Jesus yachatsikonqanta wiyakur rurë

“Dios cachamushqanqa yachatsicun Dios parlashqancunatam.” (JUAN 3:34.)

1, 2. ¿Imawantaq igualatsishwan Jesuspa yachatsikïninkunata, y imanirtaq Jehová Diospa yachatsikïninllapitam karqan nishwan?

¿IMANÖRAQ karinkiman huk kilo orota qarëkuyäshuptiki? Imaraq kushikïkunkiman alläpa väleq kaptin. Pero tsëpitapis más voloryoqtaqa tarintsik Jesucristu hirkapita yachatsikonqanchömi. Tsë yachatsikï valoryoq kanampaqqa manam kikimpatsu karqan, sinöqa Teytan Jehová Diospam. Tsëmi kikimpaq parlarnin Jesus kënö nerqan: “Dios cachamushqanqa yachatsicun Dios parlashqancunatam” (Juan 3:34-36).

 ² Itsa media hörapita mënosllachi Jesus yachatsikonqanqa karqan, tsënö kaptimpis Escrituras Hebreas nishqampitam ishkë chunka huk (21) yachatsikïkunata, puwaq (8) librokunapita parlarqan. Awmi, tsëchömi rikätsikorqan Jehová nenqanllata yachatsikonqanta. Mä rikärishun imanöshi noqantsiktapis yanapamäshun Jesus yachatsikonqan.

“Ofrendequita jaqirïcur, tse wauqiquiman ewë amishtaq”

3. Piñakï mana alliman apakonqanta qateqninkunata willarirnin, ¿ima nishpataq willaparqan Jesus qateqninkunata?

³ “Santu Espirituyoqcunaqa [...]. Cushi cushim cawacuyan. Alli pasaquichomi cawayan” (Gál. 5:22, 23). Cristianokunaqa tsë santo espïrituta katsirmi kushi kushi kawantsik y wakinkunawampis alli pasakïcho kawantsik. Jesusqa qateqninkuna imëpis tsënö kawayänanllatam munarqan, piñashqalla kakuyänantaqa manam munarqantsu, mana alliman apakonqanta musyar (lei Mateo 5:21, 22). Tsëmi kënö nerqan: “Diospa altarninman ofrendata aparqa, puntata yarpäcurcuyë meqan nuna mayiquillatapis piñatsiyashqequita. Piñatsishqa carqa, altar nopancho tse ofrendequita jaqirïcur, tse wauqiquiman ewë amishtaq. Tsepitana cuti ofrendequi churaq” (Mat. 5:23, 24).

4, 5. a) ¿Ima ofrendapaqtaq parlëkarqan Jesus Mateo 5:23, 24 nishqanchö? b) ¿Alläpa precïsotsuraq piñatsinakonqantsikkunawan amishtë?

⁴ Jesus parlëkanqan ofrendaqa Jerusalen temploman Jehoväpaq apayanqan tukïläya qarëkunam karqan, hasta animalkuna apayanqampis. Kë ofrendakunawanmi israelitakunaqa Jehová Diosta adorayaq, tsëmi alläpa preciso karqan. Pero tsë qarëkunapita más precïsoqa karqan piñatsinakurnin raslla amishtëmi, manaraq tsë ofrendata Jehoväpaq rurar, tsëtam Jesus rikätsikorqan.

⁵ ¿Jesus nenqanqa imatataq yachatsimantsik? Këqa yachatsimantsik, nuna mayintsikwan alli kashqaraq adoranqantsikta Diosnintsik chaskimänatam (1 Juan 4:20). Tsëmi, unë tiempochö ofrenda rurayanqanqa, imapaqpis sirveqtsu nuna mayinkunawan chikinakuyaptenqa (lei Miqueas 6:6-8).

Humilde këmi alläpa precisan

6, 7. ¿Imanirtaq humilde kë alläpa preciso piwampis amishtakunapaq?

⁶ Piñatsinakonqantsik cristianowan amishtëqa manam fäciltsu, pero tsëta rurarqa humilde kanqantsiktam rikätsikuntsik. Huk humilde nunaqa manam cristiano mayinwan pleitontsu, noqa nenqällam alliqa nir, o nenqanölla katsun nerqa. Tsënö këqa alläpa mana allimanmi apakun, tsënö kaqllam Corinto markapita punta cristianokunapis mana alliman ishkiyarqan, tsëmi apóstol Pablu kënö qellqarqan: “Allapa penqaquipaqmi quiquiquicuna pura tsatanacur cacuyanqequi. ¿Imanirtaq allqutsayäshuptiqui y suwapäyäshuptiquipis mana awantaquicuyanquitsu?” (1 Cor. 6:7).

⁷ Qammi ofendimarqonki, noqaqa manam ofendishqaqtsu nirnin ëwanki nerqantsu manam Jesusqa, sinöqa mëqantsik culpayoq kashqa karpis amishtëta ashinantsikpaqmi nerqan. Pensanqantsiktaqa respëtowanmi willanantsik, hina yarpänantsikmi tsë ofendimaqnintsik llakishqa këkanqanta. Si noqantsik ofendishqa karnenqa disculpatam mañakunantsik humildadwan.

‘Ñawiqui jutsata ruratsishuptiqui’

8. ¿Imataq nerqan Jesus Mateo 5:29, 30 nishqan textochö?

⁸ Hina hirkachö Jesus yachatsikonqanchöqa, warmipaqpis ollqupaqpis lluta yarparëpita cuidakuyänampaqmi yachatsikorqan. Jesusqa musyarqanmi makintsik, nawintsik o cuerpontsikpa mëqan partenllapis mana alliman ishkitsimänata. Tsëmi kënö nerqan: “Tsaymi niyag: Derëchocag, ñawiqui jutsata ruratsishuptiquiga jorgosquir jitasquiy. Mas allim canga juccag ñawiquita ograngayqui, entëro cuerpuyquita infiernuman [“Gehenaman”, NM] garpungayquipitaga. Derëchocag maquiqui jutsata ruratsishuptiquiga, rogosquir jitasquiy. Mas allim canman juccag maquiquita ograngayqui entero cuerpuyquita infiernuman [“Gehenaman”, NM] garpungayquipitaga” (Mat. 5:29, 30, Señor Jesucristopa Alli Willacuynin, Conchucos – Norte).

9, 10. ¿Imanötaq nawintsikpis o makintsikpis mana alliman ishkitsimashwan?

⁹ “Ñawiqui” nishpa Jesus parlarqa parlëkarqan imatapis rikanqantsikta yarparar munëpaqmi, y  “maquiqui” nerqa parlëkarqan imëka munanqantsiktapis makiwan ruranqantsikpaqmi. Mana cuidakushqaqa nawintsik y makintsikpis mana allimanmi apamashwan, y tsëqa Diosnintsik munanqannö kawëta manam puëdeshuntsu (Gén. 5:22; 6:9). Mana alli rurëkunaman yarpararnenqa, rasllam tsë munëta y yarparëta haqinantsik, nawintsikta oqtirir hitareq cuenta o makintsikta roqurir hitareq cuenta.

¹⁰ ¿Imatataq rurashwan nawintsik rakcha kaqta mana rikänampaq? Jehová Diospa sirveqnin Job nunam kënö nerqan: “Nawïwanmi huk conträtota rurarqö, shipashkunata mana munapänapaq” (Job 31:1). Jobqa casado nunam karqan tsëmi Jehová Diospa leyninkunata wiyakorqan. Noqantsikpis Jobnö kaqllam casado o soltero karnimpis Jehová Diospa leyninkunata wiyakurnin mana alli rurëkunamanqa yarparänantsiktsu. Tsëmi casado o soltero karpis hukwan punukïki hutsaman mana ishkinapaqqa wanantsik Jehová Diospa santo espïritun yanapamänata (Gál. 5:22-25).

11. ¿Imataq yanapamäshun rakcha rurëkunaman mana ishkinapaq?

¹¹ Allichi kanman kënö tapukushqa: “¿Internetchö o televisionchö rakcha rurëkunata rikaräkikäku munapänarëkur? ¿Y mana alli rurëkunapaq parlaq librokunatapis leïku tsë rakcha rurëkunaman yarparänapaq?”. Yarpärishun Jesuspa qateqnin Santiagu nenqanta: “Quiquin nunam mana alli muneninta ichicllapayan munapäquican. Tseno munapëcarllanam, juclla jutsaman jeqarcun” (Sant. 1:14, 15). Tsëmi, Diospa sirveqninna këkar warmitapis o ollqutapis munapar rikararqa, tsë mana alli pensëninta raslla peqampita horqanan, nawita oqtirir hitareq cuenta (lei Mateo 5:27, 28).

12. ¿Pablu ima nenqantaq yanapamäshun “jucwan jucwan” punukï hutsaman mana ishkinapaq?

¹² Makintsikpis imëka mana allimanmi ishkitsimashwan, Jehová Dios chikenqan mana alli rurëkunata ruratsimarnintsik. Tsëmi imëpis limpio kawakïta tïranantsik apóstol Pablu kënö nenqanta wiyakur: “Qonqëcuyena que munducho mana alli rurecunata. Ama jucwan jucwan pununacur caquicayëtsu, ni lluta puriquicayëtsu, shonqiquicunapa mana alli muneninta rurar. Ni capoqyoq quepaq erayäquicayëtsu Diostano cuyar” (Col. 3:5). Këchö nenqanmi rikätsimantsik mana allikunapitaqa chipyëpa rakikashqa kanapaq.

13, 14. ¿Imanirtaq alläpa preciso mana alli pensëkunapita y manaraq casakur piwampis punukï munëpita witikushwan?

¹³ Wakin nunakunapaqa chakinkunachö o makinkunachömi mana hampikätsina qeshya yurin, y tsë antsaptin hampita mana puëdernam kawayänanrëkur roquratsiyan. Noqantsikpis tsënömi ruranantsik, mana alli pensëkuna y manaraq casakur piwampis punukïqa Diosnintsikwan alli kënintsiktam ushakätsin. Tsëmi, nawita y makita hipirir hitareq cuenta mana alli rurëkunapita y pensëkunapita chipyëpa witikunantsik. Rasumpëpaqa, pensënintsikchö, kawënintsikchö, Diosta adoranqantsikchö limpio karllam salvakäshun ‘Gehenapita’ o chipyëpa ushakätsikoq Diospa juiciompita.

¹⁴ Hutsasapam kantsik, tsëmi alleqraq sinchikunantsik limpio kawakunapaq. Apóstol Pablum  kënö nerqan: “Tsemi cuerpüta esclabu cuentata sujetar muneninta ruracunanta mana jaqïtsu. Tseno muneninta ruracunanpaq jaqiriptïqa, capas tse corir gananacoqcunacho perdeq nuna cuenta qepacho quedarishaq, yachatsiconqäta quiquï mana cäsucur” (1 Cor. 9:27). Jesus nenqankunata wiyakur allita rurashun y limpio këta imëpis ashishun. Y Jesus noqantsikrëkur wanonqanta alläpa agradecikorqa, ama kikintsikpa mana alli munënintsikta rurashuntsu (Mat. 20:28; Heb. 6:4-6).

Nuna mayikikunata qarayë

15, 16. a) ¿Imanötaq Jesus rikätsikorqan alli kanqanta? b) ¿Ima nitataq munarqan Jesus Lucas 6:38 nishqanchö?

¹⁵ Jesusqa parlakïninwan y rurëninwanmi alli kanqanta rikätsikorqan. Y nunakunata kuyarmi kë Patsaman shamorqan (lei 2 Corintios 8:9). Ciëlochö alli kawëninta haqirïkurmi shamorqan nunanö yurinampaq y hutsasapa nunakunata wanïninwan salvananrëkur. Tsënö wanunqanrëkurmi wakin nunakunaqa ciëlochö pëwan kayänampaq akrashqa kayan (Rom. 8:16, 17). Kikin Jesusmi llapan nunawampis alli kanantsikpaq animamarqantsik, kënö nir:

¹⁶ “Nuna mayiquita qarecuyaptiqueqa, Diosmi qamcunatapis mas atscata qoycuyäshunqui, tupuman junta junta tapsïcur, rame rame qaracoq cuenta. Imanollam qamcunapis nuna mayiquicunata tratayanqui, tsenollam qamcunatapis Dios tratayäshunqui” (Luc. 6:38). “Rame rame qaracoq” nerqa Jesusqa parlëkarqan, unë tiempochö mellqaninkunapis mana tinkunqanyaq qaranakuyanqampaqmi. Këchöqa Jesus rikätsimantsik noqantsikpis shonquntsikpita patsë qarakoq kashqaqa, noqantsiktapis tsënölla qaramänatam alli tupuwan ramë ramëraq, itsa pasëpa wanëkanqantsik o ministïkanqantsik hora (Ecl. 11:2).

17. ¿Imanötaq Jehová rikätsikorqan alli qarakoq kanqanta y imata rurartaq kushishqa kashun?

¹⁷ Shonqupita patsë qarakoqkunataqa Jehová Diosmi bendecin. Kikin Jehovämi yachatsimarqontsik, “que patsacho nunacunata allapa cuyarninmi, [...] jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” (Juan 3:16). Y apóstol Pablunam kënö qellqarqan: “Pipis atscata muroqqa atscatam ellun; y pipis ichicllata muroqqa jina ichicllatam ellun. Tsemi pipis shonqun sientenqanmanno ofrendecutsun, peru ama malasqa obligayëtsu qonanpaq, porqui Teyta Diosnintsicqa cuyan cushi cushilla ofrendaq nunatam” (2 Cor. 9:6, 7). Tsëmi Diosnintsikta adoranantsikrëkur, kallpantsikwan, tiempontsikwan y imëka kapamanqantsikwampis yanapakushqaqa, atska bendicionta chaskishun y kushishqam kawakushumpis (lei Proverbios 19:17 y Lucas 16:9).

“Nunacuna alabayänanta munarmi, trompetata tocaräcur yanapacuyan”

18. ¿Imanö kashqataq Diosnintsik premiota qomäshuntsu?

¹⁸ “¡Paqtataq yo nunacuna ricayäshunequillapaq allicunata rurayanquiman! Tseno rurayaptiqueqa, sielucho quecaq Dios Yayapis manam premiyiquicuna qoyäshunquitsu” (Mat. 6:1). “Allicunata rurayanquiman” nishpa Jesus parlarnenqa, parlëkarqan Jehová Dios munanqannö kayänampaqmi y manam nunakuna rikäyänanllapaq rurayänampaqtsu. Pëqa manam nunakuna rikarëkäshuptikeqa ama allikunata rurayankitsu nikarqantsu, sinöqa qateqninkunatam kënö nerqan: “Lamparin actsicoq cuenta qamcunapis allicunata rurar cawacuyë” (Mat. 5:14-16). Pero imëka tushuqtanöpis nunakuna rikarämarnintsik alabamänata munarllaqa, manam allikunata rurashwantsu, tsënö kaptenqa ciëlochö këkaq Dios Yaya manam premiontsik qomäshuntsu. Y manam Diosnintsikwan allitsu kashun, ni  manam chaskishuntsu shamoq tiempochö mana wanushpa kawakïtapis.

19, 20. a) Waktsakunata yanapar ama trompëtata tocayëtsu nerqa, ¿ima nitataq munarqan Jesus? b) ¿Imatataq rurashwantsu waktsakunata yanapanqantsik hora?

¹⁹ Pero alli shonquyoq karqa Jesus kënö nenqantam wiyakushun: “Wactsacunata yanaparqa, ama tse alli tucoq nunacunanoqa cayëtsu. Pecunaqa ellucayänan wayicunachopis, y callicunachopis nunacuna alabayänanta munarmi, trompetata tocaräcur yanapacuyan. Rasontam niyaq: Tsellanam pecunapa premiuncuna” (Mat. 6:2). Unë tiempochöqa waktsakunata tukïnöpam yanapayaq (lei Isaías 58:6, 7). Jesuspawan qateqninkunapapis kaqmi fondo qellëninkuna waktsakunata yanapayänampaq (Juan 12:5-8; 13:29). Trompëtataqa manam rasumpëpatsu tocayaq yanapakuyanqan hora, këwanqa Jesusqa rikätsikïkarqan waktsakunata yanapakuyanqan hora gälakur purikïqa mana alli kanqantam, tsëtaqa fariseokunallam rurayaq. Kë nunakunataqa Jesus qayarqan allitukoqkuna nishpam. “Pecunaqa ellucayänan wayicunachopis, y callicunachopis” yanapakïkäyanqanta musyatsikurmi puriyaq, tsënö rurayanqampitam nunakuna alabayaq, y “tsellanam pecunapa premiuncuna” kaq. Y “ellucayänan wayichopis mas presisaqcuna täcuyänanmanmi täquita munaya[q]”. Tsëmi Jehová Diospitaqa manana imatapis chaskiyänannatsu karqan (Mat. 23:6). ¿Jesuspa qateqninkunaqa fariseokuna rurayanqannöllatsuraq rurayänan karqan? Jesusqa punta qateqninkunata y noqantsiktapis kënömi nimantsik:

²⁰ “Tsemi qamcunaqa wactsacunata yanapayanqequita ni pitapis willayänequitsu. Antis mana pipis musyashqanlla wactsacunata yanapecuyanqui. Tseno pacallapa yanapayanquequita ricashoqniqui Dios Yayam, qamcunatapis mas allipa yanapecuyäshunqui” (Mat. 6:3, 4). “Yanapayanqequita ni pitapis willayänequitsu” nerqa, manam musyatsiyänëkitsu kastëkikunata, ni kuyë amïguïkikunatapis nikarqanmi Jesusqa.

21. ¿Ima premiotataq qaramäshun pakallapa yanapakonqantsikta rikëkämoq Diosnintsik?

²¹ Tsënöpam alabakur mana willakushqaqa, waktsakunata yanapëkanqantsik musyakanqatsu. Tsënö rurashqaqa pakallapa yanapakonqantsikta rikämoq Diosnintsikmi premiontsik qomäshun. Diostaqa manam pipis rikëta puëdentsu, pero Pëqa llapantam rikarëkamun (Juan 1:18). Pëqa bendecimäshunmi, alli nunatanönam chaskimäshun, y mana ushakaq kawëtam qaramäshun (Pro. 3:32; Juan 17:3; Efe. 1:7). Kë llapan bendicionkunaqa nunakuna alabamanqantsikpitapis más allim, ¿manaku qampis tsënö rikanki?

Wiyakunapaq shumaq yachatsikïkuna

22, 23. ¿Imanirtaq kuyashwan y alläpa väleqtanö rikashwan Jesuspa yachatsikïninkunata?

²² Yachakonqantsiknöpis hirkapita patsë Jesus yachatsikonqanchöqa, tarintsik alläpa shumaq y väleq yachatsikïkunatam. Sasa o aja tiempokunachö kawëkashqapis alläpam yanapamantsik kushishqa kawakunapaq.  Awmi, Jesuspa yachatsikïninta kuyarnin y tsëwan kawënintsikta altsarnenqa kushishqam kawakushun.

²³ Jesuspa yachatsikïninkunata “wiyacur cäsucoqcunaqa” atska bendicionkunatam chaskiyanqa (lei Mateo 7:24, 25). Tsëmi, llapan kawënintsikchö Jesus yachatsikonqanta wiyakur ruranapaqqa sinchikunantsikmi. Qateqnin kaq tëmachömi Jesus hirkapita yachatsikonqanta maslla yachakurishun.

Mä respuestanta niramï

• ¿Imanirtaq alläpa preciso cristiano mayintsikwan piñatsinakurnin amishtëqa?

• ¿Imatataq rurashwan nawintsik mana alli rurëman mana ishkitsimänapaq?

• ¿Imanötaq rikashwan qarakoq këta?

[Yachakunapaq kaqpa tapukïninkuna]

[17 kaq päginachö dibüju]

¡Cristiano mayintsikwan piñatsinakushqa kar amishtëqa alläpa precïsom!

[19 kaq päginachö dibüjukuna]

Shonqupita patsë qarakoqkunataqa Jehová Dios bendecinmi