Jobqa Jehovätam alabarqan

“Jehoväpa shutin imëyaqpis alabashqa katsun.” (JOB 1:21.)

1. ¿Imëtaq y pitaq qellqarqan Job librota?

EGIPTO markapa gobernaqnin Faraón qatikachaptinmi, Moises safakorqan Madián markata tsëchö täränampaq, tsë witsanqa chusku chunka (40) watayoqnönam karqan (Hech. 7:23). Itsa tsë markachö këkarchi wiyarqan Uz markachö täraq Job nuna imëka hipakïkunapa pasëkanqanta, tsë markaqa Madián markapita manam alläpa karuchötsu karqan. Tsëpita tiempowannam, Jehová änenqan markaman chëkarna israelïtakuna pasayarqan tsë Uz marka lädompa. Tsëchöpis yapëchi Moisesqa wiyarerqan awkinyashqa Job nuna pasanqampita parlayaqta. Judïokunapa costumbrenkunamannömi Moisesqa Job librota qellqarqan Job nuna wanushqanchöraq.

2. ¿Imanirtaq alläpa yanapan cristianokunata Job libro?

² Kanan tiempo cristianokunataqa alläpam yanapamantsik kë Job libro. ¿Imanö? Jehová Dioslla patsachöpis y ciëlochöpis mandakoq kanqampitam Satanás mana allita parlarqan, tsëtam willamantsik. Hina yanapamantsikmi imëka hipakïkunapa pasëkarnimpis Jehová Diosnintsikta servita puëdenqantsikta, y pruëbakunapa pasanata Jehová Dios imanir permitenqantapis musyanapaq. Y rikätsimantsikmi Jehoväpa y nunapa pasëpa chikeqnin Satanás kanqanta, hina yachatsimantsikmi imëka pruëbakunapa pasëkarnimpis Jehová Dios servita mana haqinata. Kë pasanqampita wakin wakinllatapis rikärishun kë librochö.

Satanás Pruëbaman churan Jobta

3. a) ¿Imanö nunataq karqan Job? b) ¿Imanirtaq Diablu pruëbaman churarqan Jobta?

³ Jobqa atska kapoqyoq, reqishqa, alli portakoq, familiantapis alli dirigeq y alli consejakoq nunam karqan. Tsënö kaptimpis, Diosta respetarnin alli kaqta ruranqampitam más reqishqa karqan. Bibliaqa willamantsik, Jobqa “mana hutsallakushpa Dios munanqanta ruraq” y “Dios respetaq y mana allikunapita rakikashqa” nuna kanqantam. Manam kapoqyoq kënin, ni reqishqa kënintsu causarqan Diablu chikiparnin tukïläya pruëbakunaman churanampaq (Job 1:1; 29:7-16; 31:1).

4. ¿Ima ninantaq shonqupita patsë adorëqa?

⁴ Job libroqa willar qallamantsik, ciëlochö angelkuna huk reunionchö Diosnintsikwan kayanqampitam, hina willamantsikmi tsë reunionchö Satanás këkarnin, Job nunapaq mana allita parlar qallëkonqantapis (lei Job 1:6-11). Imëka kaponqampaq parlarnimpis, Satanasqa parlëkarqan Jehová Diosta shonqumpita patsë adoranqampaqmi. Shonqupita patsë ninanqa, imëka mana allikunata pasëkarnimpis allillata imëpis rurëkëmi. Y Bibliachö shonqupita patsë adoraqkunapaq parlarnenqa rikätsimantsik imëka pruëbakunapa pasëkarnimpis Jehovällata adorëkaqkunapaqmi.

5. ¿Imataq nerqan Satanás Job nunapaq?

⁵ Satanasqa, Jobqa imatapis munarlla o kaponqanrëkurllam adorashunki nerqanmi Diosnintsikta. Hina, tukïnin qoptiki y yanapar imëka mana allikunapita tsapaqtikillam qamta kuyashunki nerqanmi. Tsënö mana kanqanta rikätsinampaqmi Jehová Dios permiterqan Jobta pruëbaman Satanás churananta. Tsënam, wakin animalninkuna wanur ushakarqan, wakintanam suwa limpu apakorqan, sirveqninkunatapis wanutsiyarqan, y llapan wambrankunapis wanuriyarqanmi, kë llapanqa pasakorqan huk hunaqllachömi (Job 1:13-19). ¿Diablu munanqannötsuraq Jobqa Diosta haqirerqan? Manam. Tsëpa rantenqa kënömi nerqan: “Jehovämi imatapis qomarqan. Pëmi qochiramampis. Jehoväpa shutin imëyaqpis alabashqa katsun” (Job 1:21).

6. a) ¿Ciëlochö Jehová yapë reunionta ruraptenqa imataq pasakorqan? b) Satanás mana allita Jobpaq parlarnenqa, ¿pikunapaqtaq más parlëkarqan?

⁶ Tsëpitanam huk reunión masta Jehová Dios  ciëlochö rurarqan. Tsëchöpis yapëmi Satanasqa Jobpaq mana allita parlar kënö nerqan: “Kawëninrëkorqa llapan kaponqantam nunaqa qonqa. Rikärinëkipaq, tullunyaq y ëtsanyaq yatari, y mä manakush cärëkichö maldecïkushunki”. Këchö rikanqantsiknöpis Diabluqa manam Jobllapaqtsu parlëkarqan. “Kawëninrëkorqa llapan kaponqantam nunaqa qonqa” nerqa, parlëkarqan Diosta llapan sirveq nunakunapaqmi. Tsënö parlaptinmi Jehoväqa permiterqan más pruëbaman churanampaq, tsëmi Satanasqa hipatsikoq qeshyawan Jobta qeshyaratserqan (Job 2:1-8). Pero hipakïnenqa manam tsëllachötsu usharerqan.

¿Imatataq Jobpita yachakuntsik?

7. ¿Ima niyarqantaq Jobta, warmin y mana alli amïgonkuna?

⁷ Tsë pruëbakupa Job pasar qallaptenqa warmimpis igual-llam sufrerqan. Alläpa llakikïpaqchi karqan llapan wambran wanuriptin y imëkankunapis ushakäriptin. Y alläpachi llakikorqan espantakïpaq qeshyawan nunan qeshyaqta rikar. Tsë llapanta rikarmi sinchipa kënö nerqan: “¿Hinallaraqku qamqa mana hutsallakur këkanki? ¡Diosta maldecikur huklla wanukï!” Tsëpitanam, shumaq parlapaq y animaq chariyarqan kimaq nunakuna, Elifaz, Bildad y Zofar. Pero manam ni ichikllapis animayarqantsu, Jobpa contranllam parlayarqan y piñashqa parlapäkoqkunam kayarqan. Bildadmi parlakïnincho rikätsikorqan, Jobpa tsurinkunataqa hutsata rurayanqanrëkur Dios ushakätsishqa kanqanta. Elifaznam nerqan, hutsata unë ruranqëkikunapitam kë llapanwan Dios castiguekäshunki. Hina Diosqa manam kuyantsu sirveqninkunata nerqanmi (Job 2:9, 11; 4:8; 8:4; 16:2; 22:2, 3.) Kë llapanta pasëkarnimpis Jobqa manam Diospita rakikarqantsu. Pero höraqa mana allitam pensarqan, Diospita más alli ruraq nunam kä nir (Job 32:2). Tsënö këkarpis wanonqanyaqmi tsarakorqan.

8. ¿Imatataq Elihüpita yachakuyanman kanan tiempo consejakoq cristiänokuna?

⁸ Tsëpitanam Job libro willamantsik Elihú, Job watukaq ëwanqanta. Chärirllaqa manam parlakorqantsu, Job y kiman amïgonkuna parlayanqanta wiyarllaran karqan. Tsëpitam shumaq yachëpa parlar qallëkorqan, tsëwanmi rikätsikorqan wakimpita más yachaq kanqanta. Jobtaqa shumaq kuyëpam parlaparqan y hasta shutimpam qayarqan y manam tsë kiman mana alli amïgonkunanötsu lluta parlaparqan. Tsënö karpis, alli nuna kanqëkita rikätsikïta nunarmi alläpa yarpakachëkanki nishpam consejarqan. Tsëpitanam nerqan Jehová Diosllata servirnin sinchikonqanqa alläpa alli kanqanta (lei Job 36:1, 11). Elihú yachëpa parlapäkoq kanqanqa alläpa allim kanan tiempo cristiänokuna tsënö rurayänampaq. Elihüqa shumaq pacienciawanmi Jobta wiyarqan, allitam parlanki nerqanmi y shumaqmi consejarqan (Job 32:2; 33:32).

9. ¿Imanötaq Jehová yanaparqan Jobta?

⁹ Tsëpitanam Jobtaqa “Jehová parlaparqan sinchipa viento rurimpita”. Atska tapukïkunawanmi shumaq yanaparqan, tsënöpa mana alli pensëninkunata haqinampaq. Jobqa humildadwanmi  Jehová nenqanta wiyakorqan, tsëmi nerqan: “Imapaqpis mana väleq cuentam kallä”. Tsëpitanam yapë nirerqan: “Arrepentikömi, peqämampis allpata y uchpatam winashaq”. Y Jobpa kima amïgonkunatukoq nunakunatanam pëkunawan alläpa piñashqa këkanqanta Jehová nerqan. Tsëpitanam Jobta mandarqan pëkunapaq mañakunampaq. Tsënö “amïgonkunapaq mañakuriptinmi Jehoväqa ushakäratserqan Jobpa llapan hipakïninta. [...] atskapam bendecirqan, qorqan punta kaponqampitapis mastaran” (Job 38:1; 40:4; 42:6, 8-10).

¿Pruëbakunapa pasëkarnimpis Jehoväta kuyëkäshunllatsuraq?

10. ¿Imanirtaq Jehoväqa ushakäratserqantsu Satanasta o qonqëkorqantsu mana alli parlakïninta?

¹⁰ Jehovällam llapantapis kamashqa, pëllam patsachö y ciëlochöpis mandakoqqa. Satanás mana allipa parlanqantaqa Diosnintsikqa qonqëkunmanmi karqan o tsë höram ushakäratsinman karqan. Pero ¿imanirtaq tsënötsu rurarqan? Huk precisaq problëmataran Satanaswan altsanan karqan, ushakäratsir o mana cäsorqa manam altsëta puëdenmantsu karqan. Diabluqa, imëkampis ushakäriptenqa Jobqa manam servishunkinatsu haqirishunkim nerqanmi, tsënö nikaptimpis kë nunaqa llapan pruëbakunapam pasarqan y alleqmi tsarakorqan. Tsëpitanam nerqan imëka llakikïkunapa pasayänanta haqiriptikiqa nunakuna mananam serviyäshunkinatsu. Pero Jobqa tukïläya pruëbakunapa pasëkarnimpis alleqmi tsarakorqan. Këchömi rikakorqan Satanás ulikoq o llullakoq kanqan, Jobqa hutsasapa këkarnimpis manam Diosta servita haqerqantsu. Pero ¿imataq nishwan Diosnintsikta sirveq wakin kaq nunakunapaq?

11. ¿Imanötaq Jesus rikätsikorqan Satanás parlanqan mana rasumpa kanqanta?

¹¹ Satanás imëkata rurëkaptimpis huk cristiano alli tsarakorqa rikätsikun Satanás nenqanqa llapampis mana allilla kanqantam. Jesuspis kë patsachö këkarmi hina rikätsikorqan Satanasqa uli y mana kaqpita tumpakoq kanqanta. Qallananchö teytantsik Adan hutsannaq kanqannö nuna karmi, Jesusqa rikätsikorqan tukïläya pruëbakunapa pasëkarnimpis Diosnintsiktaqa servikänantsikllata y Satanás nenqanqa llapampis mana allilla kanqanta (Apo. 12:10).

12. ¿Imanötaq rikätsikushun Jehoväta shonqupita patsë kuyanqantsikta?

¹² Tsënö kaptimpis Diosta sirveqkunataqa Diablu imëpis pruëbaman churëkanllam. Tsëmi cada uno rikätsikïta puëdentsik Jehová Diosta imatapis munarllaqa mana sirvenqantsikta, sinöqa llapan shonquntsikwan adoranqantsikta. Noqantsikpaq tsë rurëqa alläpa kushikïpaqmi. Hinamampis musyantsikmi Jehová kallpantsik qoykamänantsikta, imëkatapis aguantëkunapaq, Jobwan ruranqannöpis manam permitenqatsu pruëbakuna chipyëpa ushakätsimänantsiktaqa (1 Cor. 10:13).

Satanasqa mana penqakoqmi y Diospa contranmi tikrashqa

13. ¿Imatataq Satanaspita Job libro willamantsik?

¹³ Escrituras Hebreas nishqanchöqa willamantsik kë mana penqakoq Satanasqa, Diosnintsikpa mandakïnimpaq mana allita parlanqanta y nunakunata Diosnintsikpita rakita munar, tukï mana allikunata ruratsenqantam. Hina Escrituras Griegas Cristianas nishqampis willamantsikllam Diablu munënin rurakoq kanqanta. Más tantearkunapaq, Apocalipsis librochöqa willamantsik Jehová Dios llapan chikeqninkunata ushakäratsirnin, pëlla patsachöpis y ciëlochöpis mandakoq kanqanta rikätsikunampaqmi. Job libroqa willamantsik Satanasqa Jehová Diospa y nunakunapa contran tikranqampitam, y nimantsik ciëlochö Jehová Dios reunionta ruraptin ishkan kuti tsëchö këkanqantam,  pero manam Jehoväta alabanampaqtsu tsëchöqa këkarqan, sinöqa mana allikunata parlanampaqmi. Jobpaq mana allita parlar llullakuptinmi Jehová permiterqan pruëbaman churanampaq, tsënam “Satanasqa Jehoväpa nöpampita yarqaramorqan” (Job 1:12; 2:7).

14. ¿Satanás llakiparqantsuraq Jobta pruëbaman churanqan hora?

¹⁴ Rikanqantsiknöpis, Job libroqa willamantsik Satanasqa Jehová Diospa y nunapa pasëpa chikeqnin kanqantam. Job 1:6 nishqan reunionpita hasta Job 2:1 nishqanchö reunionyaqqa atska tiemporan pasarqan, y tsë tiempo pasanqanyaqqa Jobqa llakinëpaq pruëbakunapanam pasëkarqan. Pero Job alli tsarakonqampitam Jehová kënö nerqan Satanasta: “[Jobqa] manam conträ churakanraqtsu, hinallaran tsarakïkan, imatapis mana ruranqampita ushakätsinäpaq nikämaptikipis” (Job 2:3). Tsënö tsarakonqanta rikëkarpis Satanasqa manam pantarqömi nerqantsu, sinöqa huk más sinchi kaq pruëbaman Jobta churanampaqmi Jehoväta yapë nerqan. Kapoqyoq këkaptin y waktsayashqa këkaptimpis Satanasqa Jobta pruëbaman churëkarqanllam, tsëwanmi rikätsikorqan waktsakunata mana llakipanqanta y Jehoväta shonqupita patsë sirveqkunatanäqa pasëpa chikenqanta (Job 2:3). Tsënö kaptimpis Jobqa alleqmi tsarakorqan y tsënöpam Satanás ulikoq o llullakoq kanqanta rikätsikorqan.

15. ¿Imachötaq igualäyan Satanaswan kanan tiempo Diospa contran tikrashqa nunakuna?

¹⁵ Satanasmi puntataqa Diospa chikeqnin y contran tikrarerqan. Kanan tiempo Diospa contran tikrashqa nunakunaqa Satanasnömi kayan. Congregacionchö kaqkunapaq, dirigeqninkunapaq, Jehoväpa testïgonkunata pushaqninkunapaq mana allita parlayanqanqa venëno cuentam pëkunachö. Tsëmi wakinqa Diospa shutin Jehová kanqantapis negayan, ni pëpita yachakïta ni servïtapis munayantsu. Diospa contran tikrashqa nunakunaqa teytankuna Satanasnömi Diospa sirveqninkunata tukïnöpa ishkitsita tïrayan (Juan 8:44). Tsëmi pëkunapitaqa pasëpa witikunantsik, ni ichikllapis wiyanantsiktsu (2 Juan 10, 11).

Jobqa Jehoväpa shutin alabashqa kanantam munarqan

16. ¿Imanötaq Job rikarqan Jehoväta?

¹⁶ Jobqa Jehoväta shutimpam qayarqan y alabarqanmi. Y wambrankuna wanonqampaq llakikïpaq willakïta chaskirirpis manam llutaqa Diospaq parlarqantsu. Awmi, pantarninmi Diospa castigon kanqanta pensarerqan, pero tsënö karpis Jehoväpa shutintaqa alabarqanmi. Tukï nenqankunata ushëkarnam Jehová nunata kënö nenqanta yarparqan: “Nunaqa yachëyoq kanampaq noqa Jehovätam respetamänan. Y wiyakoq këqa mana allikunapita rakikëmi” (Job 28:28).

17. ¿Imataq Jobta yanaparqan Jehoväta mana haqinampaq?

¹⁷ ¿Imataq Jobta yanaparqan alleq tsarakunampaq y Jehoväpa contran mana churakänampaq? Tsëpaqqa yanaparqan Jehoväta shonqumpita patsë sirvenqan y kuyanqanmi. Satanás  pruëbaman churëkanqanta mana musyëkarpis Jobqa pasëpam tsarakorqan y manam Jehoväpa contran churakarqantsu. Tsëmi Jehoväpaq kënö nerqan: “¡Manam haqishaqtsu wanonqäyaqpis” (Job 27:5). ¿Imanöpataq Jehoväta alläpa kuyëkorqan? Itsa musyarqan kastankuna Abrahan, Isaac y Jacob Jehoväwan alläpa kuyanakushqa kayanqanta. Hinamampis Jehovätaqa reqerqan llapan kamanqankunata rikarmi (lei Job 12:7-9, 13, 16).

18. a) ¿Imanötaq Job rikätserqan Jehová Diosta kuyanqanta? b) ¿Imanötaq noqantsikpis Job alli ruranqanta qatishwan?

¹⁸ Diosnintsikpita yachakonqanmi Jobta yanaparqan Jehová munanqanta imëpis ruranampaq. Tsëmi mana haqïllata animalkunata pishtëkur Jehoväpaq kayaq, tsëtaqa ruraq itsa kastäkuna imallachöpis hutsata rurëkuyashqa o “shonqunkunachö Diosta maldecikuyashqa” nirmi (Job 1:5). Mëläya mana allikunapa pasëkarnimpis allillatam Diospaq parlëkarqan (Job 10:12). ¡Kënö kanqanqa noqantsiktapis alläpam yanapëkamantsik! Tsënö kanantsikpaqmi noqantsikpis Jehoväpita y ruramunampaq kaqpita alleq yachakunantsik. Y tiempotam horqanantsik Bibliata leinantsikpaq, reunionkunaman mana faltanapaq, Diosnintsikman mañakunapaq, y wakin nunakunatapis yachatseq ëwanapaq. Hina imëkatapis haqirirninmi Diosnintsikpa shutimpita willakoq ëwanantsik. Imanömi Job alleq tsarakurnin Jehoväpa shonqunta kushitserqan, tsënömi noqantsikpis alleq tsarakorqa shonqunta kushitsishun (Pro. 27:11). Tsëpitam yachakushun qateqnin kaq tëmacho.

¿Yarpankiku?

• ¿Imanirtaq Satanás chikerqan Jobta?

• ¿Ima mana allikunapataq pasarqan Job, y imanötaq tsë llapanta rikarqan?

• ¿Imataq yanapamäshun Jobnö Jehoväta servirnin alleq tsarakunapaq?

• ¿Satanás imanö kanqantataq yachatsimantsik Job libro?

[Yachakunapaq kaqpa tapukïninkuna]

[11 kaq päginachö dibüju]

Jobpita willakïkunaqa Dioslla alabashqa kanantam yarpätsimantsik

[13 kaq päginachö dibüju]

¿Imakunataq Jehoväta kuyanqantsikta pruëbaman churanman?