2 Diosta alli reqi

“Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa.” (Juan 17:3)

¿IMANIRTAQ ALLÄPA SASA KANMAN? Kanan religionkunaqa Diospaq tukïta nirmi pantatsikuyan. Wakinqa Dios manam kantsu niyanmi. Wakinnam, mana käyipaq o mana mäkuypä kallpallam niyan. Wakinkunanam alläpa yachaqmi niyan, tsëpis manam musyayantsu pï kanqanta ni imanö kanqantapis.

¿DIOSTA IMANÖTAQ ALLI REQISHWAN? Apóstol Pablum kënö nerqan: “Diosta mana ricashqapis, que munducho llapan rurashqancunam musyatsimantsic Dios camashqanta. Tsemi jina musyarintsic Diosnintsic rasonpa Dios cashqanta y puedeq quenenqa mana imepis ushacashqanta” (Romanos 1:20). Diostaqa alli reqintsik kamashqankunata rikarmi. Hinamampis, Kamamaqnintsik alläpa yachaq y puëdeq kanqantam musyarintsik (Salmo 104:24; Isaías 40:26).

Diosta alli reqita munarqa, Bibliata kicharirmi kikiki leinëki. Waknömi kënömi nirnin wakinkuna creitsimänantsikllata manam haqinantsiktsu. Kikintsikmi rasumpa o mana rasumpa kanqantapis musyanantsik. Diospa Palabranqa kënö nirmi yachatsikun: “Amana que tiempu mana alli ruraq nunacunanoqa qamcunaqa llutanta rurar cacuyëtsu; antis jucnopa yarpacachëta yachacuyë. Tsenopam llapancho Dios munashqanno cushiquipaq alli cawaquita musyariyanqui”  (Romanos 12:2). Tsëmi alläpa precisan Diospita Biblia nenqanta yachakunantsik. Y tsëkunata rikärishun.

Diospa shutin kanmi. Diospa shutinqa atska waranqa kutim unë qellqayanqan Bibliakunachö yureq, y kanan witsampis wakin kaq Bibliachöqa Reina-Valera Bibliachönöpis, atska kutim Diospa shutin yurin. Torres Amat Bibliapis, atska textochömi Diospa shutinta churan, hukmi Salmo 82:19 (Salmo 83:18 wakin Bibliachö) texto, tsëchömi kënö nin: “Llapan nunakuna musyayätsun qampa shutiki Señor o Jehová kanqanta, qamllam hinantin patsapa Altísimo kanki”.

Ruranqantsikkunawanqa Jehoväta bienmi llakitsishwan o kushitsishwampis. Tsëtam israelïtakuna rurayarqan, Jehová Egiptopita horqashqa këkaptimpis pëkunaqa atska kutim wiyakuyarqantsu. ¿Tsënö kayanqan Diosta llakitserqantsuraq? Awmi, “alläpam shonqunta nanatsiyarqan” y “llakitsiyarqanmi Israelpa Santo Diosninta” ninmi Biblia (Salmo 78:40, 41).

Jehoväqa llapantsikpaqmi yarparan. Tsëtam Jesus musyatsikorqan qateqninkunata keno nir: “Pishqoqa ishqueran juc sentabupis cuestan. Tseno baratulla quecaptinpis, Dios Yaya mana permitiptenqa manam jucllellapis wanuyanqatsu. Y qamcunapatanäqa llapan aqtsequicunatapis jucllellapayan yupashqam quecatsin. Tseno quecaptenqa, ama imatapis mantsacuyëtsu. Porqui atsca pishqocunapitapis qamcunaqa masmi baliyanqui” (Mateo 10:29-31).

Diosqa kuyanmi tukï color o më tsë markapita nunakunatapis. Pëpaqqa llapantsikpis igual-llam kantsik, Atënaschö täraq nunakunata Pablu nenqannöpis: “Diosmi juc nuna camanqanllapita miratserqan jinantin munducho tuquilaya nunacuna cawayänanpaq”. Hinamampis, “Diosta reqinantsicpaqqa manam allapa sasatsu”, tsëmi llapantsikpis pëman witishwan (Hechos 17:26, 27). Apóstol Pedrum kënö nerqan: “Cananqa allim noqa cäyicurerqö llapan nunatapis Dios iwallla ricamanqantsicta. Porqui jinantin marcacho pipis allicunata rurar y Diosta respetar cacuyaptenqa, pëqa chasquinmi” (Hechos 10:34, 35).

¿IMAKUNACHÖTAQ YANAPAMANTSIK? Wakinkunaqa “tïrecuyan Diosta cäsuquita[m]; peru manam rasonpa caqtaqa” musyayantsu, noqantsikqa manam tsënö kanantsiktsu (Romanos 10:2). Bibliata leirnin Jehová pï kanqantapis musyashqaqa, manam ni pï waknömi kënömi nirnin creitsimäshuntsu. Tsëta rurarqa Dios ‘Yayata masmi cuyashun’ (Santiagu 4:8).

Más yachakïta munarqa, Rasumpëpaqa, ¿imatataq Biblia yachatsikun? * libropa 1 kaq capïtulonchö këkaq, “¿Imataq Diospita rasumpëpa yachatsikïqa?” neq tïtulota ashiri.

[Päginapa ura kuchunchö willakï]

[6 kaq päginachö dibüju]

Llapan kamanqanchömi Diosta más reqintsik