1, 2. ¿Imatataq Jehoväpa sirweqkunaqa rurëkäyashqa?

WATAKUNA pasanqanmannömi Jehoväqa willakurqan imakuna pasakunampaq kaqta. Sirweqninkunaqa pacienciawanmi cumplikänanta shuyaräyashqa. Tantiyarinapaq, Jeremïasmi willakurqan Judä markata Babilonia nacion ushakätsinampaq kaqta. Tsëqa cumplikarqan 607 wata Jesus manaraq shamuptinmi (Jeremïas 25:8-11). Isaïasnam willakurqan, Babilonia nacionpita judïukuna markankunaman kutiyänampaq Jehovä yanapanampaq kaqta. Kënömi nirqan: “Kushishqam kayan mäkoq mäkoqlla pëta shuyaraqkunaqa” (Isaïas 30:18). Miquëaspis segürum karqan tsë willakïkuna cumplikänampaq kaqta. Tsëmi kënö nirqan: “Mäkoq mäkoqllam këkäshaq” (Miquëas 7:7). Y mëtsika pachak watapam Diosta sirweqkunaqa Mesïas chämunanta shuyaräyarqan (Lücas 3:15; 1 Pëdru 1:10-12). *

² Tsënöllam, Diospa gobiernumpita willakïkuna cumplikänanta shuyarëkantsik. Jesusqa Diospa gobiernumpa mandakoqninnam këkan y ichikllachönam imëka mana allikunapita  libraramäshun. Ushakë chäramuptinnam, mana alli nunakunata y imëka sufritsimaqnintsikkunata chipyëpa ushakäratsinqa (1 Juan 5:19). Ushakëqa illaqpitam chäramunqa. Tsëmi listu këkänantsik.

3. ¿Imataraq itsa tapukushwan atska watapana ushakëta shuyarëkarqa?

³ Diospa munënin kë Patsachö rurakänampaq junaq chämunantaqa alläpam munëkuntsik (Mateu 6:10, NM). Peru atska watapana ushakë chämunanta shuyarëkarqa, “¿mäkoq mäkoqllatsuraq y listullatsuraq këkäman?” nir itsa tapukushwan.

4. ¿Imanirtaq listu y mäkoq mäkoqlla këkänantsik?

⁴ ¿Imanirtaq mäkoq mäkoqlla y listu këkänantsik? Këkunarëkurmi: 1) Jesusmi mandamarquntsik mäkoq mäkoqlla këkänapaq (Mateu 24:42; Lücas 21:34-36). 2) Jehoväpa markampis nimantsik ushakë junaqpaq listu y mäkoq mäkoqlla këkänapaq y kë Patsata shumaqyätsinampaq Dios änimanqantsikman yarparänapaqmi (leyi 2 Pëdru 3:11-13 *).

5. ¿Imanirtaq ushakë junaqpaq mäkoq mäkoqlla këkänantsik precisan?

⁵ Apostolkuna kawayanqan witsan cristiänukunaqa Jehoväpa piñakïnin junaqpaq listu y mäkoq mäkoqllam këkayänan karqan. Peru kananqa imëpitapis masmi precisan ushakë junaqpaq listu këkänantsik. Porqui Jesus willakunqanmi rikätsikun, 1914 watapita patsë mandakoqna kanqanta y ushakë junaqkunachöna kawëkanqantsikta. Tantiyarinapaq, nunakunaqa mas mana allimanmi chäkïkäyan y entëru Patsachönam Diospa gobiernumpita alli willakïninta willakïkantsik (Mateu 24:3, 7-14). Jesusqa manam nirqantsu ushakë junaqkuna ëka tiempu duranampaq kaqta. Tsëmi listu y mäkoq mäkoqlla këkänantsik, porqui ushakë junaqqa illaqpitam chäramunqa.

6. ¿Imanirtaq musyantsik nunakuna mas mana alliman chäkïkäyanqanta?

⁶ Kanan witsankunaqa, nunakuna mas mana allimanmi chäkïkäyan. Y tsëtaqa musyantsik Biblia kënö nishqa kaptinmi: “ushanan junaqkunachöqa alläpa sasa y mantsakëpaq tiempukunam kanqa” (2 Timoteu 3:1, 13, NM; Mateu 24:21; Apocalipsis 12:12). Tsëmi, pasëpa mana allikuna pasëkaptimpis musyantsikmi mas mana alli tikranampaq kaqta. Tsëqa, ¿ushakë junaq chämunampaqqa mana allikuna mas mana allimanraqku tikranqa?

7. Mateu 24:37-39 textu ninqanman yarpachakurqa, ¿imapitataq cuentata qokuntsik?

⁷ Wakinkuna itsa pensayan jatun sufrimientu manaraq qallaptin mallaqë, qeshyakuna y guërrakuna entëru nacionkunachö kanampaq kaqta (Apocalipsis 7:14, NM). Peru tsëqa manam pasanqatsu. ¿Imanir? Porqui tsëkuna pasakuptinqa, Biblia willakunqankuna cumplikëkanqantachi llapan nunakuna cuentata qokuriyanman. Hasta Biblia ninqanta mana creeq nunakunapis rikäriyanmanchi. Jesusqa nirqanmi ushakë junaqkunachö kawëkanqantsikta mëtsikaq nunakuna cuentata mana qokuyänampaq kaqta. Jina nirqanmi, kushishqa kawakïkäyaptin illaqpita ushakë junaq chämunampaq kaqta  (leyi Mateu 24:37-39). Jesus ninqanmi rikätsimantsik, jatun sufrimientu manaraq chämuptin nunakuna pasëpa mana alliman tikrakuriyänanta mana shuyaränapaqmi (Lücas 17:20; 2 Pëdru 3:3, 4).

8. Diospa sirweqninkunaqa, ¿imapitataq següru këkantsik?

⁸ Jesusqa willakurqan ushakë junaqkunachö mäkoq mäkoq këkaqkunalla, ushakë junaq chämushqanta cuentata qokuyänampaq kaqtam. Diospa sirweqninkunaqa mäkoq mäkoqllam këkarquntsik (Mateu 24:27, 42). Tsëmi 1914 watapita patsë Bibliapa willakïninkuna imanö cumplikëkaqta rikarquntsik. Tsëmi mana allikunapa ushakënin junaqkunachö kawëkanqantsikta següru këkantsik. Y Jehoväqa patsätsishqanam imë junaq ushakätsinampaq kaqta.

9. ¿Imanirtaq mäkoq mäkoqlla y listu këkänantsik?

⁹ Rikanqantsiknömi, mäkoq mäkoq y listu këkänantsik. ¿Imanir? Cristutam wiyakuntsik y ushakë junaqkunachö imakuna pasakunampaq willakunqankuna cumplikanqanmanmi creintsik. ¿Imanirtaq tsëman creintsik? Porqui Biblia ima pasakunampaq kaqta willakunqanqa clärum cumplikëkan.

10, 11. (1) ¿Imanirtaq discïpulunkunata Jesus nirqan mäkoq mäkoqlla këkäyänampaq? (2) ¿Imatataq rurashwan ushakë junaq chämunampaq mas demoramuptin? (Rikäri kë yachatsikïpa qallananchö këkaq dibüjuta.)

¹⁰ Mëtsikaq Jehoväpa testïgunkunam ushakë junaq chämunanta atska watapana shuyarëkäyan. Atska watana o tsëllaraq Diosta sirwir qallashqa karpis, llapantsikmi mäkoq mäkoqlla y listu këkänantsik. Jesus kutimurnin mana alli nunakunata ushakätsinan junaqpaqmi listu këkänantsik. Ushakë junaq imë chämunanta qateqninkuna mana musyarnimpis mäkoq mäkoqlla këkäyänampaq Jesus ninqantam yarpänantsik. Jina nirqanmi: “Tseqa canqa imeca juc nuna eucurnin, wayinta cuidayänanpaq sirweqnincunanta umpaquicur dejapashqannomi. Pecunatam imecata rurayänanpaq caqtapis cäyitsin. Y täpacoqtapis nin puncucho mäcoq mäcoq quecananpaq. Tsemi mäcoq mäcoq quecayänequi, porqui tse täpacoq cuentam musyayanquitsu ime öra cutimunäta. ¿Patsa paqasyärëcaqtsuraq, pullan paqastsuraq, qoya gallu cantetsuraq o qoya patsa waretsuraq tse wayiyoq cutimonqa? ¡Paqtaraq illaqpita cutimur punuquicaq cuentata tariyäshunquiman! Qamcunatanollam waquincunatapis canan willarï ¡imepis mäcoq mäcoqlla quecayänanpaq!” (Marcus 13:33-37).

¹¹ 1914 watachö Jesus mandakur qallanqanta musyarirmi, cristiänukunaqa ushakë junaq chämunampaq kaqtana entiendiriyarqan. Tsëmi Diospita yachatsikurnin ocupädu këkäyarqan. Marcus 13 kaq capïtuluchömi Jesus nirqan sirweqninkuna shuyaräyanqampita mas tardiraq patronnin chänampaq kaqta. Imë höra chänampaq kaqta mana musyarpis mäkoq mäkoqllam këkäyänan karqan. Tsëmi ushakë junaqpaq alläparaq pishinqanta o wanunqantsikchöraq chämunampaq kaqta  pensanantsiktsu. Mäkoq mäkoqllam këkänantsik.

12. (1) ¿Imatataq Habacuc Jehoväta tapurqan? (2) ¿Ima nirqantaq Jehovä Habacucta?

¹² Profëta Habacucman pensarishun. Jerusalen ushakänampaq kaqta willakurmi pacienciawan tsë ushakëta shuyararqan. Manaraq pë willakuptinmi, atska watakunapana wakin profëtakunapis willakushqana kayarqan. Habacucqa rikarqanmi nunakuna mas mana alli tikrëkäyanqanta. Y yanapanampaqmi Jehoväta mañakurnin kënö tapurqan: “¿Imëyaqraq yanapamänëkipaq qayakallämushaq Teyta Dios? Qamqa manataq wiyëkallämankitsu”. Jerusalen imë ushakänampaq kaqta mana willarpis, Jehoväqa mandarqan mäkoq mäkoqlla y listu kanampaqmi. Y “manam tarditsu chämunqa” nirqanmi (leyi Habacuc 1:1-4 * y 2:3 *).

13. (1) ¿Imatataq Habacuc pensarqantsu? (2) Peru tsënö pensashqa kaptinqa, ¿imaraq Habacucta pasanman karqan?

¹³ Ushakë raslla mana chaptin Habacucqa manam kënötsu pensarqan: “Atska watapanam Jerusalempa ushakëninta shuyarëkä. Itsa alläparaq pishin, manam precisantsu willakur sïguinä. Wakinkuna willakuyätsun”. Peru ¿imaraq Habacucta pasanman karqan tsënö pensashqa kaptinqa? Dioswan amïgu kënintam oqrarinman karqan. Y mäkoq mäkoqlla mana kanqanrëkurmi ushakë junaqchö wanunman karqan.

14. ¿Imanöraq sientikushun Paraïsuchöna këkar?

¹⁴ Paraïsuchö këkarninqa, rikashqanam kashun ushanan junaqkunapaq Jehovä willakunqankuna llapan cumplikashqa kanqanta. Tsëqa, ¿imanöraq sientikushun? Jehovämanmi imëpitapis mas markäkushun (yärakushun) y segürum kashun wakin änikunqankunatapis cumplimunampaq kaqta (leyi Josuë 23:14 *). Y alläpam Jehoväta agradecikushun, ushakë junaqta  tiempunchö apamushqa kaptin y mäkoq mäkoqlla këkänapaq willamashqantsik kaptin (Hëchus 1:7; 1 Pëdru 4:7).

15, 16. ¿Imanirtaq yachatsikïta mas precisaqpaq churanantsik?

¹⁵ Kawënintsikchö imapitapis masqa precisan Diosta sirwïmi, y Jehoväpa markanqa tsëtam seguïdu yarpätsimantsik. Tsëmi yanapamäshun Diosta sirwir sïguinapaq, masqa Diospita willakunqantsikta imëpitapis mas precisaq kanqanta mana qonqanapaqmi. Segürum këkantsik ushakë junaqkunapaq Jesus willakunqan cumplikëkanqanta y ushakë junaqpaq ichikllana pishinqanta. Tsëmi, noqantsikpaqqa alläpa precisan Jehoväta sirwi y gobiernumpita willakï (Mateu 6:33; Marcus 13:10).

¹⁶ Satanaspa makinchö këkaq nunakunaqa ichikllachönam ushakäriyanqa. Yachatsikurninmi nunakunata yanapantsik salvakuyänampaq. Imanir tsë precisanqanta juk pasakunqanwan rikärishun. 1945 watachömi Alemaniapita juk barcu undikärirqan, tsëchömi waranqëpayan nunakuna wanuyarqan. Juk casädu parëjam Testïgu manaraq karnin tsë barcuchö këkäyarqan. Warmi kaqmi yarpan, juk warmi qepinkuna y aläjankuna barcuwan undikaqta rikar alläpa qayarinqanta. Peru wakin pasajërukunapaqqa mas precisarqan nunakunata salvëmi. Kanampis nunakunapa kawëninqa  peligruchömi këkan. Tsëmi yachatsikur ocupädu këkänantsik, porqui musyantsikmi salvakuyänampaqqa yachatsinqantsikpitaraq kanqanta. Tsëmi nunakuna salvakuyänampaq llapan puëdinqantsikmannö yanapëta tïrantsik.

17. ¿Imanötaq musyantsik ushakë junaq illaqpita chämunampaq kaqta?

¹⁷ Bibliapa willakïninkuna cumplikëkanqanqa clärum rikakïkan y ushakë junaq imë höra karpis chäramunqanam. Organizacion de las Naciones Unidas nishqan y yanapaqnin gobiernukunaqa ichikllachönam mana alli religionkunata ushakätsita munayanqa (Apocalipsis 17:16). ¿Tsëpaqqa alläparaqku pishin? Manam. Porqui mana alli religionkunata ushakätsiyänampaqmi gobiernukunata Jehovä utilizanqa. Tsëtaqa ras y imë höra karpis rurëta puëdinmi (Apocalipsis 17:17). Satanaspa makinchö këkaq mana alli nunakunapa ushakënin chämunampaqqa ichikllanam pishin. Tsëmi Jesus kënö nimanqantsikta wiyakunantsik: “Cuidakuyë, ama shonqïkikuna nitipakätsuntsu atska mikïkunawan, machakïkunawan, y kë kawëpa yarpachakïninkunawan, itsapis illaqpita tsë junaqqa raslla qamkunaman chëkamunman” (Lücas 21:34, 35, NM; Apocalipsis 16:15). Jehoväta sirwirnin mäkoq mäkoqlla y ocupädu këkäshun. Y mäkoq mäkoqlla y listu këkaqkunata salvanampaq kaqman markäkushun (yärakushun) (Isaïas 64:4).

18. ¿Ima tapukïpitataq yachakushun qateqnin kaq yachatsikïchö?

¹⁸ Ushakë junaq chämunanta shuyaranqantsikyaqqa, discïpulu Jüdas consejakunqantam rurëkänantsik. Seguïdu mañakur markäkïnintsikta mas sinchiyätsishun y mana wanushpa kawëta shuyaränqantsikyaq Dioswan amïgu kënintsikta cuidashun (Jüdas 20, 21). ¿Imanötaq rikätsikushwan kë Patsa shumaq huertamanna tikrashqachö kawëta munanqantsikta? Qateqnin yachatsikïchömi tsëta rikärishun.