¿Imapaqtaq yapë yurikuyan?

SALVAKUNAPAQQA yapëraqmi yurikunantsik niyanmi wakin nunakunaqa. Pero yarpäri, ¿imanirtaq yapëran yurikuyänëki nerqan Jesus? ‘Pipis yape mana yuricorqa, Diospa mandaquininman mana yëcunan’ kaptinmi (Juan 3:3). Rikanqantsiknöpis, Diospa mandakïninman yëkuyänampaqmi yapë yurikuyänan karqan, manam salvakuyänampaqtsu. Itsa wakinkunaqa tapukuyanman: “¿Salvakïqa manaku Diospa mandakïninman yëkïnölla?” nirnin. Pero manam tsënötsu. Hukläya kanqanta musyanapaqqa, puntata rikärishun ‘Diospa mandaquinin’ ima kanqantapis.

Diospa mandakïnenqa huk gobiernom, tsëmi ‘Diospa mandaquinin’ nerqa, Dios churanqan gobiernopaq parlëkan. Biblia nenqannöpis, Jesucristum ‘Diospita Shamushqa Nunaqa’, pëpa makinchö y yanaqinkunapa makinchömi këkan tsë gobiernoqa (Daniel 7:1, 13, 14; Mateo 26:63, 64). Apóstol Juan visionta rikanqanmi, Cristuwan gobernaqkuna “llapan kastapita i parleypita i pweblupita i nasyonpita” akrashqa kayanqanta musyatsikun, y pëkunaqa ‘reynayanqa patsatam’ (Apocalipsis 5:9, 10; 20:6, QKW). Hina Diospa Palabranqa willakunmi tsë “wallcalla” gobernaqkuna 144.000 kayanqantapis, y pëkunaqa ‘patsapita reskatashqam’ kayan (Lucas 12:32; Apocalipsis 14:1, 3, QKW).

Tsëpenqa, ¿mëpitataq Diospa mandakïnin gobernamäshun? Diospa ‘mandaquininqa’ ‘syeluchow reynum’, tsëmi  musyantsik Jesuswan yanaqinkuna ciëlopita gobernayämunampaq kaqta (Lucas 8:10; Mateo 13:11, QKW). Rikanqantsiknöpis, Diospa Mandakïnenqa ciëlochömi këkan, y gobernaqkunaqa kayan Jesucristu y Patsapita akrashqa nunakunam.

Tsëqa, Diospa Mandakïninman yëkuyänampaq yapëraqmi yuriyänan nerqa, ¿imapaqtaq Jesus parlëkarqan? Ciëlochö Jesuswan mandakuyänampaq yapëraq yurikuyänampaq kaqtam parlëkarqan. Rikärenqantsiknöpis, wallkaqlla nunakunaqa yapë yurikuyan ciëlochö gobernayänampaqmi.

Këyaqqa rikärerqontsik: yapë yurikuyänan alläpa precisanqanta, kikin Dios tsëpaq akranqanta, y ciëlochö gobernayänampaq yapë yurikuyanqantam. Rikärishun imanö yapë yurikuyanqantapis.

[7 kaq päginachö ninqan]

Wallkaq nunakuna yapë yurikuyan ciëlochö gobernayänampaqmi

[7 kaq päginachö dibüju]

Diospa Gobiernonchö mandakoqkunaqa kayan Jesucristuwan Patsapita akrashqa nunakunam