Imanö kawanapaqpis akranantsikmi

“Dios nunata rurar qallëkorqan kikin rikoqtam, Dios rikoqtam rurarqan, orquta y chinatam rurarqan.” (Génesis 1:27.)

TSËNÖMI nin Biblia qallanan textokunachö, y pï mëpis tsëtaqa musyayanmi, y këqa parlëkan utsannaq Adantawan Ëvata Dios kamanqampaqmi, pëkunatapis ‘tiemponchömi shumaq rurarqan’ (Eclesiastés 3:11). Diosmi kënö nerqan: “Wambrëkikuna katsun y atskaqyäyë y Patsa huntanqanyaq mirayë y dominayë, hina lamarchö pescädokunata, volaq animalkunata y patsachö llapan pureq animalkunatapis dominayë” (Génesis 1:28).

Tsënö nirmi pëkunapaq imata munanqantapis Dios willëkarqan: wambrankuna kanampaq, Patsata alli rikäyänampaq y llapan nunakunapaq Patsata shumaqyätsiyänampaq. Imëyaq kawayänanta ni imë wanuyänantapis Pëqa manam disponishqatsu. Tsëpa rantenqa shumaq kawakuyänampaqmi kamarqan. Alli kaqta y Diospa munëninta rurarqa, yamë y kushishqam mana wanukushpa kawakuyanman karqan.

Pero, tsëpaq kamashqa këkäyaptimpis; noqantsikqa awkinyantsik y wanuntsikmi. Unë tiempochö Diosta sirveq Job nenqannöpis: “Nunaqa wallka tiempollam kawan y imëka mana allikunatam pasan” (Job 14:1). ¿Imanirtaq tsënöqa kawantsik?

Bibliam kënö nin: “Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan” (Romanos 5:12). Adanqa munëninta rurarmi kikin Dios nenqanta wiyakorqantsu (Génesis 2:17). Y mana wiyakurninmi, shumaq Patsachö mana wanushpa kawakunampaq kaqta oqrarerqan. Y manam tsëllatsu, llapan tsurinkuna mana wanushpa kawakuyänampaq kaqtapis oqraratserqanmi, hina hutsaman y wanïmanmi qarpurerqan.  ¿Imëyaqpis tsënöllanatsuraq kawakuyanman karqan?

Diospa munënin rurakaptin

Tsëpita atska wata pasariptinmi, salmistata Dios kënö qellqatserqan: “Patsachöqa alli nunakunallam tärayänqa, y mana wanushpam tsëchö kawayanqa” (Salmo 37:29). Edén shutiyoq huertachömi, Dios nunakunapaq imata munanqantapis nerqan, y tsë nenqanmanqa markäkushwanmi o yärakushwanmi, Bibliachömi kënö nin: “Mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam”. Y kikin Diosmi kënö nerqan: ‘Cananqa llapantapis mushoqmannam tumaratsimushaq’ (Apocalipsis 21:4, 5).

Llapampaqpis tiempon këkaptenqa, “¿Dios awnikonqan shumaq kawakï tiempo imëraq chämonqa?” nirmi wakinkunaqa tapukuyan. Kë revistata qellqamoq Jehoväpa testïgonkunaqa, kë mundo ushakänampaq ‘ichicllana pishicanqan’ witsanchö kawëkanqantsikta, y Dios ‘llapantapis mushoqmanna tumaratsimunampaq’ kaqta nunakuna musyayänantam munayan (2 Timoteu 3:1). Tsëmi, qampis shumaq kawakïta tarinëkirëkur Bibliapita yachakunëkipaq niriyaq. Diospa Palabranmi kënö nimantsik: “Jehoväta ashiyë tarina kanqanyaqlla. Pëman qayakuyë këllachö këkanqanyaqlla” (Isaías 55:6). Yarpë, mana wanushpa kawakïtaqa kikikim akranëki. Kikikim kawëniki imanö kanampaqpis ashinëki.

[6 kaq päginachö ninqan]

‘Llapantapis mushoqmannam tumaratsishaq’