1. ¿Imanirtaq Pabluqa nirqan ‘Jesucristoga Dios Yayapa podernin’ kanqanta?

JESUSQA mëtsika milagrukunatam kë Patsachö rurarqan. Tsë milagrukunapita Bibliachö leyishqaqa markäkïnintsiktam mas sinchiyätsinqa (Mateu 9:35; Lücas 9:11). Jehoväpa poderninwanmi Jesusqa tsë milagrukunata rurarqan. Tsëmi apostol Pabluqa nirqan ‘Jesucristoga Dios Yayapa podernin’ kanqanta (1 Corintius 1:24, NTCN). Peru ¿imatataq yachatsimantsik Jesus milagrukunata ruranqan?

2. ¿Imatataq yachatsimantsik Jesus milagrukunata ruranqan?

² Jesus milagrukunata ruranqanqa atskatam yachatsimantsik (Hëchus 2:22). Tsë milagrukunarëkurmi musyantsik waranqa watapa Jesus mandakamurnin, kë Patsachö llapan nunakunata milagruta rurar yanapanampaq kaqta. Jina Jehoväwan Jesus imanö kayanqanta mas reqinapaqpis yanapamantsikmi. Kë yachatsikïchöqa parlashun, kima  milagrukunata Jesus ruranqampitam y rikäshunmi kanan y shamoq tiempuchö imanö yanapamänantsikpaq kaqta.

3. (1) ¿Imataq pasakurqan juk casakï fiestachö? (2) ¿Imanirtaq Jesusqa kë milagruta rurarqan?

³ Canä markachö juk casakïchömi Jesusqa punta kaq milagrunta rurarqan. Manam musyantsiktsu imarëkur vïnu pishinqanta. Peru juk casakïchö vïnu pishiptinqa noviukunapaqmi alläpa penqakïpaq kaq, porqui pëkunam invitädunkunata shumaq atiendiyänan karqan. Tsëmi yanapëkunampaq Jesusta Marïa nirqan. Porqui Jesuspaq parlaq profecïakunata y “sielucho Diospa tsurin” nir qayayänampaq kaqtam alleq musyarqan, tsëchi yanapëta puëdinqanta pensarqan (Lücas 1:30-32; 2:52). Marïawan Jesusqa, casakoqkunatam yanapëta munayarqan. Tsëmi Jesusqa 380 litru yakuta, alli kaq vïnuman tikraratsirqan (leyi Juan 2:3, 6-11). Tsë milagruta ruranampaqqa Jesustaqa manam obligayarqantsu, sinöqa nunakunaman interesäkurmi rurarqan. Jehovä alli qarakoq kanqannöllam Jesuspis karqan.

4, 5. (1) ¿Imatataq yachatsimantsik Jesus yakuta vïnuman tikratsinqan milagru? (2) Kë milagruwan, ¿imapitataq següru kantsik?

⁴ Jehoväpa poderninwanmi, Jesusqa yakuta alli kaq vïnuman tikraratsirqan. Tsëqa atska nunapaqmi tinkurqan. Kë milagruqa yachatsimantsik Jehoväwan Jesusqa alli qarakoq kayanqanta y nunakuna imanö sientikuyanqanman rasumpa interesäkuyanqantam. Jinamampis paraïsuchö llapan nunata Jehovä mikïnin qonampaq kaqtam rikätsimantsik (leyi Isaïas 25:6 *).

⁵ Këman pensarishun. Diosta wiyakoq nunakunallana kawayanqan witsanchöqa, Jehoväqa manam ni ima wananqantsiktapis faltätsinqatsu. Alli mikïkuna y shumaq wayikunam kapamäshun. Tsë llapan allikunata Jehovä qomänapaq kaqman pensarqa, alläpa agradecïdum sientikuntsik.

6. (1) ¿Imapaqtaq Jesus poderninta utilizarqan? (2) ¿Imanötaq Jesus ruranqanta qatishwan?

⁶ Manam kikimpa provëchumpaqtsu Jesusqa poderninta utilizarqan. Yarpärishun, Diablu tentarnin rumikunata tantaman tikratsinampaq niptin, manam rurarqantsu (Mateu 4:2-4). Wakinkunapaq allikunata rurananllapaqmi Jesusqa poderninta utilizarqan. ¿Imanöraq  Jesus ruranqanta qatishwan? Jesusqa nirqan wakinkunapaq alli cösaskunata imëpis ruranapaqmi (Lücas 6:38). ¿Imatataq rurashwan wakinkunapaq? Wayintsikmanmi mikunapaq invitashwan. Jinamampis, reunionkuna ushariptinmi tiempuntsikta rakishwan pëkunawan parlakurinapaq o discursunkunata yachakuyaptin wiyarinapaq. Jina tsëraq yachatsikoq yarqïkaqkunatam yanapashwan. Imëpis alli qarakoq karnin y wakinkunata yanaparninqa, Jesus ruranqantam qatïkantsik.

7. ¿Ima problëmaraq Satanaspa mandakïkaptinllaraqqa këkanqalla?

⁷ Kanan tiempuqa mëtsikaq nunakunam waktsa kayan. Unë tiempupis waktsa këqa karqannam. Israelïtakunatam Jehovä nirqan: “Kë patsachö waktsakunaqa imëpis këkanqallam” (Deuteronomiu 15:11). Jesuspis, “wactsacunaqa imeyaqpis qamcunawanmi quecayanqa” nirqanmi (Mateu 26:11). Tsëqa, ¿waktsa kë ni imëpis mana ushakänampaq kaqtaku nikarqan? Manam, sinöqa Satanas mandakïkaptinllaraqqa imëpis waktsa kë kanampaq kaqtam nikarqan. Peru kë Patsachö alli nunakunallana kanqan witsanqa llapampaqmi mikï kanqa y waktsa këqa mananam kanqanatsu.

8, 9. (1) ¿Imanirtaq Jesusqa milagruta rurar tantawan pescäduta miratsirqan? (2) ¿Imatataq sientinki tsë milagruman pensar?

⁸ Nunakuna llapan wanayanqanta Jehovä qonampaq listu këkanqantam Salmu 145:16 textu nin. Kë patsachö Jesus këkarmi, Teytan ruranqannölla, nunakunata wanayanqanta qorqan. Tsëtaqa rurarqan manam poderninta rikätsikunanrëkurtsu, sinöqa nunakunapaq rasumpa interesäkurmi. Rikärishun Mateu 14:14-21 (leyiri) textu ninqanta. Atska markakunapitam waranqëpayan nunakuna Jesusta chakipa qatiyarqan (Mateu 14:13). Alläpa tardiyäkïkuptinnam discïpulunkunaqa, nunakunata utishqata y mallaqëkaqta rikarnin, Jesusta niyarqan nunakunata mandanampaq ëwar imallatapis rantir mikuyänampaq. ¿Imatataq Jesus rurarqan?

⁹ Pitsqa tantawan y ishkë pescädullawanmi Jesusqa tsëtsika waranqa nunakunata mikutsirqan. Tsëtaqa rurarqan nunakunata alläpa kuyarninmi. Atska mikïninkunam qorqan, tsëchi Bibliaqa nin pachankuna juntanqanyaq mikuyanqanta. Tsë mikuyanqanmi kallpata qorqan wayinkunaman kutiyänampaq (Lücas 9:10-17). Y mikïqa, chunka ishkë canastaran sobrarqampis.

10. ¿Imataq pasanqa waktsa këwan?

¹⁰ Mandakoqkuna suwakoq y kikinkunallapaq imëkata munayanqanrëkurmi, mëtsikaq millonyëpayan nunakuna waktsa kayan. Jina Jehoväpa testïgunkunapapis wakimpaqa mikuyänampaq ichikllam kayäpun. Peru Diosqa munanmi  y puëdinmi llapan nunakuna wanayanqanta qoyta. Y änikunmi waqtsa këta ushakätsinampaq (leyi Salmu 72:16 *). Ichikllachönam Diosta wiyakoqkunaqa shumaq Patsachö kawayanqa, tsëchöqa mananam suwakoqkuna ni waktsa këpis kanqanatsu.

11. (1) ¿Imanirtaq següru këkantsik ichikllachöna llapan nunakunata yanapanampaq poderninta Jesus utilizänampaq kaqta? (2) Jesus ruramunampaq kaqman pensanqantsikqa, ¿imata ruranapaqtaq yanapamäshun?

¹¹ Kë Patsachö këkarninmi, Jesusqa kima wata pullan milagrukunata rurarqan (Mateu 15:24). Y kananqa juk mandakoqnam, y waranqa wata mandakïninchöqa llapan nunakunatam yanapanqa (Salmu 72:8). Milagrukunata ruranqanwanmi Jesusqa rikätsimarquntsik, yanapamänapaq kallpanta utilicëta munanqanta. Tsëmi següru këkantsik ichikllachöna tsënö ruranampaq kaqta. Tsëkunaman yarpachakunqantsikmi yanapamantsik, tiempuntsikta y kallpantsikta nunakunata yanapëchö utilizänapaq (Salmu 45:1; 49:3). Rasunmi, noqantsikqa manam milagrukunata rurëta puëdintsiktsu, peru Biblia änikunqanta nunakunata yachatsitaqa puëdintsikmi. Tsëta ruranapaqmi carguta chaskirquntsik (Romänus 1:14, 15).

12. ¿Imanirtaq musyantsik Patsa imanö rurakashqa kanqanta Jesus alleq musyanqanta?

¹² Bibliaqa nin Dios Patsata kamanqanchö “obra ruraq maestrunö” Jesus yanapanqantam (Proverbius 8:22, 30, 31; Colosensis 1:15-17). Tsëmi Jesusqa alleq musyan Patsa imanö rurakashqa kanqanta y vientukunatawan lamarkunatapis dominëta puëdinmi.

13, 14. Juk willakïwan rikätsikaramï Jesus vientutawan lamarta dominëta puëdinqampita.

¹³ Tsënö dominëta puëdinqantam Jesusqa kë Patsachö këkarnin rikätsikurqan. Tantiyarinapaq, juk kutichömi Diospa poderninwan alläpa ‘bientuta päratsirqan’ (leyi Marcus 4:37-39). Juk yachaq nunam tsë vientukunapaq nin alläpa sinchi kanqanta, yana pukutëkunawan, räyukunawan y alläpa tamyawan kanqanta. Tsënö vientuwan tamyaqa llapan tarinqantam apakun. Mateupis tsënö alläpa vientuwan tamyanqampaqmi parlarqan (Mateu 8:24).

¹⁴ Lamar laqcheqsar barcuta kuyïkätseqta y rurinman yaku yëkïkaqta pensarishun. Tamyawan vientuqa alläpam bunrurükïkan y barcutapis wakman këman kuyïkätsin, peru Jesusqa alläpa utishqa karmi punukärishqa. Tsëmi discïpulunkunaqa alläpa mantsakar “[¡]salbecalläyällamë! ¡Yacumannam tullpucäquicantsic!”  niyan (Mateu 8:25). Tsënam, Jesusqa sharkurir kënö nin: “Amana bientïnatsu; ni yacu laqcheqsënatsu” (Marcus 4:39). Tsënam, ¡vientuwan laqcheqsëkaq yakuqa pärarin! Clärum këkan Jesusqa imëkatapis dominëta puëdinqanta.

15. ¿Imanirtaq musyantsik imëka kamanqanta Jehovä controlëta puëdinqanta?

¹⁵ Jehovämi Jesusta podernin qorqan tsënö ruranampaq. Tsëmi següru këkantsik Jehoväpis tsënö rurëta puëdinqanta. Manaraq Apakï Tamya kaptinmi kënö nirqan: “Qanchis junaqllatanam chusku chunka junaq y chusku chunka paqas tamyatsimushaq” (Genesis 7:4). Y Exodu 14:21 textupis willakun Inti yarqamunan kaq lädupita Diosnintsik fuertipa vientutsinqantam, y tsënöpa lamar ishkëman rakikärinqanta. Y Jonas 1:4 textupis ninmi lamarchö mantsakëpaq vientuta vientutsinqanta. Alläpam kushikuntsik mushoq Patsachöqa imëka desgraciakuna manana kanampaq kaqta, porqui tsëkunataqa Jehovämi ushakätsinqa.

16. ¿Imanirtaq kushikuntsik Jehoväwan Jesus imëka kamanqankunata controlëta puëdiyanqanta musyarnin?

¹⁶ ¿Imanirtaq kushikuntsik Jehoväwan  Jesus kamanqankunata controlëta puëdiyanqanta musyarnin? Porqui waranqa watapa Jesuspa mandakïninchöqa mananam kanqanatsu mantsakëpaq shukukï vientukuna, lamarpis ni volcankunapis yarqamunqanatsu, ni Patsapis kuyunqanatsu. Mananam mantsashunnatsu imëka desgraciakuna pasananta, porqui Jehovämi nunakunata tsapanqa (Apocalipsis 21:3, 4). ¡Jesusqa Diospa poderninwanmi desgraciakunata ushakätsinqa!

17. ¿Imanötaq Jehoväwan Jesus rurayanqanta qatishwan?

¹⁷ ¿Imanötaq Jehoväwan Jesus rurayanqanta qatishwan? Milagrukunata rurëta mana puëdirpis, Proverbius 3:27 * (leyi) textu ninqannö, cristiänu mayintsikkuna ima desgraciapapis pasayaptin wanayanqanta qornin y shoqarninmi (Proverbius 17:17). Këllaman pensarishun, mantsakëpaq shukukï vientu wayinta malograriptin cristiänu mayinkuna yanapayanqampitam, juk pani nirqan Jehoväpa testïgun kanqampita alläpa agradecikunqanta, tsënöqa nirqan manam cösaskunata qoyanqanllapitatsu, sinöqa Diospa kaqchö yanapayanqampitam. Tsënöllam juk soltëra panitapis pasarqan. Vientuwan tamya wayinta malogranqampitam alläpa llakishqa këkarqan. Cristiänu mayinkuna ëwarninmi wayinta altsapuyarqan, tsëmi alläpa agradecikurnin kënö nirqan: “Gracias Jehovä”. Llapantsikpis alläpam agradecikuntsik kuyakoq wawqintsikkunapita y panintsikkunapita, y masqa Jehovätawan Jesustam cuidamanqantsikpita.

18. ¿Imanötaq sientikatsishunki kuyakoq kar Jesus milagrukunata ruranqan?

¹⁸ Kë Patsachö Jesus këkarninmi rikätsikurqan “Diospa poderninta katsinqanta”. Milagrukunataqa ruraq manam nunakuna alabayänanta munartsu, ni kikimpa biennimpaqtsu. Sinöqa nunakunata rasumpa kuyarnin y yanapëta munarninmi. Qateqnin yachatsikïchömi këpita masllata rikärishun.