrëkur yawarnïta ramariptïmi qallarinqa” (1 Cor. 11:25, NM). Jehoväqa willakurqan, israelïtakunawan ruranqan conträtu Leyta, mushoq conträtuwan trukanampaq  kaqtam (leyi Jeremïas 31:31-34 *). Kë mushoq conträtutaqa, Jehovämi rurarqan ciëlupaq akrashqa kaqkunawan (Gäl. 6:15, 16). Tsë conträtutaqa, Jesus ramanqan yawarmi valoryoqta tikratsirqan (Lüc. 22:20, NM). Mushoq conträtuchöqa Jesusmi yanapakun, y ciëlupaq akrashqakunaqa pëwanmi kawayanqa (Heb. 8:6; 9:15).

15. (1) ¿Pikunataq juk Gobiernupaq conträtuchö këkäyan? (2) ¿Imataraq chaskiyanqa alli tsarakurqa?

¹⁵ Jina ciëlupaq akrashqakunaqa musyayanmi, juk Gobiernupaq conträtuchö këkäyanqanta (leyi Lücas 12:32 *). Tsë conträtutaqa Jesusmi patsätsirqan, “pe sufrenqanno” sufreq y mana jaqeq discïpulunkunawan (Filip. 3:10). Tsë conträturëkurmi, ciëlupaq akrashqakunaqa Jesuswan juntu imëyaqpis mandakuyanqa (Apoc. 22:5). Kë cristiänukunam, Señorpa Cënanchö tantata mikïta y vïnuta upïta puëdiyan.

16. Romänus 8:15-17 textu ima ninan kanqanta willakaramï.

¹⁶ Tantata mikïta y vïnu upïtaqa puëdiyan, Diospa tsurinkuna kayanqanta santu espïritu musyatsishqan kaqkunallam (leyi Romänus 8:15-17). Pabluqa abba, “papällä”, neq palabratam churarqan. Tsë palabraqa rikätsikun juk wamra teytanta kuyëpa qayanqantam. Ciëlupaq akrashqakuna, santu espïrituwan akrashqa karnin, Jehoväwan alläpa kuyanakuyanqantam rikätsikun. ‘Santu Espiritullam shonquncunacho cäyitsin Diospa wamrancunana cayanqanta.’ Këqa manam Patsachö kawëta mana pensayanqanllapitatsu, sinöqa alleq clärum musyayan, alleq tsarakurninqa, ciëlupita patsë mandakayämunampaq kaqta. 144.000 Santu espïrituwan akrashqakunapitaqa, ichikllanam kë Patsachö quedayan (1 Juan 2:20; Apoc. 14:1). Jehoväwan alläpa kuyanakurmi “papällä” nita puëdiyan.

17. (1) ¿Imatataq shuyaräyan ciëlupaq akrashqakuna? (2) ¿Imanötaq ciëlupaq akrashqa kayanqanta musyayan?

¹⁷ Ciëlupaq akrashqa karqa, tsëchö kawanëkipaq kaqtachi mañakïnikichö Jehoväta imëpis parlapanki. Y Biblia ninqanqa, qampaqqa alläpachi precisan. Këllaman pensarishun, Jesus casakunampaq y ‘noviampaq’ parlaptinqa, qampaq parlëkanqantachi sientinki y tsë höra chäramunantanachi munëkunki (2 Cor. 11:2; Juan 3:27-29; Apoc. 21:2, 9-14). Y akrashqankunata Dios kuyanqanta Bibliachö niptinqa, “këqa noqapaqmi” ninkichi. Y akrashqankuna imatapis rurayänampaq Bibliachö mandakïta tariptikiqa santu espïrituchi raslla yanaparishunki ruranëkipaq y shonqikichöchi, “noqatam  mandëkaman” ninki. Tsënömi, santu espïrituqa musyatsishunki ciëlupaq akrashqa kanqëkita.

18. (1) ¿Imatataq shuyaräyan Patsapaq kaqkuna? (2) ¿Imanötaq sientikunki Patsachö kawanëkipaq kaqman pensar?

¹⁸ Y Patsapaq kaptikiqa, Diosmi änishunki kë Patsachö kawakunëkipaq (Apoc. 7:9; Juan 10:16, NM). Y tsëchöchi kawëta munëkanki, y Patsachö kawë imanö kanampaq kaqta Biblia willakunqanmanchi alläpa yarparanki. Y alläpachi shuyarëkanki, amïguïkikunawan y familiëkikunawan kushishqa kawakïta, jina mallaqë, waktsa kë, sufrimientukuna, qeshyakuna y wanï ushakärinantapis (Sal. 37:10, 11, 29; 67:6; 72:7, 16; Is. 33:24). Y wanushqa familiëkikuna kawariyämunantanachi alläpa shuyarëkanki (Juan 5:28, 29). Këkunata Jehovä änishunqëkipitaqa alläpachi agradecikunki. Jesus Wanunqanta Yarpëchö tantata mana mikur y vïnuta mana upurpis, Jesucristu wanunqampita agradecikurchi ëwanki.

19, 20. (1) ¿Imatataq ruranëki shuyaranqëkita chaskinëkipaq? (2) ¿Imanirtaq Jesus Wanunqanta Yarpëman ëwankiman?

¹⁹ Patsapaq kar o ciëlupaq karpis, shuyaranqëkita chaskinëkipaqqa alläpam precisan Jehoväman, Jesusman y jutsantsikpita Jehovä pagakunqanman markäkunëki. Jesus Wanunqanta Yarpëchöqa, yarpachakunki mëchö kawanëkipaq kaqman y Jesus wanunqan alläpa precisanqanmanmi. 2015 wata viernis 3 de abril Inti (Rupay) jeqarkuptinmi, mëtsikaq nunakuna Señorpa Cënanta celebrayanqa Jehoväpa Testïgunkuna Yachatsikuyänan Wayikunachö y juk localkunachöpis.

²⁰ Jesus Wanunqanta Yarpëman ëwarnin wiyakurmi, mas agradecikunki jutsantsikrëkur Jehovä pagakunqampita. Y yanapashunkim, nunakunata kuyanëkipaq, y Jehovä alläpa kuyamanqantsikpita y ichikllachöna ruramunampaq kaqpita parlapärinëkipaq (Mat. 22:34-40). ¡Ama faltëtsu kë precisaq reunionman!