Jehová Diospa Palabranqa kawanmi

Apocalipsis libropita akrashqa yachatsikïkuna​—(ishkë kaq)

¿IMARAQ pasanqa Jehoväta sirveqkunata y mana sirveqkunata? ¿Satanastawan demonionkunata imaraq pasanqa? ¿Diosta wiyakoq alli nunakunaqa ima bendicionkunataraq chaskiyanqa Waranqa (1.000) Wata Jesus Gobernaptin? Kë precisaq tapukïkunata y wakin kaq tapukïkunatam contestamäshun Apocalipsis 13:1–22:21 textokuna. * Kë capïtulokunachömi chunka hoqta (16) visionkunapita, ushanan kaq isqon (9) visionkunata tarintsik, kë visionkunataqa apóstol Juan chaskerqan ishkë kaq siglopaq wallka tiempollana pishikaptinmi.

Juanmi kënö qellqan: “Cushicuyë que escribishqächo imapis pasacunanpaq caqta leyeqcuna. Jina cushicuyë leyeqcunata wiyar cäsucoqcuna” (Apo. 1:3; 22:7). Apocalipsis librota leir y yachakonqantsiknölla kawarqa, kushishqam Diosta servishun, hina pëman y Tsurin Jesucristuman markäkïnintsik o yärakïnintsikpis masmi chachaqyanqa, y shamoq tiempopaq änimanqantsikmampis paqwëmi markäkushun (Heb. 4:12). *

QANCHIS TAZONKUNACHÖ KËKAQ DIOSPA PIÑAKÏNINTA HICHARKUYAN

(Apo. 13:1–16:21)

Apocalipsis 11:18 textochömi kënö nin: ‘Jinantin nasioncho nunacunam waputucur cäsuyashushqanquitsu, peru chäramushqanam piñaquiniqui tiempu. [...] Y que patsata lluta ruraqcunatam ushacätsinqui’. ¿Imarëkurtaq Dios piñakurkun? Puwaq (8) kaq visionchö parlanqannöpis, Diosqa piñakun, ‘juk bestya qanchis peqayoq y chunka waqrayoq’ ruranqankunapitam (Apo. 13:1, QKW).

Juan rikanqan isqon (9) kaq visionchömi, “Achkas sheykarqan Syon jirkachow, i peywan pachak chusku chunka waranqa (144,000)” y “keykunam reskatashqa kayan nunakunapita” (Apo. 14:1, 4, QKW). Tsëpitanam hoqta willakïkunata hoqta angelkuna musyatsikuyan. Chunka (10) kaq visionchönam ‘qanchis anjelcunata qanchis castiguwan’ këkaqta Juan rikan. Rikanqantsiknöpis, Jehovämi angelkunata mandan ‘qanchis copacho (tazonchö) quecaq piñaquininta’ Satanaspa makinchö këkaqkunaman hicharpuyänampaq. Tazonkunachö winaraqqa, willakïninkuna y Diospa juicionta musyatsikïkunam kayan (Apo. 15:1; 16:1). Kë ishkë visionkunam yanapamantsik qanchis kaq trompëtata toquë, y kima kaq “nanatsiki” Diospa juicionkuna imanö kanqantapis más musyanapaq (Apo. 11:14, 15, QKW).

Tapukïkunapa respuestan:

13:8. ¿Imataq ‘Jesucristupa wiñe cawaqui librun’? Tsëqa, Jesuswan ciëlochö gobernaqkunapa shutinkuna huk librochö qellqarëkaq cuenta yarpëninchö këkanqanmi. Hina Patsallachöraq këkaq ungidokunapa shutinkunapis tsëchöqa këkanmi.

13:11-13, QKW. ¿Imataq ishkë waqrashqa bestia dragonnö parlanqan y ciëlopita ninata urätsimonqan? Ishkë waqrashqa bestiaqa, potencia mundial angloamericana nishqanmi, y dragonnö parlanqannam, mantsakätsikïpa, tukïnöpa munëninta rurayänampaq y gobernanqanta nunakuna chaskiyänampaq obliganqan. ¿Imanötaq ciëlopita ninata urätsimun? Siglo XX nishqan ishkë hatun guërrakunachö imëka mana allikunata ushakätserqö y comunismotam vencerqö nir alli profëtatukur willakonqanmi.

 16:17. ¿Imataq tsë qanchis kaq tazonpita laqchipuyanqan ‘bientu’? Tsë ‘bientuqa’ Satanaspa pensëninmi, “tsey espiritum [o mana allillata pensëmi] [...] mana wiyakoqkunachow” këkan. Llapan Jehoväta mana kuyaqkunam kë vientota shoqukïkäyan (Efe. 2:2, QKW).

Yachakunapaq:

13:1-4, 18, QKW. Nunakunapa gobiernonkunam “lamarpita” “bestya” yarqamoqqa. Lamarqa, wakpa këpa yakuno kuyukïkaq mana alli nunakunam kayan (Isa. 17:12, 13; Dan. 7:2-8, 17). Kë bestiataqa Satanasmi rurashqa, tsëmi pëpa kallpanta chaskin, y 666 nümeroyoqmi, y tsëqa paqwë hutsasapa ninanmi. Kë bestia pï kanqantapis musyarmi, wakin nunakunanötsu Diostanö rikantsik, ni adorantsik (Juan 12:31; 15:19).

13:16, 17. ‘Ranti o rantiqui’ sasaraq kaptimpis manam wakinkuna niyanqanman ni rurayanqanman ishkishwantsu ni bestia munanqanmannö kawashwantsu. Makintsikchö o urkuntsikchö tsë bestia señalamänata haqirnenqa, pë munanqannöchi kawëkashwan o pensëkashwan.

14:6, 7. Ángel willakonqanmi rikätsimantsik Diospa Gobiernompita yachatsikï alläpa precisanqanta. Mana alli rurëta mantsayänampaq y Jehoväpa shutinta allichö horqayänampaqmi tsëraq yachakïkaqkunata yachatsinantsik.

14:14-20, QKW. ‘Patsachow murukiykuna poquna’ kaptin ëllupakuyanqanqa, salvakuyänampaq kaq nunakunata ëllupakur ushayanqanmi, tsëpitanam “patsapa wayïninkunata” ángel hitarkonqa “Dyospa piñakiynin jatun posuman”. Tsëchömi paqwë ushakäyanqa. Uvas yuraqa, Satanaspa makinchö këkaq polïticakunam kayan y üvaspa ‘sartannam’, mana alli rurëninkuna. Uvas sartanö mana alli rurëninkuna mana alliman apamänata ama haqishuntsu.

16:13-16. “Melanepaq mana alli” parlëkunaqa supëkunapa willakïninkunam. Qanchis tazonchö Diospa piñakïninta, gobiernokunaman hichëkuyaptin mana wiyakuyänantam supëkunaqa munayan, hina munayanqanta rurar Jehoväpa contran sharkuyänantam munayan (Mat. 24:42, 44).

16:21. Jehoväpa piñakïnin qallanampaqqa, itsa Satanaspa makinchö këkaqkuna ushakäyänampaq kaqta masraq cärankunachö nishun, tsëpaqchi rumi runtu heqamoqnöraqmi kanqa nin Bibliaqa. Tsënö karpis mana alli nunakunaqa Diospa contran parlëkäyanqallam.

LLAPANTA VENCEQ REYQA GOBERNËKANNAM

(Apo. 17:1–22:21)

Alläpa melanëpaq Hatun Babiloniaqa Satanaspam. Chunka huk kaq visionchöqa, ‘jatun ramera’ o hukwan hukwan purikoq warmim yarqamun, pëqa ‘puka bestya jananchowmi teykan’. Tsë bestiapa ‘chunka waqranllam’ paqwë pëta ushakätsenqa (Apo. 17:1, 3, 5, 16, QKW). Chunka ishkë (12) kaq visionchönam tsë purikoq warmillapaq ‘tselaya jatun marca’ nin, paqwë ushakänampaqmi willakun y Diospa markantanam “tse marcapita yarqucuriyë” hinan höra nin. Tsëläya hatun marka ushakäriptinmi atska nunakuna waqayan, y ciëlochönam alläpa kushikuyan ‘Achcas casacuptin’ (Apo. 18:4, 9, 10, 15-19; 19:7). Chunka kima (13) kaq visionchönam, “yulaq cawallun montashqa” nuna nacionkunawan pelean y  Satanaspa mundonchö llapan mana allikunatam ushakätsin (Apo. 19:11-16).

¿Imaraq pasanqa ‘tse unepita engañacoq Diablu y Satanas culebrata’? ¿Imëraq “rupaquicaq qochaman jitarconqa”? Këkunatam yachakushun chunka chusku (14) kaq visionchö (Apo. 20:2, 10). Ushanan ishkë kaq visionkunanam käyitsimantsik o mäkutsimantsik Waranqa Watachö kawë imanö kanampaqpis. Ushanan kaq visionchönam Juan rikan hatun näni chöpimpa kawatsikoq mayu yarqëkämoqta, y “yacunaqcunaqa shayämutsun” neqta wiyan (Apo. 1:1; 22:1, 2, 17).

Tapukïkunapa respuestan:

17:16; 18:9, 10. ¿Imanirtaq Hatun Babiloniata Patsachö “reycuna” llakiyan kikinkuna ushakëkätserqa? Kikinkunarëkurllam pëkunaqa llakiyan. Llapan mana alli kaq religionkunata ushakäratsir-raqmi, imëkachöpis yanapaqnin kanqanta mäkuriyanqa. Këkunachö yanapashqa kaptin: mana alli rurëninkunata allitanö rikätsikushqa, jövenkunata guërrakunaman apayänampaq yanapashqa, nunakunata makinchö katsiyänampaq y contran mana sharkuyänampaq tukïnöpa willapashqa.

19:12. ¿Ima ninantaq kikin Jesuslla shutinta reqinqan? Tsë mana reqina shutiqa, Señorpa hunaqninchö llapan hanampa gobernaq kanqan y llapan ruranqankunatsunchi Isaías 9:6 textochö nenqannöpis. Tsë shutinta mana pipis reqinqanqa, rikätsimantsik alläpa hatun cargota chaskenqanta y imata ruranampaq kaqtapis mana pï käyinqanta o mäkunqantam. Tsënö karpis Jesusqa pëwan gobernayänampaq kaqkunaman qellqanmi tsë ‘mushoq shutinta’, tsë cargonchö pëkunapis yanapakuyänampaq kaptin (Apo. 3:12).

19:14. ¿Pikunataq Armagedonchö caballonkuna montashqa Jesuswan yarquyan? Diospa guërranchö peleayänampaq Jesusta yanaqaqkunaqa, angelkuna y ciëlochöna këkaq ungïdokunam kayan (Mat. 25:31, 32; Apo. 2:26, 27).

20:11-15. ¿Pikunapa shutinkunataq qellqaran ‘wiñe caweyoqcunapa jutincuna apuntaränan librucho’? Winë kawëta chaskiyänampaq kaqkunapa shutinkunam: ciëloman ëwaqkunapa, Patsachö kawayänampaq alli shuyni nunakunapa y unë witsanchö ‘allita rurar’ Diosta servishqa kawariyämunampaq këkaqkunapapis (Hech. 24:15; Apo. 2:10; 7:9). Diosta manaraq alli reqir mana allita rurashqakunatapis Diosnintsik sharkatsimunqam, ¿pëkunapa shutinkunatapis tsë libronman qellqanqatsuraq? ‘Wiñe caweyoqcunapa jutincuna apuntaränan librumanqa’ qellqanqa, Waranqa Watachö yachakunapaq “librucunacho” qellqarëkaqta cäsokuyaptinraqmi. Y kë llapankunapa shutinkuna qellqashqa karpis manam kakunllanatsu, borrakärinmanmi. Tsëmi ungidokunapa shuntinkunapis mana borrakänampaqna qellqakan fiel wanuyaptinraq (Apo. 3:5). Y Patsachö kawaqkunapaqa Waranqa Watapita ushanan kaq pruëbata pasariyaptinraqmi (Apo. 20:7, 8).

Yachakunapaq:

17:3, 5, 7, 16, QKW. ‘Warmipa, i apamoq [puka] bestyapa misteryunta’ musyanapaqmi “Diospita shamoq alli yacheqa” yanapamantsik (Sant. 3:17). Kë bestiaqa karqan Sociedad de Naciones nishqanmi y ushakärirnam yapë yarqamorqan Organización de las Naciones Unidas nir shutiyoqna. Unëpita mana pï musyanqan misteriota käyikarqa o mäkïkarqa, ¿manatsuraq kushi kushi Diospa Gobiernompita yachatsikushwan y Jehoväpa hatun piñakïnimpita willakushwan?

21:1-6. Diospa Gobiernon änikonqan cumplikänantaqa markäkuntsikmi o yärakuntsikmi. ¿Imanir? Cumplikärishqapaqnöna Bibliapis parlaptinmi. Apocalipsis librochömi, “¡Llapanpis cumplicärishqanam!” nin.

22:1, 17. ‘Wiñepa cawatsicoq cristalyäquicaq mayuqa’ hutsata y wanïta Jehová ushakätsinampaq ruranankunam. Kanan witsampis, pï më cäsokoq nunakunapaq kanmi kë yakuqa. ‘Cawatsicoq yacuta debaldilla upunapaqmi’ Diosqa qayamantsik. Kushishqa chaskikushun tsë yakuta y nuna mayintsikkunamampis apashun.

[Päginapa ura kuchunchö willakïkuna]

[31 kaq päginachö dibüju]

Gobiernonwanmi Dios alläpa shumaq bendicionkunata apamonqa llapan wiyakoqkunaman