JEHOVÄ alli qarakoq kanqantaqa rikantsik llapan kamanqankunata rikarninmi (Santiägu 1:17). Tantiyarinapaq, manam juk ishkë qoyllurkunallatatsu ciëluman churashqa, sinöqa yupëtapis mana puëdinatam. Jina kë Patsantsikchöpis imëka niraq plantakunatam kamashqa (Salmu 65:12, 13; 147:7, 8; 148:3, 4).

Jehoväpa unë sirweqninmi imëka kamanqampita agradecikurnin juk cancionta qellqarqan. Tsë canciontaqa leyita puëdinki Salmu 104 textuchömi. Tsëchömi kë nuna nirqan llapan kawëninchö Jehoväta alabëta munanqanta (Salmu 104:33). ¿Qampis pënöku Jehoväta alabëta munanki?

Jehoväqa pënö alli qarakoq kanatam munan. Tsëmi apostol Pabluta qellqatsirqan, qellëyoq kaqkuna kushishqa këta munarqa, qellëninkunaman mana markäkuyänampaq. Sinöqa imëka allikunata qomaqnintsik Jehoväman markäkuyänampaq. Jina qellqatsirqanmi kapamanqantsikkunawan wakinkunata kushishqa yanapanapaqpis. Kë consëjukunata wiyakurqa shamoq tiempuchöqa rasumpa kushishqam kawakushun (1 Timoteu 6:17-19). Tsëmi Jehoväqa alli qarakoq kanapaq nimantsik.

Corintukunaman ishkë kaq cartanta qellqarmi Pablu rikätsirqan imanö shonquwan rurayänampaq kaqta. Kënömi nirqan: “Pipis shonqun sientenqanmanno ofrendecutsun, peru ama malasqa obligayëtsu qonanpaq, porqui Teyta Diosnintsicqa cuyan cushi cushilla ofrendaq nunatam” (2 Corintius 9:7). ¿Alli qarakoq kanqantsikpita pikunataq yanapakïta chaskiyan? Yanapanqantsik kaqkuna y noqantsikpis, porqui Jehoväpitam alli qarëkunata chaskintsik (2 Corintius 9:11-14).

Tsëpitanam Corintukunata Pablu yarpätsirqan juk precisaq qarëpita Diosta agradecikuyänampaq (2 Corintius 9:15). Tsë qarëkunaqa Tsurin Jesucristuwan imëkata qomanqantsikkunam. Rasumpa kaqchöqa, tsë alläpa precisaq qarëpitaqa manam imanö agradecikïta puëdintsiktsu.

¿Imanötaq agradecikushwan Jehoväwan Jesus noqantsikpaq imëkakunata rurayämunqampita y rurayämunampaq kaqpita? Juknöpaqa, agradecikushwan tiempuntsikta, kallpantsikta y kapamanqantsikta Jehoväta sirwinapaq utilizarninmi, jina wakinkunatapis yanapashwanmi pëta reqiyänampaq. Këkunataqa waktsalla karpis llapantsikmi rurëta puëdintsik (1 Crönicas 22:14; 29:3-5; Lücas 21:1-4).