1. ¿Imanirtaq Jehoväwan amïgu kënintsikta sinchiyätsishwan?

JEHOVÄPA testïgunkunapaqqa, ¡Jehoväwan amïgu kënintsikmi imëkapitapis masqa precisan! Tsëmi pëwan amïgu kënintsikta mas sinchiyätsinantsik. Porqui Satanaspa mundun y jutsasapa kënintsikmi ushakäratsinman.

2. (1) ¿Imataq amïgu këqa? (Rikäri päginapa ura kuchunchö willakïta.) (2) ¿Imatataq rurashwan Jehoväwan amïgu kënintsik mas sinchi kanampaq?

² ¿Rasumpa amïgutanöku Jehoväta rikanki? ¿Pëwan amïgu kënikita mas sinchiyätsita munankimanku? Santiägu 4:8 (NTCN) textum kënö nin: “Dios Yayata mas cuyarnin payman witiyay, paypis [...] gamcunaman mas witimunanpag”. Rikanqantsiknömi Jehoväwan alli  amïgu kayänëkipaqqa sinchikunëki. * Qam witiptikiqa, pëpis witimunqam. Tsëqa amïgu kënikikunam mas sinchiyanqa y lädïkichö këkaqtanömi sientinki. Jesuspis tsënömi sientikurqan, tsëmi “kachamaqnïqa rasumpa[m] kawan” y “noqaqa reqïmi” nirqan (Juan 7:28, 29, NM). Jehoväman imanö witanapaq kaqta rikärishun.

3. ¿Imanötaq Jehoväwan parlashwan?

³ Jehoväman witita munarqa, alläpam precisan pëwan seguïdu parlanantsik. Tantiyarinapaq, ishkaq amïgukuna karu markachö tärarninqa, seguïdum cartata qellqapänakuyan y telëfunupa parlayan. Jina tsënöllam Jehoväwan amïgu kënintsikwampis pasan. ¿Imanötaq pëwan parlashwan? Seguïdu mañakurninmi (leyi Salmu 142:2 *). ¿Imanötaq Jehoväqa parlapämantsik? Palabran Bibliawanmi. Tsëmi parlapämanqantsikta wiyanapaqqa, Bibliata leyinantsik y leyinqantsikman pensanantsik (leyi Isaïas 30:20, 21 *). Jehoväwan tsënö parlarqa, läduntsikchö këkaqtanömi sientishun.

4, 5. (1) ¿Imanötaq Jehovä parlapämantsik Bibliawan? (2) Juk igualatsikïwan willakaramï.

⁴ Bibliapa yachatsikïninqa pï më nunata yanapëta puëdinqantam musyantsik. Jina cada ünutam yanapamënintsikta puëdin Diospa amïgun kanantsikpaq. Tsëmi leyinqantsik y estudianqantsik höra alkäbu këkänantsik imanö sientikunqantsikta. Jina yachakunqantsiknö ruranapaqpis yarpachakunantsikmi. Këkunata rurarmi Jehovä parlapëkämanqantsiktanö sientishun y yanapamanqantsikta rikarnam kuyë amïgun  tikrashun (Hebrëus 4:12; Santiägu 1:23-25).

⁵ Tantiyarishun. Mateu 6:19, 20 textuchömi Jesus kënö nin: “Ama que patsacho ricuyeta tirar, imecata equecatapis elluyëtsu”. Këqa rikätsimantsik kawënintsikchö Jehoväpa kaqta puntaman churanapaqmi. ¿Imanötaq sientikuntsik kë palabrakunata leyirqa? Diospa kaqta puntaman churëkarqa, rurëkanqantsikpita kushikunqantam sientishun. Peru Diospa kaqta puntaman manaraq churëkanqantsikta cuenta qokurqa, tsënö kawakunapaq Jehovä yanapëkämanqantsiktam tantiyashun.

6, 7. (1) ¿Imapaqtaq yanapamantsik Bibliata alli estudianqantsik? (2) ¿Imarëkurtaq Bibliata estudiashwan?

⁶ Bibliata leyirnin Jehoväta mas alli sirwinapaq imakunata ruranantsik pishinqanta tarirnimpis, Jehovä imanö kanqanta y kuyamarnintsik imëkata ruranqantapis tarintsikmi. Këkunapita yachakurmi mas kuyantsik, y pëpis masmi kuyamantsik. Tsënöpam kuyë amïgun tikrantsik (leyi 1 Corintius 8:3).

⁷ Jehoväta mas kuyanapaqqa, alläpam precisan alli shonquntsikwan Bibliata estudianantsik. Porqui Jesusmi nirqan mana wanushpa kawanapaqqa Jehoväta reqinantsik alläpa precisanqanta (Juan 17:3). Tsëmi, Bibliataqa estudiashwan Jehoväta alleq reqinantsikrëkur (leyi Exodu 33:13 *; Salmu 25:4).

8. (1) Rey Azarïasta Jehovä castiganqan willakïta leyirqa, ¿imataraq wakin nunakuna pensayanman? (2) ¿Peru imapitataq noqantsikqa següru këkantsik?

⁸ Jehoväta amïguntsiktanö rikarqa, Dios imatapis ruranqankunapita Biblia cläru mana willamashqapis manam yarpachakushuntsu. Judäpa reynin Azarïaspaq Biblia willakunqanta yarpärishun. Pë mandakunqan witsanqa judïukunaqa mana alli Dioskunatam sirwiyaq. Peru pëqa “Jehoväpa rikënimpaq alli kaqtam rurarqan” (2 Rëyes 15:1-5). Tsënö kaptimpis, Jehoväqa feyupam castiguëkurqan. Y imanir castiganqantaqa manam kë willakïchö rikätsimantsiktsu. Wakinkunaqa itsa pensayanman Jehoväqa mana alli kar mana kaqpita castiganqanta. Peru noqantsikqa reqirninmi musyantsik, Jehoväqa imëpis alli kaqllata ruranqanta (Jeremïas 30:11). Tsëmi imanir castiganqanta mana musyarpis, alli kaqta ruranqantaqa següru kantsik.

9. ¿Imanirtaq rey Azarïasta Jehovä castigarqan?

⁹ Bibliapa wakin willakïninkunachömi tarintsik Azarïaspaq mas willakïkunata, pëllatam Uzïas nirpis qayan (2 Rëyes 15:7, 32). 2 Crönicas 26:3-5 y 16-21 textuchömi willakun “Jehoväpa rikënimpaq alli kaqllata” ruranqanta. Jina willakunmi orgullösu tikrakurinqantapis. Juk kutim sacerdötikunalla rurayanqanta rurëta munarqan. Tsëmi 81 sacerdötikuna michäyarqan, peru reyqa orgullösu tikrakurishqa karmi piñakur  cäsurqantsu. Këkunam maslla entienditsimantsik Jehovä imanir castiganqanta.

10. (1) ¿Imanirtaq Jehovä imatapis imanir ruranqampita musyëtaraq wanantsiktsu? (2) ¿Imatataq rurashwan Jehovä allillata ruranqanman markäkunapaq?

¹⁰ Kë willakïchöqa clärum këkan Azarïasta Jehovä imanir castiganqan. Peru wakin willakïkunachöqa imanö pasanqanta Bibliaqa manam llapantatsu willakun. ¿Tsërëkurtsuraq Jehoväpaq mana allita pensar qallëkushwan? ¿O allillata ruraq kanqanmantsuraq markäkushwan? (Deuteronomiu 32:4.) Bibliachöqa Jehovä imanö kanqampita y pëman markäkunapaq cläru willakïkunatam tarintsik. Alleq reqirnin y kuyarninqa, manam imatapis imanir ruranqampita musyëtaraqtsu munashun. Peru ¿imatataq rurashwan Jehovä allillata ruranqanman markäkunapaq? Bibliatam estudianantsik. Tsënöpam Jehoväpa kuyë amïgun tikrashun (Salmu 77:12, 13).

11-13. ¿Imanirtaq musyantsik mañakunqantsikta Jehovä wiyanqanta? (Rikäri kë yachatsikïpa qallananchö këkaq dibüjuta.)

¹¹ Jehoväman mañakurninqa, alabantsik, agradecikuntsik y yanapamänapaqmi mañakuntsik. Tsëmi Jehoväman mas wititsimantsik (Salmu 32:8). Peru rasumpa amïgun këta munarqa, mañakunqantsikta wiyamanqantsiktam següru kanantsik.

¹² Wakinkunaqa niyan mañakïnintsikta  Dios mana wiyanqantam. Sinöqa alli sientikunapaq, problëmantsikkunaman pensanapaq y imanöpis kikintsik altsanapaq yanapakunqanllatam niyan. Awmi, tsëkunachö yanapamashwanmi, peru Jehoväqa rasumpam mañakïnintsikta wiyan. ¿Imanirtaq tsënö nintsik?

¹³ Jesusman pensarishun. Patsaman manaraq shamurninmi rikarqan nunakuna mañakuyaptin Jehovä imanö contestanqanta. Y Patsachö këkarqa pëpis mañakurqanmi, y imata pensanqanta y imanö sientikunqantam willarqan. Juk kutinäqa, paqas entërum mañakurqan (Lücas 6:12; 22:40-46). Discïpulunkunatapis yachatsirqanmi imanö mañakuyänampaq. ¿Tsë llapanta ruranmantsuraq karqan Jehovä mana wiyanqanta musyëkarqa? Manachi. Pëqa alleqmi musyarqan mañakïninta Jehovä wiyanqanta. Tsëmi juk kutiqa, “musyämi qam imepis wiyamanqequita” nirqan (Juan 11:41, 42). Tsënöllam, noqantsikpis mañakïnintsikta Jehovä wiyanqanta següru këkantsik (Salmu 65:2).

14, 15. (1) ¿Imanirtaq imatapis munanqantsikpita Jehoväta cläru willashwan? (2) ¿Imanötaq juk panita Jehoväman mañakunqan yanapashqa?

¹⁴ Höraqa itsa mäkushwantsu, mañakïnintsikta Jehovä imanö contestamunqanta. Peru imatapis munanqantsikta cläru willarninqa rikäshunmi imanö contestamunqanta. Tsëqa mas kuyë amïguntsiktanömi rikäshun. Imëka yarpachakïnintsikkunapita shonqupita patsë willashqaqa, noqantsikmanmi witimunqa.

 ¹⁵ Carmen * jutiyoq pani pasanqanta rikärishun. Pëmi willakun manaraq jubilakunqan witsanqa Diospita yachatsikï mana gustanqanta. Jubilakuriptinnam juk anciänu nirqan precursor regular kanampaq. Pëqa wiyakurninmi precursöra tikrarirqan. Jinamampis cada junaqmi Jehoväman mañakoq yachatsikï gustanampaq. ¿Jehovä wiyarqantsuraq mañakïninta? Awmi, tsëmi Carmenqa kima watapana precursöranö yanapakïkan. Jina ninmi mas seguïdu yachatsikoq yarqunqan y wakin cristiänu mayinkuna yanapayaptin mas alli yachatsikoq kanqanta. ¡Kananqa yachatsikïta alläpam gustëkun! Peru tsëpitapis mas kushikïpaqqa kënömi nin: “Kananqa imëpitapis masmi Jehoväwan amïgu kayä”. Rikanqantsiknömi, kë panitaqa mañakunqan yanapashqa Jehoväpa kuyë amïgun kanampaq.

16, 17. (1) ¿Imatataq rurashwan Jehoväpa kuyë amïgun cada junaq tikranapaq? (2) ¿Imapitataq qateqnin kaq yachatsikïchö yachakushun?

¹⁶ Jehoväman wititaqa imëyaqpis puëdikäshunllam, tsëqa, Bibliata estudiarnin parlapämanqantsikta wiyëkäshun y mañakurnin parlapëkäshun. Tsënö rurarqa cada junaqmi kuyë amïgun tikrashun. Y yanapamashqam imëka problëmachöpis tsarakushun.

¹⁷ Jehoväman mañakïkarnimpis, problëmakunapa pasarqa itsa Jehoväman markäkïta jaqirishwan. Itsa pensashwan mañakïnintsikta mana wiyanqanta y manana amïgun kanqantsikta. Tsënö sientikurqa, ¿imatataq rurashwan? Qateqnin kaq yachatsikïchömi tsëpita rikärishun.