Diosnintsik Sirveqnimpaq akranqanta alleq reqishun

“¡Rikë! ¡Sirveqnïta, [...] pëtam noqa akrarqö!”. (ISA. 42:1.)

1. Jesuspa wanïninta yarpänapaq ichik tiempollana pishikaptenqa, ¿imatataq ruranantsik, y imapaqtaq yanapamäshun?

JESUSPA wanïninta yarpänapaq tiempoqa chëkämunnam, tsëmi alläpa precisan apóstol Pablu kënö nenqanta ruranantsik: “Teyta Jesucristu imano cawanqantapis cäyicushun. Pemi yanapecamäshun alli marcäquiyoq canantsicpaqqa. [...] Tsemi qamcunapis marcäquiniquicunacho imata ecata sufrirpis, ama llaquinäyëtsu; antis yarpäcurcuyë Jesucristupis tse jutsasapa nunacuna sufritsiyaptin Diosman marcäcur pasensiaquiconqanta” (Heb. 12:2, 3). Awmi, ciëlopa ëwaqpaq kar o Patsapaq karpis, Jesucristu wanonqanyaq Teytampa munëninta ruranqampita yachakurninmi, noqantsikpis pënö mana qelanashpa Diosnintsikta servishun (igualaratsi Gálatas 6:9 nishqanwan).

2. ¿Imatataq yachakushwan Jesuspaq Isaías librochö qellqarëkaqpita?

² Profëtan Isaiastam Jehová qellqatserqan wambran Jesucristucho cumplikänampaq kaq profecïakunata. Kë qellqatsenqankunam yanapamäshun ‘Jesucristu imano cawanqantapis cäyicunapaq. Pemi yanapecamäshun alli marcäquiyoq canantsicpaq’. * Awmi, Pëpita alleq yachakurnenqa musyashunmi imanö kanqanta, noqantsikrëkur hipanqanta, Reynintsik y Salvamaqnintsik kanqanta. Hina masmi musyashun cada wata imanöpa wanïninta yarpanqantsikta. Kë watachö Jesuspa Wanïnin Yarpëqa ratamun jueves 9 de abril, inti o rupay ullurkuptinmi.

Diospa Sirveqnin pï kanqampis musyakärin

3, 4. a) Isaías librochö “sirveqnï” nerqa, ¿pikunapaqtaq parlan? b) ¿Isaías 42, 49, 50, 52 y 53 capïtulokunachö sirveqnï nerqa pipaqtaq parlëkan?

³ “Sirveqnï” nishqan palabraqa atska kutim yurin Isaías librochö. Höraqa kikin profeta Isaiaspaqmi parlan (Isa. 20:3; 44:26). Wakinchönam Israel markapaq parlan, tsë markataqa “Jacob” nishpapis qayanmi (Isa. 41:8, 9; 44:1, 2, 21). Pero 42, 49, 50, 52 y 53 capïtulokunachöqa, huk mastam qayan sirveqnï nishpa. ¿Pitataq tsënö qayan? Këta musyanapaqqa, ashinantsik Escrituras Griegas nishqanchömi, tsëchömi willamantsik kë capïtulocunachö pipaq parlanqantapis. Hechos nishqan librochömi willamantsik, Etiopía markapita huk nuna, Isaías nishqan librota leikanqanta, tsëmanna Felipe shutiyoq Jesuspa qateqnin santu espíritu pushaptin chärenqanta. Kë nunaqa leikarqan sinchipam Isaías 53:7, 8 nishqanta, y pipaq parlanqantapis mana musyarmi Felipeta kënö tapurerqan: “¿Pipaqtaq Diospa unë profëtan tsënö escriberqan? ¿Quiquinpaqcu, o juc nunapaqcu?”. Tsënam Felipeqa tsë etíope nunata shumaq willarerqan, leikanqanqa  Jesuspaq parlanqanta (Hech. 8:26-35).

⁴ Jesus llullullaraq këkaptinmi Simeón nishqan nuna Jesuspaq kënö nerqan: “Jinantin nasion nunacunapaqpis actsi cuentam canqa”, këqa unëpitanam Isaías 42:6 y 49:6 nishqanchö qellqarëkarqan (Luc. 2:25-32). Hina jusgayanqan paqas, tukïta pasanampaqpis qellqarëkarqannam Isaías 50:6-9 nishqanchö (Mat. 26:67; Luc. 22:63). Y 33 wata Pentecostés nishqan fiesta pasariptinmi, apóstol Pedru willakorqan Jehoväpa ‘Sirveqnin’ Jesus kanqanta (Isa. 52:13; 53:11; lei Hechos 3:13, 26). ¿Imatataq yachakuntsik Jesuspaq qellqarëkaqkunapita?

Jehovämi sirveqninta alleq yachatsin

5. ¿Pitaq yachatserqan Diospa sirveqninta?

⁵ Isaías librochö Diospa sirveqnimpaq wakin qellqarëkaqkunapis rikätsimantsik, Jehoväwan tsurin Jesusqa alläpa kuyanakuyanqanta y alleq reqinakuyanqantam kë patsaman manaraq shamuptin (lei Isaías 50:4-9). Kikin Jesusmi willakun Teyta Jehová yachatsenqanta: “Pëmi [...] rinrïta kichamun yachaqkunano wiyakunapaq” (Isa. 50:4). Ciëlochö këkarnenqa Teytan nenqantam wiyarqan, pëpitam yachakorqan, y llapan nenqantam rurarqan. ¡Imanö kushikïpaqraq Jesuspaq karqan kikin Jehová yachatsiptin!

6. ¿Imanötaq rikätsikorqan Diospa sirveqnin llapanchö wiyakoq kanqanta?

⁶ Isaías qellqanqanchöqa Diospa sirveqninqa, Teytantam “Llapan puëdeq Kamakoq Jehová” nishpa qayan, këqa rikätsimantsik Teytampa autoridadninta respetanqanta y kallpayoq kanqanta alleq musyanqantam. Hina llapanchö wiyakonqantaqa rikantsik kënö nenqanwanmi: “Llapan puëdeq Kamakoq Jehovämi rinrïta kichamushqa wiyakoq kanäpaq, y noqaqa llapanchömi wiyakorqä. Manam qepaman kuterqätsu” (Isa. 50:5). Jehová Dios llapanta ruraptin yanapakunampaqmi Jesusqa “huk maestrono lädonchö” këkarqan. Kë ‘maestroqa’ llapan tiempom kushishqa karqan Teytampa lädonchö, tsëmi kikin kënö willamantsik: “Llapan tiempom Pëpa lädonchö kushishqa karqä, hina kë patsachö imëka wayoqta rikarpis alläpam kushikorqä, nunakunatapis pasëpam kuyarqä y pëkunarëkurmi kushishqa karqa” (Pro. 8:22-31).

7. ¿Imanötaq musyantsik Teytan llapanchö yanapananman Jesus markäkonqanta o yärakonqanta?

⁷ Tsënö Diosnintsik yachatsenqanmi y nunakunata kuyanqanmi yanaparqan kë Patsata shamurnin imëka mana allikunata pasarnimpis alleq tsarakunampaq. Tsëläya chikirnin qatikachäyaptimpis, Pëqa kushishqam Teytan munanqanta rurarqan (Sal. 40:8; Mat. 26:42; Juan 6:38). Jesusqa pasëpam markäkorqan o yärakorqan Teytan llapanchö yanapananta y ruranqampita kushikunanta. Isaías qellqanqannömi pëqa kënö nerqan: “Allitam rurëkanki nimaqnëqa lädochömi këkan. ¿Pitaq noqata vencimanman? [...] ¡Rikäyë! Kikin mandakoq Jehovämi yanapamanqa” (Isa. 50:8, 9). Awmi, Isaías qellqanqannömi Jesustaqa yachatsikoq ëwaptin Teytan yanaparqan. Tsënö kanqantam Isaiasqa mastaraq rikätsimantsik.

Diospa sirveqnin kë Patsachö yachatsikur purenqan

8. ¿Imanötaq musyantsik Isaías 42:1 nishqanchö qellqarëkaq Jesuspaq parlanqanta?

⁸ Bibliam willamantsik 29 watachö Jesus bautizakuriptin ima pasanqantapis, kënömi nin: “Imeca palumano[mi] Santu Espiritu urämur, Jesusman chämorqan. Sielupeqnam Dios queno nimorqan: —Qammi cuyë tsurï canqui. Qamrecurmi allapa cushicü” (Luc. 3:21, 22). Tsënöpam kikin Jehová alleq musyatsikorqan Isaiaschö ‘akrashqampaq’ qellqarëkaqqa Jesus kanqanta (lei Isaías 42:1-7). Kë Isaiaschö Diospa sirveqnimpaq qellqarëkaq profecïaqa llapanmi cumplerqan Jesus yachatsikonqanchö. Mateopis qellqanqan librochö Isaías 42:1-4 nishqampitam qellqarqan Jesuspaq parlarnin (Mat. 12:15-21).

9, 10. a) ¿Imanötaq Isaías 42:3 nenqan cumplikarqan Jesus yachatsikonqanchö? b) ¿Imanötaq Jesus rikätsikorqan rasumpëpa alli kaq rurëta? c) ¿Imëtaq alli kaqta patsätsenqa kë patsachö?

⁹ Jesuspa tiemponchö religiösokunapa pushaqninkunaqa waktsankaq nunakunataqa chikiyaqmi markamayinkuna këkäyaptimpis (Juan 7:47-49). Pasëpa mana allim rikäyaq, tsëmi “pakishqa shoqushno” y “upinëkaq chiwchi cuenta”  kë nunakuna kayaq. Pero Jesusqa alläpam llakipaq waktsakunata y llakishqakunata (Mat. 9:35, 36). Tsëmi llapan nunakunata kënö kuyëpa invitarqan: “Llapequipis utishqa y llaquishqa carnenqa, noqaman shayämï. Shayämuptiqueqa, noqam jamaratsiyashqequi” (Mat. 11:28). Hinamampis, yachatsikonqanchömi rikätsikorqan rasumpëpa alli kaq rurë imanö kanqantapis (Isa. 42:3). Y yachatsikorqanmi Diospa leyninwan shumaq y yachëllapa yanapanakuna kanqanta y manam tsë leykunawan llakitsinakuna kanqantatsu (Mat. 23:23). Waktsatapis y kapoqyoqtapis igualpa yachatsirmi alli kanqanta rikätsikorqan (Mat. 11:5; Luc. 18:18-23).

¹⁰ Isaías qellqanqannömi, Jehoväpa akrashqan Jesusqa, kë patsachö allikaqllatana patsätsimonqa (Isa. 42:4). Y tsëtaqa ruramonqa ichik tiempollachönam, kë Patsachö mana alli gobiernokunata chipyëpa ushakäratsirnin kikinllana gobernamur. Tsënöpam ‘mushoq patsachoqa allicunata rurarllana, nunacuna cawayanqa’ (2 Ped. 3:13; Dan. 2:44).

Llapan nunapaq huk “aktsi” y huk “contrato”

11. a) ¿Imanötaq Jesusqa kë patsachö këkar nacionkunata aktsiparqan? b) ¿Y kananqa imanötaq aktsipëkan?

¹¹ Isaías 42:6, nenqannömi Jesusqa “nacionkunapaq aktsi” cuenta karqan. Tsëmi marka mayin judiokunata aktsipaq cuenta alleq yachatserqan (Mat. 15:24; Hech. 3:26). Hina kikinmi kënö nerqan: “Noqaqa actsi cuentam cä nunacunapaq” (Juan 8:12). Awmi, pëqa aktsi cuentam karqan judiokunapaq y mana judiokunapaqpis, tsëmi yachatserqan Diospa Palabranta y pëkunarëkurmi wanorqampis (Mat. 20:28). Wanonqampita kawariramurnam qateqninkunata kënö nerqan: “Noqa rurashqäcunata willacur[mi], puriyanqui [...]; y jinantin munduyaqmi chäratsiyanqui” (Hech. 1:8). Pabluwan Bernabëqa mana judïokaqkunatapis yachatsiyarqanmi, tsënöpam rikätsikuyarqan yachatsikikäyanqanqa mana Israel kaq nunakunapaqpis “actsin cuenta”, kanqanta (Hech. 13:46-48 igualaratsi Isaías 42:6). Y kanan tiempochö tsë willakïta willakuyänampaqqa Jesus haqishqa ciëlota ëwaqpaq kaqkunatam, y Patsachö quedaqpaq kaqkunam yanapëkäyan. Kë ishkan grupom nunakunata aktseq cuenta yanapëkäyan Jesusman markäkuyänampaq o yärakuyänampaq.

12. ¿Imanötaq Jehová ‘nunakunawan conträtota’ rurarqan?

¹² Hina tsë profeciallachömi Sirveqninta Jehová kënö nerqan: “Noqam imëkapitapis tsapashqëki, y nunakunawan conträtota ruranäpaqmi qamta churashqëki” (Isa. 42:6). Satanasqa tukïtam rurarqan Jesusta wanutsinampaq, tsënöpa, Teytan yachatsikoq kachamonqanta mana cumplinampaq, pero Jehoväqa tsë llapampitam tsurinta tsaparqan wanunampaq tiempon chanqanyaq (Mat. 2:13; Juan 7:30). Tsëpitam kawaritsimorqan y ‘conträtota’ rurarqan markanwan. Tsë “conträtowanmi” rikätsikorqan, Jesuslla nunakunata aktsipaq cuenta yanapar seguinanta, y Diospa Palabranta mana musyar paqaschöno këkaqkunata aktsipar alli näniman horqamunanta (lei Isaías 49:8, 9). *

13. Diospa Palabranta mana musyar paqaschö këkaqkunata, ¿imanötaq Jesus kë patsachö këkar salvarqan, y kananqa imanötaq rurëkan?

 ¹³ Kë profecïachö qellqarëkanqannömi Diospa akrashqa Sirveqninqa kichanan karqan “wiskukunapa nawinta”, “carcelcho këkaqkunata” horqanan karqan, y “paqaschö tëkaqkunata” yanapanan karqan (Isa. 42:7). Tsëtaqa Jesus rurarqan pushaq religiösokunapa yachatsikïninkuna mana alli kanqanta rikätsikurmi (Mat. 15:3; Luc. 8:1). Tsënöpam judiokunata yanaparqan mana alli religionpita yarquyänampaq y kë nunakunaqa qateqninkunam tikrayarqan (Juan 8:31, 32). Jesusqa manam judiokunallatatsu mana alli religionpita horqashqa, sinöqa mana judío kaqtapis atska nunatam yanapashqa. Llapan qateqninkunatam kënö mandarqan: “Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq”. Hinamampis kënömi nerqan: “Noqaqa qamcunawanmi quecashaq imecamayaqpis, asta que patsapa usheninyaq” (Mat. 28:19, 20). Awmi, Jesusqa ciëlopitam dirigikämun kë patsachö Diospita yachatsikuyanqanta.

Jehoväqa sirveqninta llapampa más precisaq mandakoqnin kanampaqmi churashqa

14, 15. ¿Imanötaq Jehová Sirveqninta “mas presisaq mandacoqnin cananpaq churarerqan”?

¹⁴ Hina huk puchachönam sirveqnimpaq Jehová kënö nin: “¡Rikäyë! Sirveqnïqa imëkatapis yachëllapam ruranqa. Y hatuntsashqam kanqa, y llapankunapis reqiyanqam” (Isa. 52:13). Awmi, teytan Jehovälla mandakoq kanqanta rikätsikonqampita, y imëka pruëbakunata pasëkarpis alli tsarakonqampita, llapampa más precisaq mandakoqnin kanampaq Jehová churarerqan Jesusta.

¹⁵ Apóstol Pedrum Jesuspaq kënö nerqan: “Pemi sieluman eucur, Dioswan juntu quecan, anjelcunapa y llapan [...] poderyoqcunapapis mas mandacoqnin” (1 Ped. 3:22). Tsënöllam apóstol Pablupis qellqarqan: “Umillaquicorqan Diosta cäsucurmi asta waniyaqpis chärerqan, y manam penqacorqantsu [...] [‘qerucho wanïta’, NM]. Tserecurmi Dios sieluchopis y que patsachopis llapanpa mas presisaq mandacoqnin cananpaq churarerqan. Tsemi pe mandacoq captin qonquricuyanqa sielucho llapan caqcuna, que patsacho llapan caqcuna y patsa rurincho  llapan caqcunapis. Y llapan nunacunam niyanqa: ‘Jesucristoqa [...] [“Señornintsikmi”, NM]’ nishpa. Tsemi Dios Yayatapis allapa alabayanqa” (Fili. 2:8-11).

16. a) ¿Ima kanampaqtaq Jehová churarerqan Jesusta 1914 watachö? b) ¿Imatataq rurashqa tsë watapita patsë?

¹⁶ 1914 watachömi, Jehová wambranta “llapanpa mas presisaq mandacoqnin cananpaq churarerqan”, tsëtaqa rurarqan ciëlopita patsë gobernamunampaq churarmi (Sal. 2:6; Dan. 7:13, 14). Tsë watapita patsëmi gobernëkämun chikeqninkunapa rurinchö (Sal. 110:2). Gobernar qallamurqa puntata Satanastawan demonionkunatam kë Patsaman qarparamorqan (Apo. 12:7-12). Tsëpitanam Mayor kaq Ciro karnin “jatun Babilonia marca[pita]” librarqan ciëloman ëwaqpaq kaq nunakunata (Apo. 18:2; Isa. 44:28). Kananqa llapan patsachö Diospita yachatsikuyanqantam dirigikan, tsëwanmi ëllushqa o qorishqa ciëlopa ëwaqpaq kaqkunata, y kë patsachö quedaqpaq kaqkunatapis (Apo. 12:17; Juan 10:16; Luc. 12:32).

17. ¿Imatataq yachatsimarqontsik Diospa Sirveqnimpita yachakonqantsik?

¹⁷ Isaías librochö qellqarëkaq profecïakunata yachakonqantsikmi yanapamarqontsik Reynintsik y Salvamaqnintsik Jesucristuta más kuyanapaq y qatinapaq. Kë Patsachö këkar llapanchö wiyakoq kanqanmi rikätsikun ciëlochö këkaptin Teytan yachatsenqanta. Y “nacionkunapaq huk aktsi” cuenta kanqantaqa manam yachatsikonqanllachötsu rikätsikushqa, kananyaqpis rikätsikïkanmi qateqninkuna yachatsikuyaptin dirigirnin. Qateqnin kaq tëmachömi yachakushun masllata Jesuspita, noqantsikrëkur hipanqanta y salvamänapaq wanonqanta. Awmi, Jesuspa wanïninta yarpänapaq tiempoqa chëkämunnam, tsëmi alläpa precisan yachakonqantsikkunaman alleq yarparänantsik (Heb. 12:2, 3).

[Päginapa ura kuchunchö willakïkuna]

Yachakonqantsikta yarpärishun

• ¿Isaías librochö Sirveqnï nishpa qayanqanqa pitaq, y imanötaq musyantsik?

• ¿Imakunatataq Jehová yachatserqan Sirveqninta?

• ¿Imanirtaq Jesusqa nacionkunapaq aktsi cuenta?

• ¿Llapampa más precisaq mandakoqnin këman imanötaq Jesus charqan?

[Yachakunapaq kaqpa tapukïninkuna]

[21 kaq päginachö dibüju]

Felipeqa musyarqanmi Isaiaschö “Sirveqnï” nishpa qellqarëkaqqa, Jesuspaq kanqanta

[23 kaq päginachö dibüju]

Diospa akrashqa Sirveqnin Jesusqa, llakiparqanmi waktsakunata y qeshyaqkunatapis

[24 kaq päginachö dibüju]

Jehoväqa llapampa más precisaq mandakoqnin kanampaqmi churarerqan Jesusta