Cristupa qateqnin kayänampaq yanapakïqa kushikïpaqmi

“Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq.” (MAT. 28:19.)

1-3. a) ¿Imanötaq wakin cristianokuna rikäyan Bibliapita yachatsikïta? b) ¿Ima tapukïkunapa respuestantataq yachakushun?

ESTADOS UNIDOS markachö Bibliapita yachatsikur, hindi nishqan idiömachö yanapakïkaq panim, kënö nishpa qellqamorqan: “Casi kima killanam Pakistan markapita huk familiata Bibliapita yachekätsï, y markankunata kutikuyänanna kaptinmi pasëpa llakinärï, manachi pëkunawanqa imëpis tinkushaqnatsu nir. Pëkunata Jehoväpita yachatsiqa noqapaq alläpa kushikïpaqmi kashqa”.

² Y qamqa, ¿imëllaqa kushikorqonkiku Bibliapita nunamayikita yachatsirnin? Jesuswan qateqninkunaqa alläpam kushïkuyarqan nunakunata Bibliapita yachatsirnin. Qanchis chunka (70) qateqninkunatam Jesus kacharqan yachatsikuyänampaq, y kutiramurnin kushishqa llapan rurayanqanta willariyaptinmi, tsë höra “Santu Espiritupa poderninwan shonqun alläpa” kushikorqan (Luc. 10:17-21). * Kanampis Jesuspa qateqninkunaqa  kushishqam atskaq nunakunata yachëkätsiyan. Musyarinapaq, 2007 watachömi hoqta millonpitapis masta Bibliapita nunakunata yachatsiyarqan.

³ Tsënö kaptimpis atskaq publicadorkunam kushikïta tariyanraqtsu, nunamayinkunata Jesuspa qateqnin kayänampaq manaraq yanapashqa karnin. Wakinnäqa atska watana publicador këkarnimpis manam hukllaqllatapis yanapayashqaraqtsu. ¿Imataq tsaparämashwan nunamayintsikta mana yachatsinapaq? ¿Imatataq rurashwan? Jesusmi nerqan: “Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq” nishpa. ¿Imanirtaq këta ruranantsik? (Mat. 28:19.)

Imataq qelanätsimashwan

4, 5. a) ¿Wakin markakunachöqa Bibliapita yachakïta munayantsuraq? b) ¿Y wakin markakunachöqa imanirtaq nunakuna Bibliapita wiyëta munayantsu?

⁴ Wakin markakunachöqa kushishqam revistakuna y librokuna apanqantsikta chaskikuyan, wakinnäqa tsë höram yachakur qallëkuyan Jesuspa qateqnin tikrayänampaq. Australiapita huk wawqim warminwan ewayarqan Zambia markapa Bibliapita yachatsikoq, tsëmi kënö qellqayämorqan: “Niyamanqanqa rasumpam kanaq, Zambia markachöqa nunakuna alläpam Bibliapita yachakïta munëkuyan. Cällekunachö yachatsikinäqa alläpa shumaqmi. Wakin nunakunanäqa kikinkuna witïkamurninmi mañamantsik, ¡tsë kaq revistataran munä!, nir”. Y pasaq watakunallachöran ishkë pachak waranqapitapis masta (200.000) yachatsiyarqan Bibliapita nunakunata, këqa rikätsikun cada publicador huk nunata yachëkätsenqantam.

⁵ Tsënö kaptimpis wakin markakunachöqa manam revistantsikkunata ni librontsikkunata chaskikïta munayantsu y manam fäciltsu Bibliapita yachatsir qallëqa. ¿Imanirtaq tsënö? Wakinkunataqa manam wayinkunachö tarintsiktsu, y wakinkunanam religionpita imatapis musyëta munayantsu teytankuna tsënö wätashqa kayaptin. Wakinkunanam mana alli religionkunachö mana allikunata rurayanqanta rikar piñakuyan, tsëmi religionpitaqa ni imatapis musyëta munayantsu llapampis igual-llan nir. Wakinkunataqa dirigeqninkunam shumaqllaqa yachatsiyashqatsu, tsëmi pantakashqa üsha cuenta purikuyashqa (Mat. 9:36). Tsënöpam Bibliapita pillapis parlapëta munaptenqa piñakur wiyëta munayantsu. Tsënö kaptinmi wakin publicadorkunaqa qelanäyan yachatsikoq ëwëta.

6. ¿Imanirtaq wakinkuna qelanäyan Bibliapita yachatsikïta?

⁶ Pero wakinkunaqa qelanäyan, puntatanöna yachatsikoq ëwëta mana puëder, qeshyapäkurnin o edäna karninmi. Y wakinkunaqa qelanäyan nuna mayinkunata yachatsita mantsaparninmi. Moisesnömi manachi puëdeshaqtsu niyan. Faraonwan parlanampaq Jehová mandaptinmi Moisés kënö nerqan: “¡Ay Jehová! imëpitapis manam noqalläqa alleqllaqa parlallatsu” (Éxo. 4:10). Manachi puëdeshaqtsu neqkunaqa, mantsayan mana alli yarqunantam. Tsënö, manam yachatsita puëdetsu nerqa, manam pitapis yanapashuntsu bautizakunampaq. Y tsënö yarparqa manam sinchikushuntsu Bibliapita yachatsikurnin qallanapaq. ¿Imatataq rurashwan mana mantsakushpa yachatsikunapaq?

Shonquntsikpitam yachatsita munanantsik

7. ¿Imataq Jesusta yanaparqan yachatsikoq ëwanampaq?

⁷ Puntataqa shonquntsiktam alistanantsik. Jesusmi nerqan: “Nunaqa parlan shonquncho imatapis yarpanqantam” (Luc. 6:45). ¿Imataq Jesuspa shonqunchö karqan? Wakinta yanapananllapaqmi yarpararqan. Tsëmi yanaparqan nuna mayinta yachatseq ëwanampaq. Musyarinapaq, pushakoq religiösokuna nunakunata mana shumaq yachatsiyaptinmi Jesus llakikorqan, tsëmi “disipuluncunata queno nerqan: —Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan. Tsemi Teyta Diosman mañacuyë elloqcuna mas atscaq cayänanpaq” (Mat. 9:36-38).

8. a) ¿Imakunamantaq yarpashwan nunakunata shumaq yachatsinapaq? b) ¿Bibliata yachakïkaq warmi nenqampita imatataq yachakuntsik?

⁸ Yarpakurkushun, noqantsiktapis pacienciawan  Bibliapita yachatsimanqantsikman. Tsëmi yanapamäshun markantsikchö nunakunata shumaq yachatsinapaq. Huk warmin Jehoväpa testïgonkunapa sucursalninman kënö nir qellqarqan: “Alläpam kushikü Jehoväpa testïgonkuna Bibliapita yachatsimaqnï shayämuptin. Höraqa llakikurïmi alläpa tapupäkoq kanqäpita, y tapukinïkunata contestamarnï más hörakuna quedakuyaptin. Pero alläpa pacienciayoqmi kayan, llapan yachayanqampitam yachatsiyäman. Alläpam agradecikü Jehovätawan Jesusta reqenqäpita”.

9. Wakinkuna mana wiyakuyaptimpis, ¿imamantaq Jesus yarpararqan y noqantsikta imanötaq tsë yanapamantsik?

⁹ Musyanqantsiknöpis, Jesustaqa atskaq nunakunam wiyayarqan, pero manam llapantsu qateqnin tikrayarqan (Mat. 23:37). Wiyakoq kaqkunapis wakinqa yachatsikonqanta manana munarmi haqirir ewkuyarqan (Juan 6:66). Tsënö kaptimpis Jesusqa manam qelanärerqantsu, yachatsikïnenqa alläpa väleq kanqantam musyarqan. Wakin mana wiyakuyaptimpis, allita rurëkanqanmanmi imëpis yarpararqan. Alli shonquyoq nunakuna Diospa Palabranta yachakïta munaqkunatam rikarqan, y pëkunata yanaparmi kushikorqan (lei Juan 4:35, 36). Tsënö kaqllam noqantsikpis willapäkonqantsikchö mana wiyamashqapis, yarpänantsik markantsikchö wiyakïta munaq nunakuna kayanqantaraq. ¿Tsënö pensarqa imatataq rurashwan?

Willakoq yarqushun yachakï munaqkunata tarinantsikman yarparëkar

10, 11. ¿Imatataq rurankiman nunakunata yachatsirnin imëpis kushishqa kanëkipaq?

¹⁰ Huk murupakoq nunaqa murukun atska cosëchata ëllunanman o qorinanman yarparëkarninmi. Noqantsikpis willakoq yarqunantsik yachakïta munaqkunata yanapëta munarmi. Tsënö tarita munar ëwëkashqapis itsa yachakïta munaq nunakunata tarishwantsu, y tsënö  kaptenqa itsa qelanärishwan. ¿Tsërëkurtsuraq wayin wayin yachatsikoq ëwëta haqirishwan? Manachi tsëtaqa rurashwantsu. Rasumpëpaqa, atskaq nunakunam tsëraq Diospa alli willakïninta wiyar qallëkäyan, wayin wayin willakoq ëwanqantsikrëkur.

¹¹ Pero kushishqa yachatsikunapaqqa tukïnöpam nunakunaman Diospa willakïninta chätsita tïrashwan. Más tantearinapaq, ¿yachatsikïta qallarqonkiku qatukuyanqankunachö, nänikunachö, trabäjochö o viaje ëwëkanqëkichöpis? Tsëkunachö nunakunata parlapëta sinchikurnenqa tarinkim pillatapis Bibliapita yachakï munaqkunata, tsëqa alläpam kushikunki.

¿Imatataq rurashwan yachatsikonqantsikta mana wiyamashqaqa?

12. ¿Imanötaq yachatsishwan religionpita mana parlë munaqkunata?

¹² Wakin nunakunaqa manam religionpita musyëta munayantsu. ¿Imanötaq tsënö nunakunata yachatsishwan? Llakitsenqankunapitam parlapashwan. Apóstol Pablum Corinto markachö cristiano wayinkunapaq kënö qellqarqan: “Teyta Jesucristuman mana allapa marcäcoqcunawan quecarnam, pecunanolla quecä. Tsenoqa quecä pecunata marcäquinincunacho yanapecunäpaqmi. Ojala tseno rurarnin, atscaqta yanapecüman salbaquicuyänanpaq” (1 Cor. 9:20-22). Noqantsikpis imëka pasakïkanqankunapitam vecinontsikkunata parlapärishwan, tsënöpa wiyaramänapaq. Atskaqmi casado o mana casado karpis alli y kushishqa kawakïta ashikäyan. ¿Munëkäyanqan tëmakunata parlapashllapa Bibliapita yacharatsishwantsuraq?

13, 14. ¿Imakunatataq rurashwan kushishqa yachatsikunapaq?

¹³ Mana wiyakuyanqan markakunachöpis, wakin publicadorkunaqa nunakunata yachatsirnin kushikïta tariyashqam. ¿Imatataq rurayashqa? Huk idiömatam yachakuyashqa. Huk wawqim warminwan musyariyarqan täränqan markachö huk nacionpita nunakuna kayanqanta. Tsëmi hoqta chunka (60) watayoqna këkarpis huk idiömata yachakur qallëkuyarqan, ollqu kaqmi kënö nin: “Pëkuna parlayanqan idiömata yachakïqa allichi kanman nirmi pensariyarqä. Tsëmi yachakur qallëkuyarqa llapan hunaqkuna, y yachakuriyarqämi, tsënöpam atskaqta Bibliapita yachatsir idiömankunachö qallëkuyarqa”.

¹⁴ Huk idiömata yachakïta mana puëdernimpis, folleto Buenas nuevas para gente de todas las naciones nishqanwanmi yachatsita puëdentsik, huk idiömata parlaq nunakunata tarirnenqa. Y revistakuna y librokunapis kanmi huk idioma parlaqkunapaq y tsëkunatapis apapushwanmi. Awmi, tsënö parlaq nunakunata yachatsiqa manam fäciltsu. Tsënö kaptimpis manam qonqanantsiktsu Biblia kënö nenqanta: “Pipis atscata muroqqa atscatam ellun; y pipis ichicllata muroqqa jina ichicllatam ellun” (2 Cor. 9:6).

Llapantsikmi yanapanakuntsik

15, 16. a) ¿Jesuspa qateqnin këman chäyänampaq imanötaq llapantsik yanapanakuntsik? b) ¿Imanötaq yanapayan mayoryashqa wawqikuna y panikuna tsëraq yachakïkaqkunata?

¹⁵ Jesuspa qateqnin këman pitapis chätsinapaqqa atskaqmi yanapanakuntsik y manam tsëtaqa hukllaqllatsu rurantsik. ¿Imanirtaq tsëta nintsik? Jesusmi kënö nerqan: “Sitsun qamcuna jucniqui jucniqui cuyanacuyanqui, llapan nunacunam musyariyanqa noqapa disipulücuna cayanqequita” (Juan 13:35). Tsënö kuyakoq kanqantsiktaqa, rikäriyan yachatsikunantsik wayiman shamurninmi. Bibliapita yachakïkaq warmim kënö qellqarqan: “Alläpam gustëkaman Jehoväpa testïgonkuna yachatsikuyanqan wayiman ëwëqa, ¡alläpa kuyakoqmi kayan!”. Jesusqa willakorqanmi Bibliapita yachakïkaqkunata wakintaqa kastankuna chikiyänanta (lei Mateo 10:35-37). Tsënö kaptimpis Jehoväpa markanchöqa tariyanqam “wauqincunata, panincunata, tëtanta, mamanta, wamrancunata” nerqanmi (Mar. 10:30).

¹⁶ Mayoryashqa wawqikunapis yachakïkaqkunataqa yanapayanmi, ¿imanötaq rurayan? Wayinkunaman yachatseq mana ëwarnimpis, reunionchö këkarnin shumaq parlakayamonqanwanmi  mushoqkunapa fëninta sinchiyätsiyan. Hinamampis pëkunaqa atska watapanam alli kaqta rurar kawayan y tsëta rikarninmi alli shonquyoq nunakuna Teyta Diospa markanman shayämun (Pro. 16:31).

Ama mantsakushuntsu

17. ¿Imatataq rurashwan nuna mayintsikta Bibliapita yachatsita mantsaparnenqa?

¹⁷ Nuna mayintsikta Jesuspa qateqnin kanampaq yanapëta mantsakurnenqa, ¿imatataq rurashwan? Yarpänantsikmi Moisestapis Jehová santo espïritunwan yanapanqanta. Y wawqin Aarontapis parlakurnin yanapanampaq churanqanta (Éxo. 4:10-17). Jesuspis änerqanmi qateqninkuna yachatsikoq ëwayaptenqa, Diosnintsik santo espïritunwan yanapananta (Hech. 1:8). Y ishkaqtayanmi yachatsikoq kacharqan (Luc. 10:1). Tsëmi, yachatsikïta mantsakurnenqa Jehová Diosta mañakï yachaq këninta, santu espïritunta y huk alli yachaqta yanaqiki ashi. Jehová Diosnintsik manshu nunakunata Palabrampita yachatsikuyänampaq permitenqantaqa alläpam kushikuntsik (1 Cor. 1:26-29).

18. ¿Imakunamantaq yarpashwan yachëkätsenqantsik nunakuna Jesuspa qateqnin këman mana chäyaptin?

¹⁸ ¿Imamantaq yarpashwan yachatsenqantsik nunakuna Jesuspa qateqnin mana tikrayaptin? Yarpänantsikmi, yachatseqpita mana kanqanta. Mikunataqa hukllaqllapis ruraramunmanmi, pero Bibliapita yachatsikïqa manam tsënötsu. Más precisaq kaqtaqa kikin Jehovämi ruran, alli shonquyoq nunakunata markanman pushamurnin (Juan 6:44). Tsëpitanam noqantsik y wakin cristiano mayintsikkunawan tukïnöpa yanapantsik yachakïkaqkuna más yachakuyänampaq (lei 2 Timoteu 2:15). Y tsëpitanam kikin yachakïkaq sinchikunan yachakïkanqannö kawëta (Mat. 7:24-27). Awmi, Jehoväpa sirveqnin tikrayanantam munantsik. Pero shumaq yachakïkar haqiriyaptenqa alläpam llakikuntsik y qelanärintsikmi. Tsënö kaptimpis musyantsikmi Diosnintsikqa “llapan rurashqantsicpita cuentata” mañamänata (Rom. 14:12).

Ruranqantsikqa alläpa allim

19-21. a) ¿Imanötaq yanapamantsik hukkunata Bibliapita yachatsenqantsik? b) ¿Imanötaq Jehová rikan Palabrampita willakur purishqa?

¹⁹ Nuna mayintsikta Bibliapita yachatsiqa yanapamantsik Diospa kaqta imëpis puntaman churëkänapaqmi. Hinamampis yanapamantsik Bibliapita yachakonqantsikta imëpis shonquntsikchö këkätsinapaqmi. Barak nishqan precursormi kënö nerqan: “Bibliapita hukta yachatsiqa wanan kikintsikpis Bibliata alleq leinatam, hinamampis hukta yachatsinapaqqa kikintsikmi alleq markäkunantsik o yärakunantsik yachakonqantsikkunaman”.

²⁰ Bibliapita pillatapis mana yachatserqa, ¿Diosta adorëkanqä manam imapaqpis servintsu nishpatsuraq pensankiman? Manam tsënöqa pensanëkitsu. Kushitsita munarnin imëka ruranqantsikkunapitaqa Jehová Diosqa alläpam kushikun. Jehoväpita willakoq kaqqa llapantsikpis “Diospa mincancunallam” kallantsik. Tsënö kaptimpis, pillatapis yachatsiptikiqa Diosnintsik yanapanqam, y tsëta rikarmi alläpa kushikunki (1 Cor. 3:6, 9). Amy shutiyoq precursöram kënö nin: “Yachatsenqëki nuna kawëninta altsar qallëkuptenqa alläpam Jehová Diosta agradecikïkunki, mana wanushpa kawakïta tarinampaq yanapëkanqëkita”.

²¹ Wakinkunata yachatsirnenqa más ocupadom kashun, y tsëmi yanapamäshun alleq tsarakunapaq y mushoq patsamampis chärinapaq. Y Jehoväpa yanapakïninwan itsa hukllaqllatapis yanaparishwan salvacionta tarinampaq (lei 1 Timoteu 4:16). ¡Kë kushikïnintsiktanöqa manachi mëchöpis tarishwantsu!

[Päginapa ura kuchunchö willakï]

¿Yarpankiku?

• ¿Imataq tsapämashwan mantsakur nuna mayintsikta mana yachatsinapaq?

• Markantsikchö Bibliapita yachatsikushqa wiyakïta mana munayaptinqa, ¿imatataq rurashwan?

• ¿Imanirtaq sinchikushwan nuna mayintsikta yachatsita?

[Yachakunapaq kaqpa tapukïninkuna]

[13 kaq päginachö dibüjukuna]

Tukïnöpa Bibliapita yachatsikurnenqa tarishunmi yachakï munaq nunakunata