Hukniki hukniki yanapanakuyë
Hukniki hukniki yanapanakuyë
“Jucniquipis jucniquipis juc castanolla shumaq cuyanacuyë, y respetanacuyë, y waquincunatapis mas presisaqpaq churayë.” (ROM. 12:10.)
1. ¿Ima nintaq Biblia Diosnintsikpaq?
DIOSPA PALABRANQA kutin kutinmi willamantsik, mana alli tiempokunapa pasarnin llakishqa këkashqa Diosnintsik yanaparkamänantsikta. Rikärishun Palabran kënö nenqanta: “Llapan ishkikaqkunatam Jehová tsarëkan, y shärikätsinmi tukï hipakïkunawan nitipakashqatapis”. “Llakishqa shonquyoqkunatapis kachakëkätsinmi, herïdankunatapis hampikanmi” (Sal. 145:14; 147:3). Kikin Teyta Diosnintsikmi nimantsik: “Noqa Jehová Diosnikim, derecha kaq makikipita tsararëkaq, y noqam kënö nishoqniki kä: ‘Ama mantsakïtsu, kikïmi yanapashqëki’” (Isa. 41:13).
2. ¿Imanötaq sirveqninkunata Jehová yanapan?
2 Pero Jehová Diosnintsik ciëlochö këkarnenqa, ¿imanöraq makintsikpita tsararkur yanapamashwan mana allikunapa pasanqantsik hora? Tsëtaqa ruran tukïnöpa yanapamarnintsikmi. Musyarinapaq, santu espïritunwanmi yanapamantsik tukïläya problëmakunata vencinapaq, tsëwanmi musyantsik ruranqantsikkunaqa kikintsikllapita mana kanqanta (2 Cor. 4:7; Juan 14:16, 17). Hina yanapamantsikmi Palabran Bibliawampis (Heb. 4:12). ¿Tsëkunallawanku Jehová yanapamantsik? Manam, huknöpapis yanapamantsikmi. Tsëkunata musyanapaqqa rikärishun apóstol Pedru puntakaq carta qellqanqanchö.
Diosnintsikqa tukïnöpam yanapamantsik
3. a) ¿Sufrimientokuna imanö kanantataq apóstol Pedru willakun? b) ¿Cristianokunata pï yanapanampaqtaq apóstol Pedru nerqan, y imataq pasanqa tsë sufrimientokunawan?
3 Qellqanqan cartachömi Pedru willan ciëlota ëwaqpaq kaqkuna kushikuyänampaq, atska bendicionkunata chaskiyänan kaptin. Tsënö kushishqa kayänan kaptimpis Pedruqa alleqmi willan, “cay vïdachö juc tiempulla imayca pruebacunawan tucuylä[ya] sufrimientucunata” pasayänanta (1 Ped. 1:1-6, Señor Jesucristopa alli willacuynin-conchucos norte). Rikanqantsiknöpis Pedruqa manam huk sufrimientollapaqtsu parlan, sinöqa ‘tucuyläya’ sufrimientokuna ninmi. ¿Tsë llapantaqa cristianokuna aguantayanmantsuraq? Awmi, Pedruqa tsënö nirirpis tukïläya sufrimientokunapa pasëkäyaptin Jehová yanapanantam willan. Tsëmi ushanan kaq cartanchö kënö nin: “Que patsacho llapan caqcunapa ushaquenin chëcamunnam” (1 Ped. 4:7).
4. ¿Imanötaq kushitsimantsik 1 Pedru 4:10 nenqan?
4 Apóstol Pedrum kënö nin: “Cada ünuta shongoyquicunaman Dios Yaya yachayniquicuna garayäshungayquinölla, runamajiquicunata cuyarnin imaycallachöpis yanapanqui. Tsaynö cuyanacurnin cawarga, tucuyläyapam cumpliycäyanqui Dios Yaya alläpa cuyacug cayninwan llapan yachayniquicuna garayäshungayquita” (1 Ped. 4:10, Señor Jesucristopa alli willacuynin-conchucos norte). Rikanqantsiknömi këchöpis yapë tukïläyapam nimantsik. Apóstol Pedruqa këchö rikätsimantsik, imanömi sufrimientokunapis tukïläya, tsënöllam Diosnintsikpis tukïlayapa yanapamënintsikta puëden. ¿Imanirtaq kushitsimantsik këqa? Tukïläya pruebakunapa pasëkarnimpis, Diosnintsikpa yanapakïnintaqa chaskikäshunllam llapanta aguantanapaq. Pero ¿tantearqonkiku imanö Jehová yanapamanqantsikta? Pëqa yanapamantsik, cristiano mayintsikkunawanmi.
Huknintsik huknintsik yanapanakushun
5. a) ¿Rasumpëpa cristiano karnenqa imatataq rurashwan? b) ¿Mëqan tapukïkunapa respuestantaq yanapamäshun këta ruranapaq?
5 Apóstol Pedrum kënö qellqarqan llapan cristianokunapaq: “Llapanpita mas alleqa jucniqui jucniquicuna ancupänacur cuyanacuyänequim”. Tsëpitanam hina kënö nirerqan: “Diosnintsic qoyäshonqequi yacheniquicunamanno nuna mayiquicunata yanapayë” (1 Ped. 4:8, 10). Awmi, llapantsikmi huknintsik huknintsik yanapanakunantsik. Jehová Diosnintsikmi shumaq qarënintsik qaramashqantsik, wakinkunata yanapanapaq. ¿Imataq tsë qarëqa? ¿Imanötaq tsëwan yanapashwan wawqintsikkunata y panintsikkunata?
6. ¿Ima qarëkunatataq Diosnintsikpita chaskishqantsik?
6 Diospa Palabranmi kënö nimantsik: “Llapan imecapis qomanqantsic caqcunaqa allapa allim. Tseqa llapan actsicuna camaq Dios Yayapitam shamun” (Sant. 1:17). Awmi, Jehová Diosqa kuyakïninta rikätsimantsik llapan qomanqantsikwanmi. Tsë llapampita más precisaq qarëninqa santu espïritunmi. Tsëmi yanapamantsik kuyanakunapaq, alli shonquyoq kanapaq, humilde kanapaq, wakinkunatapis Dios munanqannö rikänapaq y yanapanapaq. Hina tsë espïritunwanmi Palabrampita yachakuntsik alli kaqta ruranapaq, tsëpis huk qarëmi (1 Cor. 2:10-16; Gál. 5:22, 23). Y Teyta Diosllam qaramashqantsik, musyanqantsikta y imëka rurëllatapis yachanqantsikta, pëta llapan rurënintsikwan alabar kushitsinantsikpaq. Hinamampis tsë llapan qaramashqantsikwanmi wawqintsikkunata y panintsikkunata yanapanatam Diosnintsik shuyaran.
¿Imatataq rurashwan Diosnintsik qaramanqantsikwan?
7. a) “Diosnintsic qoyäshonqequi yacheniquicunamanno” nerqa, ¿imapaqtaq parlëkan? b) ¿Ima tapukïkunataraq rurakushwan y imanir?
7 Qarëkuna chaskenqantsikpaq parlarninmi Pedru kënö nerqan: “Diosnintsic qoyäshonqequi yacheniquicunamanno nuna mayiquicunata yanapayë”. Kë textochö “yacheniquicunamanno” nerqa, rikatsimantsik cada cristiano tukïläya rurëkunata yachanqantsiktam. Tsëmi apóstol Pedruqa animamantsik, Diosnintsik qaramanqantsikkunawan yachanqantsikmanno nuna mayintsikkunata yanapanapaq. Tsëmi Pedruqa nin: “Tseno carqa, alli mayural cuentam rurecayanqui Diosnintsic munashqanno”, kë textochöqa manam pueder-raq rurayankï nikämantsiktsu, sinöqa mandëkämantsikmi. Tsëmi tapukushwan: “¿Teyta Dios qaramanqanwan cristiano mayïkunata yanapëkaku?” (1 Timoteu 5:9, 10 nishqanwan igualaratsi). “¿O tsë qarëwan kikïllapaqku imëkatapis ashikä?” nishpa (1 Cor. 4:7). Jehová Diosnintsikqa, alläpam kushikun qaramanqantsikwan cristiano mayintsikkunata yanapashqaqa (Pro. 19:17; lei Hebreus 13:16).
8, 9. a) ¿Imakunata rurartaq wakinqa yanapayan cristiano mayinkunata? b) ¿Imanötaq yanapanakuyan congregacionnikichöqa?
8 Punta cristianokuna tukïnöpa yanapanakuyanqantam Bibliaqa willamantsik (lei Romanos 15:25, 26 y 2 Timoteu 1:16-18). Tsënöllam kanan tiempopis rasumpëpa cristianokunaqa, Diosta wiyakurnin wawqinkunata y paninkunata tukïnöpa yanapayan. ¿Imanötaq tsëta rurayan? Mä rikärishun.
9 Atska wawqikunam congregacionchö yachatsikayämunampaq horas y horas revistakunata, librokunata alleq leiyan. Tsënö shumaq yachatsikïninkunawanmi yanapamantsik Teyta Diospa markanchö imëpis këkänapaq (1 Tim. 5:17). Wakin wawqikuna y panikunaqa reqishqa kayan kuyakoq y llakipäkoq kayanqampitam (Rom. 12:15). Wakinnam alläpa llakishqa këkaqkunata imëpis watukayan y pëkunawan paqtam Diosnintsikman mañakuyan (1 Tes. 5:14). Wakinkunanam qellqayan cartakunata tukï yarparëkunawan llakishqa këkaqkunata animayänampaq. Y wakinkunanam qeshyaqkunata yanapayan yachakunantsik wayiman aparnin. Tiempontsikchöqa, shukukïkuna y patsa kuyïkunam wayikunata ushakätsin, tsëkuna pasakuptinmi atska waranqa wawqikuna y panikuna yanapakuyan, cristiano mayinkunapa wayinkunata altsarnin, o huk mushoqta shäritsirnin. Kënö kuyakïpa yanapanakuyanqanqa rikätsimantsik Dios Yaya yachënintsik qaramashqantsiktam (lei 1 Pedru 4:11).
Mëqan rurëtaq más precisaq kaq
10. a) ¿Ima rurëkuna alläpa precisaq kanqantataq rikarqan Pablu? b) ¿Imanötaq Pablu ruranqanta qatishwan?
10 Cristiano mayintsikta yanapanapaq shumaq qarëta chaskishqa kashqapis, Diosnintsikqa mandamarqontsik nuna mayintsikta Palabrampita yachatsinapaqmi. Kë ishkan rurë alläpa preciso kanqantam apóstol Pablu alleq musyarqan. Efeso markachö këkaq cristianokunatam kënö nerqan: “¿Manacu musyayanqui Teyta Diospa alli queninta willayänaqpaq pe acramar cachamashqanta!”. Awmi, kikin Teyta Diosmi akrarqan yachatsikunampaq (Efe. 3:2). Hinamampis Pabluqa nerqanmi: “Teyta Diosmi marcäcayämashqa alli willaquita willacuyänäpaq. Tsëtam noqacunaqa willaquicayä” (1 Tes. 2:4). Noqantsikpis Pablunö kaqmi musyantsik, llapan nunakunata yachatsinapaq Diosnintsik mandamanqantsikta. Pëqa mana haqishpam nunakunata yachatsir pureq, tsënöllam noqantsikpis ruranantsik (Hech. 20:20, 21; 1 Cor. 11:1). Alleqmi musyantsik yachatsikonqantsikqa nunakunata salvananta, hina yarparantsikmi cristianomayintsiktapis yanapëqa alläpa preciso kanqanta, Pablu ruranqannö (lei Romanos 1:11, 12; 10:13-15).
11. ¿Imanötaq rikashwan nuna mayintsik yachatsita y cristiano mayintsik yanapëta?
11 Kë ishkan rurëkunapita, ¿mëqantaq más precisan? Más tantearinapaq, ¿huk pishquqa mëqan älasnintaraq más wanan volanampaq? Manam hukkaqllatatsu, sinöqa ishkantam wanan. Tsënöllam noqantsikpis ishkantaraq ruranantsik alli cristiano kanantsikpaq. Tsëmi hukninkaq rurëllatatsu pricisaqtano rikantsik, sinöqa yanapanakunantsik y yachatsikoqpis ewanantsikmi, apostolkuna rurayanqannö. ¿Imanirtaq kë ishkan rurëraq precisan?
12. ¿Imakunata rurarnin cristiano mayintsikta yanapanapaqtaq Diosnintsik mandamarqontsik?
12 Bibliapita yachatsikoq ëwarnenqa, tukïnöpam shonqunkunaman Diosnintsikpa Palabranta chätsita tïrantsik. Tsënöpam yanapantsik Jesucristupa qateqnin tikrayänampaq. Pero shumaq parlapäkoq kënintsikwampis yanapantsikmi wawqintsikkuna y panintsikkuna más sinchi kayänampaq. Shumaq parlapanqantsik y imëkachöpis yanaparnin ruranqantsikmi, rikätsikun Teyta Diospa qarëninwan yanapëkanqantsikta (Pro. 3:27; 12:25). Tsënömi yanapëkantsik Jesuspa qateqnin këta mana haqiyänampaq. Yachatsikoq ëwarnin y wawqintsikkunata panintsikkunata yanaparninmi, alläpa kushikuntsik Jehová munanqannö rurëkanqantsikpita (Gál. 6:10).
“Jucniquipis jucniquipis [...] shumaq cuyanacuyë”
13. ¿Huknintsik huknintsik mana yanapanakushqaqa imataq pasamashwan?
13 Pablum cristiano mayinkunata kënö nerqan: “Jucniquipis jucniquipis juc castanolla cayanqequirecur, shumaq cuyanacuyë, y respetanacuyë, y waquincunatapis mas presisaqpaq churayë” (Rom. 12:10). Cristiano mayintsikta kuyanqantsikmi yanapamantsik, Teyta Dios mandamanqantsikno shonquntsikpita patsë imëpis yanapakïkänapaq. Alleqmi musyantsik mana yanapanakurnenqa rakikashqa y mana alli kawakunata, tsëtam Satanasqa munan (Col. 3:14). Mana kuyanakur y mana yanapanakurnenqa manam kushishqatsu yarqushun yachatsikoq. Huk kaq rurëllatapis haqirirqa mana allimanmi ishkishun, imëka huk älan pakishqa pishqunö, tsëmi Satanasqa hukkaqllatapis haqiratsimënintsikta munan.
14. ¿Imëkatapis rurarnin yanapakonqantsikqa, noqantsiktapis yanapamantsiktsuraq? Willakaramï
14 Cristiano mayintsikta yanapanqantsikqa manam pëkunallapaqtsu, sinöqa kikintsiktapis yanapamantsikmi (Pro. 11:25). Tsënö kanqantam rikätsimantsik Estados Unidos markapita Ryan y warmin Roni rurayanqan. Katrina nishqan shukukï viento pasariptinmi, cristiano mayinkunapa atska wayinkuna ushakashqa kanqanta musyarir, kuyakoq karnin trabäjonkunata y wayinkunata haqirïkur ëwayarqan yanapakoq. Y puritsina wayitam (casa remolque) makwallata rantiyarqan, tsëta altsapärirnam ewayarqan 1.400 kilömetrosta Luisiana markayaq. Tsë markachömi wata más quedakuyarqan cristiano mayinkunata tukïnöpa yanaparnin. Ryan, 29 watayoq wawqim kënö willamantsik: “Tsëchö yanapakonqäqa Diosta más kuyanäpaqmi yanapamarqan, y rikarqämi markanta imanöpis cuidanqanta”. Hina ninmi: “Yachaq wawqikunawan trabajanqämi yachatsimarqan, tukïnöpa cristiano mayïkunata cuidanäpaq. Hina yachatsimarqanmi, joven këkarqa tukïnöpa yanapakïta puëdenqantsikta”. Y warmin Roni, 25 watayoqmi kënö nimantsik: “Wakinkunata yanapanqäpitaqa alläpam kushikü. Manam imëpis tsënöqa kushikushqatsu kä. Kë yanapakonqachö yachakonqäqa imëyaqpis yanapamanqam”.
15. ¿Imanirtaq huknintsik huknintsik yanapanakonqantsikqa alläpa preciso?
15 Rikanqantsiknöpis, Jehoväpa alli willakïninta willakonqantsik y cristiano mayintsikta yanapanqantsikqa llapantsiktam yanapamantsik. Yanapanqantsikkaqkunaqa Jehoväta serviyänampaqmi shonqunkunachö más animashqa tikrariyan, y yanapaqkaqnam alläpa kushikurintsik rurëkanqantsikpita (Hech. 20:35). Huknintsik huknintsikpis alli yanapakoq kashqaqa, congregacionnintsikpis más yachanëpaqmi kanqa. Hinamampis huknintsik huknintsik kuyanakonqantsikmi, rikätsikonqa rasumpëpa cristiano kanqantsikta. Jesusmi kënö nerqan: “Sitsun qamcuna jucniqui jucniqui cuyanacuyanqui, llapan nunacunam musyariyanqa noqapa disipulücuna cayanqequita” (Juan 13:35). Awmi, alläpa kushishqam këkantsik Teyta Diosnintsik cristiano mayintsikwan tukïnöpa yanapamanqantsikta. Tsëmi Teyta Diosnintsik qaramanqantsikwan huknintsik huknintsik yanapanakunantsik. ¿Tsëtatsuraq imëpis rurëkanki? (Lei Hebreus 6:10.)
¿Yarpankiku?
• ¿Imanötaq Jehová yanapan sirveqninkunata?
• ¿Imakunata ruranapaqtaq mandamarqontsik?
• ¿Imanötaq cristiano mayintsikkunata yanapashwan?
• ¿Imataq yanapamäshun tukïläya rurëta yachanqantsikwan cristiano mayintsikta yanapanapaq?
[Yachakunapaq kaqpa tapukïninkuna]
[17 kaq päginachö dibüjukuna]
¿Imëka rurë yachanqantsikwan, hukkunata yanapëkantsikku o kikintsikllapaqku imëkatapis rurakïkantsik?
[19 kaq päginachö dibüjukuna]
Diosnintsikqa mandamarqontsik nuna mayintsikta yachatseq ëwanapaq y cristiano mayintsikta yanapanapaqmi
[20 kaq päginachö dibüju]
¡Kushikïpaqmi shonqunkunapita patsë cristiano mayinkunata yanapayanqanqa!