Teytannaqkunapa teytan
Diosman witi
Teytannaqkunapa teytan
“TEYTANNAQKUNAPA teytan[mi] santo wayinchö yachaq Diosqa.” (Salmo 68:5.) ¡Jehová imanö kanqantapis kë texto nimanqantsikqa, imanömi shonquntsikta kushiratsin! Pëqa, manam qonqantsu teytanta o mamanta oqrashqakunata, antis yanapanmi. Israelïtakunata Jehová Leynin qonqampis, pëkunata alläpa kuyanqantam rikätsikun. Tsëta rikärishun Éxodo 22:22-24 textochö, tsëchömi ‘teytannaq’ neq palabra yurir qallan. *
Diospa Leyninchöqa, kënömi neq: “Teytannaqta manam hipatsinëkitsu [ñakatsinëkitsu]” (versículo 22). Këchöqa, ankupäkoq o llakipäkoq kayänampaqtsu manam israelïtakunata Dios roguëkarqan, antis mandëkarqanmi. Wambrakunapa teytan wanukïkuptenqa, manam ni pïnin kaqnatsu rikänampaq ni yanapanampaqpis. Tsëmi Diosqa teytannaqkunata manam “hipatsinëkitsu” nerqan, o wakin traduciyanqan Bibliakunachönam manam “ñakatsinëkitsu”, “allqutsanëkitsu” o “ashnutanö ruratsinëkitsu” nin. Jehoväpaqqa manam ichikllapaqtsu karqan tsënö rurayanqanqa, tsëta rikärishun.
Kënömi nerqan Jehoväpa Leynin: “Imanöpapis hipatsiptiki [ñakatsiptiki] noqaman mañakamuptenqa, hinan höram mañakamunqanta wiyarishaq” (versículo 23). Kë textochöqa, manam qamkuna neqnötsu Dios parlëkan, antis hukllëllata parlapaqnömi parlëkan. Tsënö nirmi, cada nuna y llapan nacionpis tsë nenqanta wiyakuyänampaq mandakïkarqan. Hinamampis, teytannaqkuna mañakuyanqanta wiyanampaq y yanapanampaqmi Jehoväqa imëpis listo këkaq (Salmo 10:14; Proverbios 23:10, 11).
¿Imataraq Jehová ruraq teytannaqkunata allqutsayaptin pëman mañakuyaptin? “Paqwëmi piñakurkushaq, y espädawanmi qamkunata ushakäratsiyashqëki” nerqanmi Jehoväqa (versículo 24). “Paqwëmi piñakurkushaq” nenqampaqmi huk libro kënö nin: “Tsënö nenqanqa alläpa piñakunampaq kaqtam rikätsikun”, y kanqantanölla traducishqaqa “senqämi achachakurkonqa” ninanmi. Hinamampis, teytannaqkunata imatapis rurayaptenqa, kikin Diosmi castigaq, manam Israelchö juezkunatsu (Deuteronomio 10:17, 18).
Jehoväqa kanampis unënöllam (Malaquías 3:6). Kanan witsampis tsënöllam teytannaqkunata llakipan o ankupan (Santiagu 1:27). Ama qonqashuntsu: teytannaq wambrata ñakatsishqaqa, teytannaqkunapa Teytan Jehovätam paqwë piñatsishun. Mana pïnimpis kaq wambrakunata allqutsaqkunaqa, manam qeshpiyanqatsu “Jehoväpa piñakïnin” hunaqpita (Sofonías 2:2). Kikinkunam musyariyanqa ‘¡alläpa mantsakeypaq kawaq Dyospa makinman ishki!’ kanqanta (Hebreus 10:31, QKW).
[Päginapa ura kuchunchö willakï]
^ par. 4 ‘Teytannaq’ neq palabraqa, chusku chunka (40) kutinömi Bibliachö yurin. Hebreu nishqan idiömachö ollqullapaqnö parlaptimpis, Dios israelïtakunata Leynin qonqanqa, hina teytannaq warmi wambrakunapaqwanmi karqan (Números 27:1-8).