Cristiano familiakunaqa Jesus ruranqantam qatiyan

“Keypaqmi qayashqa kayarqonki; Kristupis jiparqan noqantsikkunapaqmi, yachatsimarnintsik; yupinkunata qatiyaneykipaq.” (1 PED. 2:21, QKW.)

1. a) Diosnintsik imëkata kamar qallaptin, ¿imatataq rurarqan mayor Tsurin? b) ¿Imanötaq Jesus sientekun nunakunata rikar?

DIOSNINTSIK ciëlokunata y Patsata kamaptinmi mayor Tsurin “huk maestrono lädonchö” trabajarqan. Tsë wambranmi yanaparqan imanö kë Patsa kanampaqpis Diosnintsik patsätsiptin, y tukïläya animalkunata, plantakunata y nunakuna täränampaq shumaq paraïsota Jehová alistaptimpis. Tsëpitanam Diospa mayor Tsurintaqa reqirqontsik Jesus nishpa, pëmi pasëpa nunakunata ‘kuyëkorqan y pëkunarëkurmi kushishqa karqan’ (Pro. 8:27-31; Gén. 1:26, 27).

2. a) ¿Imatataq qoshqa Jehová hutsasapa nunakunata yanapanampaq? b) Willakarami hukllëllata, ¿imachötaq Bibliapa consëjon yanapamantsik?

² Adanwan Eva hutsaman ishkiriyaptenqa alläpa precïsom tikrarerqan Diosnintsik nunakunata rescatanan, tsënöpa llapan munanqan cumplikänampaq. Tsëmi Teyta Dios kachamorqan Tsurin Jesusta, wanïninwan hutsapita salvamänantsikpaq (Rom. 5:8). Tsëpitapis hina Jehoväqa Palabran Bibliatam qomarqontsik hutsasapa këkarpis kushishqa kawakunapaq (Sal. 119:105). Këman yarpärishun, Bibliapa shumaq consëjonkunaqa yanapamantsikmi familiantsikwan kushishqa y unido kawakunapaq. Tsënömi, Génesis libro rikätsimantsik “ollquqa haqirenqa mamanta yayantam warminwan juntakänampaq. Y ishkankunapis huknöllanam kayanqa” nishpa (Gén. 2:24).

3. a) ¿Imatataq Jesus yachatsikorqan casado kawakïpaq? b) ¿Imapitataq kë tëmacho yachakushun?

³ Kë Patsachö Jesus yachatsikïkarmi claro willakorqan  casado kawakïqa imëyaqpis kanampaq. Hina yachatsikorqanmi atska consëjokunata casado kawakïcho shumaq portakuyänampaq, tsënöpa casado kawakïninkunata ni familiankunata peligroman mana churayänampaq (Mat. 5:27-37; 7:12). Kë tëmachoqa rikäshun familiachö kushishqa kawakunapaq Jesus yachatsikonqantam, hina rikäshunmi Jesus ruranqan imanö yanapanqanta, ollqukunata, warmikunata, teytakunata, mamakunata y wambrakunatapis kushishqa kawakuyänampaq.

Huk cristiänoqa warminta shumaqmi tratan y respetan

4. ¿Imachötaq igual kayan Jesuswan, casado ollqukuna?

⁴ Diosnintsik imanöllam Jesusta churashqa congregacionta Diriginampaq, tsënöllam casado ollquta churashqa familianta diriginampaq. Apóstol Pablum kënö nerqan: “Warmeqa qowanpa mandadunchomi canan, imeca creyicoqcuna Jesucristupa mandaduncho cayanqanno. Porqui peman creyicoqcunapaqqa Jesucristullam Salbadornincuna. Warmiyoq ollqucuna, imanomi Teytantsic Jesucristupis Peman creyicoqcunata cuyarnin pecunarecur wanorqan; tsenolla qamcunapis warmiquicunata shumaq cuyayë” (Efe. 5:23, 25). Qateqninkunata imanöpis tratanqanwanmi Jesusqa yachatsikorqan cristiänokuna tsënölla warminkunata tratayänampaq. Rikärishun Teytan autoridadnin qonqanwan Jesus imanöpis wakinkunata tratanqanta.

5. ¿Imanötaq Jesus autoridad këninwan wakinkunata tratarqan?

⁵ Jesusqa karqan qollmi shonqu y humildem (Mat. 11:29). Imatapis pasëpa kushishqam ruraq, y ruranampaq kaqtaqa ruraqmi, manam haqireqtsu (Mar. 6:34; Juan 2:14-17). Discïpulonkuna consëjota wanayaptenqa o ministiyaptenqa, manam haqireqtsu sinöqa consejaqmi, pero kuyëpam ruraq (Mat. 20:21-28; Mar. 9:33-37; Luc. 22:24-27). Tsënö karpis manam ni imëpis qayaparqantsu ni penqakatserqantsu. Manam ni imëpis rikätserqantsu mana kuyanqantanöqa o nenqankunata mana cumpleqpaqtanöqa. Tsëpa rantenqa alli kayanqampita y alli rurëninkunapitam kushishqa parlapaq y tsënölla seguiyänampaqmi animaq (Luc. 10:17-21). Tsënö kuyakoq y yachanëpaq kaptinchi qateqninkunaqa pasëpa kuyayaq y respetayaq.

6. a) ¿Imatataq yachakuyanman casado ollqukuna Jesus discïpulonkunata shumaq tratanqampita? b) ¿Ima nishpataq Pedru consejan casado ollqukunata?

⁶ Jesus qateqninkunata shumaq tratanqanmi, rikätsimantsik casado ollqukuna warminta lluta sinchipa o esclävantanö mana tratayänampaq. Tsëpa rantenqa shumaqmi respetanan, kuyanan y warminrëkur imëkatapis ruranan. Apóstol Pëdrum consejarqan casado ollqukunata, Jesus ruranqanta qatiyänampaq y warminkunata shumaq tratayänampaq y respetayänanpaq (lei 1 Pedru 3:7). Pero ¿imanötaq huk casado ollqu rikätsinman pë mandakoq kanqanta warminta respetashllapa?

7. ¿Imanötaq huk cristiano shumaq tratanman y respetanman warminta?

⁷ Ollquqa warminta shumaq tratanqanta rikätsinman parlanqankunata respetarnin, y imatapis manaraq rurar warminta willarnin,  tsënöpa llapan familianta mana llakitsinampaq. Këman yarpärishun, itsa ollquqa munanman huk trabäjotana ashita o huk wayimanna taräyänampaq ëwakïta. O mëtapis vacacionwan ëwëta o wayichö mënosta gastayänanta. Këkuna decidenqanqa llapan familiapaqmi kanqa, tsëmi alläpa preciso warminta tapunan. Kë ruranqanqa alläpa allim, tsënöpam decidenqanqa, llapan familian kushikunampaqqa alläpa alli kanqa, y warminqa kushishqam yanapanqa llapan decidenqanchö (Pro. 15:22). Tsëmi warminta shumaq trataq y respetaq ollqutaqa warmin shumaq respetanqa y kuyanqa, pero tsëpitapis masqa Jehoväpa yanapakïnintam chaskinqa (Efe. 5:28, 29).

Jehoväta sirveq warmiqa alleqmi respetan qowanta

8. ¿Imanirtaq Ëvaqa mana alli ejemplo warmikunapaq?

⁸ Jesusqa shonqupita patsëmi respetarqan Teytampa autoridadninta, Tsë ruranqanwanmi rikätsikorqan warmikunapis qowankunata respetayänampaq kaqta. ¡Imëka hukläyam Jesus ruranqanwan Eva ruranqanqa! Punta warmi Ëvaqa haqishqa huk mana alli ejemplotam llapan warmikunapaq. Jehoväqa churashqa karqan Adantam familianta diriginampaq y pëwanmi imata rurayänampaqpis willatsinman karqan llapan familianta. Tsënö kaptimpis Ëvaqa manam wiyakorqantsu qowan Adantawan Jehová nenqanta (Gén. 2:16, 17; 3:3; 1 Cor. 11:3). Awmi, huk culebram Ëvataqa uliparqan o llullaparqan, pero tsë culebra Dios nenqanta musyämi niptimpis Ëvaqa qowantaran tapunan karqan ruranampaq o mana ruranampaqpis. Tapukunampa rantinmi, kikin munanqannö rurarerqan (Gén. 3:5, 6; 1 Tim. 2:14).

9. ¿Imachötaq Jesusqa huk alli ejemplo?

⁹ Pero Jesusqa huk alli ejemplotam haqerqan, pëqa imëpis dirigeqnintam käsukorqan. Ruranqan y portakïninmi rikätsikorqan Diosnö këta mana niranqanta, ni Diosnö kashaq mana nerqanta. Tsëmi Bibliapis pëpaq kënö nin: “Kikin kashqantam haqerqan y servikoq nunanömi tikrarqan”. Kanan Rey këkarpis Teytan Jehovätaqa respetëkanllam (Fili. 2:5-7). Teytan nenqanllatam humildadwan ruran y autoridadnintam alläpa respetan (Mat. 20:23; Juan 5:30; 1 Cor. 15:28).

10. ¿Imanötaq huk cristianaqa qowanta respetanqanta rikätsikunman?

¹⁰ Huk cristianaqa allim Jesus ruranqanta qatinman y qowan nenqanta respetarmi ruranman (lei 1 Pedru 2:21; 3:1, 2). Këman yarpärishun, huk joven mamanta permisota mañakun huk rurëta ruranampaq, pero tsë ruranampaq kaqtaqa ishkan teytankunaraq decidiyänanta musyanmi. Y warmiqa wambran rurëta munanqampaq qowanwan manaran parlashqa karnenqa, wambrantam tapunman, teytanwan parlanqantana o mana parlanqantapis. Wambra teytanwan manaraq parlashqa kaptenqa, warmiqa qowantaran tapunan manaraq permisota qornin. Y qowan nenqanwan mana acuerdo karnenqa respëtowanmi ishkankuna parlayänan y manam wambra hananchö pleitoyanmantsu (Efe. 6:4).

 Jesusqa huk alli ejemplom teytakunapaq

11. ¿Imanirtaq Jesusqa huk alli ejemplo teytakunapaqpis?

¹¹ Jesus mana casakushqa karpis y wambran mana kashqa kaptimpis huk alli ejemplom teytakunapaq. ¿Imanir? Kuyakïwan y alläpa pacienciawanmi yachatserqan qateqninkunata y tsëtaqa rikätsikorqan rurëninchö y parlakininchömi. Yachatsërqanmi mandanqankunata imanö rurayänampaqpis (Luc. 8:1). Jesus pëkunata tratanqanmi rikätserqan, kikinkunapura imanöpis tratanakuyänampaq (lei Juan 13:14-17).

12, 13. ¿Imatataq rurayanman cristiano teytakuna wambrankunata Diospa leyninkunata yachatsiyänampaq?

¹² Wambrakunaqa teytankuna rurayanqantam allita mana allitapis yachakuyan. Tsëmi teytakuna kënö tapukuyanman: “¿Rurënintsikkunawan allitaku yachëkatsintsik wambrantsikkunata? ¿Ëka tiempotaq televisionta rikaräkuntsik y kushikunapaq rurëllacho kakuntsik? ¿Ëka tiempotaq Bibliata estudiantsik y yachatsikoq yarquntsik? ¿Familiantsikchö imatataq puntaman churantsik? ¿Diosnintsikta adoranqantsikta pasëpaku kuyantsik? ¿Imata akranqantsikchö y ruranqantsikchöpis Diosta kuyanqantsiktaku rikätsikuntsik?”. Diospa leyninkunata teytakuna wambrankunata yachatsiyänampaqqa puntata kikinkunapa shonqunkunachömi Diospa leyninkunata katsiyänan (Deu. 6:6).

¹³ Teytakuna cada hunaq rurëninkunachö Diospa leyninkunata wiyakurnin rurayaptenqa, wambrakunapis más wiyakoqmi kayanqan y pëkunapis sinchikuyanqam teytankuna rurayanqanta qatirnin. Pero teytakuna Jehová nenqanta mana wiyakuyaptenqa, wambrankunaqa cuentata qokuriyanqam y yachatsiyanqantapis mana presisaqtanömi rikäyanqa. Y tsëqa wambrakuna mana alli rurëpita manam tsarakuyanqatsu y facil-llam ishkiriyanqa hutsa rurëman.

14, 15. ¿Imakunata rurayänampaqtaq teytakuna wambrankunata animayanman y imanötaq rurayanman?

¹⁴ Cristiano teytakunaqa musyayanmi wambrakuna watëqa, llapan wanayanqan cösaskunata qoyänanlla mana kanqanta. Tsëmi, wambrankuna atska kapoqyoq kayänanllapaq imë hörapis animayanqanqa allitsu, tsëqa juicionnaq këmi (Ecl. 7:12). Jesusqa qateqninkunata yachatserqan kawëninkunachö Jehoväpa kaqta más precisaqta churayänampaqmi (Mat. 6:33). Tsënömi, teytakuna Jesus ruranqanta qatiyanman y sinchikuyanman wambrankunata animëta Diosnintsikpa kaqta más puntata ashiyänampaq.

¹⁵ Teytakunaqa wambrankunata animayanman llapan tiemponkunawan Jehoväta sirveq cristiänokunata reqiyänampaqmi. Huk jövenpaqqa alläpa kushikïpaqmi kanman precursorkunawan, o Congregacionta watukaq wawqiwan y warminwan reqinakïqa. Misionërokuna, betelïtakuna y huk nacionpita Diospa wayinta ruraq shamushqa wawqikunaqa willayanqam  tsënö Jehoväta serviqa alläpa kushikïpaq kanqanta. Atskachi këkun imëkatapis cuentakuyänampaq. Imëkankunatapis haqirïkurnin Jehoväta sirveqkunata rikäyanqanmi yanapanqa jövenkunata, pëkunapis Jehoväta tukïnöpa más serviyänampaq y tsë serviyanqanchö yanapanampaq ima estudiotapis akrayänampaq.

¿Imataq yanapanman Jesus ruranqanta wambrakuna qatiyänampaq?

16. ¿Imanötaq Jesus rikätsikorqa teytan Josëta, Marïata y ciëlochö Teytanta honranqanta?

¹⁶ Joven, Jesusqa qampaqpis huk alli ejemplom. Pëqa imëpis teytankuna Josëtawan Marïatam wiyakoq (lei Lucas 2:51). Hutsasapa kayaptimpis, Josëtawan Marïata Pëta cuidanampaq Dios churashqantam musyarqan (Deu. 5:16; Mat. 15:4). Yashqayärirnam Teytan Jehoväta imëpis käsukorqan y manam imëpis mana allikunamanqa ishkirqantsu (Mat. 4:1-10). Y qamqa ¿imataraq rurankiman teytëkikunata mana wiyakunëkipaq tentación shamuptin? ¿Imanötaq Jesus ruranqanta qatinkiman?

17, 18. a) ¿Ima pruëbakunapataq pasayan jövenkuna? b) ¿Imaraq jövenkunata yanapanqa pruëbakunapa pasarnin mana ishkiyänampaq?

¹⁷ Itsa estudiaq mayikikunaqa Diospa Palabran Bibliapita wiyakïta munayanqatsu. Y mana allikunata ruranëkipaq niyäshunki, y manam niptikeqa itsa asikuyanman qampita burlakurnin. ¿Imataraq rurankiman niyäshonqëkita mana ruranqëkirëkur burlakuyaptin? Yarpë, mantsakurnin ruraptikeqa teytëkikunata y Jehová Diostapis llakiratsinkimanmi. Hinamampis, ¿estudiaq mayikikunapa rurëninllata qatirnenqa, mëmanraq chanki? Itsa munanki precursor këta, betelita këta, siervo ministerial këta, o itsa munëkanki Diosnintsikpita yachatsikoqkunata más wanayanqan o ministiyanqan markakunachö yanapakïta. Yarpë, ¿tsënö yanasakunaqa yanapashunkitsuraq Jehoväta más servinëkipaq?

¹⁸ Joven, Jehoväman markäkïniki pruëbaman churakaptenqa, yarpë Jesus ruranqankunaman, tsëmi yanapashunki. Pëqa manam tentacionkunaman ishkerqantsu, sinchim tsarakorqan y yachakurir kawëninchö ruranqankunataqa pasëpam defenderqan. Ruranqankunata yarpëmi yanapashunki estudiaq mayikikuna mana allikunata ruranëkipaq niyäshuptiki “manam munätsu” ninëkipaq. Jesuspanölla yarpëniki katsun, Jehoväta servir y wiyakurnenqa alläpa kushishqam imëyaqpis servinki (Heb. 12:2).

¿Imataq yanapamäshun kastantsikwan kushishqa kawakunapaq?

19. ¿Pï ruranqantataq qatinantsik rasumpëpa kushishqa kawakunapaq?

¹⁹ Jehoväwan Jesusqa llapan nunakuna kushishqa kawakuyänantam munan. Hutsasapa këkarnimpis tsënö kawëtaqa puëdentsikmi (Isa. 48:17, 18; Mat. 5:3). Jesusqa manam qateqninkunata kushishqa kayänampaq yachatsikïkunallatatsu yachatserqan, sinöqa yachatserqanmi imanö rasumpëpa kushishqa kawana kanqantapis. Kawëninwanmi rikätsikorqan rasumpëpa kawëta y imëkatapis alleq tanteëkur rurana kanqanta. Familiachö, teyta, mama o wambra kashqapis llapantsiktam yanapamantsik Jesuspa ejemplon. Tsëmi casado ollqukuna, warmikuna, teytakuna, mamakuna y wambrakuna, ¡Jesus yachatsimanqantsikta qatiyë! Yachatsikonqanta y ruranqanta qaterqa kushishqam kawakushun.

¿Musyankiku respuestanta?

• ¿Imanötaq casado ollqukuna dirigiyanman familiankunata Diosnintsik autoridad qoshqanwan?

• ¿Imanötaq Jesus ruranqanta qatiyanman casada warmikuna?

• ¿Imatataq teytakuna yachakuyanman Jesus qateqninkunata shumaq tratanqampita?

• ¿Imatataq jövenkuna yachakuyanman Jesus ruranqampita?

[Yachakunapaq kaqpa tapukïninkuna]

[20 kaq päginachö dibüju]

¿Imatataq puntata ruranman casado ollqu familiampaq imatapis manaraq decidir?

[21 kaq päginachö dibüju]

¿Imanötaq huk cristianaqa qowanta respetanqanta rikätsinman?

[22 kaq päginachö dibüju]

Wambrakunaqa teytankunapa alli rurëninkunatam qatiyan