LÏBANU jirkachö cedru nishqan montikunaqa jatusaq y alläpa shumaqmi kayan. Tsëwan igualatsishqaqa, olïvu montiqa takshallam y wiksu wiksullam kayan. Peru waranqa watanömi kawëtaqa puëdin y alläpa fuertim tsë montiqa. Sipinkunaqa alläpa titam y sinchim kayan. Walluriyaptimpis, sipinkuna kawëkaptinqa yapëmi tseqllimïta puëdin.

Kë igualatsikïqa yarpätsimantsik Jehoväta sirweq Job nuna unë tiempuchö ninqantam (Job 14:13-15). Roquriyaptimpis yapë tseqllimïta puëdimunqanta nirqa, itsa olïvu montipaq parlëkarqan. Tiempupa usyashqa kaptimpis, tamya chäriptinqa tsë montiqa yapëmi tseqllir atska rämayoq “mushoq plantanö” tikrarin. Wanuriptimpis Dios kawaritsimunampaq kaqman markäkurmi, Jobqa tsë igualatsikïta nirqan (Job 14:7-9).

Juk nuna montinta roqushqata rikarqä yapë tseqllimunantam munan. Jina tsënöllam Jehoväpis sirweqninkuna y wakin nunakuna wanuyaptin, yapë kawaritsimïta munan (Mateu 22:31, 32; Juan 5:28, 29; Hëchus 24:15). Yapë kawariyämunantaqa noqantsikpis munantsikmi. Tsë junaq chäramuptinqa, ¡imanö shumaqraq këkunqa!