JULIAN jutiyoq wawqim cuentakun mayor tsurinwan alläpa amïgu kayanqanta y ishkanraq imatapis rurayanqanta. Tsënö këkäyaptinmi, wamranqa mana allita rurar qallëkurqan, tsëmi Diospa markampita qarquriyarqan. Congregacionchö willakuriyaptinqa, Julianqa alläpam llakikurqan. Warmimpis alläpam waqarqan y manam shoqëtapis puëdirqantsu. Y ninmi: “Imachö mana allita rurayanqätam tapukuyaq kayä”.

¿Imarëkurtaq congregacionpita pitapis qarquyan? ¿Ima nintaq tsëpaq Biblia? Tsë rurë alläpa llakitsikuptinqa, ¿imanirtaq kuyakïtam rikätsikun nintsik? Kë yachatsikïchömi kë tapukïkunata contestashun.

Juk Testïgu jatun jutsata rurarir mana arrepentikuptinqa congregacionpitam qarquriyan.

Jehoväqa manam shuyaran jutsannaq kanatatsu. Peru mandamanqantsikkunata cäsukunantsiktaqa shuyaranmi. Tantiyarinapaq, Jehoväqa prohibimantsik oqllanakur ruranakï jutsata, imäginkuna adorëta, suwakïta, wanutsikïta y brujerïakuna rurëtam (1 Corintius 6:9, 10; Apocalipsis 21:8).

Dios mandamanqantsikta cäsukïqa manam sasatsu, mas bienqa biennintsikllapaqmi. Këllaman pensarishun, congregacionchöqa alli sientikuntsik honrädu y kawëninkunachö limpiu nunakunawan kanqantsikrëkurmi. ¿Imanirtaq honrädu y limpiu kantsik? Porqui bautizakunqantsik junaqmi Jehoväta änirqantsik llapan mandamanqantsikkunata cäsukunapaq.

Peru ¿imataq pasakun juk Testïgu alläpa jatun jutsata rurëkuptinqa? Diosta unë witsan sirweqkunapis jatun jutsakunatam rurayarqan, peru Jehoväqa manam  despreciarqantsu. Tantiyarinapaq, rey Davidmi oqllanakur ruranakï jutsata rurarqan y juk nunatapis wanïkatsirqan, peru Diosqa perdonëkurqanmi (2 Samuel 12:13).

¿Imanirtaq perdonarqan? Shonqupita patsë arrepentikushqa kaptinmi (Salmu 32:1-5). Tsënöllam kanampis, juk Testïgu jatun jutsata rurarir rasumpa arrepentikur tsë jutsata manana ruraptinqa, cäsunta rikaq anciänukunaqa congregacionpita qarquyannatsu (Hëchus 3:19; 26:20). Peru rasumpa mana arrepentikuptinqa qarquriyanmi.

Kastantsikta o amïguntsikta congregacionpita qarquriyaptinqa alläpa llakikïpaqmi. Hasta pensashwanmi, mana alli y mana kuyakoq kar qarquyanqanta. Peru Bibliaqa nimantsik tsënö rurëqa kuyakïta rikätsikunqantam. ¿Imanir?

Imatapis decidinqantsik alli kanqantaqa rikantsik alli yarquptinmi nirqanmi Jesusqa (Mateu 11:19). ¿Ima allikunataq pasashqa mana arrepentikoqkunata congregacionpita qarquyanqanrëkur?

Diospa jutintam tsapan. Tantiyarinapaq. Juk wamra mana alli portakuptinqa, teytankunapitam mana allita parlayan. Peru alli portakuptinqa, teytankunatam alabayanqa. Tsënöllam Jehoväwampis pasakun. Ezequielpa tiempunchöpis judïukunapaq parlarqa, Jehoväpaqmi parlayaq (Ezequiel 36:19-23). Kanampis noqantsikpaq parlarqa, Diospa jutimpaqmi nunakunaqa parlayan, Testïgun kashqa (Isaïas 43:10). Diosta cäsushqaqa, pëpaqmi allita parlayanqa, sinöqa mana allitam parlayanqa.

Juk Testïgu oqllanakur ruranakï jutsata ruraptinqa, Jehoväpaqmi nunakunaqa mana allita parlayanqa. Peru Dios mandakunqanta wiyakuptinqa Jehoväpaqmi allita parlayanqa. Tsëmi apostol Pëdru nirqan mana alli munëkunata mana cäsushpa Diosta wiyakunapaq. Jina nirqanmi kawënintsikchö limpiu kanapaq, Diospis limpiu kaptin (1 Pëdru 1:14-16, NM).

Juk testïgu mana allikunata ruraptinqa nunakunaqa musyariyanqam y Testïgukunapaqmi mana allita parlayanqa. Peru congregacionpita qarqushqa kanqanta musyarirqa, cuentatam qokuyanqa Testïgukunaqa Diospa palabran ninqannö rurar, congregacionta limpiuta katsinqantsikta. Tantiyarinapaq, paninta jutsata ruranqampita congregacionpita qarquriyaptinmi, Suiza nacionpita juk nuna, Testïgu këta munar reunionnintsikman ëwarqan. Alläpam espantakurqan Diospa markanchöqa jutsa ruraqkunata ichikllapis mana permitinqantsikpita.

Congregaciontam limpiuta katsin. Corintu markachö cristiänukunatam Pablu cläru willarqan, juk jatun jutsata rurëkaq mana arrepentikoq nunata congregacionpita qarquriyänampaq. Porqui tsë jutsa ruraqqa wakin cristiänukunatapis jutsa rurëmanmi ishkitsinman karqan. Pabluqa igualatsirqan jutsa ruraq nuna congregacionllachö karninqa levadüra masata poqutseq cuenta kanqantam. Tsëmi tsëchö wawqikunata nirqan congregacionpita qarquyänampaq (1 Corintius 5:6, 11-13).

Tsë nunaqa oqllanakur ruranakï jutsatam mana penqakushpa rurëkänaq. Tsëmi congregacionninchö kaqkunaqa tsë jutsata allitanöna rikar qallëkuyarqan (1 Corintius 5:1, 2). Tsëqa alläpa peligrösum karqan, porqui cristiänukunapis Diosta mana reqeq nunakunanömi jutsata rurar  qallëkuyanman karqan. Kanampis tsënöllam, pipis jutsampita mana arrepentikoqta congregacionchö permitishqaqa, wakinqa pensayanman Dios mandakunqankunata wiyakïqa alläpa mana precisanqantam (Eclesiastes 8:11). Bibliaqa willakun jutsankunapita mana arrepentikoqkunaqa, barcukunata hundikätseq lamar rurinchö mana rikakoq qaqa cuenta kayanqantam (Jüdas 4, 12, NM). Kë jutsata ruraqkunaqa congregacionchö këkaq cristiänukunapa markäkïninkunatam ushakäratsiyanman.

Jutsa ruraqkunatam arrepentikuyänampaq yanapan. Jesusmi willakurqan juk jövin wayimpita ëwakur herencian qellëta imëka jutsakunata rurar ushanqampita. Tiempuwannam cuentata qokurirqan kastakunapita karuchö tsënö kawakïqa alläpa llakikïpaq kanqanta. Tsëmi arrepentikur decidirqan wayinman kutinampaq. Arrepentikushqa kanqanta rikarmi teytanqa alläpa kushishqa chaskirqan (Lücas 15:11-24). Kë willakïmi yanapamantsik pipis arrepentikuptinqa Jehovä kushikunqanta. Bibliaqa nimantsik pëqa manam munantsu mana alli nunakuna wanuyänanta, antis cambiayayänanta y kawar sïguiyänantam munan (Ezequiel 33:11).

Congregacionchöqa juk familianömi kantsik. Tsëmi pitapis qarquriyaptinqa, tsë familiapita yarqurin. Jutsata ruranqanrëkur mana allikunapa pasanqanta rikarqa, itsa cuentata qokurinqa mana allita ruranqampita. Itsa Jehoväwan alli amïgu kayanqan y cristiänu mayinkunawan kushishqa kanqan witsankunata yarpanqa. Itsa tsëqa arrepentikur kutinampaq decidinqa.

¿Imanötaq congregacionpita qarqushqakunata yanapashwan kutiyämunampaq? Alli firmim kanantsik y anciänukuna decidiyanqantam respetanantsik. Y tsënöpis rikätsintsikmi kuyanqantsikta. Maslla tantiyarinapaq, pensashun rajupa ëwaq ishkaq nunakuna rajupita yarqïta mana puëdir jorqayänampaq shuyarëkaqman. Juknin punukar qallëkuptinqa, juk kaqqa qaqllanchö itsa fuertipa laqyakacharkunman. ¿Imanir? Porqui musyanmi punukarqa wanunampaq kaqta. Laqyanqanqa nananqam, peru kawënintam salvanqa. Davidpis tsëtanöllam nirqan: “Alli kaqta ruraq nuna maqamanqanqa, rasumpa kuyakïchi kanman” (Salmu 141:5). Davidqa musyarqanmi piñapämanqantsik nanarpis kawënintsikta salvëta puëdinqanta.

Imanömi peligruchö këkaq nunata riyakunampaq laqyakacharkï yanapan, tsënöllam congregacionpita qarqïpis jutsa ruraqkunata yanapan arrepentikur Jehoväman kutiyänampaq. Tsënömi pasarqan Julianpa tsurinwanpis. Pëqa chunka wata pasariptinmi kawëninchö cambiukunata rurarir congregacionman kutirirqan. Kananqa anciänunönam yanapakun. Jehoväta mana cäsi imachö ushanqanta rikänampaqmi congregacionpita qarqushqa kanqanqa yanaparqan. Tsëmi nirqan: “Tsënö corrigiyämänantaqa wanarqämi” (Hebrëus 12:7-11).

Alläpa llakikïpaqmi pitapis congregacionpita qarquriyaptinqa. Peru yarpänantsikmi Jehoväman kutita puëdinqanta. Tsënö kanampaqqa llapantsikmi yanapakunantsik. ¿Imataraq rurashwan?

Anciänukunaqa, Jehovänömi kuyakoq kayänan, y masran pitapis Jehoväpa  testïgun manana kanampaq kaqta niyanqan höranäqa. Kuyakïwan y alli clärum congregacionman kutimunampaq imata ruranampaq kaqta entienditsiyänan. Tiempuwannam congregacionpita qarqushqa cambiaqta rikarninqa, anciänukuna watukaq ëwayanman congregacionman imanö kutimunampaq kaqta yarpätsiyänampaq. *

Kastan kaqkunaqa, anciänukuna decidiyanqantam respetayänan. Tsënöpam qarqushqata y congregacionta kuyayanqanta rikätsikuyan. Julianmi nin: “Wamrätaqa imëpis kuyëkarqällam, peru mana alli portakunqanqa rakirayämarqanmi”.

Congregacionchö kaqkunaqa, Jehovä ninqantam respetayänan. Tsënömi congregacionpita qarqushqata kuyayanqanta rikätsikuyanqa. Tsëmi pëwan tiemputa pasayantsu ni parlayantsu (1 Corintius 5:11; 2 Juan 10, 11). Tsënö kaptimpis kastankunataqa kuyëpam tratayänan. Pëkunaqa alläpa llakishqam këkäyan, tsëmi pëkunataqa congregacionpita qarqushqatanöqa rikäyänantsu (Romänus 12:13, 15).

Julianmi nin: “Höraqa precisanmi congregacionpita qarqushqa këqa, porqui yarpätsimantsik Diosta cäsukïqa alläpa precisanqantam”. Jina ninmi: “Llakikïpaq kaptimpis tiempuwanqa allipaqmi. Wamrata imëpis tratanqänölla tratashqa kaptïqa, manachi imëpis kutimunmantsu karqan”.