“Noqata qatimë”
“Noqata qatimë”
“Pipis qatirämaqnï queta munarnenqa, quiquinpa muneninta jaqiricur, [...] noqata qatimätsun.” (LUC. 9:23.)
1, 2. a) ¿Imapaqtaq Jesus inkitarqan nunakunata? b) ¿Qamqa Jesusta qatikankinaku?
KË PATSACHÖ Jesus yachatsikonqampa ushanan tiempo chëkaptinnam, huk kuti yachatsikïkarqan Jordan mayupa wak tsimpan Perea markachö. Tsëchömi huk joven tapurerqan imatataq rurashaq mana wanushpa kawakïta tarinäpaq nishpa. Moisés qellqanqan leykunata llapanta cumplïkanqanta mäkurirmi, qateqnin kananta munarnin Jesus kënö nerqan: “Canan ewar llapan imequicunatapis rantiquicur, tse qelleta wactsacunata qoyquï. Tseno ruraptiquim, sielucho mana ushacäcoq fortunequi canqa. Tseno rurarïcur, noqata qatimë” (Mar. 10:21). Yarpakurkï, ¡kikin kamakoq Diospa Tsurintam qatinan karqan!
2 Kë joven qateqnin këta mana munaptimpis, wakin nunakunaqa qatiyarqanmi. Más puntatanam Felipeta “acu, eucushun” nishqa karqan (Juan 1:43). Felipeqa tsë höram qatir qallëkorqan, tsëpitanam apostolnin këman chärerqan. Mateotapis Jesusqa tsënöllam nerqan, pëpis qatirmi qallëkorqan (Mat. 9:9; 10:2-4). Jesusqa manam huk ishkë nunakunallatatsu qatiyämë nerqan, sinöqa llapan nunakunatam kënö nerqan: “Pipis qatirämaqnï queta munarnenqa, quiquinpa muneninta jaqiricur, [...] noqata qatimätsun” (Luc. 9:23 ). Awmi, llapan alli shonquyoq nunakunam Jesusta qatita puëdeyan. ¿Qamqa qatita munankiku? Wakintsikqa “noqata qatimë” nishpa Jesus nenqanta wiyakurmi qatikantsikna y wakintapis qateqnin kayänampaqmi yanapantsik.
3. ¿Ima tapukïkunaman yarpëtaq yanapamäshun Jesusta imëpis qatikänapaq?
3 Wakinqa shumaqmi Diospa Palabranta yachakur qallëkuyan, pero llakinëpaqqa, Jesusta más qatiyänampa rantinmi qelanärir haqiriyashqa (Heb. 2:1). Y noqantsikqa, ¿imanötaq rikätsikushwan Jesusta imëpis qatikanqantsikta? Tsëpaqqa yanapamäshun kënö tapukonqantsikmi: ¿Imanöpataq Jesusta qatir qallarqä? Rasumpëpaqa, ¿ima ninantaq Jesusta qatiqa? Kë ishkan tapukïpa respuestanta musyanqantsikmi yanapamäshun Jesusta imëpis qatikänapaq y wakintapis yachatsinapaq Jesuspa qateqnin këman chäyänampaq.
¿Imanirtaq Jesusta qatintsik?
4, 5. ¿Imanirtaq Jesusllam shumaq gobernamënintsikta puëden nintsik?
4 Profeta Jeremiasmi kënö nerqan: “Alleqmi musyä Teyta Jehová, nunapa nänin kikimpa mana kanqanta. Ni kikinllapita mana purenqanta” (Jer. 10:23). Jeremías nenqan rasumpa kanqantaqa, rikätsimantsik llapan pasakonqankunam. Awmi, watakuna pasanqanmannömi rikantsik hutsasapa nuna, nuna mayinta alli gobernëta mana puëdenqanta. Pero Jesusllam nunakunata shumaq gobernëtaqa puëden, tsëmi qateqnin tikrantsik. ¿Imanirtaq Jesusllam shumaq gobernamënintsikta puëden nintsik? Rikärishun.
5 Tsënöqa nintsik kikin Kamakoq Diosnintsik gobernamänapaq akrashqa kaptinmi. ¡Kamakoq Diosnintsiknöqa manam pipis akrëta yachanmantsu! Hina tsënöqa nintsik Jesusqa alläpa yachaq y kuyakoq kaptinmi (lei Isaías 11:2, 3). Y Pë ruranqantaqa noqantsikpis qatita puëdentsikmi (1 Ped. 2:21). Hinamampis Jesusqa qateqninkunata yarparan y kuyanmi, tsëmi wanorqampis (lei Juan 10:14, 15). Huk alli mitsikoq üshankunata kuyaqnömi Jesusqa kuyamantsik, y kushishqa kawakunapaqmi yanapamantsik, mana wanushpa kawëmampis chatsimënintsiktam munan (Juan 10:10, 11; Apo. 7:16, 17). Këkunata y maskunatapis musyanqantsikmi yanapamarqantsik qateqnin tikranapaq. Pero, ¿ima ninantaq Jesuspa qateqnin këqa?
6. ¿Imanötaq Jesuspa qateqninkunaqa kawayanman?
6 Jesuspa qateqnin këqa manam cristianom kä ninanllatsu. Tiempontsikchöqa casi ishkë millón nunakunam cristianom kä niyan, pero kawëninkunawan y rurëninkunawanqa, Diospa Palabran nenqanta mana wiyakuyanqantam rikätsikuyan, rasumpëpaqa ‘mana alli ruraqcunam’ kayan (lei Mateo 7:21-23). Pero rasumpëpa cristianokunaqa, llapan kawënintsikchömi Jesus yachatsimanqantsiknö kawëta munantsik, y tsëllatam willantsik Jesuspa qateqnin kë munaqkunatapis. ¿Imanö nunataq Jesus karqan? Rikärishun wakinllatapis, mä imanöshi yanaparamäshun Pënö kanapaq.
Qatishun Jesus yachakonqannölla ruranqanta
7, 8. a) ¿Imanötaq Jesus yachaq këninta rikätsikorqan? b) ¿Yachaq këninwan imanö kawakïtataq Jesus akrarqan, y imanötaq tsëta noqantsikpis rurashwan?
7 Jesus alli kanqampitaqa atskatam yachakuntsik, pero kananqa rikärishun chuskullata: yachakonqannölla imatapis ruranqanta, humilde kanqanta, kuyakoq kanqanta, y shonqupita patsë Teytanta servinanllapaq kawanqanta. Puntata rikärishun yachakonqannölla imatapis ruranqanta. Apóstol Pablum kënö qellqarqan: “Jesucristuman creyicurllam, paqwepa yachacurintsic Diosnintsic munashqanno cawacunantsicpaq caqtaqa” (Col. 2:3). ¿Pitaq yachatserqan Jesustaqa? Kikinmi nerqan: alleqmi musyayanki “quiquïllapita imatapis mana rurashqäta, sinoqa Dios Yaya yachatsimashqanllata parlashqäta” (Juan 8:28). Kikin Jehovämi yachatserqan imata ruranampaqpis, tsëmi yachaqtukorqantsu, ni yachaq këninta alabakur purerqantsu.
8 Musyarinapaq, kikin Jesusmi sencillulla kawakïta akrarqan, Teytan munanqanta ruranampaq. Tsëmi llapan tiempo Teytampa munëninllata rurarqan y manam, mana precisaq rurëkunamanqa yarparäkorqantsu tiemponta perditsir. Tsëmi Pëpa qateqnin këkarqa, noqantsikpis sencillulla kawakïta akranantsik, mana precisaq rurëkunawan nitipakashqa mana kanapaq, mana precisaq rurëkunaqa tiempontsikta y kallpantsiktapis ushanmi (Mat. 6:22). Wakin cristianokunaqa sencillulla kawarmi qallayashqa, yachatsikoq más yarquyänampaq, wakinnäqa precursor këmanmi chäyashqa. Tsëta rurashqa kaptikeqa kushikuyämi, allitam rurarqonki, Diospa kaqta puntaman churëqa atska kushikïtam apamun (Mat. 6:33).
Jesusnö humilde kashun
9, 10. ¿Imanötaq Jesus rikätsikorqan humilde këninta?
9 Kanan rikärishun Jesus humilde kanqanta. Nunaqa hutsasapa karninmi ima cargotapis chaskirirnenqa, wakimpitapis más yachaq y musyaqtukun. Pero Jesusqa manam tsënötsu. Jehová, llapan munëninta cumplitsinampaq akrashqa këkaptimpis, Jesusqa manam ni ichikllapis yachaq, ni puëdeq kanqampita alabakorqantsu. Tsëmi Bibliaqa pënö humilde kanapaq yachatsimantsik. Apóstol Pablum kënö qellqarqan: “Jesucristupa yarpeninnolla qamcunapapis yarpeniquicuna catsun. Pëqa [...] [‘Diosnö’ NM] quecarninpis, manam [...] [‘Diosnö’] queninta cuentapaqpis churarqantsu, sinoqa poderyoq [...] [‘Diosnö’] quecarninpis, juc nunano yuricurninmi, imeca juc sirwipacoqno que patsaman shamorqan” (Fili. 2:5-7). ¿Jesus imanö kanqantataq kë texto yachatsimantsik?
10 Alleq yarpashqaqa, Jesusqa Teytampa lädonchömi kawarqan, ¡imanö shumaq kawakïraq tsë karqan! Tsënö këkarpis, humilde karmi tsë shumaq kawakïninta haqirerqan. Teytan Jehovämi huk judía shipashpa pachanman churëkamorqan, tsëchömi isqon killa winarqan, yuririrninmam Josëpawan Mariapa yanapëninta wanarqan, wakin wambrakunanö winanampaq. Winarqan kë humilde carpinteropa wayinchömi, tsëchömi purita yachakorqan, hina tsëchömi wambra këninta y joven këninta pasarqan. Jesusqa hutsannaqmi karqan, tsënö këkarnimpis hutsasapa teytankunatam wiyakorqan (Luc. 2:51, 52). ¡Tsënömi pasëpa humilde kanqanta rikätsikorqan!
11. ¿Imakunata rurartaq Jesus humilde kanqanta qatishwan?
11 Mana precisaqnö rurëkunata rurarninmi Jesusnö humilde kanqantsikta rikätsikuntsik. Këman yarpärishun, wayin wayin yachatsikoq ëwëtaqa, wakin nunakunaqa penqakïpaq rurëtanömi rikäyan, ¿imanir? Nunakuna mana chaskikur despreciamashqa y qayapämashqa. Tsënö niyaptimpis yachatsikonqantsikqa nunakunatam salvan. Tsëmi mana penqakushpa yanapanantsik nunakunata Jesuspa qateqnin kayänampaq (lei 2 Timoteu 4:1-5). Tsënöllam hina humilde kënintsikta rikätsikushun Jehoväpa testïgonkuna yachatsikuyänan wayita pitsapakurnin, basürata hitarnin, y bäñokunata limpiarnin. Y alleqmi musyantsik Jehová Diosnintsiktaqa limpio wayichö adorana kanqanta, y tsënöpa wakin nunakunapis rasumpëpa Diosta adoranqantsikta musyayänanta. Tsëkunata rurarqa humilde y Jesuspa qateqnin kanqantsiktam rikätsikuntsik.
Jesusnö shonqupita patsë Diosta servishun
12, 13. a) ¿Ima rurëtaq Jesuspaq más precisaq karqan y imataq yanaparqan tsëta ruranampaq? b) ¿Noqantsiktapis imataq yanapamäshun Diospita yachatsikonqantsikta puntaman churanapaq?
12 Kanan huk masta rikärishun, Jesusqa shonqupita patsëmi Teytampita yachatsikorqan. Kë patsachö karqa padraston Josëwanmi carpinteriachö trabajaq, tsëpitanam qeshyaqkunata kachakätserqan, wanushqakunata kawaritserqan. Pero tsënö kaptimpis, Pëpaq más precisaq kaq rurëqa karqan nunakuna yachatsimi (Mat. 4:23). Noqantsikpis Pënöllam yachatsikunantsik. ¿Imataq yanapamäshun Jesusnö kushishqa ruranapaq? ¿Imataq Jesusta yanaparqan? Mä rikärishun.
13 Nunakunata yachatsinampaqqa yanaparqan Diosta kuyanqanmi, pero manam tsëllatsu karqan, nunakunataqa yachatseq Teytampa yachatsikïnin rasumpa kanqanta kuyarmi. Pëpaqqa rasumpa kaq yachatsikïqa alläpa valoryoqmi karqan, tsëmi wakinkunatapis yachatsita munarqan. Noqantsikpis Jesusnöllam nuna mayintsikta rasumpa kaqta yachatsita munantsik, tsëmi, Pë nenqannö noqantsikpis maestro kantsik. Yarpärishun Bibliapita rasumpa kaqta yachakonqantsikman: Yachakorqontsikmi Jehoväta imanö Satanás tumpanqanta y tsë imanö altsakänantapis. Hina musyantsikmi, wanushqakuna imanö këkäyanqanta y kawariyämunantapis, y Diospa gobiernon atska bendicionkunata apamunantapis. Tsëllaraq o unëna yachakushqa kashqapis tsë yachatsikïkunaqa kananyaqpis tsëllam (lei Mateo 13:52). Kë yachatsikïta kushishqa imëpis puritsishqaqa, nunakunam rikäyanqa rasumpakaq yachatsikïkunata kuyanqantsikta.
14. ¿Imanötaq Jesus yachatsikonqannölla noqantsikpis yachatsikushwan?
14 Rikärishun Jesus imanö yachatsikonqantapis. Imatapis parlarqa: “Queno[mi] escribirëcan” nerqanmi (Mat. 4:4; 21:13). Awmi, Escrituras Hebreas librokunapitaqa atska kutim yachatsikorqan. Tsënöllam noqantsikpis yachatsikurnenqa Biblia nenqanta rikätsintsik. Tsëmi nunakuna musyayanqa yachatsenqantsik kikintsikpita mana kanqanta, sinöqa Diospita kanqanta. Bibliata leiponqantsik hora wiyamashqaqa alläpam kushikuntsik. Y Jesuspa qateqnin këta munayaptinnäqa masran kushikuntsik.
Jesuspa qateqninkunaqa nuna mayinkunata kuyayanmi
15. ¿Jesus imanö kanqantaq más reqishqa y imapaqtaq tsë yanapamantsik?
15 Kananqa kuyakoq kanqantaraq rikärishun. Nunakunata alläpa kuyanqanqa pasëpam kushitsimantsik. Tsëmi apóstol Pablu kënö qellqarqan: “Teyta Jesucristu cuyamanqantsicrecurmi peta shonqucurcur munashqanno cawantsic” (2 Cor. 5:14). Awmi, Jesusqa llapan nunakunatam kuyan y qateqninkaqtanäqa masran kuyamantsik, tsëmi kushitsimantsik y shonquntsikpitam ruranqanta qatita munantsik.
16, 17. ¿Imanötaq Jesus rikätsikorqan nunakunata kuyanqanta?
16 ¿Imanötaq Jesus rikätsikorqan nunakunata kuyanqanta? Nunakunata kuyanqantaqa rikätsikorqan pëkunapaqrëkur wanurninmi (Juan 15:13). Y yachatsikoq ëwarnimpis tukïnöpam rikätsikorqan kuyakoq kanqanta. Tantearinapaq, nunakuna nanatsikoqta rikarninmi, kikin hipëkaq cuenta llakipäreq. Lazaru wanushqa kaptinmi Maria y wakin nunakunapis waqayarqan, tsëta rikarmi llakiparqan. Kawaritsinanta musyëkarnimpis alläpa llakirninmi waqarerqan (Juan 11:32-35).
17 Yachatsikur qallanqan witsëmi, huk leprayoq nuna Jesusta kënö nerqan: “Munarnenqa, cachaquecatsillämë”. ¿Imataq nerqan Jesus? Bibliam nimantsik “ancuparnin” o llakiparmi “nunata yatecur queno nerqan: —Munämi, cachacänequita —Tse öram lepra qeshyapita cachacärir, sanu püru ticrarerqan”. Jesusqa musyarqanmi, Moisés qellqanqan Leykuna nenqannö leprayoq nunakunaqa, wakimpita rakikashqa kayänanta, rakcha qeshyayoq karnin. Tsë nunataqa karullapitapis hampirita puëdenmanmi karqan. Tsënö kaptimpis, manam hamperqanllatsu sinöqa yatëkurmi kachakäratserqan, kë nunaqa imaraq kushikïkorqan unëpitana pipis mana yatashqa kaptin. ¡Kë rurëmi rasumpa kuyakïqa! (Mar. 1:40-42.)
18. ¿Cristiano mayintsikkunapa llakikïninta maslla musyarinapaqqa imatataq rurashwan?
18 Jesuspa qateqnin kaqqa cristiano mayintsiktam kuyanantsik, y tsëtaqa rurantsik mana allikunapa pasayanqanta rikar llakiparninmi (1 Ped. 3:8). Itsa musyashuntsu alleqllaqa llakikïninkunata, qeshyëninkunata, nanatsikïninkunta, pëkunano mana pasashqa karnin. Pero Jesusqa musyarqanmi imanö llakikuyanqanta y llakiparqanmi imëpis mana qeshyapäkushqa këkarnimpis. ¿Imanötaq noqantsikpis tsënölla llakipäkushwan? Qeshyëkaq cristiano mayintsikkuna parlapämashqa shumaq wiyarmi. Kënömi tapukushwan: “¿Imanöraq noqa käman, pënö qeshyëkarnenqa?”. Llakipäkoq karnenqa musyashunmi imanö këkäyanqantapis, tsënöpam “llapan nunacunatapis shumaq” pacienciawan parlapärishun (1 Tes. 5:14). Tsënö llakipäkoq karmi Jesuspa qateqnin kanqantsikta rikätsikushun.
19. ¿Imataq yanapamantsik Jesus ruranqanta qatinapaq?
19 ¡Alläpa kushikïpaqmi Jesus ruranqankunapita yachakïqa! Pëpita más yachakonqantsikmi yanapamäshun Pë ruranqanta qatinapaq y nuna mayintsiktapis yanapashunmi Jesuspa qateqnin kayänampaq. Awmi, ¡kanan y imëyaqpis qatikäshun Reynintsik Jesucristuta!
Mä willakaramï
• ¿Imatapis Jesus yachëwan ruranqampita imatataq yachakushwan?
• ¿Imanötaq humilde kanqantsikta rikätsikushwan?
• ¿Imataq yanapamäshun shonqupita patsë Diosnintsikpita yachatsikunapaq?
• ¿Jesus nunakunata kuyanqampita imatataq yachakuntsik?
[Yachakunapaq kaqpa tapukïninkuna]
[9 kaq päginachö dibüju y recuadru]
CRISTUTA QATINAPAQ HUK SHUMAQ LIBRO
Kima hunaq kaq asambleachömi 2007 watachö, 192 päginayoq “Ven, sé mi seguidor” nishqan libro yarqamorqan. Kë libroqa rurakämorqan llapan cristianokuna, Jesus imanö kanqanta y imata ruranqantapis más reqiyänampaqmi. Qallananchö ishkë kaq capïtulokunaqa rikätsikun Jesus imanöpis kanqantam, tsëpitanam humilde kanqanta, imatapis mana mantsashpa ruranqanta, yachakonqanmannö imëpis kawanqanta, wiyakoq kanqanta, y wanonqanyaqpis Teytampa munëninllata ruranampaq yarparanqanta.
Tsëpitanam rikätsimantsik imanö yachatsikonqampita, y kuyakoq kanqampita. Kë libroqa yanapamantsik Jesus ruranqanta musyarirnin, noqantsikpis tsënölla ruranapaqmi.
Awmi, kë libroqa yanapamäshun llapantsiktam Jesusta rasumpëpa qatikanqantsikta o mana qatikanqantsiktapis alleq musyanapaq. Hina yanapamäshunmi Diosnintsik munanqannö Jesus ruranqanta qatinapaq. Y “wiñe cawe munaq” o mana wanushpa kawë munaq nunakunatapis yanapanqam noqantsikwan paqta Jesusta qatiyänampaq (Hech. 13:48).
[8 kaq päginachö dibüjukuna]
Patsaman shamïkur wambranö yurirnin, ¿imanö kanqantataq Jesus rikätsikorqan?
[10 kaq päginachö dibüjukuna]
¿Imataq yanapamäshun shonqupita patsë Diosnintsikpita yachatsikunapaq?