¿Jesus yachatsikonqannöku Diosman mañakunki?
¿Jesus yachatsikonqannöku Diosman mañakunki?
“Jesus tseno yachatsicur ushariptinnam, llapan nunacuna allapa espantacur mantsacäcuyarqan tse yachatsiquininpita.” (MAT. 7:28.)
1, 2. ¿Imanirtaq nunakuna espantakuyarqan Jesus yachatsikonqanta wiyar?
LLAPANTSIKMI listo këkänantsik Jesuspa yachatsikïninta wiyakurnin tsënölla ruranapaq. Manam pï nunapis Jesusnöqa yachatsikushqatsu. Tsëchi nunakunaqa espantakushqa quedariyarqan hirkachö yachatsikïninta ushariptin (lei Mateo 7:28, 29).
2 Diospa wambranqa manam escrïbakunanötsu nunakunapa yachatsikïninkunata yachatsikorqan, sinöqa “puedeq queninwanmi” Teytan mandanqannölla yachatsikorqan (Juan 12:50). Tsëpenqa, masraq yachakurishun hirkapita Jesus yachatsikamonqanta, mä imanöshi yanapamäshun Diosnintsikman mañakunapaq.
‘Ama alli tucoq nunacunanoqa mañacushuntsu’
3. Willakarami Mateo 6:5 nishqan textochö Jesus nenqampita.
3 Diosman mañakorqa adorëkantsikmi, tsëmi mana haqishpa imëpis mañakïkänantsik. Tsëpaqqa yarpänantsikmi, hirkapita Jesus imanö mañakunapaqpis yachatsikonqanta. Kënömi nerqan: “Diosta mañacur, ama alli tucoq nunacunanoqa mañacuyanquitsu. Pecunaqa gustayan ellucayänan wayicunacho, y plasa isquinacunacho sharcur, nunacuna ricayänanpaq mañaquitam. Rasontam niyaq: Tsellanam pecunapa premiuncuna” (Mat. 6:5).
4-6. a) ¿Imanirtaq fariseokunataqa alläpa gustëkoq “ellucayänan wayicunacho, y plasa isquinacunacho sharcur” mañakï? b) ¿Imataq premionkuna karqan tsë allitukoq nunakunapa?
4 Jesuspa qateqninkunaqa manam fariseokunanötsu mañakuyänan karqan. Kë allitukoq nunakunaqa wakimpitapis más alli kayanqantam creiyaq y tsëtam rikätsikïta munayaq Diosman mañakuyanqan hora, rasumpëpaqa tsëtaqa rurayaq nunakuna rikäyänanllapaqmi (Mat. 23:13-32). Maslla musyarinapaq, pëkunataqa alläpam gustëkoq “ellucayänan wayicunacho, y plasa isquinacunacho sharcur” Diosman mañaki. ¿Imanirtaq tsëman ewëkur-raq mañakuyaq? Tsëtaqa rurayaq “nunacuna ricayänanpaq[mi]”. Diosnintsikta adoraq judiokunapa costumbrenkunaqa karqan, templochö ofrendata kayayänan hora gruponö juntakarkur Diosman mañakïmi, tsëtaqa rurayaq qoyapa o wärëpa las nueve y tardepanam las tres. Jerusalenchö täraqkaqqa templomanmi mañakoq ëwayaq, y estancianchö kaqkunanam juntakäyaq amänunlla “ellucayänan wayicunacho” mañakuyänampaq (igualaratsi Lucas 18:11, 13, nishqanwan).
5 Y tsë mañakuyänan hora chämuptin, templo lädonchö o ëllukäna wayi lädonchö mana këkarnenqa, mëchöpis këkäyanqanchömi mañakuyänan karqan. Pero kaqmi allitukoqkuna gälakur, nänikunaman, ‘plasa isquinacunanam’ shäkikur Diosman mañakoqkuna, tsëtaqa rurayaq tsëpa pasaq nunakuna rikäyänampaqmi. Hinamampis, ‘nunacuna alli cayanqanta pensayänanpaqnam, alli tucushpa unepa Diosman mañacuyaq’ (Luc. 20:47). Pero rasumpa cristianokunaqa manam tsënötsu kanantsik.
6 “Tsëllanam pecunapa premiuncuna” nerqanmi Jesusqa kë allitukoq nunakunapaq parlarnin. Pëkunaqa nunakuna rikarnin alabayänantam munayaq y tsëllanam premionkuna karqan, y Jehoväqa manam mañakïninkunata wiyaqnatsu. Pero Jesuspa qateqninkunapa mañakïninkunataqa Jehová Dios wiyaqmi, rikärishun Jesus nenqanta.
7. ¿Ima nitataq munëkarqan Jesus “wayiquicunaman yecurir puncuta wichqarcur mañacuyanqui” nerqa?
7 “Peru qamcunaqa Dios Yayaman mañacurnin, wayiquicunaman yecurir puncuta wichqarcur mañacuyanqui. Y pacallapa mañaconqequita wiyaq Dios Yayam premiquicuna qoyäshunqui” (Mat. 6:6). Wayikikunaman yëkïkur punkuta wichqarkur mañakuyanki nerqa, manam nunakuna rikëkayashuptikeqa mañakïta puëdeyankitsu nikarqantsu. Tsëwanqa nikarqan, nunakuna rikämanallapaq o alabamänallapaq mañakïqa mana alli kanqanta musyanapaqmi. Këtam imëpis yarpänantsik cristiano mayintsikkunawan junto këkashqa mañakï tocamashqa. Hina kënö nenqantapis wiyakunantsikmi.
8, 9. Mateo 6:7 textochö nenqannö, ¿mañakïnintsikchö imapitataq cuidado kanantsik?
8 “Jina Diosman mañacorqa, ama mañacuyanquitsu Diosta mana cäsucoq nunacunanoqa. Pecunaqa mañacurnin, juc parlayashqanllatam cutïcuryan ushepa ushar parlacuyan. Tsenoqa rurayan ‘Atsca cuti parlaptïqa, masllam Dios wiyamanqa’ nirmi” (Mat. 6:7). Këchöqa Jesus parlëkarqan, huk parlanqantsikllata kutin kutin parlëqa mana alli kanqantam. Këchöqa manam Jesusqa shonquntsikpita patsë parlekanqantsikpaqtsu nikarqan, shonquntsikpita patsë parlashqaqa tsë kaqllata kutin kutin nishqapis allillam, kikin Jesuspis tsënömi rurarqan Getsemaní nishqan jardinchö “puntata mañacushqannolla” Teytanman mañakur (Mar. 14:32-39).
9 Mana alliqa, ‘Diosta mana cäsucoq nunacunano’ kaqllata kutin kutin mañakïmi. Diosta mana adoraq nunakunaqa qellqarëkaqpita alli yachakurkurmi kaqllata kutin kutin mana ushëpa resayan. Tsënömi rurayaq unë tiempochö Baal nishqan diosta adoraq nunakuna “Patsa waranqampita hasta pullan hunaqyaq, kënö nir: ‘¡Oh Baal, wiyëkallayämë!’” (1 Rey. 18:26). Kanan tiempopis mëtsika nunakunam Diosman mañakuyan huk parlayanqanllata kutin kutin mana ushëpa, tsënö mañakuptëqa wiyamanqam nir. Pero Jesusqa rikätsikorqan huk parlayashqanllata kutïpekuryan ushëpa ushar parlakuyanqantaqa Jehová mana gustanqantam. Jesus nenqanta masta rikärishun.
10. ¿Imanö mañakïtaq allitsu?
10 “Ama pecunanoqa rurayanquitsu. Porqui manaraq mañacuyaptiquim, Dios Yayaqa musyanna imata wanayanqequitapis” (Mat. 6:8). Judío religiösokunapa pushaqninkunaqa Diosta mana adoraq nunakuna rurayanqantam qatiyaq, tsëmi mana ushëta mañakïninkunachö parlakuyaq. Rasumpëpam, Teyta Diosman mañakurnin alabanqantsikqa, rikätsikun Jehová Diosta adoranqantsikta (Fili. 4:6). Pero manam allitsu, kaqllata kutin kutin parlakïqa, Dios mana qonqëkunampaq neq cuenta. Yarpänantsikmi, llapan munanqantsikta puntallapitana Diosnintsik musyëkanqanta, tsëmi Jesuspis kënö nerqan: “Manaraq mañacuyaptiquim, Dios Yayaqa musyanna” nishpa.
11. ¿Imatataq yarpashwan atskaq wiyëkämashqa mañakurnenqa?
11 Jesusqa clärom willakorqan kaqllata kutin kutin mana ushëpa mañakïkunaqa Diosnintsikta mana gustanqanta. Hina yarpänantsikmi reunionkunachö mañakorqa, wiyamaqnintsikkuna, imanömi mañakïta yachëkun niyänanllapaqqa manam rurashwantsu. Hina manam alläpa tiempoqa demorakushwantsu mañakïnintsikchö, tsënö kaptenqa wakinkunam imënataq ushanqa nir shuyaräkuyanqa ushananllatana. Ni manam mañakïnintsikchöqa wiyamaqnintsikkunata consejar kakushwantsu, tsëqa Diosnintsikman mañakunapaq Jesus yachatsikonqampa contrannam tikrarinman.
Jesusmi Diosnintsikman mañakunapaq yachatsimarqontsik
12. ¿Imatataq mañakïkantsik “jutillequi allapa respetuwan alabashqa catsun” nerqa?
12 Mañakuyanqan hora imakunatapis mana rurayänampaq parlapärirninmi, Jesus qateqninkunata yachatserqan imanö mañakuyänampaqpis (lei Mateo 6:9-13). Manam padrenuestro nishqan oracionta alleq yachakïkurnin kutin kutin tsëllata mañakuyänampaqtsu Jesusqa yachatsikorqan. Këtaqa imanöpis mañakuna kanqanta musyanallapaqmi yachatsikorqan. Rikärishun, kë mañakïpa qallananqa rikätsimantsik mañakïnintsikchöqa Diosnintsikpa shutin puntachö kanantam, kënömi qallan: “Sielucho quecaq Dios Yayalläcuna, jutillequi allapa respetuwan alabashqa catsun” (Mat. 6:9). Jehovätaqa qayantsik “Dios Yayalläcuna” nishpa pëlla kamamaqnintsik, y ciëlochö kawakoq kaptinmi (Deu. 32:6; 2 Cró. 6:21; Hech. 17:24, 28). Hinamampis “Yayalläcuna” nerqa, rikätsikuntsik cristiano mayintsikkunapis noqantsiknölla Dioswan kuyanakuyanqantam. Y Edén huertachömi Jehoväpa shutimpaq mana allita parlayarqan, y tsënöllam kananyaqpis parlëkayan, tsëta limpioyätsinampaqmi “jutillequi allapa respetuwan alabashqa catsun” nirnenqa mañakïkantsik. Awmi, Jehová Diosqa kë Patsachö llapan mana allikunata ushakäratsirmi shutinta santoyätsenqa (Eze. 36:23).
13. a) ¿Imanötaq cumplikanqa “llapan nunacuna mandadiquicho catsun” nishpa mañakonqantsik? b) ¿Imataq pasanqan kë Patsachö Jehová munanqan rurakäriptin?
13 “Llapan nunacuna mandadiquicho catsun. ¡Sielucho caqcuna qam mandaconqequita rurayanqannolla, que patsachopis nunacuna rurayätsun!” (Mat. 6:10). ¿Imataq ‘mandadiquicho’ nishpa mañakonqantsikqa? Tsëqa Jehoväpa gobiernonmi, tsëwanmi Jehová autoridadninta rikätsikun. Tsë gobiernontaqa wambran Jesucristupa makinman y ciëlopa ewaqpaq kaq nunakunapa makinmanmi churashqa, pëkunaqa wanurirnin y kawariramurninmi ciëlopa ëwayan Jesuswan paqta gobernayämunampaq (Dan. 7:13, 14, 18; Isa. 9:6, 7). “Llapan nunacuna mandadiquicho catsun” nerqa, mañakïkantsik llapan mana alli nunakunata ushakäratsiptin, allikaqkunallana mandakïninchö kayänampaqmi. Tsënö kariptenqa hinantin Patsam huk shumaq paraïsoman tikranqa, tsëchöqa kushishqa allikunallata rurarllanam kawakuyanqa (Sal. 72:1-15; Dan. 2:44; 2 Ped. 3:13). Ciëlochöqa Diospa munënin cumplikëkannam. Kananqa kë Patsachöpis tsënölla munënin rurakänampaqmi mañakunantsik. Peqa llapan chikeqninkunata ushakätsinampaqmi änikushqa unë tiempochö ruranqannö (lei Salmo 83:1, 2, 13-18).
14. ¿Imanirtaq “miquilläcuna cada junaq qoycalläyämë” nishpa mañakuntsik?
14 “Miquilläcuna cada junaq qoycalläyämë” (Mat. 6:11; Luc. 11:3). Kënöqa mañakuntsik cada hunaqpaq Jehová mikïnintsik qoykamänapaqmi. Confiakuntsikmi Jehová Diosqa imata wananqantsikta musyanqanta y llapan hunaqkuna mikïnintsik qomänata, tsëmi cada hunaqllapaq mañakuntsik. Kë mañakïqa yarpätsimantsik unë israelitakunata Jehová mandanqampaqmi, pëkunapaqmi nerqan, cada hunaqpaq tinkulla ëlluyätsun o qoriyätsun manä nishqan mikïninkuna (Éxo. 16:4).
15. ¿Imata rurashqataq Jehová perdonamäshun hutsantsikpita?
15 Qateqnin kaq mañakïnam yarpätsimantsik imata ruranapaqpis, Jesusmi nerqan: “Noqacuna mana alli rurayämaqnïcunata perdonayanqänolla, jutsalläcunapita perdonecalläyämë” (Mat. 6:12). Awmi, mana alli ruramaqnintsikkunata perdonashqa karllam, Jehová perdonamänata shuyarashwan (lei Mateo 6:14, 15). Tsëmi, imëkata ruramashqapis nuna mayintsiktaqa perdonëkunantsik (Efe. 4:32).
16. ¿Imanirtaq alläpa preciso “jutsa rureman diablu ishquitsiyämeta munaptin ama jaqiralläyamëtsu” nishpa mañakï?
16 “Jutsa rureman diablu ishquitsiyämeta munaptin ama jaqiralläyamëtsu” (Mat. 6:13). Awmi, Jehoväqa manam ardëpatsu pruëbaman churamantsik (lei Santiagu 1:13). Musyanqantsiknöpis Satanasmi mana allikunamanqa ishkitsimantsik (Mat. 4:3). Höraqa Jehová pruëbaman churakonqantanömi Bibliaqa rikätsikun, pero rasumpëpaqa manam pruëbaman churakuntsu, sinöqa permitinllam (Rut 1:20, 21; Ecl. 11:5). Tsëmi Diablu hutsa rurëman ishkitsimënintsikta munaptenqa o mana allikunata rurëta munarnenqa, Jehoväman mañakunantsik alleq tsarakunantsikpaq. Hinamampis Satanás mana vencimänapaqmi mañakïkänantsik. “Teyta Diosnintsicman marcäcushqaqa musyanmi meyaqlla awantanantsicpaq caqta. Tsemi tentasion chacaramuptinpis, yanapecamäshun imanopapis mana ishquinantsicpaq” (lei 1 Corintios 10:13).
Mañakïkayë, ashikäyë, takakikäyë
17, 18. ¿Ima nitataq Jesus munëkarqan “mañacoq caqqa chasquinmi; asheq caqqa tarinmi; puncuta tacacoq caqtaqa quichapäyanqam” nerqa?
17 Apóstol Pablum cristiano mayinkunata kënö nerqan: “Imepis mañaquicayë Diosman” (Rom. 12:12). Hina Jesuspis kënömi nerqan: “¡Imatapis mañacuyaptiqueqa, Dios qoyäshunquim! ¡Asherqa, tariyanquim; puncuta tsactacuyaptiquipis, quichapäyäshunquim! Porqui mañacoq caqqa chasquinmi; asheq caqqa tarinmi; puncuta tacacoq caqtaqa quichapäyanqam” (Mat. 7:7, 8). Alläpa precïsom Diosnintsik munanqannö imëpis mañakïqa. Jesus nenqannöllam apóstol Juanpis kënö qellqarqan: “Quemi noqantsicpa marcäquinintsic: Sitsun pe munashqanno imatapis mañacushun, wiyamäshunmi” (1 Juan 5:14).
18 “Mañacoq caqqa chasquinmi; asheq caqqa tarinmi” nerqa, Jesusqa nikarqan imë hörapis mana qonqëta mañakïkanapaqmi. Hinamampis mana haqishpam tocakïkänantsik Diospa mandakïninman yëkunapaq y tsëchö atska bendicionkunata chaskinapaq. Pero, ¿rasumpëpatsuraq llapan mañakonqantsikta Diosnintsik qomäshun? Awmi, Pëman imëpis markäkushqa o yärakushqaqa qomäshunmi, tsëmi Jesus kënö nerqan: “Mañacoq caqqa chasquinmi; asheq caqqa tarinmi; puncuta tacacoq caqtaqa quichapäyanqam”. Jehová “mañakïkuna Wiyaq” kanqantaqa Jehoväpa sirveqninkunaqa alleqmi musyayan (Sal. 65:2).
19, 20. Mateo 7:9-11 nenqannö, ¿imanö Teytataq Jehová?
19 Huk kuyakoq teytaqa wambranta allikunallatam qaran, tsë kuyakoq teytanö Jehová kanqantam Jesus willakorqan. Yarpakurkï Jesus këkunata parlëkanqan hora lädonchö wiyëkanqëkiman: “¿Acasu meqequipis tsuriquicuna tantata mañayäshuptiqui, rumincu qoyanqui! Jina ¿acasu pescaduta mañayäshuptiqui, culebrancu qoycuyanqui! Si qamcuna mana alli ruraq quecarpis tsuriquicunata allicunata qoyanqui, sielucho quecaq Dios Yayanäqa mas alli carmi, mas allicunata qoyäshunqui mañacuyaptiqueqa” (Mat. 7:9-11).
20 Teytakunaqa hutsasapa kar “mana alli ruraq quecarpis” wambrankunataqa kuyayanmi. Huk alli teytaqa wambranta imëpis allikunatam qaran. Tsë kuyakoq teytanöllam Jehová Diosnintsikpis allikunallata qaramantsik, tsë qaramanqantsikchömi santu espïritumpis këkan (Luc. 11:13). Tsë espïritunwanmi, imëkatapis qomaqnintsik Dios Yayantsikta servita puëdentsik (Sant. 1:17).
Jesuspa yachatsikïnimpita imëpis yachakïkashunlla
21, 22. a) ¿Imanirtaq alläpa alli hirkachö Jesus yachatsikonqan? b) ¿Ima ninkitaq qamqa Jesuspa yachatsikïnimpita?
21 Hirkachö Jesus yachatsikonqannoqa manam ni ima yachatsikïpis kantsu. Diosnintsikpita alleq claro yachatsikamonqanqa alläpa shumaqmi. Rikanqantsiknöpis kë kiman tëmakunachöqa atska consëjokunatam yachakorqontsik, y wiyakushqaqa yanapamäshunmi. Jesuspa yachatsikïninkunaqa yanapamantsik shumaq kawakunapaqmi, y shamoq tiempochö shumaq kawakïta rikänapaqpis yanapamantsikmi.
22 Kë tëmakunachöqa manam llapantatsu yachakorqontsik hirkachö Jesus yachatsikonqampita, tsë yachatsikïnenqa imëka oro cuentam. Tsënö kaptinchi “llapan nunacuna allapa espantacur mantsacäcuyarqan [Jesuspa] yachatsiquininpita” (Mat. 7:28). Noqantsikpis tsënömi espantakushun Jesus yachatsikonqata alleq yachakorqa.
¿Yarpankiku yachakonqantsikta?
• ¿Allitukoq nunakunapa mañakïnimpaq imataq Jesus nerqan?
• ¿Imanirtaq mañakurnenqa kutin kutin tsëllata parlakushwantsu?
• ¿Padrenuestro nishqan oracionqa imakunata mañakunapaqtaq rikätsimantsik?
• ¿Ima nitataq Jesus munëkarqan “mañacoq caqqa chasquinmi; asheq caqqa tarinmi; puncuta tacacoq caqtaqa quichapäyanqam” nerqa?
[Yachakunapaq kaqpa tapukïninkuna]
[21 kaq päginachö dibüju]
Nunakuna rikäyänanllapaq allitukur mañakoqkunataqa Jesus condenarqanmi
[23 kaq päginachö dibüju]
¿Musyankiku imanirtaq ‘miquïlläcuna cada junaq qoycalläyämë’ nishpa mañakuntsik?