Moisespa mayornin Jesus ruranqanta valorashun

“Teyta Diosmi shamoq castantsiccunapita pepaq juc willacoqta churamonqa noqatano. Y tse profeta llapan yachatsicushqancunata wiyacur, cäsucuyanqui.” (HECHOS 3:22.)

1. ¿Jesus ruranqan trabajo alläpa valoryoqtsuraq karqan?

ISHKË waranqa (2000) watakunanönam pasarishqa Belen markachö huk wambra yurenqampita, y kë wambra yuririptinmi angelkuna kushikïpita Diosta alabar mitsikoqkuna wiyëkäyaptin cantayarqan (Luc. 2:8-14). Watakuna pasariptinnam kë wambra hatunyar poqu nuna tikrarerqan. Tsëpita kima chunka watayoq këkarnam, qallakïkorqan alläpa valoryoq trabäjota rurarnin, y kë trabäjoqa kima wata pullanyoqllam tsarakorqan, tsënö karpis ruranqanqa llapan nunakunatam yanapanan karqan. Huk reqishqa nunapis 1900 watakuna witsanchö kënömi nerqan kë nunapaq: “Ni huk lineallatapis mana qellqëkarmi, shumaq yachatsikïkunata parlarqan, shumaq consëjokunata willakorqan, Diosman mañakunapaq yachatsikorqan y pleitokunata imanöpis altsana kanqanta rikätsikorqan, y shumaq rurëkunata rurarqan, y mëläya yachaq nunakuna rurayanqan cantokunawampis manam igualarqantsu”. Kë llapanta ruraq nunaqa karqan Jesucristum.

2. ¿Imataq nerqan apóstol Juan Jesuspita y yachatsikonqampita?

² Jesus yachatsikonqampitam Juan qellqarqan y tsë qellqanqanta ushëkarnam kënö nerqan: “Cay gellgangäcunapita mascunatam Jesus rurargan. Llapam rurangancunata gellgarga manam imaypis ushämantsu cargan” (Juan 21:25, MTCS). Awmi, Juanqa alleqmi musyarqan Jesus kë patsachö kima wata pullanyaq këkarnin, llapan ruranqanta qellqarnenqa mana ushananta. Tsënö karpis qellqanqan librochö Jesuspaq qellqanqanqa alläpa valoryoqmi.

3. ¿Imataq yanapamäshun Diosnintsikpa munëninta Jesus ruranqampita más tanteanapaq?

³ Manam Mateo, Marcos, Lucas y Juan evangeliokunallachötsu Jesuspaq parlaqta tarintsik, Bibliapa huk libronkunachöpis tarintsikllam y tsëchö parlanqanqa alläpam yanapamäshun Jehoväta sirvenqantsikchö más sinchi kanapaq. Maslla tantearkunapaq, Jesus manaraq shamuptin Diospa sirveqninkuna imanöpis kayanqanta yachakonqantsikmi, yanapamantsik Diosnintsik llapan ruramunampaq kaqchö Jesus cumplenqanta alleq musyanapaq. Wakinllatapis rikärishun.

Unë tiempochö fiel nunakunam Jesus imanöpis kananta rikätsikuyarqan

4, 5. ¿Pikunataq Jesus imanö kanqantapis rikätsikuyarqan y imanö?

⁴ Jehová Diospa akrashqan y Rey, Jesus, imatapis rurananta y imanöpis kanantam Moises, David y Salomón rikätsikuyarqan, tsëtam willamantsik chuskun evangeliokuna. ¿Imachötaq Jesusnö kayarqan kë nunakuna? ¿Imanöpis kawayanqanta musyanqantsik imachötaq yanapamäshun?

⁵ Bibliam nimantsik Moisesqa huk profëta, Dioswan amishtatsikoq, y salvakoq kanqanta, y tsënöllam Jesuspis karqan. Y Davidnam karqan huk mitsikoq, y chikeqninkunatapis ushakätseq rey, Jesuspis Teyta Diospa markanta mitseq cuentam täpan, y chikeqninkunatapis venceq reymi (Eze. 37:24, 25). Salomonnam karqan huk yachaq y fiel rey, Diospita manaraq rakikaptenqa Israel marka kushishqam kawakorqan (1 Rey. 4:25, 29). Jesuspis alläpa yachaq reymi, tsëmi Bibliapis “Príncipe de Paz” shutin kanqanta willakun (Isa. 9:6). Rikanqantsiknöpis Jesusqa kë Diospa unë sirveqninkunawan casi llapanchömi igualan, pero Diosnintsikpa voluntadnin cumplikänampaq llapan ruranqanqa masmi. Rikärishun imakunachö Jesus Moiseswan igualanqanta. Tsëpita yachakurninmi Jesus ruranqanta más valoryoqta rikäshun.

 Moisesmi Jesus imata ruranantapis puntata rikätsikorqan

6. Pedru nenqannöpis, ¿imanirtaq alläpa preciso Jesus nenqanta wiyakunantsik?

⁶ Kima chunka kima (33) wata Pentecostés fiesta pasarishqanllachömi Pedruwan Juan templochö këkar yurikïnimpita cojo nunata kachakäratsiyarqan. Tsë cojo nuna purikaqta rikarnam “llapan nunacuna espantashqa” quedariyarqan, y cörrillapam ëwayarqan pëkuna këkäyanqanman imanöpis pasakonqanta musyëta munar. Tsënam Pedruqa willakorqan Jesucristurëkur Jehová Diospa santo espïritunta chaskinqanwan kë milagrota ruranqanta. Tsëpitanam Escrituras Hebreascho Jesuspaq qellqarëkaqpita parlarqan. Kënömi nerqan: “Tsemi Moisespis une castantsiccunata willarnin, Jesuspaq queno nerqan: ‘Teyta Diosmi shamoq castantsiccunapita pepaq juc willacoqta churamonqa noqatano. Y tse profeta llapan yachatsicushqancunata wiyacur, cäsucuyanqui” (Hech. 3:11, 22, 23; lei Deuteronomio 18:15, 18, 19).

7. ¿Imanirtaq Pedru parlëkanqanta wiyarnin nunakuna raslla tanteariyarqan?

⁷ Tsë tiempochö nunakunaqa alleqchi reqiyarqan kë profecïata (Deu. 34:10). Judïokunaqa alläpam respetayaq Moisesta, y shuyaräyaqmi tsë Moises parlanqan profeta chämunanta. Moisesqa karqan mesïasmi Dios akrashqa kaptin, pero kë shamoqpaq kaq profëtaqa, manam Dios akrashqan mesïasllatsu kanan karqan, sinöqa “Dios Acrashqan” y ‘pepita shamushqam’ kanan karqan (Luc. 23:35; Heb. 11:26).

¿Imachötaq Jesuswan Moises igualäyan?

8. ¿Imakunachötaq Moiseswan Jesus igualäyan?

⁸ Jesuspa kawëninqa atskachömi igualan Moisespa kawëninwan. Këman yarpärishun, wambra kayanqan witsanmi mana alli reykuna ishkantapis casi wanutsiyarqan (Éxo. 1:22–2:10; Mat. 2:7-14). Hina ishkantam Egiptopita Jehová Dios qayamorqan, tsëmi Oseas kënö nenqan cumplikan pëkunachö: “Israeltam wambrallaraq kaptin kuyarqä. Y Egiptopitam wambräta qayamorqä” (Ose. 11:1). Profeta Oseasqa parlëkarqan Israel marka, Moises, Jehová Diospa akrashqan, dirigiptin Egiptopita yarqamonqanpaqmi (Éxo. 4:22, 23; 12:29-37). Kë parlanqankunaqa manam tsë tiempollachötsu cumplikänan karqan, sinöqa shamoq tiempochöpis cumplikänanmi karqan. Këqa cumplikarqan Herodes wanuriptin, Josëwan Maria y Jesus, Egiptopita markankunaman kutiyämonqanchomi (Mat. 2:15, 19-23).

9. a) ¿Ima milagrokunatataq rurayarqan Moiseswan Jesus? b) ¿Imakunachötaq más igualäyan? (Rikë página 26, “Moiseswan Jesus maskunachö igualäyanqan” nishqan recuadrota.)

⁹ Moisespis y Jesuspis milagrokunatam rurayarqan, tsëwanmi rikätsikuyarqan Jehová yanapëkanqanta. Moisesmi puntataqa milagrokunata rurar qallarqan, tsëtam willamantsik Biblia (Éxo. 4:1-9). Y atska milagronkunam yakuwan karqan. Yarpärinapaq, Diospa poderninwanmi Nilo yakuta y Egipto kitakunachö yakutapis yawarman tikraratserqan, y mar Rojo nishqan lamartapis ishkëman rakikäratserqan, hina tsutsin hirkachöpis qaqapitam yakuta horqaramorqan (Éxo. 7:19-21; 14:21; 17:5-7). Hina Jesuspis tsënöllam yakuwan milagrokunata rurarqan. Punta kaq milagronchömi casakï fiestachö yakuta vïnoman tikraratserqan (Juan 2:1-11). Tsëpitanam lamar yaku lanchatapis pasëpa laqcheqsar unditsita munaptin yakuta päraratserqan, y huk kutichönam yaku hanampa purir ëwarqan (Mat. 8:23-27; 14:23-25).  Página 26 recuadrochömi masta tarintsik Moiseswan Jesus igualayanqanta.

Jesuspis profëtam karqan

10. a) ¿Imatataq profëtakuna rurayarqan? b) ¿Imanirtaq Moisesqa huk profëtam karqan nintsik?

¹⁰ Casi llapan nunam, profëtakunaqa shamoq tiempochö pasakunampaq kaqta willakurlla kayanqanta pensayan, pero pëkunaqa manam tsëllatatsu rurayaq. Kë profëtakunaqa Jehová Dios nenqantam nunakunata willayaq, y “Diospa espantepaq” rurëninkunatapis willakuyaqmi (Hech. 2:11, 16, 17). Profëtakunaqa shamoq tiempochö pasakunampaq kaqtan willakuyaq, Diosnintsik llapan ruramunampaq kaqkunata, y ushakëta apamunampaq kaqtapis willakuyaqmi. Tsënö kaq profëtan karqan Moisesqa. Tsëmi tsë chunka castigokuna Egiptochö kanantapis willakorqan. Moisesmi willakorqan, Jehová Dios markanwan Sinaí hirkachö huk conträtota ruranqanta y leyninkunata, y yachatserqanmi Diosnintsikpa munënin imakuna kanqantapis.  Tsënö kaptimpis pëpita más alli kaq profëtam yurimunan karqan.

11. ¿Imanirtaq Jesuspaq Moisespitapis más alli kaq profëtam karqan nintsik?

¹¹ Jesucristu manaraq yuriptinmi, Juan Bautistapa teytan Zacarías, profëtanö parlarqan wambram imatapis ruranampaq Diosnintsik listotana katsenqanta (Luc. 1:76). Juan Bautistanam willakorqan, Moises parlanqan alläpa nunakuna shuyaräyanqan profeta, Jesucristu, chämunanta (Juan 1:23-36). Y Jesuspis profëtam karqan, imëkakuna pasakunantam atskata parlarqan. Maslla tantearkunapaq, parlarqanmi imanö wanunampaq kaqta, mëchö y pikuna wanutsiyänampaq kaqtapis (Mat. 20:17-19). Y llapan nunakuna musyanampaqmi, Jesucristuqa parlarqan Jerusalen marka y templon ushakänampaq (Mar. 13:1, 2). Y wakin parlanqankunaqa tiempontsikchömi cumplikëkan (Mat. 24:3-41).

12. a) ¿Imanötaq Jesusqa kë alli willakïta qallamorqan llapan Patsaman chänampaq? b) ¿Imatataq noqantsikqa rurëkantsik Jesus ruranqanta qatinapaq?

¹² Hinamampis Jesusqa manam profëtallatsu karqan, sinöqa Diosnintsikpita willakoq y alli yachatsikoqmi karqan. Alli willakïkunatam willakorqan y Diosnintsikpa Gobiernompitam mana mantsakushpa shonqumpita patsë willakorqan (Luc. 4:16-21, 43). Hina alli yachatsikoqmi karqan y manam pënöqa pipis karqantsu, tsëmi nunakunapis kënö niyarqan: “¡Manam pipis tse nuna parlanqannoqa parlantsu!” (Juan 7:46). Y kushishqam yachatsikoqpis Diosnintsikpa alli willakïninta,  y tsënö yachatsikoq kënintam qateqninkunapis qatiyarqan. Tsënömi kë preciso willakïta qallamorqan, y hinantin Patsapanam chashqa, y kananyaqpis seguikanllam (Mat. 28:18-20; Hech. 5:42). Qanyan watam qanchis millonnö cristiänokuna 1.500.000.000 hörakuna willakuyarqan y yachatsikuyarqan Bibliapita llapan nunakunata. ¿Y qamqa shonqupita patsëku kë willakïta purikätsinki?

13. ¿Imaraq yanapamäshun imëpis mäkoq mäkoqlla këkänapaq?

¹³ Awmi, alleq clärom këkan Moisesnö huk profeta shamunampaq änikonqantaqa Jehová cumplenqanta. Pero qamqa ¿imataq ninki tsëpita? ¿Manaku Diosnintsik llapan ruramunampaq kaqman markäkunëkipaq o yärakunëkipaq yanapashunki? ¡Awmi yanapashunkim! Kë Moisespa Mayornin kaq profeta ruranqanman alleq yarpakacharqa, imatapis mäkoq mäkoqllam këkäshun, alli juiciowanmi kawëkäshun, y Diosnintsik llapan ruramunampaq kaqtapis alcäbollam shuyarëkäshun (1 Tes. 5:2, 6).

Cristom Diosnintsikwan amishtatsikoq

14. ¿Imanötaq Jehová israelïtakunawan amishtanampaq conträtota ruraptin Moisesqa yanaparqan?

¹⁴ Moisespis y Jesuspis Diosnintsikwan amishtatsikoqmi kayarqan. Israelïtakunawan Jehová conträtota rurar Leyninta qoptinmi Moises yanaparqan. Y israelïtakuna Jehoväpa Leyninkunata cumpliyaptenqa Diosnintsikqa akrashqa markantanömi rikänan karqan (Éxo. 19:3-8). Tsë contratoqa qallarqan 1513 watachömi, y tsarakorqan punta cristianokunapa tiemponyaqmi.

15. ¿Imanirtaq contrato rurëchö Jesus más alli kaq yanapakoq karqan Moisespita?

¹⁵ Kima chunka kima (33) watachömi Jehová rurarqan huk conträtota “rasonpa israel” nunakunawan, tsë nunakunam huk mushoq marka ciëlopa ëwaqpaq kaq tikrayarqan (Gál. 6:16). Punta kaq contrato Moises yanapakonqan kaqchöqa Jehová qorqan leyninkunata palta rumikunacho qellqashqatam. Pero Jesus yanapakonqan kaq mushoq contratoqa más alli kaqmi, ¿imanir? Leyninkunata shonqunkunaman Diosnintsik churashqa kaptin (lei 1 Timoteu 2:5 y Hebreus 8:10). Awmi, tsë Ley churashqanta casokuyanqanrëkurmi ‘rasonpa israelqa’ Diospa akrashqa markan tikrashqa (Mat. 21:43). Kë mushoq contratoqa rurakarqan ciëlota ewaqpaq cristianokunawanmi, pero manam pëkunallatsu bendicionkunata chaskiyan, sinöqa kë patsachö kawaqpaq kaq mëtsika nunakuna y hasta wanushqakunapis tsë contratorëkurqa bendicionkunata chaskiyanqam.

Jesusmi libramaqnintsik

16. a) ¿Ima peligrokunapitataq Jehová salvarqan markanta Moiseswan? b) Éxodo 14:13 nenqannö, ¿pillataq salvamënintsikta puëden?

¹⁶ Egipto markapita israelïtakuna yarqayämunan paqasmi, huk ángel ordenta chaskerqan Egiptochö llapan mayor wambrankunata wanutsinampaq, tsëmi israelïtakunapa mayor wambrankunapis peligrochö kayarqan. Y Moisestawanmi Jehová willatserqan llapan israelïtakunata, tsë peligropita wambrankunata salvayänampaq, huk achkasta wanïkatsirnin yawarninwan punkunkunapa kuchunta hiruroq pasatsiyänampaq (Éxo. 12:1-13, 21-23). Tsëpita Israel marka Egiptopita yarqurirnam yapë huk peligrochö kariyarqan, qepankunapam egipcio soldädokuna wanutsiyänampaq qatiyarqan y puntankunapanam mar Rojo nishqan lamar karqan y manam mëpapis qeshpita puëdeyarqantsu. Tsëchöpis yapëmi Jehová salvarqan markanta Moiseswan, pëmi milagrosamente lamarta ishkëman rakikäratserqan tsëpa israelïtakuna pasayänampaq (Éxo. 14:13, 21).

17, 18. ¿Imanirtaq Jesusqa Moisespitapis más alli kaq salvakoq?

¹⁷ Markanta kënö salvanqan espantakïpaq kaptimpis, manam tsurimpa wanïninwan llapantsikta salvamanqantsikwanqa igualantsu. Jesuswanmi Diosnintsik llapan wiyakoq kaq nunakunata  salvashqa hutsapa esclavon këpita (Rom. 5:12, 18). Y tsë salvacionqa huk kutillam kashqa y imëyaqpis tsarakonqam (Heb. 9:11, 12). Hinamampis Jesuspa shutinqa “Jehovämi salvakoq” ninanmi. Pëqa manam punta hutsantsikllapitatsu libramarqontsik, sinöqa shamoq tiempochö shumaq kawakunapaqpis yanapamarqontsikmi. Hutsapa esclavon kanqantsikpita Jesus libramarnintsikqa, Jehoväpa piñakïnin hunaqpitapis libramarqontsikmi y Diosnintsikwan alli këta tarinapaqpis yanapamantsikmi (Mat. 1:21).

¹⁸ Y ichik tiempollatanam kënö hutsapita libramanqantsikrëkur qeshyapita y wanïpita librashqa tikrarishun. Këta más alleq tanteanëkipaqqa yarpäri, Jairopa chunka ishkë (12) watayoq warmi wambran wanushqa këkaptin Jesus ruranqanta. Jesusmi Jairota kënö nerqan: “Ama mantsaquëtsu. Noqallaman marcäquï; wamrequeqa cachacanqam” (Luc. 8:41, 42, 49, 50). Nenqannöllam wambrataqa kawarkatsimorqan. Tantearinkiku ¿imanöraq teytankuna kushikïkuyarqan wambra kawarkuptin? Tsëta tantearqa, Jesuspa vozninta wiyar llapan wanushqakuna kawarimoqta rikar alläpa kushikunëkitapis tantearinkichi (Juan 5:28, 29). Awmi, segurom kantsik, salvamaqnintsik y libramaqnintsikqa Jesus kanqanta (lei Hechos 5:31; Titu 1:4; Apo. 7:10).

19, 20. a) ¿Mayor kaq Moises, Jesus,ruranqanman yarpakachanqantsik imapaqtaq yanapamantsik? b) ¿Qateqnin kaq tëmacho imapitaraq yachakushun?

¹⁹ Noqantsikmi nuna mayintsikta yanapëta puëdentsik pëkunapis Jesus salvakoq kanqampita bendicionkunata chaskiyänampaq. Tsëmi llapantsik yarquntsik Diosnintsikpita willakoq y yachatsikoq (Isa. 61:1-3). Hina noqantsikpis alleqmi yarpakachänantsik kë Mayor kaq Moises, Jesus, llapan ruramonqanman, tsënöpam sinchi këkäshun y alleq markäkushun o yärakushun kë mana alli mundota ushakätsiptin salvamänantsikman (Mat. 25:31-34, 41; Apo. 7:9, 14).

²⁰ Jesus ruranqan milagrokunataqa Moises manam rurëta puëdenmantsu karqan, tsënöpam Jesustaqa Mayor kaq Moises nintsik. Shamoq tiempopaq willakonqankuna y Diosnintsik conträtota nunakunawan ruraptin yanapakonqanqa llapan nunakunapaqmi kashqa y hutsapita libramanqantsikqa manam imëpis ushakanqatsu. Pero kanran hukkunapis unë tiempochö Diosnintsikpa sirveqninkuna Jesuspita yachatsimänapaq. Qateqnin kaq tëmam yachatsimäshun imarëkur Jesusta, Mayor kaq David y Mayor kaq Salomón nishpa qayanqantsikta.

¿Mä willakaramï?

¿Imanirtaq Jesustaqa . . .

• . . . Moisespita más alli kaq profëtan nintsik?

• . . . Moisespita más alli kaq amishtatsikoqmi nintsik?

• . . . Moisespita más alli kaq librakoqmi nintsik?

[Yachakunapaq kaqpa tapukïninkuna]

[26 kaq päginachö dibüju y recuadru]

 Moiseswan Jesus maskunachö igualäyanqan

□ Ishkampis alli reqishqa këninkunatam haqiyarqan Diosta y markanta serviyänampaq (2 Cor. 8:9; Fili. 2:5,7; Heb. 11:24-26)

□ Ishkampis akrashqa o “Cristum” kayarqan (Mar. 14:61, 62; Juan 4:25, 26; Heb. 11:26)

□ Ishkampis Diospa shutintam willakuyarqan (Éxo. 3:13-16; Juan 5:43; 17:4, 6, 26)

□ Ishkampis manshu nunam kayarqan (Núm. 12:3; Mat. 11:28-30)

□ Ishkampis Jehoväpa yanapëninwanmi mallaqashqa nunakunata pachan qarayarqan (Éxo. 16:12; Juan 6:48-51)

□ Ishkampis Jehoväpa leyninkunatam yachatsikuyarqan, y juezmi kayarqan (Éxo. 18:13; Mal. 4:4; Juan 5:22, 23; 15:10)

□ Ishkampis Teyta Diospa wayinchömi, mandakoq y dirigeq kayarqan (Núm. 12:7; Heb. 3:2-6)

□ Ishkampis Jehoväpa testïgonmi kayarqan (Heb. 11:24-29; 12:1; Apo. 1:5)

□ Ishkampa ayantam wanuriyaptin Jehová illakäratserqan (Deu. 34:5, 6; Luc. 24:1-3; Hech. 2:31; 1 Cor. 15:50)