Leeqkuna tapukuyanqan

¿Imanirtaq santokunawantsu Diosta adorayan Jehoväpa testïgonkuna?

Hindú, budista, católico y ortodoxo religionkunachömi santokunata, imägenkunata y idolokunata adorarnin alläpa kuyayan. Y Africachönam wakin nunakuna adorayan qerupita o rumipita rurashqakunata diosmi o diospa espïritunmi tsëchö këkan nir.

Tsënö rurayaptimpis, Jehoväpa testïgonkunaqa manam adorayantsu santokunata ni imägenkunata. Jehoväpa Testïgonkuna Yachatsikuyänan Wayiman ëwaqkunaqa manam tariyantsu “santokunata” ni Jesuspa o Marïapa imägennin rurashqatapis. * ¿Imanir? Rikärishun Biblia nenqanta.

Israel markanta Dios mandanqan

Jehová, Egiptopita israelïtakunata horqaramurmi imanö adorayänampaq kaqtapis nerqan. Chunka Mandamientopita ishkë kaq mandamientom kënö nin: “Ciëlochö këkaqkunatanö, patsachö këkaqkunatanö ni yaku rurinchö këkaqkunatanöpis manam huk imägenta ruranëkitsu. Manam pëkunaman puktinëkitsu, ni niyäshuptikipis servinëkitsu, noqa Jehová Diosnikiqa, noqallata adorayämanëkitam shuyarä” (Éxodo 20:4, 5).

Kë mandamientokunata Moisesta Dios willanqanyaqmi, huk becërrota oropita rurar qallëkuyarqan israelïtakuna, itsa egipciokuna adorayanqanta qatirninchi tsëta rurayarqan. Tsënö karpis, israelïtakunaqa egipcio dioskunapa shutintatsu manam churayarqan, tsëpa rantenqa Jehovällatam kënö adorëkantsik niyarqanmi (Éxodo 32:5, 6). Tsëta rurayaptin, ¿Dios ima nerqanraq? Llapan becërrota adoraqkunawanmi piñakurkorqan. Tsëpitanam Moises tsë ïdolota paqwë ushakäratserqan (Éxodo 32:9, 10, 19, 20).

Tsëpitanam Jehová tsë ishkë kaq mandamientonta más hatunyätserqan. Moiseswanmi israelïtakunata yarpätserqan “imägenkunata, ni ima rikoqtanö, ni china ni orqu rikoqtanö, ni patsachö imëka animal rikoqtanö, ni ciëlochö volaq pishqutanö, ni patsachö kuyïpa pureqkunatanö, ni yaku rurinchö këkaq pescädokunatanöpis” mana rurayänampaq (Deuteronomio 4:15-18). Rikanqantsiknöpis, imägenkunata adorayänantaqa Dios markanta prohibirqanmi.

Tsënö karpis israelïtakunaqa ïdolokuna adorëmanmi churakäyarqan. Tsënam Jehoväqa profëtakunata kacharqan paqwë ushakäyänampaq kaqta willakuyänampaq (Jeremías 19:3-5; Amós 2:8). Tsë llapanta rurëkätsiptimpis israelïtakunaqa manam wiyakuyarqantsu. Y 607 watachömi babiloniokuna Jerusalenta paqwë ushakätsiyänampaq Jehová haqirerqan, y tsënam sirveqninkuna kayänampaq apakuyarqan llapan nunakunatapis (2 Crónicas 36:20, 21; Jeremías 25:11, 12).

Punta kaq cristiänokuna creiyanqan

Qallanan siglochö mana Judío kaqkunapis cristiano këman tikrarirmi Diosta serviyänanrëkur imägenkunata o santokunata adorëta haqiriyarqan.  Ëfesochö imägenkunata ruraq Demetriu nuna nenqanchömi tsëta tanteantsik. Pablu yachatsikonqampaq parlarmi kënö nerqan: “‘Tëtecuna, qamcuna musyayanquim que ofisiuntsic alli ganatsimanqantsicta’ nir. Peru ricayanqequinomi y wiyayanqequinomi, tse Pablu jutiyoq nuna puriquican nunacunata queno willapar: “Nunacuna rurashqan imajincunaqa manam adoranantsicpaqtsu” nishpa. Tseno nishpam atscaq nunacunata engañar creyitsipäcun. Manam que Efeso marcallachotsu tseno rurashqa; sinoqa jinantin Asia marcantsicchomi” (Hechos 19:25, 26).

Demetriu parlanqanqa rasumpam karqan, tsëtaqa musyantsik kikin Pablu Atenas markachö kënö yachatsikushqa kaptinmi: “Manam creyinantsictsu nuna munanqanno orupita qellepita o rumipita rurashqa imajinno Diosnintsic canqanta. Tse imajincunataqa nunacunallam quiquincunapa yarpenincunamanno ruracuyashqa. Une tiempum Dios tse nunacunapa mana alli yarpenincunapita pasensiacorqan; peru cananqa jinantin marcacho nunacunatam mandan pellatana cäsucuyänanpaq” (Hechos 17:29, 30). Tesalónica markachö këkaqkunatam kënö nerqan: Qamkunam ‘ïdulukunapeq Dyosman kombertikuyarqëki’ (1 Tesalonicenses 1:9, QKW).

Hina apóstol Juanpis cristiänokuna imägenkunata mana utilizäyänampaqmi nerqan. Ishkë kaq siglopaq ichikllana pishikaptinmi, “rakikäkuyey idulukunapita” nir willaparqan o yätsiran (1 Juan 5:21, QKW).

Tsëmi Jehoväpa testïgonkunaqa imägenkunata mana adorayänampaq Biblia nenqanta wiyakuyan. Kënö Dios nenqantam wiyakuyan: “Noqam Jehová kä. Tsëmi shutï; y manam ni pitapis qoshaqtsu gloriäta, ni rurashqa imägenkunata manam qoshaqtsu alabanzäta” (Isaías 42:8).

[Päginapa ura kuchunchö willakï]

[23 kaq päginachö ninqan]

“Noqam Jehová kä. Tsëmi shutï; y manam ni pitapis qoshaqtsu gloriäta, ni rurashqa imägenkunata manam qoshaqtsu alabanzäta.” (Isaías 42:8)