Diospa munëninchö, ¿imanötaq Maria yanapakorqan?

ATSKA nunakunachö Jesus yachatsikïkaptinmi, illaqpita huk warmi kënö nerqan: “¡Allapa cushiquiyoqchi wachashoqniqui y chichishoqniqui mamequi!”. Qateqninkuna mamäninta adorayänanta munarqa, tsëllachönachi Jesus adorayänampaq ninman karqan. Tsëpa rantenqa kënömi nerqan: “Antis Diospa palabranta wiyar cäsucoqcunam, mas cushishqaqa cayan” (Lucas 11:27, 28).

Rasun kaqchöqa, kikimpis manam mamäninta adorarqantsu, ni qateqninkuna adorayänampaqpis manam nerqantsu. Tsëpenqa, ¿imanirtaq nunakuna Marïata adorayan? Jesuspa mamänimpaqqa më tsëchöpis tukïläyapam creiyan, tsëpaq Biblia ima nenqantapis rikärishun.

Alläpa estimashqa y llapan warmikunapitapis más bendecishqa

Diospa munëninchö imata ruranampaq kaqtapis ángel Gabriel Marïata willanampaqmi, kënö naparqan o rimëkakuran: “¡Cushiquï, Maria! Dios acrashqanmi canqui. Pemi qamwan quecan” (Lucas 1:28). Wakin Bibliachöqa kënömi nin: “¡Salbe, alläpa estimashqa! Señormi qanwan”. Huk kutinam Elisabetta watukaq Maria ëwaptin, rikärirlla Elisabet kënö nerqan: “¡Bendita qam warmikunachow, i bendïtu pacheykichow wamra!” (Lucas 1:42, QKW). ¿Tsënö niyanqampitaku noqantsikpis Marïata adorashwan?

Manam. Gabriel y Elisabet niyanqannölla catölicokuna Marïata rezapäyaptimpis, manam pëman mañakunapaqtsu Bibliaqa yachatsikun. Tsënö naparqa,  rikätsikïkäyarqan Mesiaspa mamänimpaq akrashqa kaptin respetayanqantam, manam pëman mañakunapaqtsu yachatsikïkäyarqan. Maria adorëtaqa manam Biblia yachatsikuntsu. Hinamampis Jesusqa qateqninkuna Teytanman mañakuyänampaqmi yachatserqan, kënö nirnin: “Syelukunachow keykaq Teytalläkuna, jutiki santifikashqa katsun” (Mateo 6:9, QKW).

Wakinkunawan gobernanampaq akrashqa

Maria kanan “ciëlopa Reinan” kanqantam më tsëchöpis yachatsikuyan. Tsënö niyaptimpis, Bibliaqa manam ni mëchöpis tsëta yachatsikuntsu. Imam sïqa, Diospa wakin sirveqninkunawan ciëlochö këkanqantam Biblia yachatsikun. ¿Imapaqraq tsëchö këkan?

Wakin qateqninkunawan ciëlochö gobernayänampaq kaqtam Jesus willakorqan (Lucas 22:28-30). “Saserdoticunano Diosnintsicta sirwiyänanpaq y patsacho nunacunata mandayänanpaq” kaptinmi, kikin Jesus yachatsin qateqninkunata (Apocalipsis 5:10). Kikin Bibliawanmi musyarintsik, wakin nunakunawan ciëlochö gobernanampaq Marïapis akrashqa kanqanta. ¿Imanötaq tsëtaqa musyantsik?

Yachakonqantsiknöpis Jesus wanurishqanchöqa, Maria, wambrankunawan y Jesuspa qateqninkunawanshi ‘juntacar, juc shonqulla imepis Diosman mañaquicäyaq’. Pachak ishkë chunka (120) nunakuna y ‘warmikunapis’ Diosman ëllukashqa mañakïkäyänaqshi (Hechos 1:12-15). ‘“Pentecostes” nishqan fiesta junaq Teyta Jesusman creyicoqcunapis jucllacho ellucashqa quecarmi’, santu espïrituta chaskirir tukïläya idiömakunata parlar qallëkuyarqan (Hechos 2:1-4).

Maria y wakin warmikunapis tsëchö santu espïrituta chaskeqkunawan këkäyanqanmi, rikätsimantsik Jesuspa Gobiernonchö yanapakunampaq pëpis akrashqa kanqanta. Kë llapanmi musyatsikun Maria Jesuswan ciëlochö këkanqanta (Romanos 8:14-17). Diospa munënin rurakänampaq, ¿imataraq Maria ruranqa wakin akrashqakunawan?

Atska bendicionkunata apamïchömi yanapakonqa

Apocalipsis librom yachatsikun 144.000 nunakuna ciëlochö kawariyämunampaq kaqta, pëkunam Jesuswan sacerdotekuna, juezkuna y gobernantekuna kayanqa (Apocalipsis 14:1, 4; 20:6). Sacerdote karmi, Jesus wanonqampita nunakuna bendicionkunata chaskiyänampaq, y Jehoväpa kaqchö, kawëninkunachö, y llapanchöpis, hutsannaq këman chäyänampaq yanapayanqa (Apocalipsis 21:1-4). ¡Imanömi tsë hunaq chämunanta munëkuyan Jehovällata sirveqkuna! *

Unë witsampis Marïaqa allim yanapakorqan Jehoväpa munënin rurakänampaq, y kanan witsampis tsënöllam yanapakïkan. Alli mama kanqampita, qollmi shonqu kanqampita, Jehovällapaq kanqampita, wiyakoq kanqampita, y sasa kawëchö paqwë alli tsarakonqampitapis llapantsik yachakushwanmi. Maria ruranqankunata qatirpis, hina pëpita Jesus yurishqa kaptin y Diospa munënin rurakänampaq yanapakushqa kaptinmi, alläpa respetanantsik.

Tsënö karpis Marïapitaqa këtam yachakuntsik, unë Dios sirveq nunakunanöpis pëqa Jehovällatam sirverqan y adorarqan. Pëqa ciëlochö Jesuswan gobernaqkunawanmi kënö cantayan: “¡Tronucho tëcaqllata [Jehová Diosta] y Achcasta [Jesucristuta] puedeq queninrecur allapa respetuwan imeyaqpis alabashun y adorashun!” (Apocalipsis 5:13; 19:10).

[Päginapa ura kuchunchö willakï]

[10 kaq päginachö ninqan]

Maria qollmi shonqu kanqampita, Diosman yärakunqampita y wiyakoq kanqampita yachakushun