Jesus ruranqanta qatishwanmi

¿KUSHISHQA kawakunëkipaq más alli nuna këta munankiku? Tsënö kawakunapaqmi apóstol Pedru kënö nimantsik: “Kristupis jiparqan noqantsikkunapaqmi, yachatsimarnintsik, yupinkunata qatiyaneykipaq” (1 Pedru 2:21, QKW). Jesuspita, y llapan ruranqampita yachakushwanmi. Pëpita yachakonqantsiknölla kawarqa, más alli nunam kashun y kushishqam kawakushun. Kanan yachakurishun alläpa alli nuna kanqampita, y yarpachakurishun pë ruranqankunata imanö qatinapaq kaqtapis.

Wakin rurëkunapaqpis tiempota tareqmi. “Diospita Shamushqa Nunapaqa manam ni iman cantsu jamarinanllapaqpis”, tsënö Jesus nirpis, manam waktsa pürutsu ni kushikïta chikeqtsu karqan y manam shuyaqtsu wakinkunapis tsënö kayänanta (Mateo 8:20). Hatun mikïkunamampis ëwanqantam Bibliaqa willakun (Lucas 5:29). Casakï mikïcho, yakuta vïnoman tikratsenqanmi rikätsikun wakin nunakunawampis ëllukanqanta o qorikanqanta (Juan 2:1-11). Tsënö karpis, imata puntaman churanqantaqa rikätsikorqan kënö nirmi: “Noqapa miquinïqa cachamaqnïpa munenincunata ruranämi y llapan mandamashqancunata cumplinämi” (Juan 4:34).

□ Itsa kënö tapukushwan: “¿Wananqäkunata ashirpis, noqaqa Jehoväpa kaqtaku puntaman churëkä?”.

Yachanëllapaqmi karqan. Kuyakoq y yachanëllapaq kanqantam Jesuspaq Bibliaqa parlan. Nunakuna sasa o aja kawëninkunata willayaptin, y imatapis musyëta munar tapukuyaptimpis manam piñakorqantsu. Huk kutim, chunka ishkë watana qeshyëkaq warmi, kachakëta munëwan atska nunakunapa chöpimpa yëkurir, mana mäkutsïllapa Jesusta yatëkorqan. Tsë ruranqampita wakinkunaqa alläpachi piñakuyanman karqan, pero Jesusqa manam piñakorqantsu. Tsëpa rantenqa kuyëllapam kënö nerqan: “Ija, noqaman marcäcurmi cachacärerqonqui” (Marcos 5:25-34). Pishi wambrakunapis alläpam yachanäyaq, manam mantsapäyaqtsu (Marcos 10:13-16). Qateqninkuna imata pensayanqampitapis mana mantsakushpa parlapäyanqanmi rikätsimantsik pëkunapis mana mantsapäyanqanta (Marcos 6:30-32).

□ Llapantsikmi kënö tapukunantsik: “Y noqataqa, ¿pï mëpis yachanämanku?”.

Ankupäkoq o llakipäkoqmi karqan. Alläpa alli kënintaqa más rikätsikorqan, yanapananrëkur nunakunapa yarpachakïninta kikimpatanö rikarmi. Läzarupaq Mariata waqakïkaqta rikarninmi, “Jesus allapa llaquir shonquncho nanatsicur” ‘waqarerqan’. Juan willakonqannöpis, musyëmi tsë familiata Jesus alläpa kuyanqan, y manam penqakorqantsu wakinkuna waqëkaqta rikäyänantapis. Manam tsëllapistsu, ¡alläpa kuyakoq kanqantam rikätsikorqan amïgonta kawariratsimurnin! (Juan 11:33-44.)

Huk kutinam, lepra qeshyayoq karnin karuchö täraq nuna kënö rogakorqan: “Tëte, munarnenqa, ¡cachaquecatsillämë!”. ¿Ima  nerqanraq Jesus? ‘Nunata yatëcurmi’ kuyëllapa kënö nerqan: “Munämi, cachacänequita” (Mateo 8:2, 3). Bibliachö qellqarëkanqan cumplikänanllapaqtsu manam Jesusqa nunakunata kachakätserqan. Pëqa hipakïninkunachö o ñakëninkunachö yanapëta munarmi tsëkunata rurarqan. Y kë reqishqa yachatsikïnin nenqannömi imëkatapis rurarqan: “Imanomi munayanqui qamcunapaq nuna mayiquicuna allita rurayänanta, tsenolla qamcunapis pecunapaq rurayë” (Lucas 6:31).

□ Noqantsikqa, ¿llakipäkoq o ankupäkoq kanqantsiktaku imëka ruranqantsikchöpis rikätsikuntsik?

Alläpa alli nunam karqan. Hutsannaq karpis, manam pënölla nunakuna kayänantatsu asherqan, ni imëkachöpis yachaqtukoqtsu karqan; hina manaraq pensarqa manam ni imatapis rasllaqa ruraqtsu. Huk kutim, fariseupa wayinchö Jesus këkaptin, ‘tse marcacho lluta pulicoq warmi’ fëninta y kuyakïninta rikätsita munarqan Jesusta, chakinta weqinwan awirnin o paqarnin. Wayiyoq fariseu tsë warmipaq mana allita pensëkaptimpis, Jesusqa manam micharqantsu. Warmipa shonquntam rikarqan, tsëmi hutsampita mana piñapashpa Jesus kënö nerqan: “Noqaman marcäcurninmi, condenasionpeq salbacorqonqui. Canan euquï shumaq cawacunequipaq”. Itsa shumaq parlapanqampitachi tsë warmi mana alli rurëninkunata haqerqan (Lucas 7:37-50).

□ Noqantsiktaqa, ¿nunakunapaq alli parlanqantsikpitaku o rimanqantsikpitaku reqimantsik?

Llapantapis kuyaqmi y respetaqmi. Discïpulon Juantaqa alläpash Jesus kuyëkunaq ninmi Bibliaqa, itsa imachöpis pënö kaptin o kastan kaptinchi tsënöqa kuyarqan. * Tsëpis, manam pëtatsu imëkachöpis puntaman churarqan, llapampaqmi igual karqan (Juan 13:23). Juan wawqin Santiaguwan Diospa Gobiernonchö punta puntachö këta munar mañakuyaptinmi, Jesus kënö nerqan: “Derechu laducho y itsoq laducho pipis täcamunanpaqqa manam noqatsu dispunï. Tsetaqa Papänïllam dispunishqana” (Marcos 10:35-40).

Hina pï mëtapis respetakoqmi. Manam wakin nunakunanötsu nuna mayintapis chikipaq o mana allipa rikaq. Wakin nunakuna warmikunata mana kaqpaqnö churëkäyaptimpis, pëqa respëtowanmi rikaq. Mesias kanqantapis, puntataqa huk warmitam willarqan. Tsëpis parlapanqan warmiqa  Samariapitam karqan, musyanqantsiknöpis judïokunaqa Samaria marka nunakunata alläpam chikiyaq, manam napayaqllapistsu o rimëkakuyaqllapistsu (Juan 4:7-26). Manam tsëllapistsu, wanonqampita kawariramurpis, warmikunatam puntataqa yuriporqan (Mateo 28:9, 10).

□ Noqantsikpis, ¿Jesusnöku imëka rikoq nunakunata, y warmita o ollquta, o huk idioma parlaqta, o huk nación nunakunata respëtowan y igualpa rikantsik?

Alli wambra y alli wawqim karqan. Itsa jövenllaraq këkaptinchi, maman Mariapa nunan Josëqa wanukïkorqan. Tsëqa, pënachi mamänimpaq y qepa kaq wawqi paninkunapaqrëkur carpinteriachö uryarqan o arurqan (Marcos 6:3). Wanunampaqna këkarpis mamampaqqa yarpachakïkarqanmi, tsëmi qateqnin Juanta rogarqan mamäninta rikänampaq (Juan 19:26, 27).

□ ¿Jesusnöku noqantsikpis familiantsikkunata shumaq rikantsik?

Alli amïgom karqan. Jesusqa alläpa alli amïgom karqan. ¿Imanirtaq tsëtaqa nintsik? Pëqa manam amïgonkunata haqerqantsu hutsasapa karnin kutin kutin pantëkäyaptimpis. Hinamampis, Jesus munanqannöllatsu manam pëkunaqa imatapis rurayarqan. Tsënö kayaptimpis, mana allita mana pensashpam alli rurëninkunata rikarqan, tsënöpam alli amigo kanqanta rikätsikorqan (Marcos 9:33-35; Lucas 22:24-27). Manam imatapis mälastsu creitserqan. Tsëpa rantenqa, pensayanqanta parlakuriyänampaqmi pëkunata tapureq (Mateo 16:13-15).

Imanö kayaptimpis, Jesusqa rasumpam pëkunata kuyarqan (Juan 13:1). ¡Imaläyam pëkunata kuyëkorqan! Tsëmi kënö nerqan: ‘Que cuyaquimi cuyacoq quëqa, manam pipis wanurinmantsu amiguncunapaqrecur’ (Juan 15:13). ¿Pipis amïgonpaqrëkur kawëninta qoykunmantsuraq?

□ Yarpachakushun: “Y noqaqa, ¿ima nëtaq huk amigo mana allita rurëkamaptin o piñëkatsimaptin?”.

Mana mantsakoq jinchi nunam karqan. Jesusqa manam dibüjochö pintayanqannö wanunarëkaq ni kallpannaq nunatsu karqan, tsëpa rantenqa jinchi kallpayoq nunam karqan. Ishkë kutim qatukïninkunata hitakacharkur templochö rantikoqkunata qarqaramorqan (Marcos 11:15-17; Juan 2:14-17). Tsariyänampaq atskaq nunakuna “Nazaretpita Jesustam” ashiyä niyaptimpis, mana mantsakushpam “Noqam cä” nerqan. Tsëpitanam, qateqninkunata tsapänanrëkur kënö nerqan: “Noqallata imanecayämëpis, disipulucunataqa jaqiriyë eucuyänanpaq” (Juan 18:4-9). Maqëkäyaptimpis nuna nunam valoryoq shëkarqan, tsëchi Poncio Pilätupis espantashqa kënö nerqan: “¡Kaq keymi key nuna!” (Juan 19:4, 5, QKW).

□ Y noqantsik, ¿alli kaqchöqa mana mantsakushpaku tsarakuntsik?

Këchö yachakonqantsikkuna, y wakin rurëninkunam rikätsimantsik Jesusta qatir alli kawakunapaq kaqta. Pëpa rurëninkunata rurarqa, alli nunam kashun y kushishqam kawakushun. Tsëmi, apóstol Pedru cristianokunata willaparqan o yätserqan Jesuspa rurëninkunata qatiyänampaq. Tsëpenqa, ¿Jesus ruranqankunata qatita tïrëkantsikku?

Manam kawëninta rikar yachakunallapaqtsu shamorqan

Jesusqa manam kawëninta qatinallapaqtsu yachatsimarqontsik. Kikinmi kënö nerqan: “Noqam näni cuenta cä. Rason caqta willacoqmi cä. Jina caweniquicunapis noqam cä. Y noqaman marcäcurllam pipis Dios Yayaman chäyanqa” (Juan 14:6). Jesus rasumpa kaqta Diospita yachatsimarnintsikmi, Jehoväman witinapaq nänita kichamushqa. Pë shamonqampitam llapan nunakuna mana wanushpa kawakïta tariyanqa (Juan 3:16).

 ¿Imanötaq tsë kawëtaqa qomantsik? Patsaman imanir shamonqampaq parlarmi Jesus kënö nerqan: “Tsenollam Diospita Shamushqa Nunapis que patsaman shamushqa nunacunata sirwinanpaq, y manam nunacuna sirwiyänanpaqtsu, sinoqa yawarninwan nunacunata rescatananpaqmi” (Mateo 20:28). Noqantsikpaqrëkur wanurmi, cimientota patsätseq cuenta kawëninta churamorqan, nunakuna mana wanushpa kawakïta tariyänampaq. Y tsënö këkaptenqa, ¿imatataq ruranantsik? Kikin Jesusmi kënö nerqan: “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa” (Juan 17:3).

Jesuspita yachakur, imanö kawanqanta qatir, y noqantsikpaq wanunqanman fëta churarmi mana wanushpa kawakïta tarishun. Tsëmi llapëkikunata niriyaq Bibliapita alli yachakuyänëkipaq, y nenqannö kawayänëkipaq, tsënöllam Jesuspis rurarqan. *

Jesuspa alli kawakïninmi yachatsimantsik imanö kawanapaqpis. Hinamampis wanïninwanmi horqamashqantsik hutsapita y wanïpitapis (Romanos 6:23). Mana pë kaptenqa, llakishqallachi kawakushwan karqan y manachi allitaqa shuyarashwannatsu karqan. Tsëmi, llakikïkuna, yarpachakïkuna, ni imapis ama michämäshuntsu llapampitapis más alli nuna Jesusta qatinapaq kaqta.

[Päginapa ura kuchunchö willakïkuna]

[6 kaq päginachö dibüjukuna y recuadru]

▪ Llapantapis kuyaqmi y respetaqmi

▪ Wanonqanyaqmi alli amigo karqan

▪ Mana mantsakoq jinchi nunam karqan

¿Alleqku qatikantsik Jesuspa rurëninkunata?

[4 kaq päginachö dibüjukuna]

Wakin rurëkunapaqpis tiempota tareqmi . . .

yachanëllapaqmi karqan . . .

ankupäkoq o llakipäkoqmi karqan